2 Corintios 12 - Biblia

Pablo imiäri mbaembae Tumpa uechakaka chupe wae re

¹ Yepe tëi che aikuaa usiriwe’ä chemaerä chemiäri yawe ayembutuicha rewe kuärái, erëi jekuaeño ayapota. Añawe chemiärita pewe yandeYa mbaembae uikuaaka jare uechakaka chewe wae re.

² Che ɨma ma arowia Cristo re. Jare uasa ma catorce año chereraa ara ɨwatete oï wae pe – jokua ko jae kiape Tumpa oï wae pe etei. Aikuaa’ä oo ra cherete ani oo’ä ra.

³ Tumpaño uikuaa oo ra cherete ani mbaetɨ ra oo. Erëi aikuaa chereraa ko ara pe.

⁴ Jare jokua yerowiarenda pe ayandu ñee ikawiete ye wae reta yayandu mbaei wae. Jae ko ñee reta Tumpa umaeño’ä kía re awe kua ɨwɨ pewa uyemɨngeta waerä.

⁵ Kua re chepuereta tëi jekuaeño ayembutuicha, erëi jaeño ayembutuichata chepɨräta mbae wae re.

⁶ Erëitu aipota ayembutuicha yawe mbaembae ikawiete ye uyeyapo chewe wae re, che ndarau chemiäri jokua iyarakuaa mbae wae reta imiäri rami. Echa’ä che chemiäri wae añetete ko uyeyapo chewe. Erëitu ndarau chemiäri jese ayembutuicha rewe, awɨye waerä kía jokua mbaembae aecha wae reño uyemɨngeta kawi cheré. Che aipota ayekuaaka chereko rupi jare che aporomboe wae rupi – mbaetɨ mbaembae aecha wae rupi.

⁷ YandeYa uechaka chewe jeta kua nunga mbaembae ikawiete ye wae. Erëi che awɨye waerä ayembutuichaete jokua re, Tumpa umaeño pëti mbae jasɨ chewe waerä. Jekuaeño jasɨ chewe pëti ñuräti yandesoo pe yandekutu oï wae rami. Satanás etei ombouka chewe kua uiporaraka waerä chewe.

⁸ Kua re mbapɨ wese ma yandeYa amɨñera tëi umbɨsɨrɨ waerä chewi.

⁹ Erëi jae jei chewe kuärái: “Ambɨsɨrɨta’ä ndewi. Erëi che chepɨakawi rupiño nomborɨta nemɨawäta waerä. Jokuaño ko ikawita ndewe. Echa’ä nepɨräta’ä neï yawe, jare che nomborɨ nemɨawäta waerä yawe, jokoropi ko chepuere aechaka kërái chembaepuere tuichaete ko.” Jukuärái yandeYa jei chewe. Jáeramo che ayerowia chepɨräta mbae wae re, jare jokua re ko che chemiärita aï. Echa’ä chepɨräta mbae wae rupi uyekuaa Cristo imbaepuere.

¹⁰ Jáeramo ime yawe kía mbae kachi jei chekotɨ wae, che ayerowia aï jokua re. Jare jae nunga wi che ayerowia aï jokua chepɨräta mbae wae re, jare mbaesusere reta re, jare yembɨawái reta re. Añetete che aiporara tuicha Cristo pe ayeyokui ramo. Erëi jokua re ayerowia aï. Echa’ä che chepɨräta’ä aï yawe, Cristo imbaepuere uparawɨkɨ cheré chepɨräta waerä.

Pablo uyembɨpɨa’ä oï Corinto pewa reta re

¹¹ Kua chemiäri ayembutuicha rewe wae rupi ayeyapo ma pëti iyarakuaa mbae wae rami. Erëi pe reta ime penoi teko. Echa’ä pe reta pemiäri kawita tëi ko ïru wae reta pe che rewa. Aramoi che parawete mbae’ä ko, erëi jokua Cristo omondo wae tenondewaete reta pere chupe wae, jae reta mbae pe awe chapɨraa’ä.

¹² Pe reta pikuaa kawi ko che aiko yawe pe reta ndiwe, che ayekuaaka kawi pewe chepɨawasu rewe Cristo chemondo jae jee re. Jare Tumpa imbaepuere rupi ayapo mbaembae kiawe ipuere’ä uyapo wae jukuärái rupi uyekuaa waerä che ko jae Cristo chemondo wae.

¹³ Jukuärái che ayapo pepɨte rupi kërái ayapo ïru wɨrowia Cristo re wae reta kerupi rupi uyembatɨ wae rupi rami. Jaeño aeka’ä pewe yemborɨ kërái che aeka chupe reta rami. Erëi kuärái ayawɨ yawe pekotɨ, jayawe awɨye pemandúa mii chewe jokua re.

¹⁴ Mase, mokui wese ma a apou pepɨ. Jare añawe ayeyapɨkatu aï a ye apou waerä pepɨ. Jare a ma awäe yawe, jae nunga wi aipota’ä pe reta chemborɨ waerä. Echa’ä che aipota’ä korepoti pewi. Che aipota pomborɨ waeräño, echa’ä mbaetɨ ko sambiaɨ reta uyandareko waerä tu re. Tu ko jae uyandareko waerä isambiaɨ reta re. Jukuärái wi che ayandareko peré cheraɨ reta rami.

¹⁵ Jáeramo che ayerowia rewe amɨkañɨta opaete chembaembae pomborɨ waerä. Jare che etei wi añemeeta pomborɨ waerä. Yepe tëi pe reta cherau’ä ma peo peï aramoi, erëi che jekuaeño jeiete puauta aï.

¹⁶ Erëi aramoi amokue wae reta jeita kuärái: “Añetete Pablo mbaetɨ iko yandiyemborɨ re. Erëi jae uikuaa upurumbɨtawɨ waerä. Ime ko aipo kërái rupi yanembɨtawɨ oï.” Jukuärái jeita tëi reta aramoi.

¹⁷ Erëi, ¿kërái rupi ra pumbɨtawɨ? ¿Pumbɨtawɨ ra aramoi jokua kuimbae reta amondo pepɨ wae rupi?

¹⁸ Che amɨkɨrëɨ hermano Tito oo waerä pepɨ, jare amondo wi jae ndiwe ïru hermano pe reta pikuaa wae. Erëi, ¿Tito pembɨtawɨ yerá? Pe pikuaa jae pembɨtawɨ'ä etei ko. Echa’ä che jare Tito oyowake ko noï.

¹⁹ Aramoi perowia peï nduyerepɨ waeräño ko numɨmbeu noï pewe kua mbaembae. Erëi jukuärai’ä ko. Tumpa jowake ko numɨmbeu noï pewe, ore pëti ramiño noï Cristo re wae reta. Mase cheïru puau wae reta, opaete nduyapo wae, nduyapo ko pe reta pepɨräta waerä Tumpa re.

²⁰ Che ayembɨpɨa’ä aï peré, aramoi a apou pepɨ yawe, puechata mbaetɨ ikawi peï kërái che aipota wae rami. Ayembɨpɨa’ä aï, aramoi puipokouta yeaka rupi, jare ñemɨro rupi, jare mbochɨ rupi, jare yembutuicha rupi, jare yembɨkate rupi. Jare aramoi imeta pepɨte pe indayepota wae reta, jare iñera japicha re wae reta, jare tekorái reta.

²¹ Ayembɨpɨa’ä aï wi aramoi chemarata apɨta pewi Tumpa jowake, jare tuicha rupi chepɨatɨtɨta jokua re. Echa’ä aramoi pepɨte pe jokua tenonde yawe teko kachi rupi yureko wae reta jekuaeño ueya’ä jokua ipɨayemɨngeta kachi wae. Aramoi imeño ko awasa pe ñonoï reta jare mbɨkere rupi.