2 Corintios 10 - Biblia

Pablo uepɨ iparawɨkɨ

^1-2 Amokue pepɨte pe ñonoï wae reta jei: “Pablo yande ndiwe oï yawe, uñemɨmichi. Erëi ikotɨ̈a oï yawe, uyemɨngeta yandekotɨ uipɨu mbae rewe,” jei reta. Jae reta wɨrowia tëi ore nduiko kua ɨwɨ jeko rupiño. Jáeramo che a awäe pepɨ yawe, imeta ko aipo ambɨeta chupe reta aipɨu mbae rewe. Erëi kërái yandeYa Cristo uñemɨmichi jare uyembutuicha’ä etei, jukuärái wi che añemɨmichi rewe pumɨñera, awɨye piko jae reta rami. Echa’ä che aipota’ä ambɨeta aï pewe wi jukuärái.

³ Ore reta, yepe tëi kua ɨwɨ pe noï, erëi nuñeräro’ä kua ɨwɨ pewa reta uñeräro rami.

⁴ Ore nuñeräro waerä, nduiporu’ä noï tembiporu kua ɨwɨ pewa. Ore nuñeräro ko noï Tumpa imbaepuere rupi. Jare jokua mbaepuere pe orepuere numɨamɨri ipotawe Tumpa kotɨ oyowaicho wae.

⁵ Jukuärái kía uipota yawe umbɨtawɨ jare umbɨawái ïru wae reta awɨye waerä uikuaa Tumpa, ore numɨamɨri jae jei wae. Jare jukuärái nduyapo opaete wae ipɨa pe uyemɨngeta waerä jare uyapo waerä kërái Cristo uipota wae rupi.

⁶ Jare imeño yawe pepɨte pe kía uipota’ä Cristo jei wae rupi iko wae, jayawe ore nduiporarakata noï chupe. Erëi jaeño nduyapota noï jukuärái ore nduecha yawe pe reta peï kawi Cristo jei wae rupi.

⁷ Amokue wae jei ñonoï iyupe, “Cristo chembou.” Erëi tuikuaa reta ore ko Cristo orembou wi. Pe pikuaa ko kua añetete wae.

⁸ Jare yandeYa umee ko orewe mbaepuere nonoi waerä peré. Aramoi amokue wae reta jei: “Pablo uasaete ma uyemɨngeta mbaepuere yandeYa umee chupe wae re.” Jukuärái ipuere jei reta, erëi ndarau chemara kua che jae wae re. Añetete yandeYa umee orewe kua mbaepuere pumɨmɨräta waerä Tumpa re, mbaetɨ ko purukachi waerä.

⁹ Jáeramo awɨye perowia che aikuatía aï pewe pumɨngɨye waeräño.

¹⁰ Echa’ä amokue wae jei chekotɨ kuärái: “Pablo uikuatía yandewe yawe, uikuatía jei wae yayapo waerä chupe, jare uikuatía mbaepuere onoi wae rami. Erëi jae oï yande ndiwe yawe, mbae’ä jare iñee ngatu’ä,” jei reta.

¹¹ Erëi jukuärái jei wae tuikuaa iyupe kua: kërái kua mbɨrɨ wi tupapire nduikuatía pewe rami, jukuärái etei wi ore noïta ore noï yawe pe reta ndiwe.

¹² Erëi ore ndarau nduyembutuicha ïru wae reta uyembutuicha wae rami. Pe reta pikuaa kërái ko amokue wae reta jeko. Jae reta uyemɨngeta kawi tëi iyé, erëi jaeño ueka reta kërái uyembutuicha waerä ïru wae reta wi. Añetete jae reta ko jae iyarakuaa mbae wae reta.

¹³ Erëi ore oremiäri yawe mbaembae nduyapo wae re, oremiäri noï jupi rupi. Jare jaeño nduyemɨngeta jokua mbarawɨkɨ Tumpa umee orewe wae re. Jare jae umaeño oreré numɨmbeu waerä pewe ñee ikawi wae Cristo rewa. Jokua re ko oremiäri noï.

¹⁴ Jare jukuärái oremiäri yawe, jupi ko nduyapo noï. Echa’ä ore ko jae tenondete ndoo numɨmbeu pewe ñee ikawi wae Cristo rewa.

^15-16 Amokue wae reta umɨmbeu ñonoï Tumpa iñee kiape ñee ikawi wae uyemɨmbeu ma wae rupi. Jare jae reta uyemɨngeta uyembɨkate rewe ambɨe wae iparawɨkɨ re jae reta uyapo wae rami. Erëi ore nduyapo’ä jukuärái. Ore nduipota numɨmbeu ñee ikawi wae kiape ñee ikawi wae uyemɨmbeu mbae wae rupi. Jare orepɨayemɨngeta ko jae pe reta pepɨräta kawi ma Tumpa re yawe, jayawe orepuereta numɨmbeu ñee ikawi wae perëta kutɨ rupi ñonoï wae reta pe.

¹⁷ Ore nduipota nduyapo kërái Tumpa iñeerɨru pe uyekuatía oï wae rupi. Echa’ä joko pe jei kuärái: “Ime yawe kía uipota uyembutuicha wae, tuyembutuicha yandeYa mbae ikawi wae uyapo chupe wae re.” Jukuärái uyekuatía oï.

¹⁸ Echa’ä ime yawe kía jaei uyembutuicha wae, mbae’ä etei ko. Jaeño kía reta uyembutuichaka yandeYa pe wae tuichaete ko añetete rewe.