2 Corintios 1 - Biblia

Pablo wɨraaka saludo

¹ Cherɨkeɨ reta, cherɨwɨ reta, jare cherindɨ mii reta tëta wasu Corinto pe piko wae, araaka aï pewe saludo. Che ko jae Pablo. YandeYa Jesucristo chemondo jae jee re amɨmbeu waerä jesewa, echa’ä jukuärái Tumpa uipota ramo. Che jare hermano Timoteo ndiwe aikuatía aï kua tupapire pewe piyembatɨ peï Tumpa jee re wae reta pe. Jare nduikuatía noï wi opaete ïru wae reta Tumpa oñono tee jae imaerä wae ɨwɨ Acaya rupi ñonoï wae reta pe.

² YandeRu Tumpa jare yandeYa Jesucristo jekuaeño tipɨakawi pewe jare tuyapo pewe piko waerä pepɨakatu rewe.

Tumpa umbɨpɨakatu Pablo uiporara wae rupi

³ ¡Yambutuicha yandeRu Tumpa jee! Jae ko yandeYa Jesucristo Tu. Jae ko yandeRu Tumpa yandeparareko wae jare yanembɨpɨakatu wae.

⁴ Echa’ä jae yanembɨpɨakatu opaete mbaembae yaiporara wae rupi, jukuärái yande reta yandepuere waerä wi yambɨpɨakatu ïru uiporara ñonoï wae reta kërái Tumpa yanembɨpɨakatu rami.

⁵ Añetete, kërái Cristo uiporara rami, jukuärái wi yande yaiporarata ñaï. Erëi yande pëti ramiño ñaï Cristo re ramo, tuicha rupi Tumpa yanembɨpɨakatu.

⁶ Jukuärái uasa orewe. Echa’ä opaete ore nduiporara wae rupi, Tumpa orembɨpɨakatu. Jare jokua ikawita oï wi pemaerä. Echa’ä añawe ore orepuereta pumbɨpɨakatu pe reta piporara peï yawe. Jare jukuärái pe reta pepuereta pemɨawäta pepɨawasu rewe jokua mbaembae piporara peï wae reta. Echa’ä kërái ore nduiporara wae rami, jukuärái wi pe reta piporarata peï.

⁷ Erëi ore nduikuaa yepe tëi pe reta piporarata peï ore nduiporara wae rami, erëitu Tumpa pembɨpɨakatuta wi kërái jae orembɨpɨakatu ma wae rami. Jáeramo ore ndorowia katu noï peré pe reta pemɨawäta waerä.

⁸ Jayawe hermano mii reta, ore nduipota pe reta pikuaa waerä kërái ore täta rupi nduiporara ɨwɨ Asia pe nduiko yawe. Ore nduiporaraete parawete jare orepuere’ä ma ndurupɨa. Jáeramo ndorowia tëi opa pota echa numano.

⁹ Añetete ko, ndorowia tëi jaeño mái opa nukañɨ. Erëi kua uasa orewe ore nduyemboe waerä orepuere’ä ko nduyeko oriyé orepɨräta reño. Jaeño orepuere nduyeko Tumpa re, echa’ä jaeño ipuere umbɨjekowe ye umanokue wae reta.

¹⁰ Jukuärái Tumpa orerepɨ ma mano wi. Jare añawe rupi jekuaeño jae orerepɨ oï. Jare ore ndorowia katu jese jae jekuaeño orerepɨ waerä.

¹¹ Erëi oremborɨ mii, pe reta, yerure rupi. Echa’ä jeta wae reta uyerure yawe Tumpa pe oreré, jae reta tuicha rupi uyapota yasurupái Tumpa pe jokua mbae ikawi wae Tumpa uyapo orewe wae re.

Maera Pablo oo rani’ä Corinto pe

¹² Kua añawe ndoeta pewe wae, ndoeta pewe nduyerowia rewe jare orepɨa orembɨjeko mbae rewe. Jae ko kua: Ore nduiko yawe Cristo re wɨrowia mbae wae reta ipɨte rupi jare pe reta ndiwe wi, ore nduiko kawi orereko mbae rewe. Ndupurumbɨtawɨ'ä etei. Erëi ore mbaetɨ ko oreiño orearakuaa rupi nduiko jukuärái. Ore ko noï Tumpa ipɨakawi rupi.

^13-14 Jare opaete ore nduikuatía pewe wae, pe reta pepuere pikuaa, echa’ä nduikuatía ko noï kërái pe reta ñee piporu wae. Pe reta michiño orekuaa. Mbaetɨ orekuaa kawiete. Erëi che aipota pe reta orekuaa kawi waerä. Echa’ä jukuärái yawe, piyerowia katuta oreré kërái ore nduyerowia katu noï peré rami. Jare jukuäraieteta ko jokua ara Jesucristo ou ye yawe.

¹⁵ Jare kua arowia ramo, ayemɨngeta aiko tëi chepɨa pe a apou pepɨ waerä mokui wese, jare jukuärái pe reta piyekou waerä mokui wese.

¹⁶ Tenonde aipota tëi a apou aiko pepɨ Macedonia kotɨ asa aiko yawe. Jare joko wi ayu ye yawe, jae nunga wi aipota tëi apou aiko pepɨ. Che ayemɨngeta tëi aiko chepɨa pe aramoi pe reta pepuereta chemborɨ a waerä ɨwɨ Judea kotɨ. Jukuärái ko chepɨayemɨngeta iko tëi.

¹⁷ Erëi pe reta pikuaa mbaetɨ jukuärái ayapo. Jayawe, ¿kua uipota ra jei aramoi che ayemɨngetaiño aiko? Mbaetɨ etei. Che mbaetɨ ko ayemɨngeta che jae wae rupiño. Ndarau etei che jae kía pe mbae ayapo waerä aikuaa rewe chepuereta’ä ayapo yawe.

^18-19 Kërái yarowia katu Tumpa, jukuärái wi pe reta pepuere orererowia katu. Echa’ä che jare Silvano jare Timoteo mbae ndoe yawe pewe, ore nduyemɨngeta’ä noï ambɨe ye orepɨa pe. Ore numɨmbeu kawi pewe Jesucristo Tumpa Taɨ rewa. Jare pe reta pikuaa kawi jae jekuaeño uyemɨngeta añetete wae. Jekuaeño uyapo jae jei uyapota oï wae.

²⁰ Añetete, opaete Tumpa jei uyapota wae uyeyapo oï Cristo rupi. Jáeramo yandepuere yae, “Jukuärái tuiko,” Tumpa jee uyembutuichaka waerä.

²¹ YandeRu Tumpa yandapo ma ñaï waerä jaeño mái pewa pëti ramiño Cristo re jare ñaneñono tee ma jae imaerä.

²² Jare Tumpa oñono ma Espíritu Santo yandepɨa pe uikuaaka waerä yandewe jae imbae ma ko yande reta. Tumpa umbɨtenonde ma yandewe Espíritu Santo opaete mbaembae ikawi wae jae umeeta oï yandewe wae wi. Jare jukuärái yaikuaa añetete ko pëti ara Tumpa umeeta oï yandewe opaetei jokua mbaembae.

²³ Jayawe tamɨmbeu pewe marái ramo ra ndeiño a ye apou pepɨ. Echa’ä pereräkua pochɨ chewe. Jáeramo a’ä apou pepɨ jukuärái. Echa’ä jese katu a yawe, aramoi añeengatata aiko pewe, cheïru mii reta. Kua che jae pewe Tumpa jowake añetete rewe.

²⁴ Ore reta nduipota’ä etei poyokui piyapo waerä Tumpa jei wae kërái pëti patrón peokui wae rami. Ore jaeño nduipota pomborɨ pewata kawi waerä Tumpa ndiwe pekɨrëɨ wae rupi, pe reta jeiete piyerowia waerä.