1 Tesalonicenses 5 - Biblia

YandeYa ou yeta wae rewa

¹ Jayawe hermano mii reta, amokue wae reta upɨrandu ñonoï kërái yawe etei ra kua mbaembae uasata oï. Erëi che aikuatiata’ä pewe jokua rewa kua tupapire pe.

² Echa’ä pe reta etei pikuaa kawi ma jokua rewa. Pikuaa kawi peï ou yawe ara yandeYa pewa, jokua ara outa oï pëti imonda wae ou pɨ̈tu yawe wae rami.

³ Jokua ara ɨwɨ pewa reta jei yawe, “Añawe yaikota ñaï yandepɨakatu rewe jare yandepɨawiwe rewe,” jayawe jokua ara ipɨranoe pewa outa chupe reta mbaesusere tuicha wae. Jare jokua outa chupe reta aramoiño kërái pëti kuña aramoiño imembɨrasɨ ou chupe rami. Jare jae reta ndarau etei oyepe chuwi.

⁴ Erëi hermano mii reta, pe reta jae reta rami’ä ko. Jokua ara ndarau ou pepɨranoe pewa pëti imonda wae ou rami. Echa’ä pe reta pɨ̈tumimbi pewa’ä ma ko – jae ko teko kachi pewa’ä ma.

⁵ Pe reta tembipe pewa ko jare pereko oï ikatu pe etei. Mbaetɨ ma yande reta ñaï pɨ̈tumimbi pewa jare pɨ̈tu yawe iko reta wae rami.

^6-7 Erëi Cristo re wɨrowia mbae wae reta jeko jukuärai’ä ko. Jae reta jeko ko pɨ̈tu rupi mbae uyapo reta wae rami. Usawɨpo ñonoï rami, jare jeta wae reta oke ñonoï wae rami. Erëi yande reta pɨ̈tumimbi pewa’ä ramo, awɨye yaiko yake ñaï wae rami. Jekuaeño yayandareko jare yaiko yandearakuaa katu rewe.

⁸ Yandereko toï ikatu pe etei. Erëi ¿kërái ra yaikota yandearakuaa katu rewe? Imeta ko jekuaeño yarowia Cristo re jare jekuaeño yayerau päwe rewe. Echa’ä jokua yanderepɨta oï mbae ikawi mbae wae wi, pëti pɨtía yopiaka yamonde wae rami. Jare jae nunga wi jokua ara Tumpa uiporaraka yawe ɨwɨ pewa reta pe jae reta mbaembae uyawɨ ikotɨ wae re, yarowia katu jae yanderepɨta oï. Jayawe ñamaeño jokua yaikuaa wae re uyandareko waerä yandepɨayemɨngeta re ñanäka jɨru jiero pewa yamonde wae rami.

⁹ Echa’ä Tumpa ñaneñono tee ma yanderepɨ waerä Jesucristo rupi – mbaetɨ ko uitɨ waerä yanderé iarasɨ.

¹⁰ Echa’ä Cristo umano yanderé yande yaiko waerä jae ndiwe. Jáeramo aramoi ñamano ma ani aramoi imeño yaiko, erëi ñaï ñotái ko Cristo ndiwe jae ou ye yawe.

¹¹ Kua mbaembae añetete ko. Jáeramo jekuaeño piñemɨatangätu päwe jare piñemɨmɨräta Tumpa re kërái piyapo peï rami.

Pablo jekuaeño umbɨarakuaa reta

¹² Añawe hermano mii reta, imeño amokue mbaembae mii pumbɨarakuaa waerä. Tenonde ko jae petenondewa reta rewa. Echa’ä jae reta uparawɨkɨ ñonoï pepɨte rupi uyandareko waerä peré, jare pembɨarakuaa ñonoï yandeYa rewa. Jáeramo ore pumɨñera pipɨu waerä chuwi reta.

¹³ Pe reta piyekou peï jae reta iparawɨkɨ re; jáeramo peau mii reta. Jare piko kawi päwe pepɨakatu rewe.

¹⁴ Jae nunga wi ime yawe pepɨte rupi iyakɨ wae reta, pembɨeta chupe reta jae reta uparawɨkɨ waerä. Jare pemɨkɨrëɨ wi ikoi wae reta. Jare pemborɨ ipɨräta’ä ñonoï wae reta. Jare pepɨawasu mii opaete wae pewarä.

¹⁵ Ime yawe kía mbae kachi uyapo pewe wae, awɨye pemɨñatima chupe. Erëi jekuaeño piyapo ikawi wae peyupe jare opaete wae pe wi.

¹⁶ Jekuaeño piyerowia katu.

¹⁷ Jare piyerure Tumpa pe pekueri mbae rewe.

¹⁸ Jare jekuaeño pemee yasurupái Tumpa pe ipotawe mbae uyeyapo pewe wae rupi. Echa’ä jukuärái ko Tumpa uipota piyapo waerä, pe pëti ramiño peï Jesucristo re wae reta.

¹⁹ Espíritu Santo uipota uparawɨkɨ pepɨte rupi. Jáeramo awɨye piyopia chuwi.

²⁰ Ime yawe kía jei, “Che ime anoi ñee Tumpa wi ou wae,” awɨye jawoi pewa perɨ̈ro.

²¹ Pemboporowa rani jokua ñee añetete ra ou Tumpa wi. Jare ikawi oï yawe jokua ñee, jayawe pipɨsɨ jare pemandúa jese.

²² Erëi piñono ikotɨ̈a peyuwi ipotawe mbae ikawi mbae wae.

²³ Tumpa ko jae yanembɨpɨakatu wae. Jare jae etei tapeñono tee opaete mbae ikawi mbae wae wi. Jare tuyandareko kawi peré – perekowe jare peä jare perete re – awɨye waerä peï teko pe yandeYa Jesucristo ou ye yawe.

²⁴ Tumpa etei pereni, jare jae jupi ko uyapo waerä pewe kua mbaembae.

²⁵ Hermano mii reta, piyerure mii Tumpa pe oreré.

²⁶ Jare pembɨsaluda mii chewe peau rewe opaete hermano reta joko pe ñonoï wae.

²⁷ Che poyokui yandeYa jee re pemɨngeta waerä kua tupapire opaete hermano reta joko pe ñonoï wae pe.

²⁸ YandeYa Jesucristo jekuaeño tipɨakawi pewe. Jukuärái tuiko.