1 Tesalonicenses 4 - Biblia

Pablo umbɨarakuaa reta kërái rupi umbɨyerowia waerä Tumpa

¹ Jayawe hermano mii reta, ore pumɨñera yandeYa Jesucristo jee re jekuaeño piko pembɨyerowia waerä Tumpa. Ore pumbɨarakuaa kawi ma jokua kërái piyapo waerä, jare jukuäraiete pe reta piyapo peï. Jaeño nduipota pe reta jeiete piyapo waerä jukuärái.

² Pe reta pikuaa kawi ma peï jokua ore ndoe pewe yandeYa Jesús jee re wae.

³ Tumpa uipota pe reta piñeñono tee waerä jae imaerä – jae ko awɨye waerä piko awasa rupi.

⁴ Pëti pëti wae tuyemboe umaeño’ä waerä iyé jete uipota wae rupi. Erëi tuyapo mbae jupi kawi wae jete rupi.

⁵ Awɨye tuiko jete uipota uyapo wae rupiño Tumpa uikuaa mbae wae reta yureko rami.

⁶ Kua nunga mbaembae rupi awɨye piyapo ikawi mbae wae perapicha kotɨ jare awɨye pembɨtawɨ wi. Echa’ä yandeYa uiporarakata oï kua nunga mbaembae uyapo wae pe kërái ore numɨmbeu pewe wae rami.

⁷ Jae nunga wi Tumpa mbaetɨ ko ñanereni yande yaiko waerä kachi rupi. Ñanereni ko ñañeñono tee waerä jae imaerä.

⁸ Jukuärái ko Tumpa yanemboe. Jare umee wi yandewe Espíritu Santo yanemborɨ yaiko waerä jae yanemboe wae rupi. Jáeramo kía wɨrɨ̈ro yawe kua yemboe, wɨrɨ̈ro ko Tumpa etei. Kuimbae’ä ko wɨrɨ̈ro oï.

⁹ Che ndarau aikuatía pewe kua tupapire pe piyerau päwe waerä. Echa’ä Tumpa etei jukuärái pemboe.

¹⁰ Jare jukuäraiete pe reta piyapo peï. Pe reta peau peï opaete ɨwɨ Macedonia pewa reta Cristo re wɨrowia wae reta. Erëitu ore jaeño nduipota pumɨatangätu jeiete piyerau päwe waerä, hermano mii reta.

¹¹ Jare pumɨñera wi piko waerä teko kawi rupi pepɨakatu rewe. Awɨye piyemɨinge opaño mbaembae pe. Peparawɨkɨta ko ime waerä penoi perembiurä kërái ore ndoe pewe rami.

¹² Echa’ä jukuärái piko yawe, Cristo re wɨrowia mbae wae reta uipɨuta pewi jare ndarau mbae uata pewe.

Cristo re wɨrowia wae reta imano rewa

¹³ Añawe hermano mii reta, ime ye mbae re ore nduipota pumbɨarakuaa waerä. Nduipota pe reta pikuaa waerä mbae ra uasa kía Cristo re wɨrowia wae umano yawe. Echa’ä jokua pikuaa yawe, ndarau pepɨatɨtɨete imano re Cristo re wɨrowia mbae wae reta ipɨatɨtɨ rami. Echa’ä ime yande mbae ñaäro ñaï yayerowia rewe wae jae reta mbaetɨ onoi wae.

¹⁴ Echa’ä yande yarowia Jesús umano jare ikowe ye ou umanokue wae reta ipɨte wi. Jáeramo yande yarowia ñaï wi Jesús ou ye yawe, Tumpa uyapota opaete wae Jesús re wɨrowia rewe umano wae reta umɨïru waerä Jesús.

¹⁵ Erëi jokua ara yandeYa Cristo ou ye yawe, yande reta imeño ñaï wae ndarau ya umanokue wae reta wi tenonde. Jukuärái yandeYa oporomboe, jare jukuärái wi añawe numɨmbeu noï pewe.

¹⁶ Añetete uyeyapota oï kuärái: YandeYa Jesucristo ou ye yawe, uyenduta pëti ñee ipɨräta wae jare araɨwa tenondewaete iñee jare Tumpa jemimbɨ wasu wi. Jare yandeYa Cristo etei uweyɨta ara wi, jare jese wɨrowia rewe umano wae reta ikowe yeta tenonde jete ipɨau wae pe.

¹⁷ Jare kua jaɨkue rupi yande imeño ñaï wae reta, ndei ñamano wae reta, ya päweta jae reta ndiwe. YandeYa etei yandereupita ñañeowäiti waerä jae ndiwe amapɨ̈tu re. Jare jukuärái yaikota yandeYa ndiwe jaeño mái pewa.

¹⁸ Kua ñee añetete ko. Jáeramo piñemɨkɨrëɨ jese.