1 Tesalonicenses 3 - Biblia

¹ Jáeramo yawái iko orewe nduikuaa’ä rambuewe kërái ra peï wae. Jare orepuere’ä ma ndurupɨa yawe, che jare Silas ndoe oreyupe: “Yapɨta pochɨ kua tëta wasu Atenas pe.

² Erëi yamondo hermano Timoteo jae reta ipɨ.” Jukuärái ndoe oreyupe. Pe reta pikuaa peï Timoteo ko jae oreparawɨkɨ ïru. Echa’ä jae ore ndiwe nduyeyokui noï Tumpa pe numɨmbeu waerä ñee ikawi wae Cristo rewa. Jare ore nduipota jae oo waerä opou pepɨ pemɨkɨrëɨ waerä Tumpa kotɨ jare jeiete perowia waerä jese,

³ awɨye waerä uasaete pepɨatɨtɨ kua piporara peï wae re. Pe reta etei pikuaa peï yaiporara ñotái ko ñaï.

⁴ Pemandúa kawi peï, ore nduiko yawe pe reta ndiwe, jekuaeño numɨmbeu pewe yaiporarata ñaï Cristo re yarowia jeko pewa. Jare añawe uasa ma pewe jukuäraiete pe reta pikuaa rami.

⁵ Jokua jeko pewa che amondo Timoteo pepɨ. Che parawete chepuere’ä arupɨa aikuaa’ä kërái ra peï ramo. Jare aipota aikuaa aiko imeño ra perowia peï Cristo re wae. Che jae tëi aiko: “¿Ipuereta ra Añawasu mbae uyapo jae reta uyerowa waerä Tumpa wi?” Jukuärái jae aiko. Arowia tëi aiko aramoi jokua täta rupi nduparawɨkɨ pepɨte pe wae usiriwe’ä maeräwe.

⁶ Erëi añawe Timoteo ou ye ma uwäe jokotɨ wi, jare umɨmbeu ma orewe kërái jekuaeño perowia peï Cristo re wae jare kërái piyerau päwe rewe wi. Umɨmbeu wi orewe pe reta jekuaeño pemandúa oreré orerau rewe, jare kërái pe reta pipota tëi orerecha ye kërái ore nduipota puecha ye rami.

⁷ Jayawe hermano mii reta, yepe tëi ïru wae reta uyapo ikawi mbae wae orewe jare nduiporara noï, erëi orepɨakatu noï jekuaeño perowia peï yandeYa re ramo.

⁸ Añawe ramo nduyerowia pɨau ye noï, echa’ä nduikuaa ma pe reta pepɨräta peï yandeYa re ramo.

⁹ ¡Kërái etei ko numee yasurupái Tumpa pe jokua yerowia pemee orewe wae re!

¹⁰ Jare tuicha rupi nduyerure noï Tumpa pe ara rupi jare pɨ̈tu rupi orepuere waerä ndoo puecha ye. Echa’ä nduipota pomboe mbaembae imeño uata pikuaa kawi waerä wae re, jukuärái perowia katuete waerä yandeYa re.

¹¹ Jayawe yandeRu Tumpa etei jare yandeYa Jesucristo tuipea mii orewe tape orepuere waerä ndoo ye ndopou mii pepɨ.

¹² Jare yandeYa tuparawɨkɨ pepɨa pe jeiete piyerau päwe waerä jare jeiete peau waerä opaete wae reta kërái ore puau rami.

¹³ Pëti ara yandeYa Jesucristo ou yeta oï opaete kía kía jae oñono tee jae imaerä wae reta ndiwe. Jare jokua ara opaete yande yayemboɨta ñaï Tumpa jowai. Jáeramo yandeYa tumɨmɨräta pepɨa pepuere waerä piko jupi, jare jukuärái pepuere waerä piyemboɨ Tumpa jowai pereko mbae rewe jokua ara. Jukuärái tuiko.