1 Samuel 31 - Biblia

Saúl jare taɨ reta imano rewa

¹ Filisteo isɨndaro reta yuweru uñeräro reta waerä Israel isɨndaro reta ndiwe ɨwɨtu wasu Gilboa jee wae pe. Jáeramo jeta Israel isɨndaro reta opa osi reta chuwi, erëi jeta umano reta wi jokua ɨwɨtu wasu rupi.

² Joko wi filisteo reta opa oñowa Saúl jare taɨ reta. Jare uyuka reta Saúl taɨ Jonatán, Abinadab, jare Malquisúa jee wae reta.

³ Jare jeiete yuweru reta Saúl jare isɨndaro reta kotɨ. Jawoi pewa filisteo isɨndaro uɨ pe uñeräro wae reta uñɨwo oñono reta Saúl jare umbɨpere reta jasɨ rupi.

⁴ Jayawe Saúl jei isɨndaro uruwata iyopiaka chupe wae pe: “Eki ndekɨsepuku cheyuka woi, awɨye waerä jokua wɨrowia mbae Tumpa re wae reta cheyoyai uyuwanga katu cheré ndei cheyuka reta mbowe,” jei chupe. Erëi isɨndaro uipota’ä, ukɨye ramo. Jáeramo Saúl ueki ikɨsepuku jare uyepɨaka jese. Jukuärái jaei uyeyuka.

⁵ Jare Saúl isɨndaro uecha umano ma yawe, ueki wi ikɨsepuku jare uyepɨaka jese. Jare jukuärái umano Saúl ndiwe.

⁶ Jayawe jokua ara etei umano Saúl ndiwe mbapɨ taɨ reta, jare isɨndaro uruwata iyopiaka chupe wae, jare opaete isɨndaro reta wi.