1 Samuel 13 - Biblia

Ñeräro filisteo reta kotɨ

¹ Saúl ime wɨreko treinta año yawe, Tumpa umbɨjee Israel pewa reta imburuwicha wasurä. Joko wi cuarenta y dos año rupi imeño iko Saúl Israel pewa reta imburuwicha wasurä.

² Jayawe Saúl uiparawo opaete sɨndaro reta Israel pewa ipɨte wi mbapɨ miri ikawiete wae. Jembɨrekue reta Saúl omondo ye jëta jëta rupi. Joko wi Saúl wɨraa jae ndiwe mokui miri sɨndaro reta tëta wasu Micmas jee wae kotɨ ñaipe reta Betel jee wae kotɨ. Jare Saúl omondo taɨ Jonatán jee wae pëti miri sɨndaro reta ndiwe tëta wasu Gabaa jee wae pe. Jokua tëta wasu oï Benjamín iñemoñaa reta iɨwɨ pe.

³ Jayawe Jonatán jare isɨndaro reta yuraa uwäe yawe Gabaa pe, uñeräro reta filisteo isɨndaro reta ndiwe, jare opa umɨamɨri reta. Jupiwoiño opaete filisteo reta uikuaa jokua rewa. Jáeramo Saúl omondo ñee uruwata wae reta opaete ɨwɨ Israel rupi umɨmbeuka waerä opaete hebreo reta pe uyeyapɨkatu ñeräro pewarä. Opaete ɨwɨ Israel rupi jokua ñee uruwata wae reta umɨñee temimbɨ wasu ueni waerä opaete wae reta, jare umɨmbeu chupe reta kuärái:

⁴ “Saúl umɨamɨri ma filisteo isɨndaro tëta wasu Gabaa pe yureko wae reta. Añawe jokua jeko pewa filisteo reta uñamɨtäaete ñonoï Israel pewa reta. Jayawe Saúl umbatɨka oï opaete Israel isɨndaro reta jae oï wae pe tëta wasu Gilgal pe.” Jukuärái umɨmbeu chupe reta.

⁵ Erëi jokua rambuewe uyembatɨ jeta filisteo isɨndaro reta uñeräro waerä Israel pewa reta ndiwe. Umbatɨ reta mbapɨ miri ikarosa ñeräro pewa jare owa miri sɨndaro opo kawayu re wae reta. Umbatɨ reta wi sɨndaro ɨwɨ rupi uñeräro wae reta jeta ye ye ɨwɨkuïti mar jembeɨ pe oï wae rami. Jare upɨta reta tëta wasu Micmas jee wae pe, tëta wasu Bet-avén jee wae wi warasɨ oë wae kotɨ.

⁶ Joko wi filisteo isɨndaro reta ou uñeräro reta waerä sɨndaro Israel pewa reta ndiwe. Jare Israel pewa reta uikuaa woi yembɨawái tuichaete chupe reta jare ukɨyete reta. Jáeramo amokue reta opa uñemi ñana tëɨ wae rupi. Jare ïru wae reta opa uñemi ɨwɨkua rupi, itape ipäu rupi, jare ɨkua utini wae reta pe wi.

⁷ Jare jeta osi yuraa chuwi reta ɨ wasu Jordán jowaicho kotɨ ɨwɨ Gad jare Galaad jee wae kotɨ. Erëi Saúl upɨtaño tëta wasu Gilgal pe. Jare sɨndaro jembɨrekue reta Saúl ndiwe upɨta wae opa urɨrɨ reta ukɨyete ramo.

⁸ Joko pe Saúl upɨta uäro chiu ara kërái Samuel jei chupe uyapo waerä wae. Erëi jupiwoi’ä uwäe Samuel tëta wasu Gilgal pe. Jáeramo amokue sɨndaro upɨta Saúl ndiwe wae reta umbɨpɨ osi wɨari chuwi.

⁹ Jayawe Saúl oyokui amokue chupe uyeyokui wae reta kuärái: “Peru chewe jokua mbaemɨmba reta ñañono tee ma yayuka yau waerä ñañemɨïru kawi waerä Tumpa ndiwe. Jare peru wi chewe jokua mbaemɨmba yayukata opa yapɨ Tumpa pewarä wae,” jei chupe reta. Joko wi Saúl etei uyuka jokua mbaemɨmba opa uapɨ umee waerä Tumpa pe.

¹⁰ Jare Saúl jokua opa uyapo yawe, uwäe ou Samuel tëta wasu Gilgal pe. Jayawe Saúl oë oo owäiti waerä Samuel.

¹¹ Jayawe Samuel upɨrandu chupe jokua mbaemɨmba reta rewa jei rewe: “¿Marái ramo kua ndiyapo?” jei chupe. Jayawe Saúl jei chupe: “Che ayapo, echa’ä chesɨndaro reta osi wɨari ñonoï chewi,” jei. “Jare nde newäe’ä ndeyu ara nemɨanga chewe wae pe. Jae nunga wi jetaete ye filisteo reta uyembatɨ ñonoï orekotɨ joko pe tëta wasu Micmas pe.

¹² Jare jae reta yuweruta ñonoï uñeräro waerä ore ndiwe, erëi ndei aeka yandeTumpa ikoño mái wae pe oremborɨ waerä. Jáeramo yepe tëi aipota’ä aiko, erëi che ayuka jare amee ma Tumpa pe mbaemɨmba, jare opa ma okai,” jei Saúl Samuel pe.

¹³ Jayawe Samuel jei Saúl pe: “¡Jokua ndiyapo wae ndearakuaa mbae wae ma ko!” jei. “Ndiyapo’ä ma jokua yandeTumpa ikoño mái wae jei ndewe wae rupi. Nde moná ndiyapo kawi yawe Tumpa jei wae rupi, jayawe Tumpa umeeta tëi ko ndewe jare niñemoñaa reta pe jekuaeño piko waerä kua ɨwɨ Israel imburuwicha wasurä.

¹⁴ Erëi añawe pikota’ä ma, echa’ä nde ndiyapo’ä jae jei ndewe wae rupi,” jei. “Jáeramo Tumpa uekata ïru kuimbae ipɨa ndiwe oyowake wae. Jokua kuimbae Tumpa etei umbɨjeeta jae uiparawo wae reta imburuwicha wasurä ndepepɨka pe,” jei Samuel Saúl pe.