1 Pedro 2 - Biblia

¹ Jáeramo peya peyuwi opaete mbaembae ikawi mbae piyapo wae. Awɨye ma pepurumbɨtawɨ. Jare awɨye ma piko mokui jowa wae rami. Awɨye ma piñemɨro peyupe. Jare awɨye ma piyemɨngeta kachi perapicha kotɨ.

² Kërái sambiaɨ oa ramo wae ikambúe rami, jukuärái wi pe reta piyueta ko neche uyea mbae wae ara pewa – jae ko Tumpa iñee. Piyemboe jese pekɨrëɨete rewe pepɨräta waerä tekowe opa mbae wae penoi wae rupi.

³ Echa’ä pikuaa ma yandeYa ipɨakawi ko pewe.

Jesucristo ko jae pëti ita ipöraete jare jepɨete wae rami

⁴ YandeYa Jesús ko jae pëti ita tekowe onoi wae rami jare tëta iyapoa reta wɨrɨ̈ro omombo iyuwi reta wae rami. Erëi yepe tëi jeta wae reta wɨrɨ̈ro Jesús, jesewe jae ko yandeRu Tumpa etei uiparawo wae. Jare Tumpa pewarä jae ko pëti ita ipöraete jare jepɨete wae rami. Jare pe reta perowia ma jese ramo,

⁵ Tumpa peapo oï pëti tupao wasu rami Espíritu Santo iko pɨpe waerä. Añetete pe reta ko jae jokua tupao wasu pewa ita tekowe ime onoi wae reta rami. Jukuärái Tumpa peñono tee oï piko waerä sacerdote retarä. Echa’ä jae uipota pe reta piyeyokui waerä chupe jare piyapo waerä jokua mbaembae jae umbɨyerowia wae. Jare jukuärái pepuere piyapo Jesucristo pemborɨ oï wae rupi.

⁶ Yaikuaa kua mbaembae añetete ko, echa’ä Tumpa jei iñeerɨru pe Cristo rewa kuärái: “Mase, añono aï pëti wae Israel pewa reta ipɨte pe. Che ko aiparawo, jare jae ikota ita tenondewaete ikawiete jare jepɨete wae tëta iyapoa uiporu wae rami. Jare ipotawe kía wɨrowia jese wae ndarau imara upɨta.” Jukuärái uyekuatía oï.

⁷ Jayawe pe reta Cristo re perowia wae reta, pemaerä Cristo ko jae pëti ita ipöraete jare jepɨete wae rami. Erëi jukuärai’ä ko oï Cristo re wɨrowia mbae wae reta pewarä. Chupe reta Cristo ko jae pëti ita tëta iyapoa reta wɨrɨ̈ro omombo iyuwi reta wae rami. Erëi yepe tëi jae reta wɨrɨ̈ro, jesewe Cristo uyeyapo ma chuwi reta ita ikawiete ye wae rami opaete ïru ita reta tëta pewa wi.

⁸ Jare jae nunga wi Cristo ikota pëti ita rami ipotawe wae kía ipɨsapäa jese waerä. Echa’ä jeta wae reta ipɨsapäata oa oo rami, jare jukuärái ndarau uepitɨ reta tekowe opa mbae wae. Kua nunga reta uyapɨsaka’ä Tumpa iñee re, jare jokua jeko pewa ipɨsapäa reta rami. Echa’ä Tumpa jeiño mái jokua uyeyapo waerä.

Mbaembae ikawiete wae Tumpa uyapo yandewe wae

⁹ Erëi pe reta ko jae Tumpa uiparawo wae reta. Pe reta ko jae sacerdote reta piyeyokui peï yaneMburuwicha wasu ara pewa pe. Jare Tumpa peñono tee ma pe reta piko waerä jae imaerä, pemɨmbeu waerä kërái jokua jae uyapo wae ikawiete ye ko. Echa’ä tenonde yawe pikuaa’ä piko añetete wae Tumpa rewa jare jukuärái pikose pɨ̈tumimbi pe rami. Erëi añawe jae uyekuaaka ma pewe, jare jukuärái pereni ma ikotɨ jokua pɨ̈tumimbi wi piko waerä tembipe ikawiete wae pe.

¹⁰ Tenonde yawe pe reta Tumpa pewa’ä piko. Erëi añawe Tumpa pewa ma ko peï. Tenonde yawe Tumpa iarasɨ uitɨta tëi iko peré. Erëi añawe jae peparareko ma.

Yaechaka teko kawi Tumpa re wɨrowia mbae wae reta ipɨte rupi

¹¹ Cheïru puau mii wae reta, yande ko jae kua ɨwɨ rupi uwata iko waeño. Ambɨe ɨwɨ pe opou iko waeño ko yande reta. Jáeramo che pumɨñera awɨye piko pere wae rupiño. Echa’ä jukuärái piko yawe, mbaembae pekɨrëɨ wae kachi ko Tumpa jowai jare perekowe jowaicho ko wi.

¹² Pechaka mii teko kawi Tumpa re wɨrowia mbae wae reta ipɨte rupi. Añawe jae reta uyemɨngeta tëi kachi pekotɨ pereko kachi wae echa rami. Erëitu pereko ikawi oï yawe, jae reta uechata jare aramoi ipɨakueeta kuri Tumpa kotɨ. Jayawe uwäe yawe ara opaete wae uyemboɨ waerä Tumpa jowai, jae reta umbutuichata ñonoï Tumpa jee pereko pewa.

Ñañeñono yayapo waerä mburuwicha reta jei yandewe wae

¹³ Ikawi’äete ko yandereko pewa ïru wae reta kachi uyemɨngeta waerä yandeYa kotɨ. Jáeramo piyapo opaete mburuwicha reta kua ɨwɨ pewa jei pewe wae. Kua yandeɨwɨ pe mburuwicha wasu opaete wae re onoi mbaepuere.

¹⁴ Jare jae ombou ïru mburuwicha reta uiporaraka waerä mbae kachi wae uyapo wae reta pe jare umbutuicha reta waerä mbae ikawi wae uyapo wae reta. Jáeramo piyapo mii opaete wae jae reta jei wae rupi.

¹⁵ Echa’ä Tumpa uipota kua mbae ikawi wae piyapo wae rupi pemɨkïi waerä jokua pekotɨ kachi uyemɨngeta wae reta. Jae reta ko jae iyarakuaa mbae echa; jáeramo uyemɨngeta ñonoï uikuaa mbae rewe.

¹⁶ Tumpa peyora ma ko pereko kachi wae wi. Añawe pe reta ko jae Tumpa pe piyeyokui wae reta. Jáeramo piko mii jukuärái. Awɨye pere peyupe kuärái: “Tumpa cheyora ma. Jáeramo chepuere ayapo mbae kachi wae chepɨawiwe rewe.” Awɨye pere jokua.

¹⁷ Jare pipɨu opaete wae wi. Peau opaete Cristo re wɨrowia wae reta. Pipɨu Tumpa wi jare mburuwicha wasu wi.

Kërái pione reta uyeyokuita ko ipatrón reta pe

¹⁸ Uyeyokui wae reta pepɨte pe ñonoï wae tuyapo uipɨu rewe ipatrón jei wae rupi. Awɨye patrón ipɨakawi jare ipɨawasu wae reta peño tuyapo kawi reta mbarawɨkɨ. Jae nunga wi tuyapo kawi reta mbarawɨkɨ patrón jeko pochɨ wae reta pe.

¹⁹ Echa’ä uyeyokui wae reta uiporara yawe jupi mbae rewe, jare umɨawäta reta yawe Tumpa wi uipɨu reta ramo, jokua umbɨyerowia Tumpa.

²⁰ Erëi jae reta uyapo yawe mbae kachi wae, jare ipatrón uiporaraka chupe reta jokua jeko pewa yawe, jupi ko uiporara reta waerä jokua re. Jare yepe tëi umɨawäta reta jokua uiporara reta wae, jesewe mbaetɨ mbae re Tumpa umɨñatima waerä chupe reta. Erëi jae reta uiporara yawe mbae ikawi wae uyapo reta wae re, jare umɨawäta reta yawe, kua ko jae Tumpa umbɨyerowia wae.

²¹ Echa’ä jokuaerä ko Tumpa ueni reta. YandeYa Cristo uiporara yanderé, jare jukuärái uechaka yandewe kërái ñamɨawäta waerä yaiporara wae rupi. Jayawe pemomoe mii jae jeko.

²² Cristo uyapo’ä etei ko mbae kachi wae, jare upurumbɨtawɨ'ä etei ko wi.

²³ Jare yepe tëi ïru wae reta jei mbae ikawi mbae wae ikotɨ, erëi Cristo mbaetɨ etei umɨñatima chupe reta. Jare jae uiporara yawe jowaicho reta ipo pe, jae uyepɨ'ä etei jowaicho reta re. Jaeño oñono reta Tumpa ipo pe, Tumpa uyapo chupe reta waerä jupi wae.

²⁴ Yande jeta ma yayawɨ Tumpa kotɨ. Erëi Cristo uyekutuka iko kurusu re yawe, jae etei uiporara jete pe yanderé jokua teko ñanoi wae opa umbái waerä yandewi. Jare jukuärái Cristo uyapo yandepuere waerä yaiko jupi rupi. Jare jukuärái ko yandepuere yayapo, echa’ä yande reta ñamano rami ma ko yandereko kachi wi. Jare Cristo ipere wae rupi yakuera ma ko Tumpa kotɨ.

²⁵ Tenonde yawe pe reta pewataiño piko owecha ukañɨ wae rami. Erëi añawe peyu ye ma ko Cristo kotɨ. Jare jae umae jare uyandareko oï peré pëti owecha iyandarekoa rami.