1 Pedro 1 - Biblia

Pedro wɨraaka saludo

^1-2 Pe Tumpa peparawo wae reta piñemɨái peï ɨwɨ Ponto, Galacia, Capadocia, Asia, jare Bitinia rupi wae reta, che ko jae Pedro aikuatía aï wae. Jesucristo chemondo jae jee re opaete kerupi amɨmbeu waerä jesewa. Tumpa jekuaeño tuicha tipɨakawi pewe jare tuyapo pewe piko waerä pepɨakatu rewe. Añawe pe reta ambɨe ɨwɨ pewa rami ko peï kua ɨwɨ pe, echa’ä pe reta ara pewa ko. Iyɨpɨ wiwe yandeRu Tumpa pekuaaño mái iko. Jare jokua arakuaa rupi jae peparawoño mái pe reta piko waerä jae imaerä. Jare Espíritu Santo peñono tee piko waerä Jesucristo jei wae rupi jare pepɨayoe waerä Tumpa kotɨ Jesucristo juwɨ uyepɨyere wae rupi.

Yayerowia Tumpa umee yandewe tekowe opa mbae wae ramo

³ ¡Yambutuicha yandeRu Tumpa jee! Jae ko yandeYa Jesucristo Tu. Jae yandeparareko wae rupi uyapo ma yandewe yaa pɨau ye waerä Espíritu Santo rupi, jare jukuärái ñanoi waerä tekowe ipɨau wae. Jare Jesucristo ikowe ye ou umanokue wae reta ipɨte wi ramo, yandepuere yaikuaa kawi imeta ñanoi jokua mbaembae ikawi wae jae jei umeeta oï yandewe wae. Jare kua mbaembae ñaäro ñaï yarowia katu rewe.

⁴ Echa’ä Tumpa upi oï yanemaerä ara pe. Jare joko pe jokua mbaembae ndarau etei ikumewa, jare ndarau jüu, jare ndarau ukañɨ yandewi.

⁵ Erëi añawe pe reta peäro peï rambuewe, Tumpa uyandareko oï peré imbaepuere pe, echa’ä pe reta perowia jese ramo. Jare jae jekuaeño uyandarekota oï peré ara taɨkuewa rewa. Jare ara taɨkuewa uwäe ma yawe, jayawe ramo uyekuaata oï opa ma uyeyapo Tumpa ipɨayemɨngeta yanderepɨ waerä.

⁶ Jáeramo kua jeko pewa, yepe tëi aramoi añawe michi pewa piporara ma yembɨawái reta opa kërái rái rupi, erëi pe reta ime penoi tuicha yerowia.

⁷ Kua yembɨawái reta yuweru ma pewe uyekuaa waerä perowia ko Tumpa re añetete rewe. Jare kua ikawiete ko oro wi Tumpa pewarä. Yaikuaa ñaï oro awe yamɨndɨkui tata pe opa jae yepái uyembatɨ waerä. Jare jukuärái rami Tumpa uyapo oï pewe yembɨawái rupi. Echa’ä jekuaeño perowia yawe Tumpa re yembɨawái rupi, jayawe Tumpa uyemɨngeta kawita peré jare pembutuichakata. Kua uyeyapota oï jokua ara yandeYa Jesucristo ou ye yawe.

⁸ Yepe tëi pecha’ä Jesucristo, erëi jesewe pe reta peau ko. Jare yepe tëi añawe ndeiño pecha, erëi perowia ma jese, jare penoi ko yerowia tuichaete wae yandepuere rape’ä ñanemiäri jese wae.

⁹ Echa’ä Cristo re perowia ramo, Tumpa jekuaeño perepɨ oï mbae kachi wae wi.

^10-11 Jokua re umɨmbeu Tumpa iñee arakae umɨmbeu wae reta. Jae reta ɨma ma umɨmbeu kërái yande añawe rupi yaiko wae reta yayekouta yaiko Tumpa ipɨakawi re. Jae reta uipotaete uikuaa kërái etei ra ko Tumpa yanderepɨta iko jare kërái yawe etei ra ko jokua uyeyapota iko. Jáeramo jae reta upɨwɨwɨ kawi jokua re. Jayawe yandeYa Cristo iEspíritu uikuaaka chupe reta kërái Cristo uiporarata iko jare taɨkue rupi uyembutuichakata iko. Jare jukuärái umɨmbeu jokua kuimbae reta Tumpa iñee arakae umɨmbeu wae.

¹² Erëi Tumpa uikuaaka chupe reta jokua ñee Cristo rewa wae mbaetɨ ko jae reta imaerä. Jae ko yanemaerä, yande añawe rupi yaiko wae reta pewarä. Jare añawe pe reta pikuaa ma ko kua mbaembae rewa, echa’ä ou ma umɨmbeu pewe amokue wae reta ñee ikawi wae umɨmbeu wae. YandeYa Cristo ombou ma Espíritu Santo ara wi, jare Espíritu Santo imbaepuere rupi jae reta umɨmbeu jokua ñee. Añetete araɨwa retawe uipota echa uikuaa kawi kua mbaembae rewa.

Tumpa ñanereni yaiko waerä jupi rupi

¹³ Jayawe Tumpa kua mbaembae uyapo pewe ramo, pemɨsɨmi pepɨayemɨngeta piyeyokui waerä chupe. Piko pearakuaa katu rewe. Jukuärái ko pe reta peärota pekɨrëɨ rewe Jesucristo ou yeta wae. Echa’ä jokua ara Tumpa ipɨakawieteta oï pewe kuri.

¹⁴ Tenonde yawe, pe reta pikuaa’äse Tumpa jare pikose kachi pe reta pere wae rupiño. Erëi añawe pe reta ko jae Tumpa taɨ reta etei. Jáeramo piko kawita ko Tumpa jei wae rupi.

¹⁵ Tumpa pereni ma piko waerä jae imaerä. Jare Tumpa jupiete ye wae ko. Jáeramo pe reta pikota ko jupi wi opaete mbaembae piyapo wae rupi.

¹⁶ Echa’ä Tumpa jei iñeerɨru pe kuärái: “Che ko jae jupi wae. Jáeramo pe reta pikota ko jupi rupi.” Jukuärái jei.

¹⁷ Tumpa – jae ko yande yae chupe “cheRu” wae – jae jekuaeño oyowake rupi umae oï yanderé. Jare taɨkue rupi pëti pëti wae pe jeita mbaembae yayapo wae re. Jáeramo piko kawi pipɨu rewe kua ɨwɨ pe peï rambuewe. Añetete pe reta ko jae kua ɨwɨ rupi pewata piko waeño, echa’ä pe reta ara pewa ma ko peï.

¹⁸ Tenonde yawe pe reta piko wɨraeño pere wae rupi. Jukuärái peramɨkue reta pemboe. Jare pereko peapɨ̈ti iko rami awɨye waerä pikuaa Tumpa. Erëi añawe Tumpa perepɨ ma jokua teko wi. Jare jae mbaetɨ etei perepɨ korepoti pe jare oro pe, echa’ä jokua mbaembae opata ko.

¹⁹ Tumpa perepɨ ma Cristo juwɨ pe etei. Jare jokua juwɨ ndaraúi uñewäe chupe jepɨrä wae. YandeYa Cristo jae ko pëti owecha kuimbae ikawiete wae jare ipere mbaei wae kía wɨraa umee Tumpa pe wae rami.

²⁰ Ndei ɨwɨ uyeyapo mbowe yandeRu Tumpa uiparawoño mái Cristo jae perepɨ waerä. Jare jukuärái jae uyapo ma pewe kua ara taɨkuewa reta pe, echa’ä ou ma ikawi waerä pewe.

²¹ Jare kua Cristo uyapo pewe wae rupi pe reta piyeko peï Tumpa re. YandeRu Tumpa jae ko umbɨjekowe ye Cristo ueru umanokue wae reta ipɨte wi wae. Jare jae umbɨjekowe ye ma yawe, umee chupe mbaepuere jupiete ye wae. Jukuärái Tumpa uyapo pe reta pikuaa waerä pepuere perowia katu jese umee waerä pewe opaete jae jei umeeta pewe wae.

²² Pe reta piyandu ma ñee añetete wae Cristo rewa jare perowia ma jese. Jare jukuärái añawe Espíritu Santo rupi pepɨayoeka ma Tumpa kotɨ. Jáeramo añawe pepuere piyerau päwe añetete rewe. Jayawe jekuaeño piyerau mii pepɨa rewe.

²³ Echa’ä pe reta pea pɨau ye ma ko jare penoi ma tekowe ipɨau wae. Kua nunga tekowe ndarau opa, echa’ä ou’ä ko peru jare pesɨ wi. Ou ko Tumpa iñee rupi. Jare Tumpa iñee jekuaeño ikota jaeño mái pewa.

²⁴ Echa’ä jukuärái jei Tumpa iñeerɨru pe: “Opaete ɨwɨ pewa reta ñana rami ko. Jare opaete jae reta ipöra wae ñana ipotɨ rami ko. Echa’ä kërái ñana ipiru jare ipotɨ reta opa usururu rami, jukuärái wi ɨwɨ pewa reta ipɨräta opata ko jare umanota reta.

²⁵ Erëi yandeYa iñee ikota jaeño mái pewa.” Jukuärái uyekuatía oï. Jare kua ko jae ñee ikawi wae uyemɨmbeu pewe wae.