1 Juan 5 - Biblia

Ñamɨamɨrita ko ɨwɨ jeko Cristo re yarowia wae rupi

¹ Opaete kía reta wɨrowia Jesús ko jae Cristo Upuruepɨ wae, jokua reta Tumpa uyapo taɨ retarä yureko waerä. Jare yande yaikuaa kawi ñaï yaau yawe pëti kuimbae sambiaɨ reta onoi wae, yaau wi ko taɨ reta.

² Jáeramo yaau yawe Tumpa, jare yaiko yawe jae jei wae rupi, yaau wi ko ïru hermano reta. Echa’ä jae reta ko jae Tumpa taɨ reta wi.

³ Jare imeta ko yayapo Tumpa jei wae rupi, echa’ä jukuärái rupi yaau Tumpa. Jare mbaetɨ ko yawái yayapo waerä Tumpa jei wae rupi.

⁴ Kua ɨwɨ jeko uipota tëi yanembɨawái, erëi yande Tumpa taɨrä yaiko wae reta ñamɨamɨri ma ko kua ɨwɨ jeko. Jare jukuärái yayapo Jesucristo re yarowia wae rupi.

⁵ Echa’ä jaeño kía wɨrowia Jesús ko jae Tumpa Taɨ wae umɨamɨrita kua ɨwɨ jeko.

⁶ Jare Jesucristo ko jae Tumpa Taɨ, echa’ä jukuärái Tumpa uikuaaka orewe Jesús uyembɨsakambuka yawe ɨ pe. Jare jae juwɨ uyepɨyere yawe kurusu re, jukuärái wi Tumpa uikuaaka orewe Jesús ko jae Tumpa Taɨ wae. Mbaetɨ ko uikuaaka orewe Jesús uyembɨsakambuka rupiño. Kua yaikuaa añetete wae ko, echa’ä jukuärái Espíritu Santo uikuaaka yandewe yandepɨa pe. Jare jokua jae jei wae añetete ko. Ndarau iyapu yandewe.

⁷ Añetete ime mbapɨ mbaembae uikuaaka kawi yandewe Jesucristo rewa.

⁸ Jae ko Espíritu Santo, jare Jesús usakambu ɨ pe wae, jare juwɨ uyepɨyere kurusu re wae. Jare kua mbapɨ mbaembae oyowakeño uikuaaka kawi yandewe Jesús ko jae Tumpa Taɨ wae.

⁹ Jare yandepuerete yarowia kua ñee re, echa’ä Tumpa wi etei ko ou jare uikuaaka yandewe jae Taɨ re etei. Ou’ä ko ipotawe kuimbae wi.

¹⁰ Kía Tumpa Taɨ re wɨrowia wae uikuaa ipɨa pe añetete ko kua mbaembae Tumpa uikuaaka yandewe wae. Erëi jokua wɨrowia’ä wae jei oï tëi Tumpa pe iyapu wae ko, echa’ä wɨrowia’ä Tumpa jei Taɨ rewa wae ramo.

¹¹ Jare Tumpa uikuaaka yandewe kuärái: Jae umee ma yandewe tekowe opa mbae wae, jare kua tekowe opa mbae wae ñawäe Tumpa Taɨ re.

¹² Jayawe kía ime onoi Tumpa Taɨ wae, ime onoi kua tekowe. Erëi kía mbaetɨ onoi Tumpa Taɨ wae, mbaetɨ etei onoi kua tekowe opa mbae wae.

Tumpa Taɨ re wɨrowia wae reta uikuaa onoi ko tekowe opa mbae wae

¹³ Jayawe pe Tumpa Taɨ re perowia peï wae reta, che aikuatía aï pewe kua mbaembae pe reta pikuaa waerä penoi ma ko tekowe opa mbae wae.

¹⁴ Jáeramo yandepuere yayerure Tumpa pe ipotawe mbae re. Jare yayerure yawe jae uipota wae rupi, yandepuere yarowia katu jese uyandu waerä yandewe yandiyerure.

¹⁵ Jare kërái yaikuaa jae uyandu yandewe yandiyerure wae, jukuärái wi yaikuaa jae uyapota oï yandewe jokua yayerure chupe wae re.

¹⁶ Jayawe pëti hermano uecha yawe ïru hermano uyawɨ oï Tumpa jei wae, tuyerure Tumpa pe jese jokua jae uyawɨ wae mano pewa’ä yawe. Jare Tumpa umbɨpɨau yeta oï jekowe. Jukuärái ko kía mbae uyawɨ wae mano pewa’ä yawe. Erëi ime pëti mbae yayawɨ wae mano pewa. Jare mbaetɨ che jae aï tuyerure jokua re.

¹⁷ Añetete opaete mbae jupi mbae yayapo wae, jokoropi yayawɨ ma ko Tumpa jowai. Erëi mbaetɨ ko opaete mbaembae yayawɨ wae mano pewa.

¹⁸ Jare yaikuaa kawi opaete kía kía Tumpa uyapo taɨ retarä wae ndarau jekuaeño uyawɨ Tumpa jei wae. Echa’ä Tumpa Taɨ etei jekuaeño uyandareko oï jese reta, jare Añawasu ndarau ipuere mbae uyapo chupe reta.

¹⁹ Añetete ko, yande yaikuaa opaete kua ɨwɨ jeko rupi yureko wae reta Añawasu imbaepuere pe ko ñonoï. Erëi yaikuaa wi yande reta ko jae Tumpa pewa reta.

²⁰ Jare yaikuaa wi Tumpa Taɨ ou ma ko kua ɨwɨ pe jare umee ma yandewe arakuaa yaikuaa waerä Tumpa añetete wae. Jare añawe yande ñaï ma ko pëti ramiño Tumpa añetete wae re, echa’ä ñaï ma pëti ramiño Taɨ Jesucristo re ramo. Jae ko Tumpa añetete wae jare tekowe opa mbae wae iYa.

²¹ Jayawe cheraɨ puau wae reta, piyandareko kawi piyé awɨye waerä pembɨadora tumparaanga reta re. Jaeño ma.