1 Juan 4 - Biblia

Kërái yaikuaa waerä kía ra añetete oporomboe oï Espíritu Santo rupi

¹ Cheïru puau wae reta, awɨye perowia woi ipotawe kía Tumpa iñee ou umɨmbeu wae, echa’ä añawe rupi ime jeta wae reta Tumpa iñee umɨmbeuraanga wae reta. Jayawe ime yawe kía ou piyembatɨ wae pe jare jei pewe yawe, “Che ko jae Tumpa iñee umɨmbeu wae,” pemboporowa rani jae iñee añetete ra ou Tumpa wi wae.

² Kuärái pepuere pikuaa jae ime ra onoi Tumpa iEspíritu wae. Jae jei yawe, “Jesucristo ko jae Upuruepɨ wae kuimbaerä uyeyapo wae,” jukuärái pepuere pikuaa jae iñee ou ko Tumpa wi.

³ Erëi jae wɨrowia’ä yawe Jesús ko jae Upuruepɨ wae kuimbaerä uyeyapo wae, jukuärái pikuaata jae iñee ou’ä ko Tumpa wi. Ou ko Añawasu wi – jae ko pëti ara umeeta oï mbaepuere jokua kuimbae Cristo uyembɨjeeraanga wae pe. Pe reta piyandu ma kërái jokua kuimbae outa oï. Jare che aikuaaka aï pewe jae imbaepuere ime ma oï kua ɨwɨ rupi.

⁴ Erëi pe cheraɨ puau wae reta, pe reta opa ma pemɨamɨri jokua oporomboeraanga wae reta, echa’ä pe reta ko jae Tumpa pewa jare Espíritu Santo oï pepɨa pe. Jare yepe tëi Añawasu ko jae kua ɨwɨ iya, erëi Espíritu Santo imbaepuere tuichaete ye ko Añawasu imbaepuere wi.

⁵ Jokua oporomboeraanga wae reta uikuaa’ä ko Tumpa jare jaeño yureko reta kua ɨwɨ jeko rupi. Jáeramo jae reta uyemɨngeta mbaembae ɨwɨ pewa reño. Jare ïru uikuaa mbae Tumpa wae reta uyapɨsaka kawi jese reta.

⁶ Erëi ore reta, oriñee ou ko Tumpa wi. Jáeramo ime yawe kía uikuaa Tumpa wae, jae uyapɨsaka oriñee re. Erëi kía uikuaa’ä Tumpa wae uyapɨsaka’ä oriñee re. Jukuärái yaikuaa kía ko jae oporomboe jupi wae jare kía ko upurumbɨtawɨ wae.

Tumpa tuicha upuruau

⁷ Cheïru puau wae reta, jekuaeño yayerauta ko päwe rewe, echa’ä jokua ou Tumpa wi ramo. Ime kía Tumpa uyapo taɨrä wae jare uikuaa Tumpa wae, upuruauta oï.

⁸ Erëi upuruau mbae wae uikuaa’ä Tumpa, echa’ä Tumpa ko tuicha upuruau. Añetete Tumpa etei ko jae mburuau.

⁹ Jare Tumpa uechaka yandewe yanderau ko kuärái: Jae ombou Taɨ jae waeño wae kua ɨwɨ pe yande yandepuere waerä ñanoi tekowe opa mbae wae Taɨ uyapo yandewe wae rupi.

¹⁰ Echa’ä Tumpa ombou Taɨ umano waerä mbaembae yayawɨ ikotɨ wae re, jare jukuärái umbɨpɨakatu Tumpa iarasɨ tëi iko yandekotɨ wae. Yaipota yaikuaa yawe kërái yapuruau waerä añetete rewe, jokua re ko ikawi ñamae waerä. Awɨye ñamae yandiyé kërái yaau Tumpa wae re. Echa’ä yaau Tumpa wae ndarau etei omboyowake Tumpa yanderau wae.

¹¹ Jukuärái ko, cheïru puau wae reta, Tumpa uikuaaka yandewe yanderau wae. Jáeramo yande reta wi yayerauta ko päwe rewe.

¹² Mbaetɨi kiawe uecha Tumpa. Erëitu yayerau päwe ñaï yawe, ñañemɨïru kawi ko ñaï Tumpa ndiwe jare yaau ko ñaï Tumpa kërái jae jukuäraiño mái uipota wae rupi.

¹³ Jare yande yaikuaa ñañemɨïru ko ñaï Tumpa ndiwe jare Tumpa uñemɨïru ko oï yande ndiwe wi, echa’ä jae umee ma yandewe iEspíritu Santo.

¹⁴ Jare jokuaño’ä ko. Jae nunga wi yandeRu Tumpa ombou Taɨ ɨwɨ pe uepɨ waerä ɨwɨ pewa reta. Jukuärái ore nduecha ma, jare jukuäraiete wi ore nduikuaaka noï opaete wae pe.

¹⁵ Jare ime yawe kía jei, “Jesús ko jae Tumpa Taɨ” wae, jae uñemɨïru oï Tumpa ndiwe jare Tumpa uñemɨïru oï jae ndiwe wi.

¹⁶ Jayawe kua mbaembae rupi yaikuaa kawi ma Tumpa yanderau ko, jare jokua re yarowia jare yayeko ma jese. Tumpa ko tuicha upuruau. Añetete Tumpa etei ko jae mburuau. Jayawe kía upuruau rewe iko wae uñemɨïru kawi ko oï Tumpa ndiwe, jare Tumpa uñemɨïru kawi oï jae ndiwe wi.

¹⁷ Jare jukuärái yayapo yawe, yaikota Cristo rami jare yayerauta päwe rewe kërái Tumpa jukuäraiño mái uipota wae rupi. Jáeramo yande yayerowiata ñaï kuri yayemboɨ yawe Tumpa jowai ara taɨkuewa uwäe yawe. Ndarau yakɨye.

¹⁸ Erëi imeño yakɨye yawe Tumpa wi, jayawe yandepɨa pe imeño yayemɨngeta ñaï Tumpa uiporarakata oï yandewe aramoi. Jare jukuärái yawe, ndeiño yaikuaa kawi kërái Tumpa uipotaño mái wae rami. Echa’ä ndeiño yaikuaa kawi kërái Tumpa yanderauete wae. Erëi jokua yaikuaa kawi jare yarowia yawe, jayawe mbaetɨta mbae wi yakɨye waerä.

¹⁹ Yande yaau ko Tumpa, echa’ä jae rani yanderau ramo.

²⁰ Erëi ime yawe kía jei, “Che au Tumpa,” erëi uñamɨtäa yawe ïru hermano, jayawe iyapu ko oï. Echa’ä yaau’ä yawe ïru hermano yaecha ñanoi wae, jayawe ¿këraita pa yandepuere yaau Tumpa yaecha’ä ñaï wae? Ndarau yandepuere.

²¹ Jare wi Tumpa yanemboe kuärái: “Jokua uau Tumpa wae, tuau wi ïru hermano reta,” jei.