1 Juan 2 - Biblia

Jesucristo uyerure oï yandeRu Tumpa pe yanderé

¹ Cheraɨ mii puau wae reta, aikuatía aï pewe kua mbaembae awɨye waerä piyawɨ Tumpa kotɨ. Erëi kía uyawɨ Tumpa kotɨ yawe, ime ko pëti wae yandeRu Tumpa jowai oï yandepepɨka pe – jae ko Jesucristo. Jae jupiete ye wae ko.

² Jare jae etei ko uñemee umano waerä mbaembae yayawɨ Tumpa kotɨ wae re, jare jukuärái umbɨpɨakatu Tumpa iarasɨ tëi iko yandekotɨ wae. Jare yandereño’ä ko Cristo umano. Jae umano tëi ko wi opaete ɨwɨ pewa reta re.

Tumpa yaau ramo, yayapota jae jei wae rupi

³ Jare ¿kërái ra yandepuere yaikuaa añetete ra yaikuaa Tumpa wae? Yande yayapo yawe mbaembae Tumpa jei yandewe wae, jokua uikuaaka yandewe yaikuaa ko Tumpa wae.

⁴ Ipuere ko kía jei iyupe, “Che aikuaa ko Tumpa,” jei. Erëi jae uyapo’ä yawe Tumpa jei wae rupi, iyapu ko. Iko’ä etei ko añetete wae rupi.

⁵ Erëi Tumpa jei wae rupi yayapo yawe, yande yaau ñaï Tumpa kërái jae jukuäraiño mái uipota wae rupi. Jare jukuärái yaikuaata yande ko ñaï pëti ramiño Tumpa re wae.

⁶ Jayawe ime yawe kía jei, “Che aï pëti ramiño Tumpa re” wae, jayawe tuiko kawi kërái Jesucristo iko rami.

⁷ Cheïru mii puau wae reta, kua aikuatía aï pewe wae mbae ipɨau wae’ä ko. Jae ko jokua iyɨpɨ wiwe pikuaaño mái piko wae. Echa’ä iyɨpɨ wiwe piyanduño mái kua ñee yayerauta ko päwe rewe wae.

⁸ Erëi yepe tëi kua Tumpa jei wae ɨma ma yaikuaa, jesewe imeño ipɨau oï wae echa. Echa’ä Cristo jei pɨau ye ma yandewe yayerau päwe waerä jae yanderau wae rami. Jare jukuärái pe reta añawe piyapo peï. Jáeramo pereko kachi opa ukañɨ oo oï jare pereko kawi uyekuaa oo oï. Jokua ko pɨ̈tumimbi ukañɨ oo oï rami jare tembipe uyekuaa oo oï rami.

⁹ Ime yawe kía jei, “Che aiko tembipe pe,” erëi uñamɨtäa yawe ïru hermano wae, jekuaeño oï pɨ̈tumimbi pe.

¹⁰ Erëi ime yawe kía uau ïru hermano reta wae, jae jekuaeño oï tembipe pe. Jare jukuärái yawe, mbaetɨta mbae re uyepɨaka waerä.

¹¹ Erëi ime yawe kía uñamɨtäa ïru hermano wae, imeño oï pɨ̈tumimbi pe jare jekuaeño uyapo mbaembae pɨ̈tumimbi pewa. Jae uikuaa’ä ketɨ ra oo oï wae, echa’ä jae ko jesa mbae wae rami Tumpa jowai mbaembae kachi uyapo wae jeko pewa.

Awɨyeta ko yaipotaete mbaembae ɨwɨ pewa

¹² Sambiaɨ mii reta, che aikuatía aï pewe kua mbaembae, echa’ä Tumpa umbái ma pewi teko penoi ikotɨ wae ramo. Jukuärái jae uyapo ma yandeYa Jesucristo uyapo pewe wae rupi.

¹³ Jare pe pekuakuaa ma piko wae reta, pe reta pikuaa jokua iyɨpɨ wiwe ikoño mái wae. Jare jokua jeko pewa ko aikuatía aï pewe. Jare pe taurusu piko wae reta, pe reta pemɨamɨri ma Añawasu. Jare jokua jeko pewa ko aikuatía aï pewe wi. Sambiaɨ mii reta, taikuatía ye pewe kua mbaembae, echa’ä pe reta pikuaa yandeRu Tumpa ramo.

¹⁴ Pe pekuakuaa ma piko wae reta, pe reta pikuaa jokua iyɨpɨ wiwe ikoño mái wae. Jare jokua jeko pewa ko aikuatía aï pewe. Jare pe taurusu piko wae reta, pe reta pepɨräta peï Tumpa re, jare Tumpa iñee oï pepɨa pe, jare pemɨamɨri ma Añawasu. Jare jokua jeko pewa ko aikuatía aï pewe wi.

¹⁵ Jayawe cheïru mii reta, che tae pewe kuärái: Kua ɨwɨ pewa reta opaete seri oyowaicho ñonoï Tumpa kotɨ, jare jae reta jeko kachi ko Tumpa jowai. Jáeramo awɨye pipotaete piko jae reta jeko rupi, jare awɨye piñono pepɨa mbaembae kua ɨwɨ pewa re. Echa’ä kía jukuärái uyapo wae, uau’ä etei ko jayawe yandeRu Tumpa.

¹⁶ Echa’ä kua ɨwɨ jeko rupi yureko wae reta jaeño uipota yureko teko kachi rupiño jare mbaembae chupe reta ipöra wae reño. Jare jekuaeño uipota uyemɨngeta reta uyembutuicha rewe mbaembae jae reta onoi wae re jare mbaembae uyapo wae re. Erëi jae reta jeko ou’ä etei ko yandeRu Tumpa wi, echa’ä kua ɨwɨ pewaño ko.

¹⁷ Jare kua ɨwɨ jeko opata oï. Jare jukuäraiete wi opata mbaembae ɨwɨ pewa reta uipota wae. Erëi ipotawe kía uyapo Tumpa jei wae ikota jaeño mái pewa. Jukuäraita ko.

Cristo kotɨ oyowaicho wae reta rewa

¹⁸ Cheraɨ reta, añawe ñawäe ma ñaï ara taɨkuewa reta pe. Pe reta piyandu ma ko jokua kuimbae Cristo uyembɨjeeraanga wae outa oï wae. Jare añawe ou ma tenonde jeta wae Cristo uyembɨjeeraanga wae reta. Jukuärái yaikuaa ara taɨkuewa rupi ma ko ñaï wae.

¹⁹ Jae reta uyembatɨse yande ndiwe añetete wae nunga. Erëitu opa ma usɨrɨ reta yandewi. Jae reta uñemɨïru’ä añetete rewe yande ndiwe. Jae reta añetete uñemɨïru yande ndiwe yawe, jekuaeñota tëi yureko yande ndiwe. Erëi opa usɨrɨ reta yandewi. Jukuärái yaikuaa jae reta mbaetɨ ko yande rami, echa’ä jae reta Tumpa pewa’ä ko.

²⁰ Erëi pe reta jokua nunga’ä ko. Echa’ä Tumpa jupiete ye wae umee ma pewe Espíritu Santo. Jáeramo pikuaa ma añetete wae.

²¹ Jare che aikuatía aï pewe pumɨmɨräta waerä jokua pikuaa wae re. Jare pe reta pikuaa kawi peï pëti apu ou’ä ko añetete wae wi.

²² Jayawe, ¿kía oporomboe oï apu re? Jae ko ipotawe kía jei, “Jesús jae’ä ko Cristo Upuruepɨ wae,” jei wae. Jokua nunga etei ko Cristo kotɨ oyowaicho oï wae. Erëi Tumpa Taɨño’ä ko jae wɨrɨ̈ro oï. Wɨrɨ̈ro ko oï wi yandeRu Tumpa etei.

²³ Echa’ä ime yawe kía wɨrɨ̈ro Tumpa Taɨ wae, jae mbaetɨ etei ko onoi yandeRu Tumpa. Erëi ime yawe kía jei, “Jesús ko jae Tumpa Taɨ” wae, yandeRu Tumpa etei ko onoi wi.

²⁴ Jáeramo jekuaeño tupɨta pepɨa pe jokua iyɨpɨ wiwe piyemboe jese wae. Jare jukuärái yawe, jekuae ñotái ko piñemɨïru kawi Tumpa Taɨ ndiwe jare yandeRu Tumpa ndiwe etei wi.

²⁵ Jare kua ko jae Tumpa jei umeeta oï yandewe wae – tekowe opa mbae wae.

²⁶ Che aikuatía aï pewe kua mbaembae, echa’ä ime amokue wae reta uipota pembɨtawɨ ñonoï.

²⁷ Erëi awɨye piyapɨsaka jese reta, echa’ä pe reta ime ma penoi Espíritu Santo pemboe waerä. Tumpa etei ko umee ma pewe Espíritu Santo, jare jae jekuaeño uyemɨngeta añetete wae. Espíritu Santo ipuere’ä etei iyapu. Jare kërái jae pemboe wae rupi, jekuaeño piñemɨïru kawi Cristo ndiwe.

Tumpa taɨ reta ndarau etei jekuaeño uyawɨ Tumpa kotɨ

²⁸ Jayawe cheraɨ mii reta puau wae, jekuaeño piñemɨïru kawi Jesucristo ndiwe. Echa’ä jukuärái yayapo yawe, ndarau yayepokouka jokua ara Cristo ou ye yawe. Ñaïta jae jowai yayerowia rewe jare ñanemara mbae rewe.

²⁹ Jae nunga wi yande yayapo yawe jupi wae rupi, jokoropi uyekuaata yande ko jae Tumpa taɨ reta wae. Echa’ä pe reta pikuaa kërái Tumpa ko jae jupi wae. Jare jukuärái wi opaete taɨ reta uyapota ko jupi wae rupi.