1 Crónicas 22 - Biblia

David umbatɨka jeta mbaembae tupao wasurä

¹ Jayawe David jei iyupe: “Kua Jerusalén pe oïta Tumpa ikoño mái wae jëta jendarä jare mbaerenda jendarä wi Israel pewa reta uapɨ jese waerä mbaembae umee reta waerä Tumpa pe,” jei iyupe.

² Jayawe David umbatɨka opaete ambɨe ɨwɨ pewa Israel pe iko wae reta. Jare jae reta ipɨte wi David umbɨjee amokue ita ombowo wae retarä umbɨipe kawi reta waerä ita reta tupao wasu pewarä.

³ Jare David umbatɨka jeta jiero uyapoka waerä clavo reta jare bisagra reta öke reta pewarä. Umbatɨka wi jetaete jiero bronce pewa. Mbaetɨ kía ipuere uipapa poɨ wae, echa’ä jetaete ye ramo.

⁴ Umbatɨka wi jetaete ye ɨwɨräre, echa’ä amokue wae reta ɨwɨ Sidón pewa jare ɨwɨ Tiro pewa ueru umee jetaete ye ɨwɨräre David pe.

⁵ David jei iyupe: “Tupao wasu imeta ko ikawiete ye, jare jeräkua kawieteta ko opaete ɨwɨ rupi. Erëi cheraɨ Salomón taurusuete ko jare ndei iyarakuaa kawiete. Jáeramo ikawi ko ambatɨka waerä mbaembae ikawiete wae jae uyapoka waerä kuri jokua tupao wasu,” jei iyupe. Jáeramo ndei umano mbowe, David umbatɨka jetaete ye mbaembae ikawiete wae tupao wasu pewarä.

⁶ Joko wi David uenika taɨ Salomón jare jei chupe: “Pëti ara ndiyapokata ko tupao wasu yande Israel pewa yandeTumpa ikoño mái wae pewarä,” jei chupe.