1 Corintios 9 - Biblia

Maera Pablo ueka’ä yemborɨ ïru wae reta pe

¹ Pemae cheré kërái aiko wae re. Che chepuere tëi ayapo chepɨawiwe rewe ipotawe mbae Tumpa umaeño cheré wae. YandeYa Cristo etei ko chemondo jae jee re amɨmbeu waerä jesewa. Che aecha ko cheresa pe etei yandeYa Jesucristo. Jare pe reta perowia ma jese kua mbarawɨkɨ ayapo chupe wae rupi.

² Erëi amokue wae reta wɨrowia’ä yandeYa Cristo chembou wae. Erëi pe reta pikuaa kawi peï Cristo ko chembou wae, echa’ä che rupi ko pe reta etei perowia jese. Jesewe amokue wae reta iñera ñeño cheré.

³ Erëi ïru wae reta iñera yawe cheré jare jei yawe, “Pablo jeko mbaetɨ ko ïru kuimbae reta Cristo omondo wae jeko rami,” che tae chupe reta kuärái:

⁴ Che jare Bernabé nduipota yawe, orepuere tëi ndoe pewe pemee waerä orerembiurä jare siripi mii wi. Jukuärái orepuere nduyapo pepɨte rupi noï rambuewe.

⁵ Jare nduipota yawe, orepuere wi numenda tëi kuña Cristo re wɨrowia wae ndiwe jare orepuere nduraa tëi orerupie. Jukuärái uyapo ïru kuimbae reta Cristo omondo wae, jare Pedro, jare yandeYa tɨwɨ reta wi. Jare jukuärái ore orepuere tëi nduyapo wi.

⁶ Jare nduipota yawe, ndarau tëi nduparawɨkɨ ndukaru waerä. Jare orepuere tëi ndoe pewe piyandareko waerä oreré.

⁷ Jukuärái orepuere tëi nduyapo, echa’ä yande yaikuaa ñaï pëti sɨndaro ndarau iko iyé, echa’ä jokua oyokui wae umbɨepɨ oï chupe. Jae nunga wi uva oñotɨ wae jou ko uva ía. Jare jae nunga wi kapura iyandarekoa jou ko wi kapura kambɨ uyetamikue. Jukuärái wi che aipota yawe, chepuere tëi aiko pe reta chemborɨ rupi, echa’ä jekuaeño aparawɨkɨ aï pemaerä.

⁸ Jare amaeta’ä kua ɨwɨ pewa reta jeko reño, echa’ä Tumpa iñeerɨru pe jukuärái wi yanembɨarakuaa.

⁹ Echa’ä Moisés arakae uikuatía kuärái: “Umɨmbarawɨkɨ wae awɨye tuyuruyokua weye trigo umbɨpiriri oï yawe, weye ipuere waerä jou trigo.” Jukuärái uyekuatía oï. Jare Tumpa kua jei yawe, jei’ä ko weye reta reño.

¹⁰ Kua jei oï wi yanderé. Echa’ä jokua weye ko jae pëti yembɨjaanga mii, jare yanemboe oï uparawɨkɨ wae uyekouta ko jae iparawɨkɨ re. Jayawe umaetɨ wae jare trigo umbɨpiriri wae uyekouta ko reta iparawɨkɨ re.

¹¹ Jare jukuärái wi ko ore reta. Echa’ä ore nduparawɨkɨ ma pepɨte rupi numɨmbeu waerä pewe Tumpa iñee. ¿Orepuere’ä yerá nduyekou oremborɨ wae re?

¹² Che aikuaa aï ïru oporomboe wae reta ueka pewe pemborɨ waerä. Jare ïru wae reta ipuere uyapo jukuärái yawe, jayawe ore uasa katu mii ko orepuere tëi nduyapo chuwi reta. Echa’ä ore rani ko numɨmbeu pewe Tumpa iñee. Erëi ore ndueka’ä ko pewe mbae awe, echa’ä ore nduipota’ä pumbɨawái ramo. Añetete ore nduipota’ä kiawe wɨrɨ̈ro waerä ñee ikawi wae Cristo rewa orereko pewa. Jáeramo ore ndoe oreyupe: “Yepe tëi ime mbaembae uata yandewe, erëi ikawi ko ñamɨawäta waerä.” Jukuärái ore ndoe oreyupe.

¹³ Jare kua pe ime ye mbae re yayemɨngeta waerä yandepɨa pe. Pe reta pikuaa ko sacerdote reta uparawɨkɨ tupao wasu pe wae uyekou ïru wae reta ueru umee mbaembae Tumpa pewarä wae re. Mbaemɨmba reta uyuka umee reta Tumpa pewarä wae, jokua soo etei ko sacerdote reta jou.

¹⁴ Jukuäraiete wi yandeYa jei jokua ñee ikawi wae umɨmbeu wae reta tuiko ïru wae reta iporomborɨ rupi.

¹⁵ Jayawe che chepuereta tëi ko aeka pewe yemborɨ, erëi ayapo’ä jukuärái. Jare añawe awɨye pepɨa pe piyemɨngeta peï kua aikuatía aï wae, jae ko pemee chewe waerä yemborɨ. Che ayerowiaete aï aeka’ä pewe mbae awe ramo. Jare chemaerä, ndei pembɨepɨ chewe mbowe, jaekawi ko amano waerä.

¹⁶ Che akowara’ä ko pewe ñee ikawi wae amɨmbeu pewe wae re. Erëi yepe tëi ayerowia aï jokua re, jesewe mbaetɨ chepuere ayembutuicha, echa’ä jaeño ko ayapo aï Tumpa jei chewe wae. Erëi Tumpa tuiporaraka chewe amɨmbeu’ä yawe ñee ikawi wae Cristo rewa.

¹⁷ Añetete moná ayapo yawe che jae wae rupiño amɨmbeu waerä pewe ñee ikawi wae, jayawe jaekawita tëi ko pembɨepɨ waerä chewe. Erëi jukuärai’ä ko, echa’ä Tumpa ko jei chewe amɨmbeu waerä ñee ikawi wae. Jokuaño ko che ayapo aï.

¹⁸ ¿Mbae ra jayawe amɨngana aï kua mbarawɨkɨ ayapo aï wae rupi? Ayerowiaete aï chepuere rambuewe amɨmbeu ñee ikawi wae akowara mbae rewe. Jare jokua yerowia rupi ko jae uyembɨepɨ wae echa chewe jokua cheparawɨkɨ re. Jáeramo, yepe tëi chepuere aeka yemborɨ jokua cheparawɨkɨ re, erëi ayapo’ä jukuärái.

Kërái Pablo iko ïru wae reta wɨrowia waerä Cristo re

¹⁹ Jayawe ndarau kiawe ipuere jei chewe mbae ayapo waerä, echa’ä kiawe umbɨepɨ'ä oï chewe. Erëi che eteiño ma ko ayeyapo opaete wae pe ayeyokui waerä, jeta wae wɨrowia waerä Cristo re chereko rupi.

²⁰ ¿Kërái ra jokua? Yambɨjaanga. Che aï yawe judío reta ipɨte pe, che ayeyapo jae reta rami awɨye waerä che ayapo mbae ikawi mbae wae jae reta jowai. Echa’ä aipota jae reta uyapɨsaka waerä chiñee re jare jukuärái wɨrowia waerä Cristo re. Judío reta yureko opaete mbaembae Moisés arakae uikuatía wae rupi. Jáeramo yepe tëi che jukuärai’ä ma aiko, erëi aï yawe judío reta ipɨte wi, aiko wi Moisés uikuatía wae rupi.

²¹ Jae ramiño wi che aï yawe judío mbae wae reta ipɨte pe, che ayeyapo judío mbae wae reta rami jae reta uyapɨsaka waerä chiñee re. Jare jukuärái aramoi jae reta wɨrowiata Cristo re. Jae reta mbaetɨ yureko Moisés arakae uikuatía wae rupi. Jayawe che aï jae reta ipɨte pe yawe, aiko’ä wi Moisés uikuatía wae rupi. Erëi kua uipota’ä jei che aiko’ä Tumpa jei wae rupi, echa’ä opaete che ayapo Cristo jei wae rupi.

²² Jae ramiño wi che aï yawe ipɨräta’ä ñonoï Tumpa kotɨ wae reta ipɨte pe, che ayeyapo wi jae reta rami. Echa’ä aipota jae reta chererowia katu waerä jare uyekou reta waerä che aporomboe wae rupi. Jayawe jukuärái ko che aiko ipotawe kiape aï wae rupi. Che ayeyapo jae reta rami uyapɨsaka reta waerä chiñee re. Jukuärái aramoi amokue wae reta wɨrowiata chiñee re jare Tumpa uepɨta reta Tatawasurenda wi.

²³ Jukuärái ko chereko, ñee ikawi wae Cristo rewa jekuaeño uñemɨái waerä yembɨawái mbae rewe. Echa’ä ñee ikawi wae uñemɨái yawe, che ayekouta wi jeta wae reta ndiwe mbaembae ikawi wae re – jae ko jokua mbaembae ñee ikawi wae rupi ou yandewe wae re.

Yaiko kawita ko Tumpa umɨñatima waerä yandewe jokua re

²⁴ Erëi ndarau opaete wae uyekou oï jukuärái. Pe reta pikuaa uñeñokuiñokui wae reta opa rewe osi, erëi pëtiño upɨta uyekou waerä. Jukuäraita ko piko wi pe reta jokua uipota upurumbɨsɨpe wae rami. Pechaka pereko kawi Tumpa umɨñatima waerä pewe jese kuri.

²⁵ ¿Kërái piyapota jokua? Pe reta pikuaa wi opaete uñeñokuiñokui wae reta uyemungúe kawi ma osi kawi waerä. Jae reta ueya ma opaete mbae ikawita’ä chupe wae. Jukuärái uyapo reta umɨngana waerä pëti iñäkarewa mii ñanarokɨ pewa ɨmambae ikumewata oï chuwi wae. Erëi yande reta yaeka ñaï mbaembae ikumewata’ä oï yandewi wae ara pewa. Jáeramo yande jae nunga wi yaeyata ko jokua nunga mbaembae ikawita’ä yandewe wae.

²⁶ Jáeramo chemaerä, che aiko pëti kuimbae uñeñokuiñokui wae sɨmi osi wae rami. Mbaetɨ aiko kuimbae osi pochɨño wae rami. Jae ramiño wi che aiko pëti uñeräro wae uipota upurumɨamɨri wae rami.

²⁷ Jáeramo che amungúe cherete, cherete uyapo waerä che aipota wae. Aipota’ä cherete uipota wae uyembɨiya waerä cheré. Echa’ä yepe tëi che jeta ma amɨmbeu ïru wae reta pe Tumpa rewa, erëi aiko yawe cherete uipota wae rupiño, aramoi Tumpa ndarau umɨñatima chewe kuri cheparawɨkɨ re.