1 Corintios 8 - Biblia

Pablo oporomboe soo uñemee tumparaanga pe wae re

¹ Jae nunga wi pepɨrandu chewe ikawi ra yau waerä soo tumparaanga pe uñemee ma wae. Añawe ime amokue mbae re yayemɨngeta waerä yandepɨa pe. Amokue pe reta pere peï: “Ore nduikuaa kawi kua rewa,” pere. Jokua jaekawi tëi ko. Erëi yandearakuaa pochɨño ko yayembutuicha waerä. Ikawiete ko yayerau päwe waerä, echa’ä jukuärái ñañemɨmɨräta päwe Tumpa kotɨ.

² Ime yawe kía uyererowia katu opa mbae uikuaa wae, jae ko uikuaa’ä wɨteño mbae uikuaata tëi wae. Añetete jae mbae’ä ko.

³ Erëi kía uau Tumpa wae, Tumpa uikuaa oï kía ko jae wae.

⁴ Jayawe, ¿mbae pa pere? ¿Ikawita ra yau waerä soo tumparaanga pe uñemee ma wae? Yaikuaa ñaï tumparaanga reta mbaetɨ ko onoi tekowe. Jare yaikuaa ñaï wi ime ko pëtiño Tumpa añetete wae.

⁵ Jeta wae reta jei tëi: “Ime ko jeta tumpa reta jare mbaembae iya reta kua ɨwɨ pe jare ara pe wi,” jei reta.

⁶ Erëi yanemaerä ime pëtiño Tumpa añetete wae. Jae ko yandeRu Tumpa ara pe oï wae. Jae ko uyapo opaete mbaembae, jare yande reta yaiko yambutuicha waerä jae jee. Jare ime wi oï pëtiño yandeYa. Jae ko yandeYa Jesucristo. Jae rupi ko opaete mbaembae uyekuaa. Jare jae rupi ko wi yande reta ime ñanoi tekowe ipɨau wae.

⁷ Erëi amokue reta Cristo re wɨrowia wae mbaetɨ uikuaa kawi kua rewa. Jae reta michi raɨ wiwe wɨrowia tëi tumparaanga reta ime onoi tekowe wae. Jáeramo yepe tëi añawe jae reta wɨrowia Cristo re, erëi mbaetɨ ɨmambae iñakañɨ jokua mbae wi. Imeño wɨrowia tëi reta jokua soo owa jou reta wae, jae ko soo tumparaanga uyembɨadora pewa. Jare jou reta ma yawe, ipɨa pe uyerecha reta teko pe ñonoï wae. Jare uyerecha reta wi ikɨa rami Tumpa jowai. Jukuärái ko jeta wae reta.

⁸ Erëi ikawi ko yanemandúa waerä Tumpa pewarä ipotawe tembiu yau wae mbae’ä ko. Ndarau Tumpa umae kawi yanderé ipotawe tembiu yau wae rupi jare yau mbae wae rupi.

⁹ Erëi yepe tëi pepuere peu ipotawe tembiu pepɨawiwe rewe, jesewe piyandareko kawi piyé. Echa’ä ïru hermano ndeiño ipɨräta Tumpa kotɨ wae ipuere opia Tumpa jape wi mbae peu wae jeko pewa.

¹⁰ ¿Kërái ra ko jokua? Nde ndere ndeyupe ndikuaa kawi neï mbaetɨ onoi tekowe tumparaanga reta, jare tembiu yau wae mbae’ä ko Tumpa pewarä. Añetete tëi ko jokua. Erëi jokua ndeiño ipɨräta Tumpa kotɨ wae pewarä, jokua soo nde ndeu neï wae, chupe waerä imeño tumparaanga uyembɨadora pewa ko. Jare jae nderecha yawe kiape ndewapɨ neï tumparaanga uyembɨadora wae pe ndeu neï soo yawe, jayawe jae aramoi uipotata jou wi jokua soo uñemee ma tumparaanga pe wae.

¹¹ Jáeramo jokua ndeiño ipɨräta Tumpa kotɨ wae opiata oï Tumpa jape wi jokua nde ndikuaa wae ndere chupe wae jeko pewa. Ipuereta ko uipɨu ye tumparaanga reta wi. Jokua ko jae mbae ikawi mbaete wae, echa’ä yandeYa Cristo umano jae imaerä wi.

¹² Ïru hermano uyapo yawe mbae yandereko pewa, erëi jae imaerä kachi ko Tumpa jowai, jayawe yande yayawɨ ma ko ikotɨ. Jare yandeYa Cristo kotɨ etei ma ko yayawɨ wi.

¹³ Jáeramo ïru hermano ipuereta opia Tumpa jape wi soo che jau wae jeko pewa yawe, jayawe ndarau ye ma che jau soo. Echa’ä aipota’ä etei ïru wɨrowia Cristo re wae opia waerä che mbae ayapo wae jeko pewa.