1 Corintios 4 - Biblia

YandeYa Jesús omondo wae reta rewa

¹ Jayawe che aipota pe reta pemae oreré waerä jaeño nduyeyokui ko noï Cristo pe. Tumpa oreokui ma numɨmbeu waerä pewe mbaembae tenonde yawe jae uikuaaka’ä kía pe awe wae.

² Jare yaikuaa ñaï pëti uyeyokui wae iya oyokui yawe, imeta ko uyapo jupi iya jei chupe wae rupi. Echa’ä jaeño iya jowai uyemboɨta oï kuri iya jei waerä iparawɨkɨ re.

³ Jayawe mbae’ä ko chewe pe reta pere cheparawɨkɨ rewa wae, ikawi ra ani ikawi’ä ra oï wae. Jae nunga wi ipotawe kía nunga cheparawɨkɨ rewa jei wae, mbae’ä ko chewe wi. Jare che awe wi jae’ä cheparawɨkɨ ikawi ra ani ikawi’ä ra.

⁴ Echa’ä aikuaa aï yepe tëi chemaerä jupi ayapo aï mbarawɨkɨ Tumpa umee chewe wae, erëi jokua uipota’ä jei jupi ko ayapo mbarawɨkɨ. Jaeño yandeYa jeita oï cheparawɨkɨ ikawi ra oï ani ikawi’ä ra oï wae.

⁵ Jáeramo awɨye ma pikura kua mbarawɨkɨ Tumpa pewarä nduyapo noï wae. Peäro mii yandeYa ou yeta wae, echa’ä jokua ara ramo yandeYa jeita oï jupi rupi oreparawɨkɨ rewa. Jukuärái ipuereta uyapo, echa’ä jaeño oñonota oï ikatu pe etei opaetei yande mbae yayapo wɨari tëi wae jare jokua mbaembae yandepɨa japɨpe oï wae. Jayawe yandeYa ou ye yawe ramo ko Tumpa jeita oï yandewe pëti pëti pe mbae ikawi wae yandeparawɨkɨ rewa ikawi oï yawe.

⁶ Jayawe hermano mii reta, opaete kua mbaembae che jae ma pewe wae rupi, ayemɨngeta ma chiyé jare Apolos rewa. Jukuärái ayapo aï pepuere pikuaa waerä kërái piyemɨngeta waerä oreré pemboea re. Imeta ko piyemɨngeta pepɨa pe oreré kërái Tumpa iñee pe uyekuatía oï wae rupiño. Jare jukuärái piyapo yawe, ndarau piyembutuicha rewe oreparawo pëti waeño ïru wae wi.

Pablo umbɨeta uyererowia katu iyé wae reta pe

⁷ Erëi jekuaeño pe reta pipota oreparawo yawe jare orererɨ̈ro yawe, tapɨrandu pewe: ¿Kía pa umee pewe mbaepuere jukuärái piyapo waerä? Jare ¿marái ramo ra jekuaeño piyembutuicha? ¿Ime yerá penoi aramoi arakuaa Tumpa umee’ä pewe wae? Mbaetɨ. Jayawe pe reta awɨyeta tëi ko piyembutuicha.

⁸ Pe reta perowia tëi chawaa Cristo peapo ma ɨwɨ pewa reta imburuwicharä piko waerä. Jáeramo perowia tëi pikokatu wae rami peï jare uata’ä mbae pewe tëi. Jare perowia tëi wi pe retaiño ko piyeyapo jukuärái ore pomborɨ mbae rewe. Erëi jaekawita tëi ko piko yawe mburuwicha reta añetete wae. Echa’ä jukuärái yawe, Cristo oreapota tëi wi ko mburuwicha retarä pe reta ndiwe.

⁹ Erëi añawe rupi jukuärai’ä ko jokua oremaerä, ore Jesús oremondo wae reta. Echa’ä añawe rupi Tumpa oreñono ma chawaa ore taɨkuewaete nduiko waerä. Ore ko jae kuimbae reta ñeräro pe jamɨri wae ramiño, jare jupiwoiño oreyukata reta opaete wae jowake pëti yuwangata wae ramiño – kuimbae reta jare araɨwa reta jowake wi.

¹⁰ Jeta wae reta umae oreré orearakuaa mbae echa ko Cristo pe nduyeyokui noï ramo. Erëi pe reta, pëti ramiño ko peï Cristo re ramo, pemae tëi piyé pearakuaa katu wae echa. Ore parawete reta, orembaepuere mbae wae echa ko. Erëi pe reta pemae tëi piyé pembaepuere wae echa ko. Jeta wae reta orererɨ̈ro ma. Erëi pe reta piyembutuicha ma tëi.

¹¹ Añawe rewa jeta wese oriyembaɨ jare oreɨwe. Jare oreremimonde opa ipächa oï uata orewe ramo. Jeta wese orenupa reta, jare mbaetɨ tëta mii awe nonoi.

¹² Jeta wese orekandɨ nduparawɨkɨ orepo pe etei numɨngana orerembiurä. Jare jeta wese ïru wae reta uyepɨpeyu oreré. Erëi jukuärái yawe, ore mbaetɨ numɨñatima chupe reta jukuärái wi. Jaeño ndoe chupe reta: “Tumpa tuyapo pewe ikawi wae.” Jare jeta wese jae reta uyapo mbae ikawi mbae wae orekotɨ. Erëi jukuärái yawe, ore jaeño ndurupɨa chupe reta.

¹³ Jare jeta wese ïru wae reta uyemɨngeta kachi orekotɨ. Erëi jukuärái yawe, ore jaeño oriñee kawi chupe reta. Kua ɨwɨ pewa reta pewarä, ore ko jae ɨtɨ rami, jare ikawi’ä ma maeräwe wae rami chupe reta. Jukuärái ko ore nduikuasɨ noï añawe rewa nduyeyokui Cristo pe ramo.

Pablo ko jae reta tu rami

¹⁴ Che mbaetɨ aikuatía aï kuärái pe reta pumɨmaraka waerä. Jaeño ko aipota pumbɨarakuaa mii, echa’ä pe reta ko jae chesambiaɨ au wae reta rami.

¹⁵ Ipuere ko jeta pemboe ñonoï Cristo rewa, erëi cheño ko jae peru rami, echa’ä che rani amɨmbeu pewe ñee ikawi wae Jesucristo rewa.

¹⁶ Jáeramo che pumɨñera pemomoe waerä chereko.

¹⁷ Jare che amondo ma pewe Timoteo jae pemɨmandúa waerä jokua rewa. Jae ko cheraɨ auete wae rami, jare jae uyeyokui kawi yandeYa pe. Timoteo oo uwäe yawe joko pe, jae pemɨmanduata oï kuri kërái ko chereko Cristo pe ayeyokui rambuewe wae re. Jare jokua mbaembae jae pemboeta oï wae, jokua nunga etei wi ko che amboe Cristo re wɨrowia wae reta opaete kerupi rupi.

¹⁸ Che aikuaa amokue pepɨte rupi oï wae reta uyembutuicha tëi ma chekotɨ, echa’ä wɨrowia reta tëi ndarau ma a pepɨ.

¹⁹ Erëi jukuärai’ä ko. Echa’ä Tumpa uipota yawe, che ata ɨmambae apou ye pepɨ. Jare joko pe a ma awäe yawe, yaecha mbae ra jeita chewe reta kuri. Yaikuaata ñaï uyemɨngetaiño ra ñonoï reta ani añetete ra Tumpa umɨmbaepuere ma reta.

²⁰ Echa’ä añetete ko Tumpa jae reta imburuwicha wasu yawe, uyekuaata ko mbaepuere Espíritu Santo umee chupe reta wae rupi. Ndarau uyekuaa jae retaiño mbae jei wae rupi.

²¹ ¿Mbae pa pipota ayapo waerä che a ma awäe yawe pepɨ? ¿Pipota ra aiporaraka waerä pewe, ani pipota ra a waerä pepɨ ñee kawi rewe jare puau rewe? Peré ma añawe oï. Pipota’ä aiporaraka waerä pewe yawe, jayawe piyapɨsaka kawi mii kua chiñee re.