1 Corintios 2 - Biblia

Pablo umɨmbeu yawe ñee ikawi wae, mbaetɨ uiporu ñee ɨwate wae

¹ Jayawe hermano mii reta, jokua jeko pewa che jaeramo a pepɨ yawe amɨmbeu waerä añetete wae Tumpa rewa, mbaetɨ etei aipota ayemɨngeta pëti iñeengatu wae rami jare pëti iyarakuaa katu echa iyupe wae rami.

² Che aiko pepɨte pe yawe, apɨta amɨmbeu waerä pewe Jesucristo rewa jare kërái jae umano kurusu re wae. Mbaetɨ ye ma ambɨe mbae.

³ Jare che jaeramo a pepɨ yawe, che a cherete ipɨräta’ä iko rewe. Jare arɨrɨ aiko parawete akɨye ramo, aramoi ayawɨta aiko mbarawɨkɨ Tumpa umee chewe wae.

⁴ Jare amɨmbeu pewe yawe ñee ikawi wae, mbaetɨ aiporu ñee ɨwate wae arakuaa katu pewa arowiaka waerä pewe. Erëi pe reta pecha Espíritu Santo uparawɨkɨ iko che rupi imbaepuere rewe,

⁵ jukuärái Tumpa imbaepuere rupi perowia waerä Cristo re – mbaetɨ pëti kuimbae iyarakuaa rupi.

Tumpa umee yandewe arakuaa Espíritu Santo rupi

⁶ Erëi che aï yawe kía kía Tumpa kotɨ ukuakuaa ma wae reta ipɨte pe, che aiporu ko ñee arakuaa katu pewa. Erëi kua arakuaa mbaetɨ ko ɨwɨ pewa. Jare jae’ä ko wi mburuwicha reta kua ɨwɨ pewa iyarakuaa onoi wae rami. Echa’ä añetete jokua mburuwicha reta imbaepuere opata oï.

⁷ Erëi kua ñee ore numɨmbeu wae jae ko arakuaa Tumpa wi etei ou wae. Ore numɨmbeu kërái iyɨpɨ wiwe Tumpa ipɨayemɨngeta oï yayekou waerä jae ndiwe imbaepuere jupiete ye wae re. Erëi tenonde yawe kua ñee kiawe uikuaa’äse, echa’ä tenonde yawe Tumpa uikuaaka’ä etei yandewe ramo.

⁸ Añetete mbaetɨ pëti awe mburuwicha yepe kua arakuaa uikuaa wae. Echa’ä mburuwicha reta kua uikuaa yawe, ndarau tëi uyukaka reta kurusu re yandeYa imbaepuere wae yambutuicha wae.

⁹ Erëi ¿këraita ra ipuere uikuaa reta? Echa’ä Tumpa iñeerɨru pe jei yandewe kuärái: “Tumpa uyapɨkatu ma mbaembae ikawiete ye ye wae kía kía uau Tumpa wae reta pewarä. Erëi mbaetɨi kiawe uecha jare uyandu jokua mbaembae rewa wae. Jare mbaetɨi wi kiawe ipɨa pe yepe uyemɨngeta jese wae, echa’ä ikawiete ye ye wae ko.” Jukuärái uyekuatía oï.

¹⁰ Erëi yepe tëi ïru wae reta uikuaa’ä jokua mbaembae, erëitu yande reta yaikuaa, echa’ä Tumpa uikuaaka ma yandewe Espíritu Santo rupi ramo. Jare Espíritu Santo ipuere umee yandewe kua arakuaa, echa’ä Espíritu Santo uikuaa opaetei mbaembae. Espíritu Santo uikuaa Tumpa ipɨayemɨngeta retawe Tumpa uikuaaka’ä kía pe awe wae.

¹¹ ¿Kërái ra uikuaa? Yande reta yaikuaa ñaï kiawe ipuere’ä uikuaa ïru wae ipɨayemɨngeta chuwi. Jaeño uikuaa. Jae ramiño wi mbaetɨ kiawe uikuaa Tumpa ipɨayemɨngeta chuwi. Jaeño Tumpa iEspíritu uikuaa, echa’ä Espíritu Santo jare Tumpa pëtiño ko.

¹² Jare Tumpa kua ipɨayemɨngeta uikuaaka ma yandewe wi, echa’ä jae iEspíritu oï yandepɨa pe ramo. Jare arakuaa Tumpa umee yandewe wae kua ɨwɨ pewa’ä ko. Jae ko Espíritu Santo pewa etei. Jare Tumpa umee yandewe Espíritu Santo yaikuaa kawi waerä opaete mbaembae ikawi wae Tumpa umee ma yandewe wae.

¹³ Jare jokua ko jae mbaembae ore numɨmbeu noï wae. Jare ore numɨmbeu yawe jokua mbaembae rewa, mbaetɨ nduiporu arakuaa kua ɨwɨ pewa. Ore nduiporu ko ñee reta Espíritu Santo uikuaaka orewe wae. Jukuärái rupi ore nduikuaaka noï ïru wae reta pe mbaembae añetete wae Espíritu Santo uikuaaka orewe wae.

Jaeño Cristo re wɨrowia wae reta ipuere uikuaa kawi Espíritu Santo uikuaaka wae

¹⁴ Erëi Cristo re wɨrowia mbae wae reta mbaetɨ onoi Espíritu Santo. Jáeramo wɨrɨ̈ro reta mbaembae Tumpa iEspíritu uikuaaka wae, echa’ä jokua mbae’ä ko chupe reta. Jare jae nunga wi ipuere’äwe uikuaa kawi reta jokua mbaembae, echa’ä jaeño Espíritu Santo onoi wae reta ipuere uikuaa jokua mbaembae rewa.

¹⁵ Jare jokua Espíritu Santo onoi wae reta ipuere uikuaa kawi ipotawe mbaembae rewa, jare ipuere jei reta ikawi oï ani ikawi’ä oï wae. Erëi ïru wae reta ndarau ipuere uyapo jukuärái. Jae reta ndaraúi ipuere ikawi umae Cristo re wɨrowia wae reta ipɨayemɨngeta re ikawi ra ani ikawi’ä ra wae.

¹⁶ Jare ¿këraita ra ipuere reta? Echa’ä: “¿Ime ra kía uikuaa yandeYa ipɨayemɨngeta wae? ¿Ime ra kía ipuere umbɨarakuaa yandeYa wae?” ¡Mbaetɨ etei kiawe! Erëi yande reta ime ñanoi Tumpa iEspíritu ramo, yaikuaa kërái Cristo umae mbaembae re ikawi ra ani ikawi’ä ra oï wae.