1 Corintios 16 - Biblia

Pablo uikuaaka chupe reta kërái oporomborɨ reta waerä

¹ Añawe ime oï ambɨe re yayemɨngeta waerä. Pe reta pipota pikuaa piko kërái pepuere waerä pemborɨ Cristo re wɨrowia wae reta tëta wasu Jerusalén pe ikuasɨ ñonoï wae reta. Kua re che ayokui ma hermano reta ɨwɨ Galacia rupi uyembatɨ wae reta, jare añawe jukuäraiete wi pewe tamɨmbeu. Ikawita ko piyapo waerä kuärái:

² Opa domingo rupi pëti pëti wae pe reta piñono teeta ko jokua pemɨngana wae wi amokue korepoti kërái pemɨngana wae rupi. Jukuärái ko piyapota opa semana rupi awɨye waerä che joko pe ma aï yawe ramo piyapo peï kuri.

³ Jare che a ma awäe pepɨ yawe, piparawo kuri amokue wae reta peraaka waerä jokua korepoti piñono tee wae tëta wasu Jerusalén pe. Jare che aikuatiata tupapire reta aikuaaka waerä hermano reta Jerusalén pe ñonoï wae pe. Joko wi amondota reta Jerusalén pe jokua korepoti rewe.

⁴ Jare jaekawi pewe yawe che wi a waerä jae reta ndiwe, jayawe jae reta ipuereta uwata yuraa che ndiwe.

Pablo uikuaaka chupe reta jae ipɨayemɨngeta

⁵ Añawe chepɨayemɨngeta aï asa waerä ɨwɨ Macedonia rupi. Jare jokua ɨwɨ rupi asa ma yawe, aipota a apou pepɨ.

⁶ Jare aramoi apɨtata pepɨ ɨma katu rupi opa roɨ uasa rewa. Jare joko wi aramoi pe reta pepuereta chemborɨ kuri ketɨ ata wae rupi.

⁷ Aipota’ä apou pepɨ michi pewaño, erëi aipota apɨta pe ndiwe ɨma katu rewa yandeYa uipota yawe.

⁸ Añawe apɨtata kua tëta wasu Éfeso pe Pentecostés ara ou uwäe rewa.

⁹ Echa’ä yepe tëi ime jeta towaicho reta kua pe, erëi öke uyepea ma chewe ayapo waerä kua pe mbarawɨkɨ yandeYa umee chewe wae.

¹⁰ Erëi Timoteo oo uwäe yawe pepɨ, piyandareko kawi mii jese kuri, jukuärái ipɨawiwe oï waerä pepɨ. Echa’ä jae uparawɨkɨ oï wi yandeYa pe che rami.

¹¹ Jáeramo awɨye kía turɨ̈ro. Jare jae ou yeta ma oï yawe chekotɨ ïru hermano reta ndiwe, pemborɨ kawi mii kuri ou waerä ipɨakatu rewe.

¹² Jare che tamɨmbeu pewe wi hermano Apolos rewa. Che jae tëi chupe: “Ikawi ko nde ndeo ndepou waerä jokua Corinto pewa reta ipɨ ïru hermano reta ndiwe jae reta yuraa ye yawe jokotɨ,” jae chupe. Erëi jae uipota’ä oo añawe. Erëi pepe katu mii rupi oota ko oï kuri, ara ime chupe yawe.

¹³ Jae nunga wi che aipota jae pewe piyandareko kawi piyé awɨye waerä kía pembɨtawɨ. Jekuaeño perowia katu Cristo re. Piñemɨatangätu jare awɨye pekɨye mbae wi.

¹⁴ Jare opaete mbae piyapo wae, piyapo pepuruau rewe.

¹⁵ Hermano mii reta, pe reta pikuaa tenondete Estéfanas jëta pewa reta rani ko wɨrowia Cristo re ɨwɨ Acaya pe. Jare pikuaa wi jae reta uñeñono ma uyeyokui waerä ïru wɨrowia Cristo re wae reta pe.

¹⁶ Jáeramo che pumɨñera piyapɨsaka waerä jokua nunga reta re. Jare jae nunga wi piyapɨsaka mii opaete uparawɨkɨ yandeYa pe wae reta re.

¹⁷ Che ayerowia aï Estéfanas jare Fortunato jare Acaico yuweru chepɨ joko wi ramo. Echa’ä yepe tëi añawe che chepuere’ä aï pepɨ, erëi jae reta ime ñonoï kua pe che ndiwe pepepɨka pe.

¹⁸ Jare jae reta chemɨkɨrëɨ ngatu yewɨ kërái jae reta pemɨkɨrëɨ ngatu rami. Jáeramo ikawi ko pipɨu waerä kua nunga reta wi.

Pablo omondo saludo

¹⁹ Cristo re wɨrowia wae reta ɨwɨ Asia rupi kiape kiape uyembatɨ wae omondo pewe saludo. Jae nunga wi Aquila jare Priscila jare opaete jae reta jëta pe uyembatɨ wae reta omondo wi pewe saludo. Jae reta wɨrowia wi yandeYa Cristo re.

²⁰ Jae nunga wi opaete hermano reta kua pe ñonoï wae omondo wi pewe saludo. Jare pe reta wi piyembɨsaluda yawe, jekuaeño piyembɨsaluda piyerau rewe.

²¹ Che Pablo, che etei aikuatía aï pewe kua saludo miño chepo pe etei, pe reta pikuaa waerä che ko araaka aï pewe kua tupapire wae.

²² Ime yawe kía uau’ä yandeYa Jesucristo wae, Tumpa tuiporaraka chupe. ¡Eyu ye, nde, oreYa!

^23-24 Che puau opaete pe pëti ramiño peï Jesucristo re wae reta. YandeYa Jesucristo jekuaeño tipɨakawi pewe. Jukuärái tuiko.