1 Corintios 15 - Biblia

Pablo umɨmandúa reta ñee ikawi wae re

¹ Añawe hermano mii reta, aipota pumɨmandúa ñee ikawi wae amɨmbeu pewe wae re. Jokua ñee re ko pe reta perowia, jare piñemɨmɨräta ma jese täta.

² Jare jokua ñee ikawi wae rupi penoita tekowe opa mbae wae, perowia jese yawe añetete pewa. Erëi mbaetɨ pipɨsɨ kawi yawe ñee amɨmbeu pewe wae, jayawe jokua perowia tëi wae usiriwe’ä pewe.

³ Che amɨmbeu yuapɨ ye pewe jokua ñee ikawi wae Cristo etei tenonde umɨmbeu ma chewe wae. Jare jokua ñee ikawiete oï opaete ïru ñee reta wi. Kuärái ko jokua ñee: YandeYa Cristo umano mbaembae yayawɨ Tumpa kotɨ wae re opa umbái waerä yandewi. Jare jukuärái jae uyapo kërái arakae Tumpa iñeerɨru pe uyekuatía iko wae rupi.

⁴ Jae jetekue ïru reta oñono teöwerenda pe, jare joko wi mbapɨ ara pe Tumpa umbɨjekowe ye ueru umanokue wae reta ipɨte wi kërái Tumpa iñeerɨru pe arakae uyekuatía iko wae rupi.

⁵ Joko wi Cristo uyechaka Pedro pe. Jare joko wi jae uyechaka ïruwe jemimboe tenondewaete reta pe.

⁶ Jare joko wi jae uyechaka jeta ïru hermano reta pe uyembatɨ yureko reta rambuewe. Jokua reta ko pandepo chiëto uasa mii rupi. Jare jokua reta, yepe tëi amokue wae umano ma, erëi jeta imeño ñonoï.

⁷ Jare joko wi Cristo uyechaka tɨwɨ Jacobo pe, jare joko wi uyechaka opaete ïru kuimbae reta jae omondo ma wae pe.

⁸ Jare taɨkuete rupi Cristo uyechaka chewe wi. Erëi yepe tëi che ko Tumpa taɨ wi añawe, erëi che ko jae pëti sambiaɨ oa kawi’ä ichɨ wi wae rami.

⁹ Echa’ä tenonde yawe jeta che aiporarakase Cristo re wɨrowia wae reta pe. Jáeramo jokua ïruwe kuimbae reta Cristo etei omondo wae ko jae cherɨkeɨ tenondewa chemaerä, jare che jupi’ä etei ko jei reta waerä chewe Cristo etei omondo wae.

¹⁰ Erëi jesewe Tumpa ipɨakawi rupi Cristo omondo wae ko che. Jare jokua ipɨakawi uechaka chewe wae ukañɨ'ä etei ko oï. Echa’ä che aparawɨkɨ tätaete ïruwe kuimbae reta Cristo etei omondo wae wi. Erëi añetete cheiño’ä ko aparawɨkɨ. Tumpa ipɨakawi rupi chemborɨ oï.

¹¹ Jukuärái ko ñee ikawi wae ore kuimbae Cristo oremondo wae reta numɨmbeu noï wae. Erëi mbae’ä ko kía nunga ra ore reta numɨmbeu pewe jokua ñee wae. Ikawi wae ko jae pe reta perowia ma jokua ñee re.

Umanokue wae reta ikowe yeta

¹² Jayawe ore numɨmbeu pewe jesäka kawi rupi kërái Cristo ikowe ye ou umanokue wae reta ipɨte wi. Jayawe, ¿këraita pa amokue pe reta pere peï ndarau kiawe ikowe ye ou umanokue wae reta ipɨte wi?

¹³ Echa’ä umanokue wae reta mbaetɨ ikowe ye yawe, jayawe Cristo awe wi ko ikowe yewɨta’ä tëi ou umanokue wae reta ipɨte wi.

¹⁴ Jare Cristo mbaetɨ yawe ikowe ye ou umanokue wae reta ipɨte wi, jayawe kua numɨmbeu pewe wae usiriwe’ä etei ko pewe, jare jokua perowia Cristo re wae jae nunga wi usiriweta’ä tëi pewe.

¹⁵ Jae nunga wi umanokue wae reta ikowe yewɨ'ä yawe, jayawe ore reta oreapu ko noï tëi pewe Tumpa rewa. Echa’ä numɨmbeu ma pewe yandeRu Tumpa umbɨjekowe ye ko ueru Cristo umanokue wae reta ipɨte wi. Erëi kiawe ikowe yewɨ'ä yawe, jayawe jokua ndoe wae añetete wae’ä ko.

¹⁶ Añawe kua pe che tae ye pewe umanokue wae reta mbaetɨ ikowe ye yawe, jayawe Cristo jae nunga wi ikowe yewɨ'ä tëi ko ou umanokue wae reta ipɨte wi.

¹⁷ Jare Cristo mbaetɨ ikowe ye yawe, jayawe jokua perowia Cristo re wae usiriwe’ä etei ko pewe, jare jae nunga wi jekuaeñota tëi ko peï teko pe Tumpa jowai.

¹⁸ Jae nunga wi Cristo re wɨrowia rewe umano wae reta opa ma ko yuraa tëi Tatawasurenda pe.

¹⁹ Añetete, ñamae ñaï Cristo kotɨ wae jae ko yayekou waerä jaeño kua ɨwɨ pe ñaï rambuewe yawe, jayawe ikawita tëi ko opaete wae reta umae waerä yanderé yandeparareko rewe. Echa’ä jeiño ma yaeya tëi yandereko yaikose wae rupi.

²⁰ ¡Erëi Cristo añetete ikowe ye ma ko ou umanokue wae reta ipɨte wi! Jare jukuärái jae rani ikowe ye uikuaaka waerä kërái opaete umanokue wae reta ikowe yeta ko wi.

^21-22 Kua yandepuere yambɨjaanga ambɨe mbae uasa yandewe wae re. Yande yaikuaa kawi ñaï kuimbae tenondewaete wae Adán uyawɨ ramo yawe Tumpa kotɨ, mano uike kua ɨwɨ pe. Jukuärái opaete yande reta ñamanota ko, echa’ä yande ko jae Adán pewa ramo. Erëi Cristo wi etei ma ko ou tekowe. Jare añawe yande ko jae Cristo pewa ramo, yande yaikowe yeta ñaï wi umanokue wae reta ipɨte wi.

²³ Cristo rani tenonde ikowe ye. Jare Cristo ara wi ou ye yawe ramo yande yaikowe yeta ñaï kuri wi. Jukuäraita ko yasa opaete yande Cristo pewa yaiko wae reta.

²⁴ Joko wi ara taɨkuewa uwäe ma yawe, yandeYa Cristo opata umbɨyapɨ oï kuri opaete jowaicho reta imbaepuere – jae ko mburuwicha reta kua ɨwɨ pewa, jare mburuwicha reta mbaetɨ kua ɨwɨ pewa wi, jare ïru mbaepuere onoi wae yaecha mbae wae reta wi. Joko wi opaete mbaepuere Cristo umee yeta Tu pe.

²⁵ Añetete ko, Cristo ikota mburuwicharä jae opa umbɨyapɨ rewa jowaicho reta imbaepuere.

²⁶ Jare towaicho taɨkuewaete wae jae umɨamɨrita onoi wae jae ko mano.

²⁷ Jokua mano re wi Cristo ime onoi mbaepuere, echa’ä Tumpa umee chupe mbaepuere opaetei mbaembae re. Jukuärái uyekuatía oï Tumpa iñeerɨru pe. Erëi kua ñee opaetei jei wae uipota’ä jei yandeRu Tumpa etei oï wi Cristo ipo pe, echa’ä Tumpa ko umee chupe mbaepuere opaete mbaembae re.

²⁸ Jayawe Tumpa Taɨ opaetei mbaembae umɨamɨri yawe, jae etei uñemeeta oï Tu ipo pe. Jukuärái Cristo uyapota oï Tu onoi ye waerä mbaepuere opaetei mbaembae re jaeño mái pewa. Jukuäraita ko.

²⁹ Jae nunga wi jokua yaikowe yeta ñaï wae wɨrowia’ä wae reta pe, che aipota jae chupe reta kuärái: Pe reta pikuaa peï amokue wae reta uyembɨsakambuka ñonoï tëi ɨ pe umanokue wae reta ipepɨka pe. Erëi ¿maera pa jukuärái uyapo reta tëi umanokue wae reta mbaetɨta ikowe ye yawe?

³⁰ Jare oremaerä, añetete ko umanokue wae reta ndarau ma ikowe ye yawe, jayawe, ¿maera pa ore jekuaeño nduiko yemumburu rupi?

³¹ Echa’ä opa ara rupi chemumburu cheyuka reta waerä. Jokua aipota pe reta pikuaa waerä, echa’ä pe reta ko jae chehermano mii reta yandeYa Jesucristo rupi, jare amae peré ayerowia rewe.

³² Täta aiporara ma parawete kua tëta wasu Éfeso pe kuimbae jeko pochɨ wae reta jeko pewa – jae reta mbaemɨmba pochɨ wae rami ko. Erëi añetete umanokue wae reta mbaetɨta ikowe ye yawe, jayawe opaete aiporara wae usiriweta’ä etei ko tëi. Echa’ä Tumpa ndarau umɨñatima chewe ikawi wae aiporara aiko wae re. Jare jae nunga wi umanokue wae reta mbaetɨta ko ikowe ye yawe, jayawe jaekawita tëi ko aramoi yae waerä yandeyupe yandepɨawiwe rewe: “Yakaru jare yakau añawe, echa’ä kuriye aramoi ñamanota.” Jukuärái aramoi yandepuere yayemɨngeta tëi.

³³ Erëi awɨye piyembɨtawɨka peï jukuärái uyemɨngeta wae reta pe. Jekuaeño piñemɨïru yawe jeko kachi wae reta ndiwe, jae reta urükumewata pewi pereko kawi.

³⁴ Piko ye arakuaa katu añetete wae rupi, jare awɨye jekuaeño piyawɨ Tumpa kotɨ. Chemaerä ime chawaa amokue pe reta ndeiño pikuaa Tumpa. Jukuärái che jae pewe pumɨmaraka waerä.

¿Këraita ra ikowe ye umanokue wae reta?

³⁵ Erëi aramoi kía jeita: “¿Këraita ra ikowe ye umanokue wae reta? Jare añetete yawe umanokue wae reta ikowe yeta, jayawe ¿këraita pa jokua jekowe ye umanokue wae jete opa ma jüu wae?” jeita reta.

³⁶ Erëi che tae iyarakuaa mbae wae retaño ko jukuärái uyemɨngeta. Yande reta temitɨ rami ko. Echa’ä pëti temitɨ ñañotɨ yawe, imeta ko opa jüu rani ambɨe jeñɨ waerä.

³⁷ Jare yaikuaa kawi ñaï yande ñañotɨ yawe pëti temitɨ – ipuere ko awati ani ipotawe ïru temitɨ – oëta’ä jokua jäɨkue ñañotɨ wae etei.

³⁸ Erëi uyekuaata ko ambɨe ye kërái Tumpa jei wae rupi. Jare jukuärái wi opaete temitɨ ambɨe ye wae reta uyekuaata wi ambɨe ye ye.

³⁹ Jae ramiño wi mbaetɨ ko opaete tekowe ime kua ɨwɨ pe wae jete oyowake pëti ramiño. Echa’ä kuimbae jete, jare mɨmba jete, jare pira jete, jare wɨra jete oyowake’ä etei ko.

⁴⁰ Jare jae nunga wi mbaembae ara pe ñonoï wae ambɨe ye ko mbaembae kua ɨwɨ pe ñonoï wae wi. Mokui rewe maepöra ko, erëi mbaetɨ oyowake.

⁴¹ Jare jukuärái wi opaete mbaembae ara re ñonoï wae oyowake’ä ko reta. Echa’ä warasɨ, jare yasɨ, jare yasɨtata reta ambɨe ye ye ipöra. Jare yasɨtata retawe ipöra pe uyuawɨ iyuwi.

⁴² Jae ramiño wi yanderete añawe ñanoi wae ambɨe yeta wi ko oï kuri yaikowe ye ma yawe. Echa’ä kua yanderete oñotɨta reta wae, opata ikumewa temitɨ rami. Erëi yaikowe ye ma yawe, ndarau etei ma ikumewa ye.

⁴³ Kua yanderete oñotɨta reta wae maepöra mbae wae ko jare ipɨräta mbae wae ko. Erëi jokua ikowe yeta oï wae maepöraeteta ko jare ipɨrätaeteta ko.

⁴⁴ Yaikuaa kawi mbaembae kua ɨwɨ pe oï wae ime onoi jete ɨwɨ pewa. Jare jukuärái wi mbaembae ara pe oï wae ime onoi jete ara pewa. Añawe kua yanderete oñotɨta reta wae, jae ko kua ɨwɨ pewa. Erëi jokua ikowe yeta oï wae ikota ara pewa.

⁴⁵ Yaikuaa kawi waerä kua mbaembae rewa, yaecha ñamae yandetenondewaete reta Adán jare Cristo re. Uyekuatía oï Tumpa iñeerɨru pe kuärái: “Kuimbae tenondewaete Adán jee wae umbɨpɨ tekowe onoi.” Jukuärái jei, jare jokua uyemɨngeta oï tekowe ɨwɨ pewa re. Erëi Cristo ko jae yandetenondewaete taɨkue rupi outa iko wae, jare jae ko umee yandewe tekowe ara pewa.

⁴⁶ Jayawe kua uikuaaka yandewe tenondete oï tekowe ɨwɨ pewa, jare joko wi tekowe ara pewa taɨkue uyekuaata oï kuri wae. Jukuäraita ko.

^47-48 Jare ¿këraita ra ko oï kuri yanderete? Jokua kuimbae tenondewaete wae ɨwɨ pewa ko, echa’ä ɨwɨ wi etei Tumpa uyapo ramo. Jare jukuärái wi yanderete ɨwɨ pewa ko Adán jete rami. Erëi joko wi ɨma katu rupi ou wi kuimbae ambɨe ye wae ara pewa – jae ko Cristo. Jare añawe yande ko jae Cristo pewa ramo, yanderete oïta wi kuri jae jete rami – jae ko ara pewa.

⁴⁹ Añawe kërái yande yaiko jokua kuimbae ɨwɨ pewa echaete, jukuäraiete wi yande yaikota kuri jokua kuimbae ara pewa echaete wi. Jukuäraita ko.

⁵⁰ Jayawe hermano mii reta, Tumpa oï ma yawe opaete wae imburuwicha wasurä jaeño mái pewa, ndarau etei yandepuere ñaï kuri jae ndiwe kua yanderete ɨwɨ pewa ndiwe. Echa’ä kua yanderete jaeño mái pewa’ä ko, echa’ä jüuta oï. Jokua re ikawi yaikuaa kawi waerä.

⁵¹ Mase, añawe tamɨmbeu pewe mbae tenonde yawe Tumpa uikuaaka’ä etei wae. Amokue yande Cristo re yarowia wae reta ndarau opa ñamano ñaï kuri. Erëi opaete yande reta yanderete Tumpa umbɨpɨau yeta oï kuri.

⁵² Kua uyeyapota oï aramoete mii pëti jei wae peño pëti yasapɨmi peño Tumpa jemimbɨ wasu taɨkuewaete wae uñee yawe. Echa’ä Tumpa jemimbɨ wasu uñeeta oï, jare Cristo re wɨrowia rewe umano wae reta ikowe yeta onoi waerä jete ndarau etei ikumewa wae. Jare joko wi yande imeño ñaï wae reta, Tumpa opata umbɨpɨau ye oï yanderete.

⁵³ Echa’ä yanderete ikumewa oo oï wae imeta ko uyepepɨka yanderete ndaraúi ikumewa wae ndiwe. Ani yandepuere yae chupe yanderete mano kotɨ oo oï wae imeta ko uyepepɨka yanderete ndarau etei ipuere umano wae ndiwe. Jukuärái uyeyapota oï yandewe kuri kërái kía yanembɨyemimonde oï wae rami.

⁵⁴ Jayawe jokua uasa ma yawe, jare uyepepɨka ma yawe yanderete mano kotɨ oo oï wae jare ikumewa oo oï wae, jayawe ramo uyeyapota ma oï Tumpa iñeerɨru pe uyekuatía oï wae. Echa’ä joko pe uyekuatía oï kuärái: “Tumpa opa ma umɨamɨri mano jare opa ma umbɨyapɨ wi.

⁵⁵ Jayawe nde, mano, ¿kiape pa neï añawe? Ndepuere’ä ma oremɨamɨri, jare ndarau ye ma ndea oreré.” Jukuärái uyekuatía oï.

⁵⁶ Mase, mano oa ma yanderé yayawɨ Tumpa kotɨ jeko pewa. Añetete, Tumpa jei wae yayawɨ ramo, jekuaeño tuicha teko pe ñaï Tumpa jowai.

⁵⁷ Erëi ñamee yasurupái Tumpa pe, echa’ä jae jekuaeño yanemborɨ ñamɨamɨri waerä kua mbaembae yandeYa Jesucristo uyapo yandewe wae rupi.

⁵⁸ Jáeramo hermano mii reta, piñemɨmɨräta yandeYa re, jare awɨye pesɨrɨ chuwi. Jekuaeño piñemɨatangätu piyapo waerä mbarawɨkɨ yandeYa umee pewe wae. Echa’ä pe reta pikuaa peï, peparawɨkɨ yawe yandeYa pe, yandeYa umeeta oï pewe kuri ikawiete wae jokua re.