1 Corintios 13 - Biblia

Yapuruau’ä yawe, jokua mbaembae yayapo wae mbae’ä etei ko

¹ Aramoi chepuere ayemɨngeta ambɨe ye ye ñee reta pe, jare araɨwa reta iñee pe awe aramoi. Erëi che apuruau’ä yawe, chiñee ko ïru wae reta pe käpana jɨapu pɨi oï wae rami jare platillo täta uyendu pochɨño wae rami.

² Jare aramoi Tumpa umee oï chewe ñee amɨmbeu waerä ïru wae reta pe. Jare aramoi ime anoi opaete arakuaa chepuere waerä aikuaa opaete mbaembae ïru wae reta uikuaa mbae wae. Jare aramoi chepuere ambɨsɨrɨ ɨwɨtu wasu reta che tuicha arowia Tumpa re ramoño. Erëi mbaetɨ apuruau yawe, mbae’ä etei ko che.

³ Jare aramoi chepuere amee opaete chembaembae reta iparawete wae reta pe amborɨ reta waerä. Jare aramoi cherowaicho reta chepɨsɨ chemombo tata pe cheyuka, che arowia Cristo re ramo. Erëi mbaetɨ apuruau yawe, mbaetɨ etei usiriwe chewe.

Yapuruau añetete wae rewa

⁴ Yapuruau añetete rewe yawe, yandepɨawasuta ko jare ñaniñee kawita ko. Añetete yapuruau yawe, ndarau ñañemɨro, jare yayembɨkateta’ä, jare yayembutuichata’ä wi.

⁵ Jare jae nunga wi yaiporuta’ä ñee kachi wae, jare yaekata’ä yanemaeräño. Jare jae nunga wi yandepochɨ woita’ä mbae re, jare ndarau yambaembasɨ wi.

⁶ Añetete yapuruau yawe, yayerowiata’ä mbae kachi wae re, erëi yayerowiata ñaï mbae jupi wae re jare añetete pewa re.

⁷ Jare yarupɨata wi mbae ikawi mbae wae yanderapicha pe. Añetete yapuruau yawe, yarowiata’ä jawoi pewa mii mbae kachi wae yanderapicha rewa. Jekuaeño yarowia katuta mbae ikawi waeño uyapo waerä. Jare yepe tëi ko ïru wae reta uiporaraka yandewe aramoi, erëi yarupɨata chupe. Jokoropi ko uyekuaa añetete yapuruau wae.

Yapuruau wae ndarau etei opa

⁸ Jekuaeño imeta yapuruau waerä. Erëi jokua ñee reta Tumpa etei umee yandewe yamɨmbeu waerä wae opata ko. Jae nunga wi jokua mbaepuere ime oï ambɨe ye ye ñee reta pe yayemɨngeta wae ukañɨta oï. Jae nunga wi jokua mbaepuere ime oï yaikuaa kawi waerä mbaembae ïru wae reta uikuaa kawi’ä wae opata ko wi.

⁹ Echa’ä ime mbae jupiete ye wae uyekuaata oï jokua mbaembae ipepɨka pe. Añawe rupi, yepe tëi amokue yande reta ime ñanoi mbaepuere yaikuaa waerä mbaembae ïru wae reta uikuaa kawi’ä wae, erëi jesewe jokua arakuaa uata oï. Jare yepe tëi añawe Tumpa umee oï amokue yandewe reta ñee yamɨmbeu waerä wae, erëi jokua ñee reta uata oï wi. Jare jukuärái oï wi opaete ïruwe mbaepuere reta ndiwe.

¹⁰ Erëi ou ma uwäe yawe jokua jupiete ye wae, jayawe opaete jokua mbaepuere mbaetɨ opaetei oï wae reta opata ko, echa’ä ndarau ma yaiporu.

¹¹ Kua yandepuere yambɨjaanga kërái yakuakuaa ñaï wae re. Yande reta, ¿kërái ra yaikose yande michi yawe? Yayemɨngetase sambiaɨ rami, jare yaikuaase sambiaɨ rami, jare yandepɨa pe yayemɨngetase wi sambiaɨ rami. Erëi yakuakuaa ma yawe, yaiko’ä ma sambiaɨ rami.

¹² Jae ramiño wi añawe rupi yandearakuaa Tumpa pewa uata oï kërái pëti sambiaɨ ndei iyarakuaa rami. Yande ko jae kía umae oï iyé pëti yechaka jäwe oï wae pɨpe wae rami. Erëi pëti ara, jokua jupiete ye wae ou ma uwäe yawe, yandearakuaa ikota jupi rupi kërái yande reta ñamae koiño kía re rami. Jare jayawe ramo yaikuaa kawita Tumpa kërái jae yandekuaa kawi wae rami. Jare jokua ara wiwe ndarau ma yaiporu mbaepuere reta Tumpa añawe umee yandewe wae.

¹³ Jukuärái ko opaete mbaepuere reta Tumpa añawe umee yandewe wae opata oï. Erëi jesewe jekuaeño imeta yarowia waerä Tumpa re. Jare jekuaeño imeta ñaäro waerä yarowia katu rewe Tumpa jei yandewe wae. Jare jekuaeño imeta yapuruau waerä. Kua mbapɨ mbaembae jekuaeño imeta yayapo waerä. Jare kua mbapɨ wae wi yapuruau wae ko jae ikawiete ye wae.