1 Corintios 12 - Biblia

Mbaepuere reta Espíritu Santo umee yandewe wae rewa

¹ Jayawe hermano mii reta, añawe ime ambɨe mbae re ambeuta pewe wae. Pe reta pepɨrandu piko chewe wi jokua mbaepuere reta Espíritu Santo umee yandewe wae re. Jaekawi. Kua rewa aipota pe reta pikuaa kawi waerä.

² Pe reta pikuaa kawi peï kërái ndei perowia yandeYa re mbowe, pe reta piyembɨtawɨka piko tumparaanga reta pe. Echa’ä yepe tëi tumparaanga reta ipuere’äwe mbae yepe jei, erëi pemaeño piyé pembɨadora jese reta waerä.

³ Jáeramo che aipota pikuaa waerä kía nunga ñee ko ou Tumpa wi. Ime yawe kía uyemɨngeta Espíritu Santo rupi añetete rewe wae, ndarau uyepɨpeyu Jesús re. Jare jaeño Espíritu Santo rupi ipuere kía jei: “Jesús ko jae cheYa.”

⁴ Jare jae nunga wi Espíritu Santo umee yandewe opaño kërái raí mbaepuere reta. Erëi yepe tëi oyowake’ä ko jokua mbaepuere reta, erëi opaete pëti Espíritu wiño ko ou.

⁵ Jare yepe tëi yande reta oyowake’ä ko yayeyokui yandeYa pe, erëi yandeYa pëtiño ko.

⁶ Jare yepe tëi Tumpa uparawɨkɨ ambɨe ye ye pëti pëti yande reta rupi, erëi jae pëtiño ko.

⁷ Jayawe Espíritu Santo umee pëti pëti Cristo re wɨrowia wae pe kërái omborɨ waerä ïru hermano reta ambɨe ye ye rupi. Jare jukuärái opaete wae uñemɨkɨrëɨta Tumpa kotɨ.

⁸ Amokue wae pe Espíritu Santo umee uyemɨngeta waerä iyarakuaa katu rewe. Jare ïru wae reta pe umee uikuaaka kawi waerä mbaembae ïru wae reta uikuaa kawi’ä wae.

⁹ Jare jae nunga wi Espíritu Santo umee ïru wae reta pe wɨrowia katuete waerä Tumpa re. Jare jae etei wi umee ïru wae reta pe ipuere waerä umɨnguera imbaerasɨ wae reta.

¹⁰ Jare jae nunga wi Espíritu Santo umee ïru wae reta pe uyapo waerä mbaembae tuicha wae kiawe ipuere’ä uyapo wae. Jare ïru wae reta pe umee umɨmbeu waerä ñee Tumpa wi etei ou wae. Jare umee wi ïru wae reta pe uikuaa kawi waerä ñee ou ra Espíritu Santo wi ani ou ra aña wi. Jare umee ïru wae reta pe ñee ambɨe ye ye wae uyemɨngeta waerä – jae ko jae ñee uyemɨngeta mbaei pɨpe wae. Jare ïru wae reta pe Espíritu Santo umee ipuere waerä umbɨasa iñee pei jokua ambɨe ye ñee reta wae. Jukuärái ko amokue mbaepuere reta Espíritu Santo umee yandewe wae.

¹¹ Kua mbaepuere reta añetete ko jeta jare oyowake’ä ñonoï. Erëi Espíritu Santo pëtiño ko, jare jae ko umee yandewe pëti pëti wae pe ambɨe ye ye mbaepuere jae uipota wae rupi.

Opaete wɨrowia Cristo re wae reta Cristo jete pewa rami ko

¹² Kua yandepuere yambɨjaanga yanderete re. Yande yaikuaa ñaï, yepe tëi yanderete pëtiño ko, erëi yanderete pe ime jeta mbaembae ñanoi. Jare opaete kua mbaembae reta, yepe tëi oyowake’ä ko, erëi opaete wae yanderete pewa ko jare yanderete pëtiño ko. Jare jukuärái wi ko opaete yande reta pëti ramiño ñaï Cristo re wae.

¹³ Echa’ä yepe tëi opaete yande reta ambɨe ye ye ko yandeyuwi, erëi Espíritu Santo yandapo ma pëti ramiño Cristo re. Yande ko jae Cristo jete pewa rami ipotawe kía ko yande wae. Ipuere ko yande judío ani judío mbae wae, jare uyeyokui wae ani uyeyokui mbae wae. Erëi opaete yande reta pëti ramiño ko ñaï Cristo re, jare yandepuere yayekou oyowake Espíritu Santo re yandepɨa pe oï wae rupi.

¹⁴ Erëitu yepe tëi ñaï pëti ramiño Cristo re, jesewe jeta ko ñaï yande reta jare oyowake’ä ko yaiko.

¹⁵ Jokua ikawi ko, echa’ä, ¿këraita ra ko yandepɨ jei yawe, “Che jae’ä ko ndepo; jáeramo che ayendu’ä ko nderete pewa echa”? Ipuere yawe jukuärái jei yandepɨ, jayawe ndarau yayapɨsaka jese, echa’ä yaikuaa yandepɨ yanderete pewa ikawi wae ko.

¹⁶ Jae ramiño wi yandeapɨsa jei yawe, “Che jae’ä ko nderesa; jáeramo che ayendu’ä ko nderete pewa echa,” jukuärái jei yawe, ndarau yayapɨsaka jese. Echa’ä yande yaikuaa yandeapɨsa yanderete pewa ikawi wae ko.

¹⁷ Añetete opaete yanderete pe oï wae ime iparawɨkɨi. ¿Këraita ra ko opaete yanderete tesaño yawe? Ndarau tëi mbae yandepuere yayandu. Jukuärái wi yanderete opaete yandeapɨsaño yawe, ndarau tëi mbae yandepuere ñaëtu.

¹⁸ Erëi jukuärai’ä ko yanderete, echa’ä Tumpa uyapo pëti pëti yanderete pewa reta oyowake’ä, jare oñono reta jenda jenda pe kawi kërái jae uipota wae rupi.

¹⁹ Echa’ä jae uikuaa ndarau ikawi ime yawe pëtiño mbae yanderete pe. Jae ramiño wi Tumpa yandapo pëti pëti yande reta ambɨe ye ye.

²⁰ Jare ikawi ko yaikuaa kawi waerä yande reta pëti pëti wae ikawi wae ko ïru wae reta pewarä. Yanemandúa kawi ñaï, yepe tëi yanderete pewa reta jeta ko oï, erëi pëtiño ko yanderete jare opaete mbaembae yanderete pewa uyeko ñonoï iyé reta.

²¹ Ndarau yanderesa jei yandepo pe: “Che aipota’ä nde chemborɨ waerä.” Jukuärái wi ñanäka ndarau jei yandepɨ pe: “Che aipota’ä nde chemborɨ waerä.”

^22-24 Añetete jukuärai’ä ko, echa’ä pëti pëti yanderete pe oï wae ikawi oï ïru wae reta pe. Kua re ikawi yayemɨngeta waerä yandepɨa pe. Yaikuaa yanderete pe oï wae jeta ko oï. Amokue yanderete pewa reta uyekuaa ikawi oï jare mbaetɨ yandepɨa’ä jese. Erëi ime ïru mbaembae yanderete pewa reta ñanemara yaechaka wae. Jáeramo yayandareko jese reta awɨye waerä yaechaka. Jukuärái yayapo, echa’ä yaikuaa opaete mbaembae yanderete pewa ikawi ko. Jare oï wi ïru mbaembae yanderete pewa aramoi yarowia tëi usiriwe mbae wae. Erëi jesewe añetete ndarau yandepuere yaiko mbaetɨ jokua mbaembae yawe. Jayawe yepe tëi ime amokue mbaembae yanderete pewa mbae’ä echa yandewe wae, erëi Tumpa ko uyapo yande reta yayandareko kawi waerä jese reta.

²⁵ Jukuärái Tumpa uyapo mbaembae yanderete pewa uyandareko kawi waerä iyé jare awɨye waerä uyembɨyao reta iyuwi.

²⁶ Añetete pëti mbae yanderete pewa uiporara oï yawe, opaete yanderete pewa reta uiporara ñonoï päwe. Jukuärái wi pëti mbae yanderete pewa uyerowia oï yawe, opaete yanderete pewa reta uyerowia ñonoï wi.

²⁷ Jayawe yanemandúa kawi yawe opaete kua mbaembae reta re, añawe yandepuere yae yambɨjaanga rewe opaete yande ko jae yandeYa Cristo jete, jare pëti pëti ko ñaï jae jete pewa.

²⁸ Jukuärái ko yande jae imaerä yaiko wae reta. Jare yandepɨte pe Tumpa tenonde oñono amokue reta Cristo etei omondo jae jee re wae. Jaɨkue rupi oñono ïru wae reta umɨmbeu waerä ñee Tumpa wi etei ou wae. Jare jaɨkue rupi Tumpa oñono wi ïru wae reta oporomboe kawi waerä. Jare jaɨkue rupi Tumpa umee mbaepuere amokue wae reta pe uyapo waerä mbaembae kiawe ipuere’ä uyapo wae, jare ïru wae reta pe umɨnguera waerä amokue wae reta imbaerasɨ wi. Jare Tumpa oñono wi ïru wae reta ikatuete oporomborɨ waerä, jare amokue ïru wae reta upurumbɨarakuaa kawi waerä, jare amokue ïru wae reta uyemɨngeta waerä ambɨe ye ye ñee reta pe.

²⁹ Jayawe, ¿mbae pa uyekuaa oï kua pe? ¿Opaete ra ko jae Cristo etei omondo reta jae jee re wae? Mbaetɨ. Jare Tumpa umee’ä opaete wae pe ñee umɨmbeu reta waerä. Jare opaete’ä wi ko oporomboe waerä. Jare opaete’ä wi ko uyapo waerä mbaembae kiawe ipuere’ä uyapo wae.

³⁰ Jare opaete’ä wi ko ipuere waerä umɨnguera imbaerasɨ wae reta. Jare opaete’ä wi ko ipuere waerä uyemɨngeta ambɨe ye ye ñee reta pe. Jare opaete’ä wi ko ipuere umbɨasa jokua ñee ïru wae reta pe iñee pei.

³¹ Jukuärái ko oï jokua mbaepuere reta Espíritu Santo umee wae. Erëi pe reta pipotaete tëi penoi jaeño jokua mbaepuere reta ikawiete wae. Erëi ime mbae ikawiete ye wae peka waerä jokua mbaepuere reta wi. Jare añawe tamɨmbeu pewe jokua rewa.