1 Corintios 1 - Biblia

Pablo wɨraaka saludo

^1-2 Cherɨkeɨ reta, cherɨwɨ reta, jare cherindɨ mii reta tëta wasu Corinto pe piko wae, tenonde araaka aï pewe saludo. Che ko jae Pablo. Ikawi iko Tumpa pe Jesucristo chemondo waerä opaete kerupi jae jee re amɨmbeu waerä iñee. Jokuaerä ko jae chereni. Che jare hermano Sóstenes ndiwe aikuatía aï kua tupapire opaete pe piyembatɨñoi Tumpa jee re wae reta pe. Pe reta ko peï pëti ramiño Jesucristo re. Jare Tumpa pereni ma jare peñono tee ma piko waerä jae imaerä. Jare pe retaño’ä ko peapo jukuärái Tumpa. Jae nunga wi Tumpa uyapo ma jukuärái opaete kía kía wɨrowia yandeYa Jesucristo re wae reta ipotawe kerupi ñonoï wae. Echa’ä yandeYa ko jae reta iYa wi.

³ YandeRu Tumpa jare yandeYa Jesucristo jekuaeño tipɨakawi pewe jare tuyapo pewe piko waerä pepɨakatu rewe.

Uata’ä etei mbae awe Espíritu Santo umee wae

⁴ Che jekuaeño amee aï yasurupái Tumpa pe peré jare jokua jae uyapo pewe wae re. Echa’ä jae ipɨakawi rupi peapo ma pe reta piko waerä pëti ramiño Jesucristo re.

⁵ Jare pëti ramiño peï Cristo re ramo, piyekou peï jeta mbaembae ikawiete wae re. Echa’ä Tumpa umee ma pewe arakuaa jae pikuaa waerä, jare jae nunga wi umee ma pewe pepuere waerä pemɨmbeu jupi rupi kawi jesewa.

⁶ Jukuärái piyekou peï, jare jukuärái rupi Tumpa uikuaaka oï opaete wae pe añetete ko jokua ñee Cristo rewa ore numɨmbeu pewe wae.

⁷ Jáeramo kua mbaembae reta rupi pepuere pikuaa kawi uata’ä etei pewe mbae awe Espíritu Santo umee wae. Jukuärái ko añawe rupi peäro peï rambuewe piyerowia rewe yandeYa Jesucristo ou yeta wae.

⁸ Jare añawe rupi jokua ara yandeYa Jesucristo pewa ou rewa, Tumpa jekuaeño pemɨmɨrätata oï ikotɨ pepuere waerä jokua ara piyemboɨ jae jowai pereko mbae rewe.

⁹ Jare pe reta pepuere perowia katu Tumpa re uyapo waerä pewe jukuärái, echa’ä jae etei ko pereni piñemɨïru kawi waerä Taɨ yandeYa Jesucristo ndiwe. Jare Tumpa ndarau uyawɨ oï pewe.

Pablo umbɨeta chupe reta uyembɨyao tee tee reta iyuwi ramo

¹⁰ Jayawe hermano mii reta, che pumɨñera yandeYa Jesucristo jee re awɨye waerä piyeaka pe yepái jare awɨye waerä piyembɨyao tee tee peyuwi. Erëi pumɨñera piñemɨïru päwe pëti ñee wae rupiño.

¹¹ Jukuärái che jae pewe, echa’ä amokue Cloé jëta pewa reta umɨmbeu ma chewe pe rewa, kërái piyeaka peï pe yepái wae.

¹² Jeräkua chewe amokue pe reta pere peï piyererowia katu rewe, “Che chemboea ko jae Pablo.” Jare amokue wi pere peï, “Che chemboea ko jae Apolos.” Jare ïru pe reta wi pere peï, “Che chemboea ko jae Pedro.” Jare ïru pe reta wi pere peï, “Che chemboea ko jae Cristo.” Jukuärái pe reta opa piyembɨyao tee tee peï peyuwi.

¹³ Jukuärái pere yawe, Cristo pembɨyao tee tee peï rami ko. Erëi ¿uyembɨyao tee tee ra oï Cristo? Ndarau. Jayawe, ¿maera pa pe Cristo jete pewa piko wae reta opa piyembɨyao tee tee peï peyuwi oreré? ¿Che yerá amano kurusu re peré? ¿Cheree re yerá piyembɨsakambuka ɨ pe? Mbaetɨ etei. Che jae’ä ko peYa.

^14-15 Chemaerä añawe che amee yasurupái Tumpa pe mbowɨño ko pumbɨsakambu ɨ pe ramo. Echa’ä añawe pepuere’ä etei pere piyembutuicha rewe, “Pablo jee re ko ayembɨsakambuka,” pere waerä. Jaeño ambɨsakambu Crispo jare Gayo.

¹⁶ Añetete yepe ambɨsakambu wi Estéfanas jëta pewa reta. Erëi mbaetɨ chemandúa kawi ambɨsakambu ra ïru wae reta wi.

¹⁷ Mbowɨño pe reta pumbɨsakambu, echa’ä jokuaerä'ä ko Cristo chembou. Cristo chembou ko ñee ikawi wae amɨmbeu waerä ïru mbaembae reta wi. Jare che amɨmbeu yawe ñee ikawi wae, aiporu’ä arakuaa kua ɨwɨ pewa. Jaeño amɨmbeu sɨmi rupi kërái Cristo umano kurusu re yanderé mbaembae yayawɨ Tumpa kotɨ wae re. Echa’ä kua ñee rupiño ko uyekuaa Tumpa imbaepuere yanderepɨ waerä jokua teko ñanoi wae wi.

Arakuaa kua ɨwɨ pewa mbae’ä ko Tumpa pewarä

¹⁸ Añetete jeta wae reta pewarä ñee ikawi wae Cristo umano kurusu re wae mbae’ä ko chupe reta. Jukuärái ko Tatawasurenda kotɨ oo ñonoï wae reta. Erëi yanemaerä yaikuaa ko jokua ñee ime onoi mbaepuere, echa’ä jokua ñee rupi ko Tumpa yanderepɨ oï.

¹⁹ Arakuaa kua ɨwɨ pewa ndarau ipuere yanemborɨ. Jukuärái ko jei yandewe Tumpa iñeerɨru pe, echa’ä joko pe uyekuatía oï kuärái: “Tumpa jei: ‘Che aikuaakata aï jokua iyarakuaa katu echa iyupe wae reta pe iyarakuaa añetete mbae’ä ko. Jae ramiño wi aikuaakata aï opaete mbaembae uikuaa kawi echa iyupe wae reta pe añetete uikuaa’ä etei ko mbae awe,’ jei.” Jukuärái uyekuatía oï.

²⁰ Jayawe Tumpa jei jukuärái yawe, ¿mbae ra yaeta iyarakuaa katu echa iyupe wae reta rewa? Jare ¿mbae ra yaeta jeta uyemboe wae reta rewa jare jokua ikatu uyeaka waerä wae reta rewa? Yepe tëi kua reta iyarakuaa katu echa ko, erëi jae reta iyarakuaa kua ɨwɨ pewaño ko. Jare Tumpa uikuaaka ma yandewe arakuaa kua ɨwɨ pewa añetete mbae’ä etei ko.

²¹ Echa’ä ipuere’ä kiawe uikuaa Tumpa jukuärái rupi. Jukuärái Tumpa uikuaaka ma yandewe, jare jaeño ko jae iyarakuaa katuete ye wae opaete wae wi. Jare yepe tëi ñee Cristo rewa uyemɨmbeu oï wae mbae’ä ko jeta wae reta pewarä, erëi ime yawe kía jokua ñee re wɨrowia wae, Tumpa uyerowia rewe uepɨ teko onoi wae wi.

²² Erëi ïru wae reta pewarä, kua ñee mbaetɨ jaekawi chupe reta. Echa’ä jeta judío reta uipota tëi uecha reta rani ore nduyapo waerä mbaembae kuimbaeño ndarau etei ipuere uyapo wae ndei wɨrowia reta mbowe. Jare judío mbae wae reta jekuaeño ueka tëi ñonoï arakuaa jae reta iyarakuaa rupiño.

²³ Erëi ore mbaetɨ numɨmbeu kërái jae reta uipota ñonoï wae rami. Ore numɨmbeuñoi opaete wae pe kërái Cristo uyekutuka pëti kurusu re yanderé. Jare opaete seri judío reta pewarä, kua ñee pëti yembɨawái ko awɨye waerä jae reta wɨrowia. “Këraita ra Upuruepɨ wae umano,” jei reta tëi. Jare jeta judío mbae wae reta pewarä, kua ñee mbae’ä ko chupe reta.

²⁴ Erëi Tumpa ñanereni ko judío reta ipɨte wi jare judío mbae wae reta ipɨte wi jae imaeräño ñaï waerä. Jare yanemaerä kua ñee Cristo rewa wae ikawiete ko, echa’ä yaikuaa ko Cristo rupi uyekuaa Tumpa imbaepuere jare iyarakuaa.

²⁵ Añetete, jokua ñee Cristo imano rewa wae mbae’ä ko jeta wae reta pe, jare jei reta tëi yandewe: “Petumpa ipɨräta’ä chawaa oï,” jei reta tëi. Erëi jesewe Tumpa ko jae iyarakuaa katuete ye jare imbaepuerete ye opaete wae wi.

Tumpa uiparawo wae reta

²⁶ Jayawe hermano mii reta, pemandúa kawi peï Tumpa jaeramo peparawo yawe, mbowɨño pe reta piko iyarakuaa katu kua ɨwɨ pewa reta iyarakuaa wi. Jare mbowɨño piko imbaepuere wae reta, jare jae nunga wi mbowɨño piko kuimbae jeräkua wae reta.

²⁷ Erëi Tumpa pewarä jokua mbae’ä etei ko. Tumpa uiparawo jae imaerä jokua ïru wae reta jei tëi chupe iyarakuaa mbae wae reta ko. Jukuärái uyapo Tumpa umɨmaraka waerä iyarakuaa katu echa wae reta. Jae ramiño wi Tumpa uiparawo jae imaerä imbaepuere mbae wae reta umɨmaraka waerä imbaepuere wae reta.

²⁸ Jae ramiño wi Tumpa uiparawo ikuasɨ wae reta, jare ïru reta wɨrɨ̈rokue reta, jare usiriwe’ä etei jei chupe reta wae. Jokua nunga reta etei ko Tumpa uiparawo jae imaerä umɨmichika waerä uyererowia katu iyé wae reta.

²⁹ Jukuärái ko Tumpa uyapo awɨye waerä kiawe ipuere uyembutuicha jae jowai.

Yayerowia yandeYa uyapo wae re

³⁰ Pe retái piyeyapo’ä ko pëti ramiño Jesucristo re. Tumpa ko uyapo jokua mbae. Jare Cristo rupi Tumpa uikuaaka yandewe iyarakuaa. Echa’ä Cristo uyapo wae rupi opa ma uyembɨepɨ teko yareko wae, jare jukuärái Tumpa umae yanderé yandereko mbae wae rami jare ñaneñono tee jae imaerä.

³¹ Jáeramo Tumpa uyapo ma yandewe opaete kua mbaembae reta ramo, ikawi ko yayapo waerä Tumpa iñeerɨru pe uyekuatía oï wae rami. Echa’ä joko pe jei kuärái: “Ime yawe kía uipota uyembutuicha wae, tuyembutuicha yandeYa mbae ikawi wae uyapo chupe wae re.” Jukuärái uyekuatía oï.