Yuhana 8 - Bible Zulgo

Məkəs duwa tə tats à ŋgat aka mege muva

¹ Ama Yesuw a da aà kwite ana tə zalar dìyes Ndzendzebire ya.

² Ndidwe ŋana i mèkwède hedwe ka, a mbəɗ gər a batsah ga Mbulum ata. A daha, a ndza a bəɗ. Gà mburma tserdze tə daha a təv ŋgar. Dite a dza ba aà metsike a tar guma ŋgar.

³ I təv ana a riŋ a tsik a ter a ya ka, gà ɓəzla medzeŋge məpala ahəm Mbulum nda gà *Farisa ta gə̀saraha məkəs duwa, tə tats dər aka mege muva. Ta hitse dər aka miɗ mburma tserdze,

⁴ ta gwaɗa a Yesuw: «Əbay, araha, mì tats à məkəs duwa naha aka mege muva.

⁵ Ama Musa a gwaɗa a mər i təv məpala ahəm Mbulum a ka, na kàa lwim aà wura kataya ka, say makə̀ɗà ŋgat nda kur ana, dite kər dze ana, kù gwa aaka ana, meme?»*fa*

⁶ Ti tsikar kataya ka, a sàs a tar magəsa ŋgat a gedzewe, dite ka, ta ŋget a vatwa aà məmàr à bakal mbaŋa. Ama Yesuw a tsaraka taŋa ka, luz a kal à gər ŋgar a bəɗ, a dza ba aà mewetse duwa aka ahəɗ nda kəla ahər.*fb*

⁷ Tar riŋ ta wiz ihər a bazlam ata hiywe. I dəba ŋa ya, Yesuw a zla gər aà Mbulum, a gwaɗa a tar: «Wur ana ika magər kurum aka ge bakal ilik tsiye ka, mà làhar à kur dzekwiŋ.»

⁸ I dəba ŋa ya, a mbə̀ɗaba gər aka mewetse dukw ŋgar ata a bəɗ asa.

⁹ Tə tsaraka bazlam Yesuw ata kataya tsara ka, sùtùtùtwa ti lèlekweye fit. Na a lah aà medeye ka, gà bàba ŋana dzekwiŋ. Gà Yesuw ti zeha riŋ à gər tar nda məkəs ata ika miɗ ŋgar a.

¹⁰ I dəba ŋa ya, a zla gər aà mbulum asa, a gwaɗar: «Məkəs aaha, gà mburma ana ta gəsara kər a ana, tar i ŋga? Seriye aka gəs kər tsa seyiŋ a?»

¹¹ Məkəs ata a gwaɗar aaka: «Awaŋ, Əbay gà.» Yesuw a gwaɗar asa: «Iye tekeɗe ka, seriye ga à gis a kər ɓav tsa. Daba dukw yak, ama kəla ka, ka ta mà aka mege bakal asa tsa.»}

Yesuw ka, dzaydzay gər ahəɗ

¹² I dəba ŋa ya, Yesuw a fàfəl a gà mburma asa. A gwaɗa a tar: «Iye ka, dzaydzay gər ahəɗ. Wur ana a zezem a iye ya ka, a ti ndze a i luvuŋ asa tsa. Ama a ŋget a dzaydzay ŋa ana a vile a mesife a mburma ya.»

¹³ Gà *Farisa a riŋ i fata, tə tsaraka kataya ka, ta gwaɗar: «Kər ki gebe a sida ba yak nda ahər yak pəra ana, meme na mìi sir a dər, ka tsik ka, ndzer ŋa ya?»

¹⁴ Yesuw a gwaɗa a tar aaka: «Ku mege i ge ba sida nda ahər gà ŋa tekeɗe ka, ndzer hiywe, aɗaba iye ka, i səraba təv ana i dara iɗəm a, kige tsa, təv ana i de aɗəm a ya asa. Ama kurum kà sərum təv gà ana i dara iɗəm a, kige tsa, təv ana i de aɗəm a ya tsa.

¹⁵ Ki gwim a seriye ka, biy gà mburma gər ahəɗ, kamala ana ki dzelwim a nda gər kurum a pəra. Ama iye ka, i ge a seriye aka gər wura tsidze.

¹⁶ Ku mege i ge a seriye tekeɗe ka, seriye ga ka, ndaka vatwa ŋa, aɗaba i ge a seriye ata ka, nda mezìwè gər gà tsa. Mìi ge a ka, nda Tsir gà ana a slərra iye ya məma.

¹⁷ Aɗaba kà sərum, mewetse ŋa a riŋ i wakita məpala ahəm kurum ka: *fd*

¹⁸ Kamala taŋa ya, iye ŋa ka, i gebe a sida ba gà, dite Tsir gà ana a slərra iye ya tekeɗe, a riŋ a ge a sida gà asa mbaŋa.»

¹⁹ Ta gwaɗar: «Tsir yak ŋa ana, i ŋga?» Yesuw a gwaɗa a tar aaka: «Kà sərum iye tsa, dite kà sərum Tsir gà ɓav tsa asa. Na mege kà sərum iye ka, ana ka, ki sirwim a Tsir gà mbaŋa.»

²⁰ Yesuw a tsik bazlam ata ka, i təv ana a riŋ a tsik a guma ŋgar a mburma i batsah ga Mbulum, bise nda təv ana tə dzawa aɗəm dukw taf ana aɗaba Mbulum a. Ama wura aka gəs ŋgat tsidze, aɗaba məpàslà ahər ŋa ana Mbulum a tiker a ka, aka ndze aɗəm zukw tsa.

Yesuw a be aà ɗaf a gà na tàa gəs ŋgat nda gəzləŋ tsiye

²¹ I dəba ŋa ya, Yesuw a gwaɗa a tar asa: «I debiŋa. Na Yàa da ka, ki ti yehwim a iye tekeɗe, taf masakəŋa. Ama kurum ka, ki metwim a i bakal kurum. Ki slwim a aà mede a təv ana i de aɗəm a ya tsa.»

²² Gà bàba gà Yahuda tə tsaraka kataya ka, ta gwaɗaba ika magər tar: «Wànà à kiɗ a ba ŋgar a, na a gwa ka, ki slwim a aà mede a təv ŋgar ana a de aɗəm a ya tsiye?»

²³ Yesuw a gwaɗa a tar aaka asa: «Kurum kà wum ɗa ba ka, ika gər ahəɗ. Ama iye i dara ka, i gər ŋa ya. Kurum ka, gà mburma gər ahəɗ. Ama iye ka, mburma gər ahəɗ tətsà.

²⁴ Aɗaba taŋa na i gwaɗa a kurum ka, ki ta metwim a i bakal kurum a. Aɗaba na kàa gəsum iye, *fe* nda gəzləŋ kurum tsəka, ki metwim a i bakal kaɗəŋ ndzer.»

²⁵ Ta gwaɗar: «Kər ana, weke?» Yesuw a gwaɗa a tar aaka: «Iye ka, wele ana i tsikewa a kurum daga piŋŋe ya.

²⁶ Taŋa gà bazlam aà iye i gà gər pampam hinne, na i tsik a kurum a zləmana, dite seriye à gis a dər kurum a. Ama i me a kurum a à bazlam wele ana a slərra iye ya ivaɗ. Ŋgat ka, mala ndzer ŋa. I me a dər a mburma ka, dukw ana i tsarakara i təv ŋgar a ɗekɗek, tsəka, i zle ahər a biy ga tsa.»

²⁷ A tsik a tar bazlam ata ka, aà Tsir ŋgar, ama ka, tə sər tsa.

²⁸ Aɗaba taŋa, Yesuw a gwaɗa a tar asa: «Na kàa kəɗum iye, *wur ana a dara i təv Mbulum a ka, ki sirwim a dər, iye ka, kuɗa. Dite ki sirwim a dər mbaŋa ka, i ge a duwa ilik nda ahər gà tsa, ama i me a ka, à dukw ana i tsarakara i təv Tsir gà ya.

²⁹ Wele ana a slərra iye ya ka, a riŋ i təv ga. Aka miyak à iye à gər gà tsa, aɗaba iye ihər i ge a ka, dukw ana a dar a gər a ɗekɗek.»

³⁰ I fataya tsara ka, gà mburma hinne ta gəs ŋgat nda gəzləŋ tar, aɗaba bazlam ŋgar ata a tsik a.

Wur ana a ge a bakal a ka, ŋgat ka, ɓele bakal

³¹ I dəba ŋa ya, Yesuw a gwaɗa a gà Yahuda ana ta gəs ŋgat nda gəzləŋ a: «Na ki giswim a ahəm aà guma gà ka, kàa nwim gà ɓəzla mazazama iye nda ndzer.

³² Dite ki ti sirwim a ndzer ŋana. I dəba ŋa ya ka, ndzer ŋa ata a be a à kurum i ɓele ata ya.»

³³ Gà asiŋ gà mìsle ŋgiɗ ta gwaɗar aaka: «Mər ka, gà gwala Abəraham. Ama ka, maa ne ɓele wura ilik tsidze. Dite meme na ki gweɗe a mər a ka, mìi ta be a i ɓele ya ya?»

³⁴ Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Ku weke na a ge a bakal ka, ŋgat ka, i ɓele bakal pəra.

³⁵ Ama ɓele ka, a ndze a i bəra mala ga ŋgar aà biybiy tsa, say kəla mala ga ana ti tike a aà ahər i təv maɗàmà ba tar aà biybiy a.

³⁶ Kamala taŋa ya, na iye, Kəla Mbulum, Yàa be à kurum i ɓele ya ka, ki ziwwim a gər kurum ndzer.

³⁷ I sər kurum. Kurum ka, gà ɓəza Abəraham seyiŋ. Ama kurum riŋ ihər ka, ki yehwim a vatwa aà makə̀ɗà iye, aɗaba ana kàa gəsum bazlam gà tsiye.

³⁸ Iye ihər i tsik a kurum a ka, dukw ana Tsir gà ɗifiŋ dər a. Ama kurum ka, ki gwim a dukw ana tsir kurum a ɗif a kurum dər a mbaŋa.»

³⁹ Ta gwaɗar aaka: «Na a ne batsah tsir mər ka, Abəraham.» Yesuw a gwaɗar: «Na mege kurum gà ɓəza Abəraham nda ndzer ka, ana ka, ki gwim a megemir ŋgar ana a ge akahər ata ya mbaŋa.

⁴⁰ Ama iye ka, i tsikewa a kurum ndzer ŋa ana i tsarakara i təv Mbulum a. Ku mege kataya tekeɗe ibam ka, kurum riŋ ihər ki yehwim a vatwa aà mekìɗe iye dər akaba ivaɗ. Medzìbe dukw ata ki wìsehwim a ya ka, Abəraham aka ge ilik tsa.

⁴¹ Kurum ihər ki meswim a ka, à dukw ana tsir kurum ata a gewa ya.» Ta gwaɗar aaka: «Tsir mər ka, Mbulum ilik. Mər ka, gà madazla tsa.»

⁴² Yesuw a gwaɗa a tar: «Na Mbulum Tsir kurum ndzer ka, ana ki weywim a iye mbaŋa, aɗaba iye Kəla ŋgar. I dara ka, i təv ŋgar a. I dara ka, nda gər gà ya tsa, ŋgat na a slərra iye ya ivaɗ.

⁴³ Aàmala na kà tsarakum dukw ana i tsik a kurum a ya tsiye? Aɗaba kàa slwim medzè zləm a bazlam gà tsa.

⁴⁴ Tsir kurum ka, Əbay sitene. Ki gwim a tekeɗe ka, dukw ana a sasar a. Ŋgat mala makə̀ɗà mburma daga piŋŋe. Aka tsik dukw ana ndzer a ilik tsidze, aɗaba ana ndzer ŋgar a riŋ tsiye. I təv pàrsa ŋgar ata a sasa ya ka, hiywe a mətsawa i ŋgar ka, aà taŋa pəra, aɗaba ana ŋgat mala pàrsa, dite ŋgat tsir gà pàrsa ya asa.

⁴⁵ Ama iye ka, iye ihər i tsik a ndzer. Aɗaba taŋa na kə̀ gəsum iye nda gəzləŋ tsiye.

⁴⁶ Weke na ika magər kurum ka, a sle aà megweɗe a, Yàa ge bakal a? A riŋ tsa. Na iye ihər i tsik a ka, dukw ana ndzer ana, dite aàmala na kə̀ gəsum iye nda gəzləŋ tsiye?

⁴⁷ Wur ana mburma Mbulum a ka, à dze a zləm a bazlam Mbulum. Ama kurum ka, gà ɓəza Mbulum tsa, aɗaba taŋa na kàa dzum zləm a bazlam ata tsiye.»

Aka ana tàa wa Abəraham zukw tsiye ka, Yesuw a riŋ dukw ŋgar

⁴⁸ Gà mburma ata ta gwaɗa a Yesuw: «Yawwa, maa gwaɗak tsiye, kər ka, gà Samariya, sitene i ba yak a?»

⁴⁹ A gwaɗa a tar aaka: «Sitene i ba gà tsa, i zlibe a ka, aà Tsir gà. Ama kurum ka, ki fìrwim aà iye a kamala dukw taf masakəŋa ya.

⁵⁰ Ama iye ka, i yehe a mezlibe ana gà mburma tì zlibe a à iye ya tsa. Wele ŋgiɗ a riŋ ilik na a waya mezlibe ata gà mburma tì zlibe a à iye ya. Wele ata na a ne mala masàsà ikaba seriye bazlam aaha ya.

⁵¹ Iye ihər i gweɗe a kurum a nda ndzer, pàrsa iɗəm tsa: Wele ana aka gəs bazlam gà ya ka, à mìt a tsa, a ndze a aà biybiy.»

⁵² Gà mburma ata ta gwaɗar: «Ama mì sər kinehe ka, sitene i ba yak ndzer kuɗa. Akahər ata Abəraham aka mət, gà ɓəzla məma à guma Mbulum tekeɗe, tàa mata kuɗa ka, dite kər ki gweɗe a ka, wur ana aka gəs ahəm aà bazlam yak a ka, à mìt a tsidze ana, meme?

⁵³ Na Abəraham tsir mər aka mət seyiŋ ana, wànà kər kà dzala ana, kà za ŋgat a? Dite gà ɓəzla məma à guma Mbulum tekeɗe, tàa mata asa ana, kər ana, weke?»

⁵⁴ Yesuw a gwaɗa a tar aaka: «Na iye ŋa i zlibe a à ba ŋa ka, a ge a ŋgulum tsa. Ama Tsir gà ana a tike iye a təv mezlibe ana tì zlibe a à iye ya. Ŋgat ka, wele ana kù gwaɗum, Mbulum kurum a.

⁵⁵ Ama ku mege kù gwaɗum ahər kataya tekeɗe ka, kà sərum ŋgat tsa. Iye ka, i sər ŋgat lele dukw ŋgar. Na bəla i gwa, i sər ŋgat tsəka, i ti ne a mala pàrsa kamala kurum a mbaŋa. Ama i sər ŋgat, dite i gis a ahəm ŋgar asa.

⁵⁶ Batsah tsir kurum Abəraham aka ŋgaya ba hinne, i təv ana Mbulum a tsikar i sida ya, a ta ŋget a a pat gà ana i dere a ya. Aka ŋgatar, dite a ŋgaya ba hinne kaɗəŋ.»

⁵⁷ Gà mburma ata ta gwaɗar: «Mive yak aka sle dzik ə̀zləm zukw tsəka, ki gweɗe a ka, Yàa ŋgat a Abəraham dze ana, meme?»

⁵⁸ Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Aka ana tàa wa Abəraham zukw tsiye ka, iye riŋ.»

⁵⁹ Tə tsaraka kataya ka, ta pala kur i bəɗ a, ta kelewa a dər ŋgat. Ama Yesuw a kaha ba aà tar a, ta ŋgatar asa tsa. I dəba ŋa ya ka, a dara aà tar i ga Mbulum batsah ŋa ata ya.