Yuhana 6 - Bible Zulgo

Yesuw a vəl dukw mezime a gà mburma hinne, ti ze a dəbuw ə̀zləm

¹ Aləka i dəba ŋa ya, Yesuw a mah ba i fataya, a daba aka lìdè duluv Galile. Tə zal a zləm duluv ata ka, Tiberiyas asa mbaŋa.

² Gà mburma hinne tə zazam ŋgat, aɗaba ana tàa ŋgat a dukw mene aà mburma ana a ge, a mbala à gà mburma i dukw məməta ya ya.

³ Aləka ti ndzeha a fata ka, gà Yesuw nda gà ɓəzla mazazama ŋgat tə daha, tə tsala aka dìyes duwa, tə ndza riŋ a bəɗ a fata.

⁴ Akahər ata ka, megirive gà Yahuda ana tə zalar Paska ya, aka à mendze aɗəm.

⁵ Yesuw a fə̀r ikaba ya ka, gà mburma a riŋ ti dehe a a təv ŋgar hinne. Aɗaba taŋa, a gwaɗa a a Filip: «Ki slekwe aà mesìkimere a dukw mezime aaha ana, i ŋga ya, na aà mivile a gà mburma aaha ide ya?»

⁶ A tsiker kataya ka, aà mesèmete dər, meme na Filip a gweɗe aaka a ya. Aɗaba ŋgat ŋa ka, aka səraba dukw ana a ge a ya.

⁷ Filip a gwaɗar aaka: «Ku mege kà sə̀kəmakwara dukw mezime ŋa biy kur siŋgwe dərməka sula tekeɗe ka, a sle a ter a tsa, na dite bəla ku weke a ŋget a zaakwa zaakwa tekeɗe ya.»

⁸ Mìsle ŋgiɗ ilik ika magər gà ɓəzla mazazama Yesuw ata ya, zləm ŋgar Andire, damər Simun Piyer, a gwaɗar:

⁹ «Kəla duwa naha i faha ka, tapa ɗaf ihər ə̀zləm, nda kilif sula mbaŋa dze ana, taŋa na a ge a ŋgulum a gà mburma aaha hinne ya ya?»

¹⁰ Yesuw a gwaɗa a gà ɓəzla mazazama ŋgat ata: «Gwaɗum a gà mburma tə ndzaya a bəɗ tserdze.» Gà mburma tə tsaraka kataya ka, tə ndzaya a bəɗ aka kwizir a riŋ mbèffe i bəɗ i fata hinne. Ama gà mburma ana i fataya, gà ɓəzla ga ɗekɗek ka, ti sle dəbuw ə̀zləm.

¹¹ Yesuw a daha, a ndzək tapa ɗaf ata, a ge dərraha kəkaaha a Mbulum, dite a dzaya a ba a gà mburma ata mandza ŋa i bəɗ a. I dəba ŋa ya, a ndzək kilif ata, a ge dər kamala taŋa ya asa mbaŋa, dite ku weke a zəm dukw mezime ata ka, a sler kamala ana gəzləŋ ŋgar a waya ya.

¹² Tə zəm ɗaf ata a sleye a tar lele ka, Yesuw a gwaɗa a gà ɓəzla mazazama ŋgat ata: «Yahum akaba gər a gà asiŋ ŋa ana a zeha ya, kwizikw ma ze a bəɗ tsa.»

¹³ Tə tsaraka kataya ka, tə daha, ti yaha gər a gà mezehe tapa ɗaf ata ə̀zləm ŋa, gà mburma tə zəm ihər a. Ti yahar gər ka, a raha a gà tàkwasa kurwa gəra sula.

¹⁴ Gà mburma ata i fataya, ta ŋgat a dukw mene aà mburma ata Yesuw a ge ya ka, ta gwa: «Wele aaha ka, mala məma à guma Mbulum ana ta gwa, a dere a aka gər ahəɗ a ndzer kaɗəŋ.»

¹⁵ Yesuw a səraba, gà mburma ata ti dere a, ti tike a ŋgat aà mene Əbay tar nda ndzəɗa ka, a mbəɗ gər, a tsəlaba aka dìyes ata à gər ŋgar.

Yesuw a de a ika gər yam a nda sik

¹⁶ Aləka hawa a ge ka, gà ɓəzla mazazama Yesuw tə tarra aà sik kwite ata ya, aà gùva duluv a.

¹⁷ Tə tsala a slə̀làh yam. Ta waya ti de a dər aka lìdè duluv ata, a Kafarnahum. I təv ana ti de a ya ka, həvəɗ a gəs tar aà vatwa, Yesuw aka ndze a təv tar zukw tsa.

¹⁸ Duluv yam ata a dza ba aà miɓezle wàkit wàkit hinne, aɗaba himbiɗ a riŋ ihər a ge a nda ndzəɗa.

¹⁹ I təv mede tar ata ya ka, tàa da ka, kiliwmeter ə̀zləm, kige tsa ndilik. Aləka ta fə̀r ikaba ya ka, ta ŋgataha a Yesuw a riŋ a de a ika gər yam a nda sik tsə̀pàk tsə̀pàk, bise aka à mendzeha a təv tar. Ta ŋgatar kataya ka, ta ge magəɗa hinne.

²⁰ Ama Yesuw a gwaɗa a tar: «Ki gwim magəɗa tsa, iye na naha ya.»

²¹ Ta waya magə̀saha ŋgat a slə̀làh yam a təv tar a fata zləmana ya. Tsam ka, tàa ndze aà gìgìze tsara, a təv ana a sàs a tar aà mede aɗəm a.

Gà mburma hinne ti yehe a Yesuw

²² Ndidwe ŋana ka, gà asiŋ gà mburma ana ti zeha i dəba i fataya, ti yehe a Yesuw. Tə dzala ka, ta gwa: Slə̀làh yam a da ka, ilik pəra ka, kwets Yesuw iɗəm ɓav tsa, gà ɓəzla mazazama ŋgat ɗekɗek na tə da dər ana, Yesuw dze ana, i ŋga?

²³ Ama gà asiŋ gà slə̀làh yam ŋgiɗ tə dara i kwite Tiberiyas a bise nda təv ana ndeɗiŋa BATSAH kwa ŋa a zla dukw mezime, a ge dərraha kəkaaha a Mbulum, dite a vəl a mburma, tə zəm a.

²⁴ Aləka gà mburma ata ta fə̀r ka, ku gà Yesuw nda gà ɓəzla mazazama ŋgat tekeɗe, tar riŋ i fata asa tsəka, tə tsala a gà slə̀làh yam ata, tə da a kwite Kafarnahum, a mayaha Yesuw a fata.

Yesuw a ne dukw mezime ana a vile a mesife a mburma ya

²⁵ Ti ndze aka lìdè duluv ŋgiɗ ka, ti le aà Yesuw a fata kaɗəŋ. Ta gwaɗar: «Mala medzeŋge a mburma, kà dara a faha ya ana, ndeɗime?»

²⁶ Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Ki yehwim a iye ka, aɗaba na kàa zəmum ɗaf, a sle a kurum a ɗekɗek pəra, tsəka, kàa tikwim dukw mene aà mburma gà ana i ge ya aà ahər tsa.

²⁷ Ka ta gwim megemir aɗaba dukw mezime ana ika gər ahəɗ, a ndze a hinne tsiye tsa. Ama gwim ka, aɗaba dukw mezime ana, a ndze a hinne, à ndìv a tsa aà biybiy, a vile a mesife a mburma ya ivaɗ. Dukw mezime ata a ndze a hinne, à ndìv a tsiye ka, iye, *wur ana a dara i təv Mbulum a, na a ta vile a a mburma ya. Aɗaba Mbulum Tsir gà na a viliŋ ndzəɗa aà mege dukw ata ya.»

²⁸ I fataya ka, gà mburma ata tə tsam aà Yesuw, ta gwaɗar: «Mìi ge a dze ana, meme, na dite mìi ge a gà mege megemir ata a sàs a Mbulum a?»

²⁹ Yesuw a gwaɗa a tar aaka: «Mege megemir ana Mbulum a veve a i təv kurum a ka, magəsa iye, iye wele ana Mbulum a slərra iye ya, nda gəzləŋ.»

³⁰ Ta gwaɗar aaka: «Na kataya ana, ki ge a ana, medzibe dukw mene aà mburma awara, na mìi ŋgeter a ka, dite mìi gis a dər kər nda ndzer a? Ɗe a mər dər te.

³¹ Aɗaba akahər ata i təv ana gà tsir kwa tə ndzawa i kusak, ti de a aka ahəɗ Kanan a ka, tàa zəm dukw mezime ana a dara i gər ŋa, tə zalar *mana ya, kamala ana ta wetse i wakita Mbulum, ta gwa ka: «*fa*

³² Yesuw a gwaɗa a tar aaka: «Iye ihər i tsik a kurum a nda ndzer, pàrsa iɗəm tsa: Dukw mezime ata akahər ata Musa a vəl a kurum i kusak a ka, na a dara i mbulum a nda ndzer a tsa. Ama dukw mezime ana Mbulum Tsir gà a vile a kurumara a i gər ŋa ya, na ndzer a.

³³ Aɗaba dukw mezime ata Mbulum a vile a a mburma ya ka, nda ahər wur ana a tarra i gər ŋa ya. Ŋgat na a ne dukw mezime ata, a vile a mesife a mburma ya.»

³⁴ Ta gwaɗar: «Əbay, vəl a mèr slala dukw mezime ata kəla pat te.»

³⁵ Yesuw a gwaɗa a tar: «Iye na a ne dukw mezime ata a vile a mesife a mburma ya. Wur ana a dere a a təv ga ya ka, may a wir ahər a tsa, dite wur ana à gis a iye nda gəzləŋ ŋgar a tekeɗe ka, yam à kiɗ a ŋgat asa tsa mbaŋa.

³⁶ Ama ar ka, kamala ana i lah metsike a kurum a, kàa ŋgetwimiŋ, dite kwets kàa gəsum iye nda gəzləŋ ɓav tsa.

³⁷ Gà mburma ana Tsir gà a dziŋ tar tserdze ya ka, ti dere a a təv gà ya, dite iye tekeɗe ka, wur ana aka dara a təv ga ya ka, i niw a ŋgat tsa.

³⁸ Aɗaba i tarra i gər ŋa ya ka, aà mege dukw ana a sèsiŋ a tsa. Ama i dara, i ge a ka, dukw wele ana a slər aakara iye ya.

³⁹ Dukw ana a sàs a wele ana a slərra iye ya ka, araha: Gà mburma gà ana a dziŋ tar a ahər a ka, ilik ma dzeye tsa. Ama ka, i mbele a à tar i məməta ya, a pat mandəvandəv gər ahəɗ ivaɗ.

⁴⁰ Dukw ana a sàs a Tsir gà ya ka, araha: Gà mburma ana tàa ŋgetiŋ, a iye, Kəla Mbulum, dite tàa gəs iye nda gəzləŋ tar a ka, ta ŋget a mesife ana à ndìv a tsa aà biybiy a, dite ka, i mbele a à tar i məməta ya, a pat ana gər ahəɗ à ndìv a ya.»

⁴¹ I dəba bazlam ata Yesuw a tsik a tar a ka, gà mburma ata tə dza ba aà masàyà ahəm aka gər Yesuw hinne, a tsəɓ a tar, aɗaba ana a gwa: «Iye ka, i ne dukw mezime ana a tarra i gər ŋa ya» ya.

⁴² Ti tsik akaba ika magər tar, ta gwa: «Abaya ŋgat ka, mì sər gà tsir ŋgar nda mama ŋgar. Ŋgat ka, Yesuw, kəla Yasufa dze ana, meme na a gweɗe a ka, i tarra i gər ŋa ya ya?»

⁴³ Yesuw a sər a taraha aka dukw ana tə dzala ya, a gwaɗa a tar: «Aàmala na ki seywim a aka iye ahəm kataya dze ya? Miyakum à mege arəv ana ki gwim aka iye a ika magər kurum a.

⁴⁴ Aɗaba wura a sle a aà medera a təv ga ya tsa, say na Tsir gà ana a slərra iye ya, aka gəsara ŋgat a tsiye. Ama ku weke na aka dara a təv ga ya ka, i ta mbil a à ŋgat i məməta ya, a pat ana gər ahəɗ à ndìv a ya.

⁴⁵ Akahər ata gà ɓəzla məma à guma Mbulum ta wetse i wakita, ta gwa ka: Aɗaba taŋa, wur ana aka dza zləm a guma Tsir gà, dite aka gəs a ka, a dere a a təv ga ya.*fb*

⁴⁶ Taŋa ka, kərga megweɗe ya, wura aka ŋgat a Tsir gà ilik ɓav tsa. Say iye, wur ana a dara i təv ŋgar a ilik na a ŋgatar a.

⁴⁷ Iye ihər i gweɗe a kurum a nda ndzer, pàrsa iɗəm tsa: Wur ana aka gəs iye ya ka, aka ŋgat mesife ana à ndìv a tsa aà biybiy a.

⁴⁸ Iye ka, i ne dukw mezime ana a vile a mesife a mburma ya.

⁴⁹ Gà bàba gà tsir kurum ata akahər ata tə ndzawa i kusak a ka, tàa zəm dukw mezime ata tə zalar mana ya. Ama ku mege kataya tekeɗe, tàa mata.

⁵⁰ Ama wur ana aka zəm dukw mezime ata ndzer, a dara i gər ŋa ya ka, à mìt a tsidze.

⁵¹ Iye ka, i ne dukw mezime ana a tarra i gər ŋa ya. Na wura aka zəm dukw mezime ata ka, a ndze a birek birek aà biybiy, à mìt a tsa. Dukw mezime ata i vile a a mburma, dite na ta ŋget a dər mesife ya ka, slu ba gà.»

⁵² Agəra bazlam ata Yesuw a tsik a tar a ka, a vəl mimbètsè ahəm a gà mburma ata ika magər tar wuràpə̀ppa, ta gwa: «Wànà meme na wele aaha a sle a aà mivile a kwe a ba ŋgar ka, a ne a dukw mezime, ki zimekwe a ya?»

⁵³ Aɗaba taŋa Yesuw a gwaɗa a tar: «Iye ihər i gweɗe a kurum a nda ndzer, pàrsa iɗəm tsa: Na kàa zəmum slu ba gà, iye, wur ana i dara i təv Mbulum a tsa, nda gà bəla kàa sum məmbəz ga tsəka, ki ŋgetwim a mesife ndzer ŋana tsa.

⁵⁴ Ama wur ana a zim a slu ba gà, dite a se a məmbəz ga asa ya ka, aka ŋgat mesife ana à ndìv a tsa aà biybiy a. Dite i mbil a à ŋgat i məməta ya, a pat ana gər ahəɗ à ndìv a ya mbaŋa.

⁵⁵ Aɗaba slu ba gà ka, dukw mezime ana ndzer ŋa ya, dite məmbəz ga ibam ka, dukw mese ana ndzer ŋa ya mbaŋa.

⁵⁶ Wele ana a zim a slu ba gà, dite a se a məmbəz ga asa ya ka, ŋgat a ndze a i təv ga, dite iye tekeɗe, i ndze a i təv ŋgar mbaŋa.

⁵⁷ Tsir gà, mala məvəla mesife na a slərra iye ya. Iye ihər i ndze a ka, aɗaba ŋgat. Kamala taŋa ya, ku weke na aka zəm slu ba gà ka, a ndze a aɗaba iye mbaŋa.

⁵⁸ Aɗaba taŋa, iye ihər i tsik a kurum a asa: Taŋa na a ne dukw mezime ana ndzer ŋa, a dara i gər ŋa ya ya. Ama ar ka, kamala biy na gà tsir kurum tə zəm akahər ata, dite ta mata ya tsa. Ama ku weke na aka zəm dukw mezime ata i viler a ya ka, à mìt a tsa, a ndze a aà biybiy.»

⁵⁹ Yesuw a tsik guma ŋgar ata ka, i ga mahàmà a Mbulum gà Yahuda ana i kwite Kafarnahum a.

Bazlam Yesuw ana a vile a mesife a mburma, à ndìv a tsa aà biybiy a

⁶⁰ Gà ɓəzla mazazama Yesuw tə tsaraka bazlam ŋgar ata tsara ka, gà asiŋ ŋa i liwiŋ tar hinne ta gwa: «Bazlam aaha ka, kuɗa ihər, weke na a sle a aà megìse ya?»

⁶¹ Yesuw a səraha aka dukw ana i gər gà ɓəzla mazazama ŋgat ata tə dzala ya. A sər ka, a wir a ter a i gəzləŋ hinne. Aɗaba taŋa a gwaɗa a tar: «Wànà bazlam ata dze ana, a tsəɓ a kurum a?

⁶² Dite meme seyiŋ a, na ki ŋgetwimiŋ a a pat ŋgiɗ, a iye, wur ana i dara i təv Mbulum a, i ti tsil a a təv ana i dara iɗəm piŋŋe ya.

⁶³ Mezite Mesife Mbulum na a vile a mesife a mburma ya, tsəka, ndzəɗa mburma a sle a duwa tsa. Gà bazlam ana i tsik a kurum a ka, na a vile a kurum a mesife ndzer ŋana, a dara i təv Mezite Mesife Mbulum a.

⁶⁴ Ama ka, gà mìsle ŋgiɗ ika magər kurum tàa gəs iye nda gəzləŋ tar tsa.» Aɗaba Yesuw a sər gà mburma ana ta gis a ŋgat tsiye, nda wele ana a ta ge aà ŋget a ɗaf a daga piŋŋe.

⁶⁵ Yesuw a səkah dər aaka asa, a gwaɗa a tar: «Aɗaba taŋa na i gwaɗa a kurum ka: Wura a sle a aà medere a a təv ga ya tsa, na Mbulum Tsir gà aka vəlarra vatwa ya tsiye.»

⁶⁶ I təv ana gà ɓəzla mazazama ŋgat tə tsaraka bazlam ŋgar ata ya ka, gà asiŋ ŋa i magər tar hinne, ta məsak à mazazama ŋgat, ta mbəɗ gər a dəba.

⁶⁷ I dəba ŋa ya, Yesuw a tsam aà gà ɓəzla mazazama ŋgat ana kurwa gəra sula a pala tar a, a gwaɗa a tar: «Kurum dze ana, wànà a sàs a kurum mede mbaŋa ya?»

⁶⁸ Simun Piyer a gwaɗar aaka: «Batsah mər ŋa, mìi de a dze ana, a ŋga, mìi zezem a weke asa ya? Kər na kà vəl a mər bazlam ana a vile a mesife a mburma, à ndìv a tsa aà biybiy a.

⁶⁹ Kinehe ka, maa gəs kuɗa, mì sər ka, kər ka, wele ana tsəɗaŋŋa, kà dara i təv Mbulum a.»

⁷⁰ Yesuw a gwaɗa a tar aaka: «Wànà iye tsiye na a pala kurum kurwa gəra sula ya? Ama mìsle ŋgiɗ ilik ika magər kurum a ka, sitene.»

⁷¹ A tsik taŋa ka, aà Yudas ana kəla Simun Iskariyut a. Aɗaba Yudas ka, ku mege ŋgat i liwiŋ gà mburma kurwa gəra sula ŋa aaha tekeɗe ka, a ta ge aà ŋgat a ɗaf.