Yuhana 19 - Bible Zulgo

¹ Aɗaba taŋa, Pilatus a vəl vatwa aà magəsa Yesuw kuɗa, ta gə̀zl nda megwiymbiɗ.

² Gà sliwdze tə daha, tə sàs adak, tə slàslapa akaba, ti ndìwìɗer dər gər. Ti tike aaka andiw nduzzwa ŋana asa. Tə dùwaya dər ŋgat kamala Əbay a.

³ Ti sìrìkeha a təv ŋgar, ta gwaɗar: «Kər Əbay gà Yahuda, Mbulum mà sə̀kàhak à mendze yak aà biybiy.» Dite wuŋ wuŋ tə lakayar kuɗa.

⁴ I fataya ka, Pilatus a dara a bəra ya asa, a dara, a gwaɗa a gà Yahuda ana ɗa i bəra ya: «Tsarakum, araha, ti de a kurumara à wele aaha a bəra ya, dite kà sərum dər ka, Yàa le aà bakal ŋgar ana a ge ya tsidze, na iye ya.»

⁵ Yesuw a dara a bəra ya nda gà mendìwìɗè gər adak ata ya, nda gà andiw nduzzwa ŋa aaha ika ba asa. Pilatus a gwaɗa a tar: «Araha, mburma kurum naha.»

⁶ Ama gà Əbay gà ɓəzla mandəva kuɗa a Mbulum, nda gà ɓəzla makàslà ga Mbulum ata, ta ŋgatar tsara ka, ta wideye ŋgəlakəkka hinne, ta gwa: «Ndwandway ŋgat aà dizl magə̀làwà ŋa, say ndwandway ŋgat aà dizl magə̀làwà ŋa ata ndzer.» Pilatus a gwaɗa a tar: «Kurum ŋa dum dər, ka tə ndwandwayum ŋgat aà dizl ata nda ahər kurum ŋa, tsəka, iye ka, Yàa le aà bakal ana biy makə̀ɗà ahər ŋgat a tsa, na iye ya.»

⁷ Gà Yahuda ata ta gwaɗar aaka: «Mər ka, kamala biy ana a sàs a məpala ahəm mər a ka, say makə̀ɗà ŋgat ilik pəra. Aɗaba a gwa ka, iye Kəla Mbulum.»

⁸ Pilatus a tsaraka bazlam tar ata ka, a ge magəɗa hinne asa.

⁹ A mbəɗ gər a ga, a daha, a gwaɗa a Yesuw: «Kà dara dze ana, i ŋga ya kaɗəŋ a?» Ama Yesuw a gəs mifèfiler aaka tsa.

¹⁰ Pilatus a gwaɗar asa: «Kə̀ gəs mifèfiliŋ aaka tsəna, aàla? Kà sər tsiye, iye ka, ndzəɗa gà a riŋ, Yàa waya ka, i pìl a à kəriŋa, kige tsa, i ndwendwey a kər aà dizl ata ya?»

¹¹ Yesuw a gwaɗar aaka: «Ki sle aà mege aà iye duwa ilik tsidze, na Mbulum aka vəlak iye a ahər tsiye. Aɗaba taŋa na wele ana aka gə̀sak iye ya ka, bakal ŋgar a za biy yak fit a.»

¹² I dəba bazlam ata ya tsara ka, Pilatus a yaha vatwa, a waya məpəla à Yesuw hiywe. Ama gà Yahuda tə dza akaba bazlam ŋgəlakəkka nda Mewideye asa, ta gwa: «Na kàa pəl à wele aaha ka, kər ka, masla Əbay gà Ruma asa tsa. Aɗaba wele ana a ne à ba ŋgar batsah Əbay ya ka, taŋa ŋgat ka, mala mene are a batsah Əbay gà Ruma ata seyiŋ ivaɗ.»

¹³ Pilatus a tsaraka bazlam ata ka, a dara à Yesuw a bəra ya asa. Ŋgat ŋa a daha, a ndza aka təv mendze ana a gewa ikəka seriye ya. Tə zal a təv ata ndaka ahəm gà Yahuda ka, Gabata, kamala megweɗe ya ka, dàmbàzlà ana tə zlàzl nda kur a.

¹⁴ Pilatus a gwaɗa a gà Yahuda ata: «Batsah Əbay kurum naha.» Ta ge dukw ata ka, magər pat aka à mege, dite ndidwe ŋana ka, megirive Paska gà Yahuda.

¹⁵ Ama tə tsaraka Pilatus ata a gwaɗa a tar ka, batsah Əbay kurum naha ya ka, tə dza ba aà Mewideye hinne. I huɗ Mewideye tar ata ya ka, ta gwa: «Gəs ŋgat, ka ndwandway ŋgat aà dizl magə̀làwà ŋa, say mekìɗe pəra.» Pilatus a gwaɗa a tar aaka: «Wànà iye i ndwendwey a batsah Əbay kurum aà dizl ata ya?» Gà Əbay gà ɓəzla mandəva kuɗa a Mbulum ta gwaɗar aakaha: «Batsah Əbay mər ŋgiɗ a riŋ tsa, say batsah Əbay gà Ruma pəra.»

¹⁶ Aɗaba taŋa Pilatus ibam, a vəl Yesuw a ahər a gà sliwdze, dite ka, tə tə ndwandway ŋgat aà dizl magə̀làwà ŋa ata kuɗa. I dəba ŋa ya, gà sliwdze ata ta mah ba nda gà Yesuw.

Tə ndwandway Yesuw aà dizl magə̀làwà ŋa

¹⁷ Ti tiker dizl ata aà gər, dite ma zla. Tə da akabara i huɗ kwite ya, tsikw a tə̀vəməŋa a riŋ tə zalar ndaka ahəm gà Yahuda ka, Gwalgwata, kamala megweɗe ya ka, atasl gər.

¹⁸ Ti ndze akabaha a fata ka, gà sliwdze ata tə daha, tə ndwandway Yesuw aà dizl ata. Tə ndwandway ahəraha gà mburma aà gà dizl ŋgiɗ a tsaka ŋgar a fata. Ilik ndaka tsèke ahər mezime, ilik ŋa aaha, aka tsèke ahər gùla. Yesuw ika magər tar.

¹⁹ Pilatus a wetse bazlam ana ta kəɗ ahər ŋgat a, a ti tike dər aà dizl ata mbaŋa. Bazlam ana a wetse ya ka, a gwa: «Naha ka, Yesuw gà Nazaret, Əbay gà Yahuda.»

²⁰ A wetse taŋa ka, ndaka ahəm ŋgiɗ pampam makər. Gà ahəm ata ka, ahəm gà Yahuda, naha ahəm gà Ruma, dite biy ŋgiɗ aaha ka, ahəm gà Girek. Gà mburma ana i fataya hinne, ti dzeŋgewa mewetse dukw ata aà dizl a, aɗaba təv ata ka, bise nda huɗ kwite, mburma iɗəm hinne.

²¹ Gà Əbay gà ɓəzla mandəva kuɗa a Mbulum ta ŋgatar, ti dzeŋge taŋa ka, tə da a təv Pilatus, tə daha, ta gwaɗar: «Kà wetse kataya ka, lele tsa, na kù gwa, ŋgat ka, Əbay gà Yahuda ya. Ki wetse a ka, ki gweɗe a, ŋgat a ne à ba ŋgar ka, a gwa iye ka, Əbay ga Yahuda ivaɗ.»

²² Pilatus a gwaɗa a tar: «Dukw ana Yàa wetse kataya ka, a ndze a kamala taŋa ya hiywe.»

²³ I təv ana ndeɗiŋa gà sliwdze tə ndwandway aba Yesuw aà dizl a ka, tə dzaya iba gà petek ŋgar a təv pampam faɗ. Ku weke ma ŋgat ilik ilik aà tar aà tar. Tə zla andiw ŋgar ana maŋgara ŋa suɗùkw təv meɗìmìke ihər tsiye,

²⁴ ta gwaɗaba: «Naha ka, ka tayakwa ikaba ya tsa, ama ŋgulum ki gekwe aaka a tsetse ika magər kwa, ŋgada weke na a ŋget a ya?» Dukw ata a ge ba ka, kamala ana ta wetse i wakita Mbulum piŋŋe, ta gwa ka: «Tàa dzaya ba gà petek gà ika magər tar, dite tàa ge tsetse aka andiw gà.»*fa* Kamala taŋa ya na gà sliwdze ata ta ge ya.

²⁵ Gà mburma ana mehìtsè ŋa bise nda dizl ata tə ndwandway ahər Yesuw a ka, gà mama ŋgar, nda damər mama ŋgar dəm ŋa, nda gà Mariya, məkəs Kulupas, nda gà Mariya ana a dara i Magədala ya.

²⁶ Yesuw a ŋgat a gà mama ŋgar nda mala mazazama ŋgat ana a waya ŋgat hinne ya, tar riŋ mehìtsè ŋa i təv ilik ŋa ya ka, a gwaɗa a mama ŋgar: «Naha ka, kəla yak, mama ga.»

²⁷ I dəba ŋa ya, a gwaɗa a mala mazazama ŋgat ata a waya hinne ya: «Naha ka, mama yak mbaŋa.» I fataya tsara ka, mala mazazama Yesuw ata a zla məkəs ata a ma ŋgar.

Məməta Yesuw

²⁸ I dəba ŋa ya, Yesuw a sər dukw ana Mbulum a slər aakara ŋgat a tserdze ka, aka ndəv na kinehe ya. A gwa: «Yam aka kəɗ iye.»*fb* A tsik kataya ka, kamala ana ta wetse akahər ata ya, dite ma ge ba kalkal kamala taŋa ya kaɗəŋ.

²⁹ Ama meɗwìtsè mawà dukw duwa a ndza ndùlàkə̀kka kamala mbəlar a, a riŋ maràhà ŋa i duwa i fata. Kamala taŋa ya, gà sliwdze tə daha, tə zlara dukw ana pàfpàfə̀ffa, yam a de aɗəm a hinne ya. Ti tsilwiɓ dər a dukw ata. Tə dzak a zùbəl tsalaka dizl dukw duwa tə zalar *izup. Tə dzakaraha a bazlam, dite ka, mà ɗìvìts ihər yam ŋa ya.

³⁰ Yesuw a ɗìvìts yam dukw ata tsara ka, a gwa: «Mege megemir gà tserdze ka, aka ndəv kuɗa.» I dəba ŋa ya, luz a kal à gər a bəɗ ka, a mət tsara.

Sliwdze duwa ilik a ge suwal a Yesuw aka wèlèɓè

³¹ Ta kəɗ Yesuw ka, a pat ana dite pat mesìfìkà ba ndidwe ŋa ya. Aɗaba taŋa a sàs a gà bàba gà Yahuda tsa na məməta Yesuw a ndze a aà dizl magə̀làwà ŋa ata a pat mesìfìkà ba ya. Aɗaba ndeyndey ŋana ka, megirive a riŋ a pat ata ka, a ne aka tar ŋgwal ŋa, a za dər gà asiŋ gà pat ŋgiɗ ana dze ya. Agəra taŋa na tə da a təv Pilatus, tə daha, ta gwaɗar: «Kamkam, vəl a mər vatwa, gà sliwdze tə daha, ta haɓa à sik a gà mburma ata tə ndwandway tar aà dizl, na dite ta mete a bise, tì ndzikere a ihər tar a.» A gwaɗa a tar: «Haya.»

³² Aləka gà sliwdze ata tə daha, tə lah mahaɓa à sik a gà mburma aaha tə ndwandway akaba tar nda gà Yesuw tserdze ya.

³³ Ti ndzeha a təv Yesuw, ta fə̀r ahər ka, aka mbər mimìte. Tə samata məməta ŋa ka, tàa haɓar à sik asa tsa.

³⁴ Ama kə̀la ka, sliwdze duwa ilik a daha, ə̀bukw a ger suwal aka wèlèɓè, gà məmbəz nda yam tə zlalarra i biye ŋa ya.

³⁵ Iye ana i ɗama gà bazlam ata ya ka, Yàa ŋgatar nda are gà, dite dukw ana i ɗama ya ka, ndzer kaɗəŋ. I sər, iye ka, i sese a pàrsa tsa, dite na kurum tekeɗe, ki giswim a nda gəzləŋ a.

³⁶ Gà dukw ata ta ge ba kataya ka, aɗaba bazlam ana ta wetse i wakita Mbulum akahər ata ya, ma ɗif aba, ta gwa ka: «Ti ta heɓer a à atasl ŋgar ilik tsidze» ya.*fc*

³⁷ Dite biy ana i wakita ŋgiɗ a, ma ɗif à ba asa, ta gwa ka: «Ti ta fir a à wele ana ta ger suwal a.»*fd*

Mazla məməta Yesuw a biye

³⁸ I dəba ŋa ya, wele duwa a riŋ, zləm ŋgar Yasufa. A dara ka, i Arimatiya ya. Ŋgat ka, mala mazazama Yesuw. Ama kə̀la ka, say nda akəl pəra na a zezem a ya, aɗaba ana a ge magəɗa a gà bàba gà Yahuda ya. A daha a təv Pilatus, a ger kamkam, dite mə vəlar vatwa aà mazlàra məməta Yesuw aà dizl a. Pilatus a gəs, a gwaɗar: «Haya.» I dəba ŋa ya, a daha, a zlara məməta ŋa ata aà dizl a kuɗa.

³⁹ Nikudimus, wele ana a da a təv Yesuw akahər ata ndaàvəɗ, a wiz ihər bazlam a,*fe* ŋgat tekeɗe, a daha a fata mbaŋa. A daha ka, nda gà wirdè gà dizl gà dukuməŋa a riŋ a ze hwaŋŋà lele, tə zalar *mira, biy ŋgiɗ ibam, *aluwa. Gà dukw ata ka, ti sle a agwada dzik makər.

⁴⁰ Tar ata sula ya, tə zla məməta Yesuw. Ta mbe ahər petek herrè ŋa. I təv ana ta mbe a ya ka, tə ndàyawa ahər dukw ata hwaŋŋà ya, kamala ana gà Yahuda ta gewa à məməta ya.

⁴¹ I təv ata tə ndwandway ahər Yesuw a ka, dzèrnè duwa a riŋ i fata. Ama i dzèrnè ata ka, dive duwa a riŋ melè ŋa awiya ŋa, tə̀vəməŋa ka, gìrdzìdzìhhe i giseh a. Dive ata ka, tàa tike aɗəm wura ilik zukw tsa.

⁴² Tə zla Yesuw, ti tike a dive ata bise ya tsara. Ti tike a fata ka, aɗaba mesìfìkà ba tar aka ndze aɗəm, ta ge a megemir tsa, dite ndidwe ŋana ti sifik a ba.