Yuhana 10 - Bible Zulgo

Bazlam minew makəva gà təmaŋ

¹ Yesuw a tsik a tar bazlam minew asa, a gwaɗa a tar: «Iye ihər i tsik a kurum a nda ndzer, pàrsa iɗəm tsa: Ama wur ana a de a a dagara gà təmaŋ ndaka biye hərmaga tsa, a de a ka, ndaka vatwa ŋgiɗ a ka, ŋgat a ne ka, mala akəl, à kìzele a mburma.

² Ama wur ana a de aɗəm a ndaka biye hərmaga ya ka, ŋgat ka, mala makəva gà təmaŋ.

³ Na bəla wele ana a kesle a biye hərmaga ya ka, à hìndìk a i ga a mala makəva gà təmaŋ ata ya, a de aɗəmiŋa. A zel a a gà təmaŋ ŋgar nda zləm tar ilik ilik tserdze. Ti tserekiŋa, dite à kìvere a tar a bəra ya.

⁴ Na aka kə̀vara tar a bəra ya ka, a ndze a ter a aka miɗ, dite gà təmaŋ ti zezemehe a ŋgat i dəba ya, aɗaba tə sər biye ɗa ŋgar.

⁵ Ama ti sle aà mezezeme a wur ana tə sər ŋgat tsiye tsa. Ta vel a ihər a, aɗaba ana tə sər biye ɗa ŋgar tsiye.»

⁶ Yesuw a tsik a tar guma ata ka, ndaka bazlam minew, ama tàa tsaraka bazlam ata a tsik ana, aka gər là ka, tə sər tsa, dèrze ikəka.

Yesuw a ne ka, mala makəva gà dukw ana ŋgwal ŋa ya

⁷ I dəba ŋa ya, Yesuw a gwaɗa a tar asa: «Iye ihər i gweɗe a kurum a nda ndzer, pàrsa iɗəm tsa: Iye i ne hərmaga dagara gà təmaŋ.

⁸ Gà mburma ana ti lìhiŋara tserdze ya ka, ti ne gà ɓəzla akəl, tàa kə̀zala mburma, ama gà təmaŋ tàa dza zləm a mifefile tar tsa.

⁹ Iye na i ne biye hərmaga ya. Wele ana a de a a dagara ata nda təv ga ya ka, a mbiliŋa. A ŋget a vatwa mada aɗəm, nda madàra iɗəm a. Ŋgat ka, barbararra, kuɗa duwa a ger a tsa.

¹⁰ Aɗaba mala akəl a dere a ka, aà mege akəl, aà makə̀ɗà mburma, dite aà manəsa à duwa ndzàɗak ndzàɗak a bəɗ. Ama iye i dara ka, dite gà mburma tə ndza barbararra, ta ŋgat mesife ana à ndìv a tsa aà biybiy a.

¹¹ Iye i ne ka, mala makəva gà dukw ana ŋgwal ŋa ya. Mala makəva gà dukw ata ŋgwal ŋa ya ka, aka hadzal ba aà medzeye à mesife ŋgar, agəra gà təmaŋ ŋgar.

¹² Wur ana a ge a megemir siŋgwe ya ka, ŋgat ka, mala makəva gà dukw ana ndzer a tsa, aɗaba gà təmaŋ tekeɗe, gà biy ŋgar tsa. Bəla kəra dala aka hitse aà tar ka, a miyek a à tar, a velebiŋa. Dite kəra dala ata a dehe a, à gese a tar. Gà asiŋ ŋa aaha ta gwitse a aba sweyèh sweyèh a dala a təv ŋa.

¹³ A vel a ka, aɗaba ana madzala gà gər ŋgar ka, aka dukw maya ba ŋgar ɗekɗek, a dzele a gà təmaŋ tsiye.

¹⁴ Iye ka, i ne mala makəva gà dukw ana ŋgwal ŋa ya. I sər gà təmaŋ gà. Gà təmaŋ gà tekeɗe, tə sər iye mbaŋa,

¹⁵ kamala ana Tsir gà a sər iye ya, dite iye tekeɗe, i sər ŋgat mbaŋa ya. Yàa hadzal ba aà medzeye à mesife gà agəra tar.

¹⁶ Gà təmaŋ gà ŋgiɗ a riŋ i dagara aaha zukw tsa. Ama say i yehere a tar a mbaŋa. Ti ti dze a zləm a mifefile gà. Ta gew a ba a təv ilik ŋa. Ti ne akaba a palam ilik, mala makəva tar tekeɗe, ilik mbaŋa.

¹⁷ Tsir gà a weye iye ka, aɗaba ana Yàa hadzal ba aà medzeye à mesife gà ya. Dite i sər ka, i ŋget a mesife ata asa.

¹⁸ Wura a sle a aà mezle aà iye mesife gà ata ya nda ndzəɗa tsa. Ama iye ŋa i dzeye a à mesife gà. Dite ndzəɗa gà a riŋ aà maŋgata aɗəm asa. Kamala taŋa ya, i ge a ka, dukw ana Tsir gà a gweɗiŋ, ge ya.»

¹⁹ Gà mburma ata tə tsaraka bazlam minew Yesuw ata ka, bazlam a da a tar aaba tsa, tə ndzaka ba ikaba ya təv pampam asa.

²⁰ Gà asiŋ gà mìsle ŋgiɗ hinne ta gwa: «Sitene na i ba ŋgar a. Aàmala na ki dzèkwe a zləm a mifefile mala mibe a dala ya?»

²¹ Gà mìsle ŋgiɗ ta gwa asa: «Wele ana sitene i ba ŋgar a ka, a sle aà mifefile a kataya tsa. Wànà sitene a sle a aà mahə̀ndə̀kà ika are ya a mala guluf a?»

Gà Yahuda ta gəs bazlam Yesuw tsa

²² Akahər ata ka, gà Yahuda ti tìkir a megirive məma à batsah ga Mbulum ana ta mà dər aà mbulum a, i Yeruzalem. Ta gewa megirive ata ka, akahər mə̀tasl.

²³ Yesuw a riŋ i megirive ata mbaŋa. A riŋ à sìweye a aà huɗ màsàpàr ana tə zalar màsàpàr Salumun a, aà batsah ga Mbulum ata.

²⁴ Gà Yahuda ata ta ŋgatar ka, ti yaha ba gər a təv ŋgar, ta gwaɗar: «Ki ti ɗif a mər a aba, kər ana kà dara i ŋga ya ana, ndeɗime? Na kər *Kiristi, mala məmbàlà à mburma ana Mbulum a gwa, i ti slir a kurumehe a ya ka, tsik a mər lele.»

²⁵ Yesuw a gwaɗa a tar aaka: «Yàa tsik a kurum aka ndəv, ama a sàs a kurum megìse bazlam gà tsa. Gà megemir ŋgwal ŋa ana i ge a nda ndzəɗa Tsir gà ya na à pèt a kurum a dər ka, iye ana, weke ya mbaŋa.

²⁶ Ama a sàs a kurum megìse nda gəzləŋ tsəka, aɗaba ana kàa nwim gà mburma gà tsiye.

²⁷ Gà mburma gà ka, tì dze a zləm a mifefile gà. Ti ne kamala gà təmaŋ ana tì dze a zləm a mifefile mala makəva tar a. I sər tar, dite tar tekeɗe, tar riŋ ti zezem a iye mbaŋa.

²⁸ I vile a ter a mesife ana à ndìv a tsa aà biybiy a, ta mete a tsidze, dite wura a sle aà mekìzelere a tar i ahər gà ya asa tsa.

²⁹ Tsir gà na a dziŋ tar a ahər a ka, a za gà dukw ana tserdze ya. Aɗaba taŋa na wura a sle aà mekìzele a tar i ahər ŋgar a tsidze ya.

³⁰ Mər ka, ilik nda Tsir gà.»

³¹ Gà Yahuda ata tə tsaraka bazlam ŋgar ata kataya ka, tə ndzək kur a ahər, ta waya makàlàwà ŋgat asa.

³² Ama Yesuw a gwaɗa a tar: «Yàa ge gà megemir ŋgwal ŋa hinne ika miɗ kurum nda ndzəɗa Tsir gà. Ika magər gà dukw ata i ge tserdze ya ana, agəra awara ilik a na a sàs a kurum ki kelewwim ahər a iye nda kur a?»

³³ Gà Yahuda ata ta gwaɗar aaka: «A sàs a mər makàlàwà kər ka, agəra ana ki ge gà megemir ŋgwal ŋa ya tsa. Ama aɗaba ana ka ne bakal à Mbulum, kà tsik ahər dukw ana ŋgwal ŋa tsiye ya. Kər ka, mburma məfara ŋa, tsəka, Mbulum tsa. Ama ka, a sàsak mene à ba yak Mbulum.»*fa*

³⁴ Yesuw a gwaɗa tar aaka asa: «A riŋ mewetse ŋa i wakita məpala ahəm kurum ka, Mbulum a gwa: *fb*

³⁵ Kà sərakwa ka, ki slekwe a mimbete à dukw ana wakita Mbulum a tsik a tsa. Ama Mbulum a zal a gà mburma ana a tsik a tar bazlam ŋgar akahər ata ya ka, ku weke a ne kamala Mbulum a.

³⁶ Iye kinehe tekeɗe, ŋgat na a zla iye, a slərra iye aka gər ahəɗ a. Dite ka, meme na ki slwim aà megweɗe a, i ne a dər bakal, agəra ana i gwa, iye Kəla Mbulum a?

³⁷ Na i ge a ka, megemir Tsir gà tsəka, taŋa ka, wura mà gəs mifefile gà ɓav tsa.

³⁸ Ama na bəla iye riŋ i ge a megemir ŋgar ka, ku mege kàa gəsum bazlam gà tsa tekeɗe, gəsum iye, aɗaba megemir ana iye ihər i ge a ya, na dite ki sirwim a dər parakkà ka, Tsir gà a riŋ mandza ŋa i təv ilik ŋa nda iye, iye tekeɗe, iye riŋ mandza ŋa i təv ilik nda ŋgat mbaŋa ya.»

³⁹ I fataya tsara ka, ti yaha vatwa aà magəsa ŋgat asa. Ama ka, a be aà tar a.

⁴⁰ I dəba ŋa ya, Yesuw a mbəɗ gər aka lìdè dulwa Yurdan asa, a təv ana Yuhana a tsilwiɓewa iɗəm à mburma a yam akahər ata ya. A daha, a ndza riŋ i fata zaakwa.

⁴¹ Gà mburma hinne tə daha a təv ŋgar. Tə daha ka, ta gwa: «Yuhana ka, aka ge dukw mene aà mburma ilik tsidze, ama dukw ana a tsik nda təv wele aaha fit a ka, ndzer kaɗəŋ.»

⁴² Aɗaba taŋa gà mburma ana i fataya hinne, ta gəs ŋgat nda gəzləŋ.