YAKUBA 3 - Bible Zulgo

Mege metsehe a bazlam ana a dere a ika arah a ya

¹ Gà damər gà, gà mburma ana ika magər kurum a fit tsa na ti ti ne a gà ɓəzla meɗìfè à bazlam Mbulum i ga Mbulum a mburma ya. Aɗaba kà sərum, seriye ana ti ta ge a à kwa, a kwa ana ki ɗifekwe a à guma Mbulum a ka, mawura ba ŋa, à zè a biy gà asiŋ gà mìsle ŋgiɗ.

² Aɗaba kwa riŋ tserdze i huɗ gà dukw ŋgiɗ pampam kwa riŋ ihər ki gekwe a bakal. Ama wur ana a ge a bakal i huɗ gà bazlam ŋgar ana a tsik a ya tsəka, ŋgat na a ne ŋgwal ŋa ndzer a, ku mege i təv gà dukula ya tekeɗe. Ŋgat ka, a sle a aà makàslà ba ŋgar i təv gà duwa ya tserdze mbaŋa.

³ Samatum gà na tə də̀gə̀zawa piris a kwaŋ, say ti tiker a tsarlàw a bazlam dzekwiŋ, na dite piris a ɗìgìr a mivele lele kamala ana a sàs a mala piris a ya.

⁴ Fə̀rum aà gà slə̀làh yam mbaŋa asa. Gà biy ŋgiɗ a riŋ ka, gà bàba ŋa hinne. I təv ana a de a ya ka, himbiɗ tekeɗe hinne mbaŋa na a ge a ya. Ama ku mege kataya tekeɗe, dukw məpaka ŋa ka, hinne tsa kwizikw masakəŋa. Aka sàs a mala slə̀làh yam ata ka, kìw à mèr a dər à gər, a de a dər a təv ana a sasar a de aɗəm a ya lele.

⁵ Arah mburma tekeɗe, kamala taŋa ya mbaŋa. Ku mege hinne tsa kwizikw ibam, a tsikara gà dukw ana gà bàba ŋa, a mba aà duwa hinne ya. Samatum akwa ana hinne tsa kwizikw ka, a wene a batsah kusak fit a kwaŋ.

⁶ Arah mburma a ndzikiɗ ba ka, akwa ana wànə̀nə̀nna kataya ya mbaŋa. Aɗaba taŋa, mayaha gər bakal ana ki gekwe a ika gər ahəɗ tserdze ya, a dara ka, ika arah ana mandza ŋa i bazlam mburma ya. Arah à nis a à mendze mburma ana a ndze a ya fit kweleŋ. A tike a akwa ana à nis a à mendze ŋgar ata, daga akahər ana ta we a ŋgat a, haa a təv ana à mìt a ya. Akwa ata a dere a ka, i təv akwa ana a mbete a tsa aà biybiy a asa mbaŋa.

⁷ Ama mburma ka, a sle aà mimbè aà gà dukw ana Mbulum a ge nda gà mesife iɗəm tserdze ya, kamala gà ɗiyeŋ, nda gà mesiwiɗ, nda gà dukw ana i yam tserdze ya ka, mburma a mba ahər fit dze.

⁸ Ama arah mburma ka, wura a sle a aà makwàrà ŋa ilik tsidze. Ar ka, ŋgwal ŋa tsa ndeyndey dze, à gis a ba a ahər tsidze. Kamala mawur ana à kiɗ a mburma ya, a dere a ka, ika arah a.

⁹ Nda arah kwa ata asa ka, kwa riŋ ihər ki zèmbeɗekwe a dər à Əbay Mbulum Tsir kwa mbaŋa. I dəba ŋa ya, nda arah ata asa hiywe ki ndeveyekwe a dər a gà mburma tserdze, ku mege Mbulum a ge tar, ti ndzikiɗ ba ŋgat tekeɗe ya.

¹⁰ Bazlam mazàmbàɗà aà Mbulum nda biy mandàvàyà a mburma fit dze a dara ka, ika arah ŋa ya ilik dze ana, meme, gà damər gà? Kataya ka, a ge a ba tsidze, na taŋa ya.

¹¹ Yam ana tsəɗaŋŋa ndəna aruwaŋ iɗəm, a dzəm tsa, ti sle aà meŋgìzere a i biye yam ŋa ya ilik dze ana, a riŋ a, na taŋa ya?

¹² A kurum gà damər gà, kà sərum dizl gùrùv ka, a sle aà mewe a uliviye tsa. Hàndaza ibam ka, a sle aà mewe a gùrùv tsa asa mbaŋa. Kamala taŋa ya mbaŋa, yam ana a dzəm a tekeɗe, ti sle aà mede akabara a i biye yam ŋa ya ilik ndəna hə̀ràɓə̀ɓa, a dzəm tsiye ɓav tsa asa mbaŋa.

Metsehe ŋgwal ŋa ana a dara i təv Mbulum a

¹³ Wura a riŋ ika magər kurum metsehe ŋgar a riŋ, a sər duwa hinne ya? Na aka ge riŋ ka, mə̀ pàt à megemir ana lele, i təv mendze ŋgar ana a ndze a ya, dite ma həna à gər a bəɗ asa mbaŋa. Aɗaba aka həna à gər a bəɗ ka, gà mburma ti sir a dər, metsehe ŋgar a riŋ kaɗəŋ.

¹⁴ Ama na bəla kurum riŋ nda gà mege are aka dukw mburma, kige tsa mege maàga a riŋ ika magər kurum huwwa kəla pat, nda madzala dukw ana ŋgwala tsiye nda təv mburma ka, ka ta gwim aba zlapa tsa, kàa nwim pàrsa à dukw ndzer ŋana.

¹⁵ Medzìbe metsehe ata a dara ka, i təv Mbulum ana i gər ŋa ya tsa. A dara ka, ika gər ahəɗ a, nda gà i madzala gà gər mburma ya, nda gà i təv Əbay sitene ya ivaɗ.

¹⁶ Aɗaba na gà mburma ta geye a are aka duwa, nda gà bəla menèba are a riŋ, kige tsa, ta geye aba a hə̀za ka, mendze tar ka, aka nəs, a de a kalkal asa tsa, nda gà dukw ana ŋgwal tsiye pampam hinne tekeɗe, tar riŋ i təv tar mbaŋa.

¹⁷ Ama metsehe ana ndzer ŋa a dere a i təv Mbulum i gər ŋa ya ka, pam, tsəka, duwa a riŋ ihər manəsa ŋa tsa. A ndze a ka, tsəɗaŋŋa. Na wura a ndze a nda gà medzibe metsehe ata i gəzləŋ ŋgar ka, a zlere a mandza zayzay a, nda masə̀ràba ya, nda gà magəsa aba ahəm a. Dite ŋgat asa ka, mburma a ndzer a are tsehe hinne. A ge a ka, dukw ana ŋgwal ŋa ya kəla pat. A wele a ikaba mburma ya tsa. Melèvekè nda məbànà mburma i təv ŋgar tsa asa mbaŋa.

¹⁸ Gà na matasla yam i gəzləŋ tar, ti sir a ba à mburma ya ka, ta ŋget a iɗəm dukw maya ba tar i fataya mbaŋa. Kamala megweɗe ya, dukw ana ta ge a ya tserdze ka, a ge a ba lele, a da gər a Mbulum.