YAKUBA 1 - Bible Zulgo

¹ Iye Zakup, mala megemir gà Mbulum nda Yesuw Kiristi BATSAH kwa ŋa. I geha wusa a gà mburma Mbulum ana tə dzaya aba vatwa ilik ilik ku mege a ŋga aka gər ahəɗ tserdze ya.

Mbulum a vile a metsehe a gà na ta gəs ŋgat a

² A kurum gà damər gà ana ika vatwa Mbulum a. Na bəla gà dukw mesewere are ana ti dzik a à kurum pampam a, tàa le aà kurum ka, ŋgeywim ba ivaɗ.

³ Aɗaba kà sərum, medzike ata ti dzik a à kurum a ka, na bəla kàa miyakum à magəsa Mbulum tsəka, à sìkèh a kurum a à ndzəɗa a gəzləŋ kurum ɓəŋɓəŋ lele.

⁴ Ama kə̀la ka, gwim metsehe lele, na dite ndzəɗa ata a de a aka miɗ aka miɗ, i təv dukw ana tserdze ya ya. I dəba ŋa ya, ki nwim a ŋgwal ŋa lele, ki ywim a kuɗa duwa asa tsidze ya.

⁵ Na wura a riŋ ilik ika magər kurum, daɗəkɗəkka, a sər dukw ana a ge a ika vatwa Mbulum a tsəka, ma wiz aà Mbulum, a ɗifer a dər. Aɗaba ŋgat a vile a duwa a mburma ka, nda gəzləŋ ilik, a niw a dər tsa.

⁶ Ama say a wiz kə̀la ka, nda megìse i gəzləŋ ŋgar lele, tsəka, nda gəzləŋ sula tsa. Aɗaba wur ana madzala gà gər i gəzləŋ ŋgar pampam a ka, a ndzikiɗ ba kamala duluv yam ana himbiɗ a ɓezle a dər wàkit wàkit, a tsele akaba a ya.

⁷ Ama wur ana kataya ya ka, ma ta gwa ka, i ŋget a duwa i təv Mbulum a tsa.

⁸ Aɗaba wur ana kamala taŋa ya ka, a sər gà gər dukw ana a ge a ya tsa. Madzala gà gər ŋgar ibam, i təv ilik ŋa tsa asa.

Gà mala matawak, nda mala limana

⁹ Mala mazazama Yesuw ana matawak ŋa ika magər kurum a ka, ma ŋgaya ba, aɗaba Mbulum aka səkah à ŋgat.

¹⁰ Ama mala mazazama Mbulum ana limana ŋgar a riŋ hinne ya tekeɗe ka, ma ŋgaya ba mbaŋa, aɗaba Mbulum aka mà à ŋgat a bəɗ, aka vəlar aɗəm dukw ana ŋgwal ŋa ya ivaɗ. Aɗaba mala limana ka, ti dzeye akaba a nda limana ŋgar kamala mibezè kwizir ana a bize a ya.

¹¹ Na pat aka zlara ahər a mbulum a ka, kwizir ata a ɓwitiŋa, dite mibìzè ŋa na tekeɗe, à dzèwe a ihər a, à tsehin a asa tsa, a gwinekiŋa. Kamala taŋa ya, mala limana ibam, a dzeye a kataya mbaŋa, na aka məts aà megemir limana ŋgar ɗekɗek a.

Dukw ana a dzik a à mburma ya

¹² Maŋgayaba ika gər wur ana a mir a aba i təv gà dukw ana ti dzik a à ŋgat a tserdze ya. Ama na aka mər aba i təv gà dukw ata ti dzik a à ŋgat a ka, a ŋget a dukw maya ba ŋgar, kamala megweɗe ya, mesife ana Mbulum a gwa i sida ya ka, i ta vile a a gà mburma ana ta waya iye ya.

¹³ Na duwa aka dzik à wura ka, ma ta gwa ka, Mbulum na a dzik à iye ya tsa. Aɗaba wura a sle a aà məbàzà za a Mbulum aà dukw ana ŋgwal ŋa tsiye tsa. Dite Mbulum tekeɗe, a beze a za a wura aà mege dukw ana ŋgwal ŋa tsiye tsa asa mbaŋa.

¹⁴ Ama say madzala gà gər ana ŋgwal ŋa tsa, i gəzləŋ mburma ya ivaɗ na a beze a za a mburma aà mege bakal a.

¹⁵ Aɗaba na meèweke madzala gà gər ata aka rah a gəzləŋ ka, a we a bakal. Dite i dəba ŋa ya, bakal ata aka səkah ka, ki mìt a kuɗa.

¹⁶ Ama kinehe ka, a kurum gà damər gà ana i waya kurum hinne ya, kà dàɗum a ba à gər tsa.

¹⁷ Aɗaba gà dukw ana gà ŋgwal ŋa lele ndzer a ka, a dere a ka, i təv Mbulum i gər ŋa ya. Na a vile a gà dukw ata masakəŋa ya ka, Mbulum, mala mege gà dukw ana tì div a dzaydzay, tar riŋ madzàvà ŋa aà gəza mbulum a. Mbulum ka, à mbìɗ a à ba ŋgiɗ tsa. Luvuŋ a riŋ i təv ŋgar tsa. Ŋgat ka, kamala pat ana à dìɗiŋa, dite sìsiye à mbìɗ a aba ya tsa asa mbaŋa.

¹⁸ Ŋgat na a waya, a vəl a kwa mesife awiya ŋa na i təv guma ŋgar ndzer ŋana a tsik a. A sasar na ka nekwa gà malahalah ŋana i liwiŋ gà dukw ana a ge tserdze ya.

Matsaraka bazlam Mbulum ka, nda zləm ɗekɗek tsa

¹⁹ A kurum gà damər gà ana i waya kurum hinne ya. Tsarakum dukw ana i tsik a kurum a ya, dukw ilik ma ta məts a kurum gər tsa: Ku weke mà dza zləm a dukw ana ti tsiker a ya dzekwiŋ. Ama ma dzala dukw ana a tsiker a ika arah ŋgar a lele, dite ma tsik kuɗa. Mà gəs gəzləŋ i təv matsəɓatsəɓ ana a dere a i gəzləŋ ŋgar a mbaŋa.

²⁰ Aɗaba matsəɓatsəɓ ka, a sle aà mege a dukw ana a sàs a Mbulum a tsa.

²¹ Aɗaba taŋa, miyakum aba à dukw bakal ana tserdze ya, ki gwim asa tsa. Hənum à gər a bəɗ aka miɗ Mbulum, gəsum bazlam ŋgar ana a dzəv a gəzləŋ kurum kamala madzàvà duwa ya, dite ka, a sle a aà mimbile dər à mesife kurum kuɗa ya.

²² Ama ka tə dzalum matsaraka bazlam Mbulum ka, nda zləm ɗekɗek tsa. Say ki gwim a dukw ana a tsik a kurum a ya mbaŋa.

²³ Wur ana à dze a zləm a bazlam Mbulum pəra, ama a ge a dukw ana Mbulum a tsik a tsəka, a ndzikiɗ ba ka, wur ana a samata ba ŋgar i kwataramà ya.

²⁴ A fə̀r aà ba ə̀ba ilik tsara, aləka a de a i fataya ka, a sər ba ŋgar a ndza ana, meme ka, a sər asa tsiye.

²⁵ Ama wur ana a dzele a məpala ahəm Mbulum, dite a ge a metsehe a megemir ŋa lele kəla pat a ka, ŋgat ka, pam. Aɗaba aka tsaraka ka, à mìtser a gər tsa, à gis a gà bazlam ata ivaɗ. Taŋa wele ata ka, mipìsè ahəm ika gər ŋgar, Mbulum a piser a ahəm lele. Məpala ahəm Mbulum ata ka, ŋgwal ŋa ndzer, aɗaba ŋgat na a sle a aà mibeye à kwa i bakal a ya.

²⁶ Na wura ika magər kurum, aka ne à ba ŋgar mala ndzer ŋa, a gweɗe a, iye mala mazazama Mbulum, ama na aka ge metsehe a gà bazlam ana a dere a ika arah ŋgar a tsəka, a bana ba ŋgar nda mazazama Mbulum masakəŋa taf.

²⁷ Dukw ana Mbulum Tsir kwa ana i gər ŋa a waya ki zezemekwe a nda ndzer ŋa ya ka, araha: Mege gər a gà ɓəzla matawak ana wur tar a riŋ tsiye, nda gà madakwa gà məkəs ana ti sèwèr a are hinne ya. Dite wur ana a ge a kataya ka, ma kasla ba ŋgar mbaŋa, i təv gà bakal ana ika gər ahəɗ ti sle aà mibene a ŋgat asa tsiye.