Sunwa Yuhana 3 - Bible Zulgo

Bazlam ana Yesuw a tsikeha a gà mburma Mbulum ana i kwite *Sardis a

¹ Wele ata a gweɗiŋ asa: «Wetseha bazlam aaha a gawla Mbulum ana i kwite Sardis, a kesle a gà mburma Mbulum a. Ki wetse a ka, bazlam aaha: Na a tsik bazlam ŋa ka, wele ana gà Mezite Mesife Mbulum təsəla*fa* mandza ŋa i təv ŋgar, dite gà màwùsàwùs təsəla i ahər ŋgar asa mbaŋa ya. I sər megemir kurum ana kurum ihər ki gwim a ya. Ta gweɗe a kurum a ka, waytsà kurum riŋ nda gà mesife kaɗəŋ, ama tsaatsa pàrsa. Kurum ka, gà məməta ŋa ivaɗ.

² Pìɗekwim, ka vəlum aba ndzəɗa, dite na ki ta metwim a kweleŋ tsiye. Aɗaba Yàa dzik à kurum, i samata, mede kurum ika miɗ Mbulum ka, a de a zukw tsa.

³ Dzalum gà gər ka, aka bazlam ŋgwal ŋa ana kà tsarakum akahər ata ya. Megìse kurum ata kə̀ gəsum ɓəŋɓəŋ lele ya ka, mə̀ məts a kurum gər tsa. Ama kinehe ka, mbəɗum à madzala gà gər kurum, dite kə̀ gəsum lele nda gəzləŋ ilik asa. Aɗaba taŋa, na kàa pìɗekwim tsəka, sərum dər, i ti dere a a təv kurum a ka, sèrèh kamala mala akəl a. Ki sirwim a pat ana i ti dere a a təv kurum a tsa.

⁴ Ama gà mìsle ŋgiɗ a riŋ ika magər kurum i Sardis ka, tàa ge aruwaŋ aà gà petek tar tsidze. Tar ka, ti diŋ a gər lele. Ti ti dzèye akaba a ka, gà petek ana herrè ŋa ya. Dite mər nda gà iye ka, mìi ti sìweye akaba a i təv ilik ŋa.

⁵ Kamala taŋa ya, na i ti dzèye a gà petek herrè ŋa aka gà na ta mbè a aà dukw bakal a. Tar ka, i mbete a à gà zləm tar ika wakita gà na tàa ŋgat mesife ya tsidze. I təv ana iye riŋ ika miɗ gà Tsir gà nda gà gawla ŋgar a ka, i gweɗe a parakkà, gà mburma aaha ka, gà biy gà.

⁶ Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a riŋ a tsik a gà mayahaba gər gà mburma Mbulum a lele.»

Bazlam ana Yesuw a tsikeha a gà mburma Mbulum ana i kwite Filadelfiya ya

⁷ Wele ata a gweɗiŋ asa: «Wetseha bazlam aaha a gawla Mbulum ana i Filadelfiya, a kesle a gà mburma Mbulum a. Ki wetse a ka, bazlam aaha: Na a tsik bazlam ŋa ka, wele ana tsəɗaŋŋa, bakal ihər tsa, dite ŋgat ka, mala ndzer ŋa asa ya. Lèkilè Əbay Dawda ka, i ahər ŋgar. Na bəla aka hə̀ndə̀k i duwa ya ka, wura ilik a sle aà mehìndìkè aɗəm a tsidze, kige tsa, na bəla aka hə̀ndə̀k aɗəm ka, wura ilik a sle a aà mehìndìkè iɗəm a tsa asa mbaŋa.

⁸ I sər megemir kurum ana kurum ihər ki gwim a ya. Dite i sər asa ka, ndzəɗa kurum ka, hinne tsa, kwizikw pəra. Ama ku mege kataya tekeɗe, kàa giswim aà iye ahəm agəra dukw ana i tsik a kurum a. Kàa miyakum à iye tsidze. Araha, iye ka, Yàa hə̀ndə̀k a kurum i biye hərmaga ya. Wura ilik a sle a aà mahə̀ndə̀kà ŋa aɗəm asa tsa.

⁹ Dzwìmiŋ zləm lele. Araha na dukw ana i ta ge a nda gà mburma ata ti zezem a Əbay sitene ya, tar ta gwaɗawa, làŋa mər ka, gà Yahuda ya, tsaatsa tar ka, ti zezem a dukw gà Yahuda ŋa nda ndzer ɓav tsa, tar ka, gà ɓəzla pàrsa masakəŋa taf: Ama i slirehe a tar a təv kurum. Ti dehe a, tì zlibe a à kurum nda mandza gurmits a bəɗ aka miɗ kurum, dite na ti sir a dər ka, iye riŋ i waya kurum a.

¹⁰ Kurum ka, kàa gəsum aà iye ahəm, kàa mərum aba i təv gà mesewere are ya, kamala ana i tsik a kurum a. Aɗaba taŋa, i kesle a kurum a pat gà mesewere are ana ti ti dere a ika miɗ mba ya. Ama ti dere a ka, aka gər gà mburma ana ika gər ahəɗ a tserdze, aà medzìkè à tar.

¹¹ Yàa à mimèra ka, bise. Gà dukw kurum ana ŋgwal ŋa, kà sinikwim dər ba ya ka, gəsum nda ndzəɗa ɓəŋɓəŋ lele, tsəka, gà mìsle ŋgiɗ ti ndzeke a aà kurum gà dukw mayaba kurum a.

¹² Gà na tàa mba aà dukw bakal a ka, i ti ndweŋ a tar kamala mendweŋe ya, i batsah ga Mbulum gà, dite ti ndze a i fata ka, hiywe. I ta wetse aà ter a zləm Tsir gà Mbulum, nda zləm kwite ŋgar ŋa mbaŋa asa. Ama kwite ata ka, Yeruzalem awiya ŋa ana a slirre a i gər ŋa i təv ŋgar ŋa ya. Dite i wetse aà ter a zləm gà awiya ŋana mbaŋa.

¹³ Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.»

Bazlam ana Yesuw a tsikeha a gà mburma Mbulum ana i kwite Lawdikiya ya

¹⁴ Wele ata a gweɗiŋ asa mbaŋa: «Wetseha bazlam aaha a gawla Mbulum ana i Lawdikiya, a kesle a gà mburma Mbulum a. Ki wetse a ka, bazlam aaha: Na a tsik bazlam ŋa ka, wele ana tə zalar *Amin a, ŋgat ka, mala sida Mbulum ana ndzer, à ses a pàrsa tsidze ya. Dukw ana Mbulum a ge tserdze ya, a dara ka, i təv ŋgar a mbaŋa.

¹⁵ I sər dukw ana kurum ihər ki gwim a ya. Aɗaba i sər, ki zezemwim a iye ka, nda gəzləŋ ilik ŋa tsa, dite kwets kà niwim iye ɓav tsa. Ana ka, ŋgulum ki zezemwim a iye nda gəzləŋ ilik, kige tsa, ki niwim a iye.

¹⁶ Ama kurum ka, daɗəkɗəkka ika magər ŋa masakəŋa. Kamala taŋa ya ka, a sèsiŋ tsa. Aɗaba taŋa na i tifere a kurum i bazlam gà ya kamala tìzle ya ya.

¹⁷ Kurum ki gweɗwim a i gər kurum ka, waytsà mər ka, gà Əbay ŋa, maa ŋgat duwa tserdze, kuɗa duwa a ge a mər a asa tsa. Ama kurum ŋa kà sərum aaba tsa. Kurum ka, gà ɓəzla mesewere are ivaɗ. Ti zleŋe a kurum, kurum ka, gà matawak hinne, sagurɗumɗum petek ika kurum tsa, dite kurum ka, gà guluf asa mbaŋa.

¹⁸ Aɗaba taŋa kinehe ka, iye ihər i tsik a kurum a dukw ana ki gwim a ya: Ama ka, dumara, ka sakamum gura ana tàa làmbaɗa nda akwa tsəzlzla lele i təv ga ya, dite ka, ki nwim a gà Əbay nda ndzer ŋa kuɗa ya. Dumara, sakamum gà petek ana herrè ya mbaŋa, kà dzàyum akaba, na dite ka, ki ndzwim a kataya sagurɗumɗum, hwarwa a ge a kurum a asa tsiye. Sakamum yàwuf are, dite ka geywim a gà are kurum asa mbaŋa, na dite ki ŋgetwim a a vatwa lele asa ya.

¹⁹ Iye ka, gà mburma ana i waya tar a ka, i kwere akaba a tar, i ɗif a ter a à metsehe. Aɗaba taŋa, mbəɗum à madzala gà gər kurum, ka zazamum iye nda gəzləŋ kurum ilik.

²⁰ Tsarakum, iye riŋ mehìtsè ŋa aà gùva biye hərmaga, i lek a a dukw mahə̀ndə̀kà a ga. Wur ana aka tsaraka mifefile gà, dite aka hìndìkiŋ i ga ya ka, i de a a ga a ma ŋgar. Mìi zim akaba a ɗaf sula məma nda ŋgat tsùrùzl a təv ilik ŋa.

²¹ Gà na tàa mba aà dukw bakal a ka, i vile a ter a vatwa, tə dara, mìi ti ndze a nda gà iye, ika təv mendze mekwere gà. Ar ka, kamala iye ana i mba aà gà dukw bakal a mbaŋa. Kinehe ka, mər riŋ mandza ŋa i təv ilik ŋa nda Tsir gà ika təv mendze mekwere ŋgar ata mbaŋa.

²² Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.»