Sunwa Yuhana 16 - Bible Zulgo

Gà tasà ata nda gà matsəɓatsəɓ Mbulum iɗəm a

¹ I dəba ŋa ya ka, i tsarakara mifefile ana a ɗera ŋgəlakəkka i ga Mbulum ata ya ya. I huɗ mifefile ata ya ka, ta gwaɗa a gà gawla Mbulum ata təsəla ya: «Dumaha, kà dzàyum à gà matsəɓatsəɓ Mbulum ana i gà tasà kurum ata ya, a bəɗ aka gər ahəɗ. Dzàyum dər ka, a gà təsəla ŋa ata i tasà ya fit dze.»

² I dəba mifefile ata ya tsara ka, gawla Mbulum malahalah ŋana, a daha, a dza à biy ŋgar aka gər ahəɗ. A dza à bəɗ tsara ka, gà mbəlak ana ti wir a hinne ya, mbùkw mbùkw a pàtaya aba aka gà mburma ana lambà dukw dala ata aà tar, dite tə zàmbaɗawa à mendzikiɗe ba ŋgar ŋana asa mbaŋa ya.

³ Aləka gawla Mbulum masula ŋana a daha, a dza à dukw ana i tasà ŋgar a ka, a batsah duluv. A dza dər tsara ka, yam ata a ne kamala məmbəz ana a dara i məməta ya. Tsam ka, gà dukw ana i yam ata ya tserdze, fit ta mata aɗəm.

⁴ I dəba ŋa ya, gawla Mbulum məmakər ŋana a daha, a dza à dukw ana i tasà ŋgar a ka, a gà dula, nda gà a biye yam ana a ŋgəzawa ya. Dite gà yam ata tekeɗe, ti neye kamala məmbəz a mbaŋa.

⁵ I fataya ka, i tsarakara gawla Mbulum ana a kaslawa gà yam a. A zàmbaɗa à Mbulum, a gwaɗar: «Kər ilik na tsəɗaŋŋa ya. Kər ka, kər riŋ daga piŋŋe, aà gər ana gər ahəɗ a riŋ zukw tsiye. Dite kinehe tekeɗe, kər riŋ nda gà mesife hiywe asa mbaŋa ya. Kər ki ge a seriye aaha a mburma ka, ndaka vatwa ŋa lele.

⁶ Gà mburma aaha ka, tə dzayawa à məmbəz gà ɓəzla məma à guma yak a bəɗ, nda biy gà asiŋ gà mburma yak ana tserdze ya, tàa batsaya tar. Ama kinehe ka, ki vile a ter a məmbəz ata, dite tə sa mbaŋa te. Kamala taŋa ya, ta ŋget a dukw mayaba tar kaɗəŋ.»

⁷ I dəba bazlam ŋgar ata ya ka, i tsarakara mifefile i gər ŋa ya, a ɗera ika təv ana ta vəlawa aaka duwa a Mbulum a. A gwa: «Haya kaɗəŋ, kər Mbulum Batsah mər ŋa ka, mala makwàrà gər ahəɗ tserdze. Kər ka, mala ndzer, ki gewa seriye a gà mburma ka, ndaka vatwa ŋa lele, pàrsa iɗəm tsa.»

⁸ I dəba ŋa ya asa ka, gawla Mbulum məfaɗ ŋana a dza à dukw ana i tasà ŋgar a, aka pat. Tsam ka, a vəlar ndzəɗa aà mewire hinne, ndàzza kamala akwa ya, na a wene a mburma ya.

⁹ I təv ana a wànà tar kamala taŋa ya ka, gà mburma ata tə ndavaya a zləm Mbulum, aɗaba ana a slər aka tarra mesewere are ata ya ya. Ama ka, tàa mbəɗ à gəzləŋ tar, dite tàa dza gurmits a bəɗ a Mbulum ɓav tsa, ti niw ŋgat ivaɗ.

¹⁰ I dəba ŋa ya asa ka, gawla Mbulum mìizlam ŋana a daha, a dza à dukw ana i tasà ŋgar a, aka təv mendze Əbay dukw dala ata. I təv ana a dza dər tsara ya ka, luvuŋ a ge ziŋziŋ hinne i mekwere ŋgar ana a kwere a ya tserdze. Gà mburma ta papaɗa dər zlir hinne, aɗaba mewire mesewere are tar ata a wir aà ter a ya.

¹¹ Ama ku mege kataya tekeɗe ka, tàa mbəɗ à gəzləŋ tar, dite tàa miyak à gà dukw ana ta gewa ya tsidze. Tə ndavaya a Mbulum ana i gər ŋa ya ivaɗ, aɗaba mesewere are gà dukw ata nda gà mbəlak tar ata a wir aà ter a ya.

¹² I dəba ŋa ya, gawla Mbulum mendilik ŋana a daha, a dza à dukw ana i tasà ŋgar a, a batsah dula ana tə zalar Efrat a. A dza dər ka, yam ana i dula ata ya, a se ndes tsara. Kamala taŋa ya, gà Əbay ana ti dere a ndaka tsèke pat ana a mbəzawara ya, ta ŋget a vatwa, ti dere a aà mege gùvəl aka lìdè ŋgiɗ a kuɗa.

¹³ I dəba ŋa ya ka, i ŋgataha a gà sitene ana gà ŋgwala tsa ndeyndey a, makər.*fa* Tar ka, kamala gà makwambaɗùkw a. I ŋgiɗ a dara ka, i bazlam *kə̀rəm a. Dite biy ŋgiɗ ibam, a dara i bazlam dukw dala ata ya. I ŋgiɗ asa ka, a dara i bazlam mala məma à guma Mbulum ata nda pàrsa ya.

¹⁴ Gà sitene ata tə dara ka, i təv Əbay tar ŋana ya. Ta gewa ka, gà dukw mene aà mburma ana pampam a. Ti de a a təv gà Əbay gər ahəɗ tserdze. Ti yehe a ter a gər aà mege gùvəl aà Mbulum BATSAH kwa ŋana a za duwa tserdze ya, a pat ana a ta pèt a à ndzəɗa ŋgar a.

¹⁵ Yesuw a gwa: «Gwim metsehe, tsarakum, aɗaba i ti dere a ka, sèrèh kamala mala akəl a. Ama maŋgayaba ika gər wele ana petek ika ba ŋgar a, dite ka, a ndze a are tsa asa ya. Aɗaba Yàa dara ka, ma tə da kataya sàgùrɗùmma kataya ze petek, dite ka, hwarwa a ger a ika miɗ mburma ya tsa.»

¹⁶ Gà sitene ata makər a ka, ti yaha gər a gà Əbay a tə̀vəməŋa a riŋ tə zalar ndaka ahəm gà Yahuda ka, Armagadan.

¹⁷ I dəba ŋa ya ka, gawla Mbulum matəsəla ŋana a daha, a dza à dukw ana i tasà ŋgar a, a himbiɗ aà gəza mbulum. A dza dər aba ya ka, mifefile duwa a ɗera nda magala ya ŋgəlakəkka i təv mendze Əbay Mbulum i ga Mbulum batsah ŋa ata ya. A gwa ka: «Aka ndəv.»

¹⁸ I fataya ka, mewìtìɗè mbulum a dza ba aà mewìtiɗe wùtəɗ wùtəɗ. Dite malaka mbulum a lakaya ŋgùzlar ŋgùzlar, dite gər ahəɗ a ɓazla hinne wàkit wàkit asa. A gər ana Mbulum a ge mburma ya ka, gər ahəɗ aka ɓazla kamala taŋa ya ilik tsidze. A ɓazla ka, a za duwa tserdze.

¹⁹ Dite asa gər ahəɗ a taya ba ikaba ya tùhak tùhak. Huɗ kwite batsah ŋana tə zalar Babila ya, a tarətsa ba ikaba ya təv pampam makər, dite gà asiŋ kwite ana ika gər ahəɗ a tserdze, ta mbazla mbaŋa. Kamala taŋa ya, aɗaba kwite Babila ata ka, aka məts gər a Mbulum tsa. A ge matsəɓatsəɓ hinne nda təv ŋgar. Ar ka, kamala dukw ana a dzəm tsəka, a gweɗere a, sa, kà ndəv dər iɗəm a ya.

²⁰ Kamala taŋa ya, gà ahəɗ ana malàwàrà ŋa nda yam a tserdze, tə dzawa a huɗ yam, dite gà kwite zùbəl ŋa ta mbazlaya bìrìm bìrìm fit, wura aka ŋgatar asa tsa.

²¹ Gà bàba gà aləndza tə dzawara i mbulum a ɓàràmakkà hinne. Ama aləndza ata ilik ka, kiliw dzik faɗ. A dzawara ka, aka gà mburma ya. Gà mburma ata ka, tə ndavaya dər akaba a Mbulum, aɗaba ana ti sèwèr a are hinne agəra aləndza ata ya. Aɗaba mesewere are ata ka, ŋgwala tsa ndeyndey, a za duwa tserdze.