RUMA 8 - Bible Zulgo

Mendze ana gà mburma ti ndze a nda Mezite Mesife Mbulum a

¹ Aɗaba taŋa, kinehe ka, seriye Mbulum à gis a gà mburma ana tar mandza ŋa i təv ilik ŋa nda gà Yesuw Kiristi ya, ilik asa tsidze.

² Aɗaba kwa ka, i ahər bakal ana a dzeye a à kwa ya asa tsa. Ndzəɗa Mezite Mesife ana a vile a kwe a mesife nda ahər Yesuw Kiristi ya, na a pəl à kwa i mazazama dukw bakal ata ya, dite ka, ŋgat a kwere a kwa kuɗa ya.

³ Məpala ahəm Musa ka, a sle aà məvəla kwa mesife tsa, aɗaba ana kwa ka, gà mburma taf masakəŋa, ndzəɗa kwa a riŋ tsiye. Kwa ka, kà mbàkwa aà magəsa ahər ahəm tsa. Ama dukw ana məpala ahəm ata a sle aà mege ŋa tsiye ka, Mbulum nda ahər ŋgar ŋa aka ge. A ge taŋa ka, nda maslə̀rà Kəla ŋgar ana a slərra aka gər ahəɗ a, a ne mburma kamala kwa ya ya. Tàa dzik à ŋgat aà mege bakal kamala kwa mburma ya mbaŋa, ama ka, aka ge tsa. Dite i dəba ŋa ya ka, a mət aɗaba bakal kwa. Kamala taŋa ya na Mbulum a ge seriye bakal ana mburma a gewa ya.

⁴ A ge taŋa ka, na dite ki ŋgetekewe a vatwa aà mege dukw ana məpala ahəm ŋgar a tsik a kwa ya ndzer. Aɗaba mendze kwa ana ki ndzekwe a kinehe ya ka, Mezite Mesife Mbulum na a kwere a kwa ya, tsəka, meèweke ba kwa asa tsa.

⁵ Na wura a zezem a meèweke ba ŋgar, a dzele a i metsehe ŋgar ka, taŋa hiywe ɗekɗek pəra. Ama na wura a ndze a nda ndzəɗa Mezite Mesife Mbulum ka, a dzele a gà gər aka dukw ana Mezite Mesife Mbulum ata a waya ya hiywe mbaŋa.

⁶ Aɗaba na wura a dzele a dukw ana ba ŋgar a waya ya ɗekɗek ka, à mìtiŋa. Ama wur ana a dzele a dukw ana Mezite Mesife Mbulum a waya ya ka, Mbulum a viler a mesife ndzer ŋana, nda matasla yam zayya a gəzləŋ ŋgar.

⁷ Wur ana a dzele a dukw ana ba ŋgar a waya ya ɗekɗek ka, ŋgat a ne ka, mala mene are a Mbulum. A zezem a ka, dukw ana Mbulum a tsik a tsa, aɗaba ana a sle a tsiye.

⁸ Aɗaba taŋa, wur ana a zezem a ka, dukw ana ba ŋgar a waya ya hiywe ka, mede ŋgar a sle aà metsehine a aà Mbulum tsa.

⁹ Ama kurum kinehe ka, ki zezemwim a dukw ana ba kurum a waya ya asa tsa. Kurum ihər ki giswim a ahəm ka, aà dukw ana Mezite Mesife Mbulum a waya ya kuɗa. Aɗaba Mezite Mesife ata ka, ar mandza ŋa i gəzləŋ kurum. Na wura aka ŋgat Mezite Mesife ata Yesuw Kiristi a vile a ya tsəka, ŋgat aka ne mburma ŋgar tsa na taŋa ya.

¹⁰ Na Yesuw Kiristi mandza ŋa i gəzləŋ kurum ka, Mezite Mesife Mbulum a vile a kurum a mesife, agəra ana kàa nwim gà ŋgwal ŋa ika miɗ ŋgar a. A vile a kurum a ka, ku mege ba kurum à mìt a aɗaba bakal ana ki gwim a ya tekeɗe.

¹¹ Ama na Mezite Mesife Mbulum ana a mbəlara à Yesuw Kiristi i məməta ya, dite Mezite Mesife ata a riŋ mandza ŋa i gəzləŋ kurum ka, taŋa ka, Mbulum a ta mbilere a à ba kurum i məməta ya nda ndzer mbaŋa, pàrsa iɗəm tsa. A ta ge a taŋa ka, nda ndzəɗa Mezite Mesife ŋgar ata mandza ŋa i gəzləŋ kurum a.

¹² Aɗaba taŋa, gà damər gà, say ki gekwe a ka, dukw ana a tsahən aà Mezite Mesife Mbulum a, tsəka, ki gekwe a dukw ana a tsahən aà ba kwa ya asa tsa.

¹³ Aɗaba na bəla ki zezemwim a dukw ana ba kurum a waya ya ɗekɗek ka, ki metwimiŋa. Ama na bəla ki vilwim a vatwa a Mezite Mesife Mbulum a gəzləŋ kurum, ki miyekwim a à dukw ana ba kurum a waya aà mege ya ka, taŋa ka, ki ŋgetwim a mesife ana ndzer ŋa ya.

¹⁴ Aɗaba gà na Mezite Mesife Mbulum a ɗe a ter a à vatwa ya tserdze ka, tar ti ne gà ɓəza Mbulum.

¹⁵ Kamala taŋa ya, duwa a riŋ na ki gwim a dər magəɗa ika miɗ Mbulum a asa tsa. Aɗaba Mezite Mesife ŋgar ana a vəl a kurum a ka, aka ne à kurum gà ɓele tsa, a ne à kurum ka, gà ɓəza ŋgar ivaɗ. Mezite Mesife ŋgar ata ka, a riŋ mandza ŋa i gəzləŋ kwa. Aɗaba taŋa na kù gwaɗawakwa aà Mbulum ka, Tsir kwa ya.

¹⁶ Mezite Mesife ata na a ɗif a kwe a dər i gəzləŋ kwa ka, kàa nekwa gà ɓəza Mbulum kaɗəŋ a.

¹⁷ Kàa nekwa gà ɓəza Mbulum kaɗəŋ. Kamala taŋa ya, ki ŋgetekewe a dukw ana ŋgwal ŋa, a tsik i sida ya, a gwa, i ta vile a a gà ɓəza gà ya. A ta vile a kwe a ka, kamala ana a vəl a Yesuw Kiristi ya mbaŋa. Aɗaba na kàa gə̀sakwa mesewere are ana Yesuw Kiristi a sèwèr a ka, ki ta ŋgetekewe a mezlibe ana tì zlibe a à ŋgat a mbaŋa.

Mezlibe ana kà dzalawakwa aaka gà gər a

¹⁸ I sər ndzer, mesewere are ana kwa ihər ki sèwèrekwe a kinehe ya ka, ar ka, kamala ana dukw masakəŋa ya. A geye akaba a nda mezlibe ana Mbulum a ta vile a kwe a mba ya tsidze.

¹⁹ Aɗaba zləma gà dukw ana Mbulum a geye tserdze ya ka, tar riŋ ihər ta veviŋa. A sàs a tar ka, hinne na aà meŋgete a pat ana Mbulum a ta pèt a aba a gà ɓəza ŋgar ndərzayya i təv dzaydzay ŋa, na a vile a ter a mezlibe ata ya.

²⁰ Mbulum a yà dukw ana a geye a tar tserdze ya ka, a dala. A gwa, ma dzeye kamala ana dukw taf masakəŋa ya. A yà a dala ka, agəra ana gà dukw ata ta waya kataya ya tsa. A miyak dər ka, aɗaba bakal gà mburma ana ta ge ya. A waya na a ge akaba a seriye mburma ka, nda biy gà dukw ata tserdze ya. Ama ku mege kataya tekeɗe, aka tike a tar duwa aka miɗ dukw ŋgar, na dite ti dzele a aaka gà gər a.

²¹ Aɗaba pat ŋa a ndzere a ka, a ta mbìrwìɗere a kwa ya nda gà dukw ata a geye tar tserdze ya mbaŋa. Gà dukw ata ti ti ndze a ka, kamala gà ɓele ya asa tsa, dite ti dzeye a tsa asa mbaŋa. Tar nda gà ɓəza Mbulum ka, ta ŋget a mezlibe ana tì zlibe a à tar a, dite ti ziwe a gər tar kuɗa.

²² Aɗaba kà sərakwa, daga aà gər ana akahər ata ya haa kinehe, gà dukw ana Mbulum a geye tserdze ya ka, tar riŋ ti sèwèr a are. A wir a ter a hinne kamala məkəs ana sawàr sawàr à bèse a mawà kəla ya.

²³ Ama ka, zləma gà dukw ata ɗekɗek tsa, na ti sèwèr a are ya. Kwa ana Mbulum a lah mivile a kwa Mezite Mesife ŋgar a tekeɗe, kwa ihər ki bèsekwe a i gəzləŋ kwa mbaŋa. Kà wayakwa pat ŋa ma ndzera ka, bise na Mbulum a ti ne a à kwa gà ɓəza ŋgar nda ndzer a, kamala megweɗe ya ka, à mbìrwìɗere a ba kwa i mesewere are ya fit kuɗa.

²⁴ Mbulum aka mbəl à kwa, ama kàa ŋgatakwa gà dukw ata tserdze ya zukw tsa. Kwa ihər ki dzelekwe a ka, aà maŋgatar mba hiywe. Ama na mege kàa ŋgatakwa gà dukw ana zləmana ki ta ŋgetekewe a mba ya, nda are kwa ka, taŋa ka, dukw ata ki dzelekwe a aaka gà gər ndzer asa tsa. Kàa mbər meŋgetekewa na taŋa ya. Dite weke na a dzele a gà gər aka dukw ana aka mbər meŋgete ya ya? Wura a riŋ tsa.

²⁵ Ama na kwa ihər ki dzelekwe a aka dukw ana kàa ŋgatakwar zukw tsiye ka, taŋa ka, ki vevekwe a nda magəsa gəzləŋ hinne ivaɗ.

²⁶ Aɗaba taŋa, Mezite Mesife Mbulum tekeɗe, a dere a, à zlèk a kwa mbaŋa, aɗaba ana ndzəɗa kwa a riŋ ika vatwa Mbulum tsiye. Aɗaba kà sərakwa, meme na ki hemekwe a a Mbulum ndaka vatwa ŋa ya tsa. Say Mezite Mesife Mbulum ata nda gər ŋgar na a riŋ a heme a a Mbulum aɗaba kwa ya. A heme a ka, nda gəzləŋ ilik sah gər, tsəka, nda bazlam ka, a sle tsa na à meɗife à dukw ana a tsik a ya ya.

²⁷ Mbulum ka, a sər dukw ana i gəzləŋ mburma ya. Kamala taŋa ya, a sər dukw ana Mezite Mesife a waya ya mbaŋa. Aɗaba Mezite Mesife ata a heme a agəra gà mburma ŋgar a ka, kamala ana a tsahən aà Mbulum a.

²⁸ Kà sərakwa, gà mburma ana Mbulum a waya tar, a zal a tar, dite ta ge dukw ana a tsahən ahər a ka, a ge a megemir nda gà tar kamala ana a waya ya. A sasar dukw ana a ge a ba nda gà tar tserdze ya ka, ma ge a tar ŋgulum.

²⁹ Gà na Mbulum a lah mipele tar, ti ne gà biy ŋgar akahər ata ya ka, a sasar na a ti ne à ter a kamala Kəla ŋgar a mbaŋa, na dite Kəla ŋgar tekeɗe, ma ne malkwara ika magər gà damər ŋgar ata hinne ya ya.

³⁰ Ama gà mburma ata Mbulum a pala tar tserdze, ti ne gà biy ŋgar a ka, a zal a tar mezele mbaŋa, na dite tə dara a təv ŋgar a ya. Gà na a zal a tar a ka, a ne à tar gà ŋgwal ŋa ika miɗ ŋgar mbaŋa. Taŋa ɗekɗek tsa, a dza tar a təv mezlibe ana tì zlibe a à ŋgat a mbaŋa asa.

Duwa a riŋ ilik à ses a ikaba kwa nda mawàyà Mbulum a tsa

³¹ Aɗaba na kataya ana, ki gweɗekwe a dze ana, là, na aka gər bazlam ata ya? Na Mbulum a riŋ mandza ŋa i təv ilik ŋa nda gà kwa dze ana, weke na a sle a aà mimbè aà kwa ya? Wura a riŋ tsa.

³² Mbulum ŋgat ka, ku mege Kəla ŋgar aka niw dər tsa, ama a miyak à ŋgat, dite mə̀ mət aɗaba kwa tserdze. Na Mbulum aka vəl a kwa Kəla ŋgar seyiŋ ana, kà dzalum ana, a ta vilekwe a gà dukw ŋgiɗ tserdze mbaŋa tsiye?

³³ Wura a sle a aà mege seriye aà gà na Mbulum a pala tar, dite a ne à tar gà biy ŋgar a tsa, aɗaba ŋgat ŋa nda gər ŋgar na a ne à tar gà ŋgwal ŋa ika miɗ ŋgar a.

³⁴ Weke na a sle a aà magəsa tar i seriye ya? Wura a riŋ tsa. Aɗaba Yesuw Kiristi nda gər ŋgar a mət agəra kwa. Ama ka, taŋa ɗekɗek tsa, ndeyndey ŋana ka, na Mbulum a mbəlara à ŋgat i məməta ya ya. Ŋgat a riŋ mandza ŋa ika tsèke ahər mezime Mbulum, dite ŋgat a riŋ a hemer a aɗaba kwa mbaŋa asa.

³⁵ Na kataya ana, duwa a riŋ na a sle a aà masàsà ikaba kwa nda gà Yesuw Kiristi ana a waya kwa ya ya? Wànà mesewere are ana ki sèwèrekwe a ya, nda gà bəla dukw mawùràba ŋa, nda gà mene are ana ti ne a kwe a ya, kige tsa, may nda matawak a, tsəna, dukw medzeye ana ki dzeyekwe a dər a ya, kige tsa məməta ana a le aà kwe a ya ya? Awaŋ, gà dukw ata tserdze ya ka, ti sle a aà masàsà ikaba kwa nda gà Yesuw Kiristi ana a waya kwa ya tsa.

³⁶ Mesewere are kwa ata a ne ka, kamala ana mewetse ŋa i wakita Mbulum, a gwa ka: «Gà mburma ti yehe a vatwa aà məbatsa mər hiywe, agəra ana mìi zezem a kər a. Tar ihər ta fir aà mər a ka, kamala gà təmaŋ ana ti ti zleye a ter a ɗa ya.»*fa*

³⁷ Ama ku mege kataya tekeɗe, ki sewlekwe a aà mesewere are ata kweleŋ fètìte, na nda ndzəɗa Yesuw Kiristi ana a waya dər kwa ya ya.

³⁸ Aɗaba i sər ndzer, duwa a riŋ na à ses a ikaba kwa nda meweye ŋgar ana a waya kwa ya ilik tsidze. Ku mege məməta ana ki metekwe a ya, kige tsa, mendze kwa ana ki ndzekwe a nda are ya tekeɗe ka, pampam tsa. Ku mege gà gawla Mbulum ana nda Əbay tar, dite nda gà dukw ana tserdze, ndzəɗa tar a riŋ hinne i gər ŋa ya tekeɗe, ti sle a aà mege duwa, na dite ti ses a ikaba kwa ya tsa. Ku mege gà dukw ana ta ge a ba kinehe ya, ndəna a ta ge a ba aka miɗ mba ya tekeɗe ka, ti sle a aà mege duwa tsa mbaŋa.

³⁹ Ku mege gà dukw ana i gər ŋa i Mbulum gà ndzəɗa ŋa ya, nda dukw ana ɗa i bəɗ a tekeɗe, ti sle a aà mege duwa tsa mbaŋa asa. Kamala taŋa ya, duwa a riŋ ilik ika magər gà dukw ana Mbulum a geye tar tserdze ya, na a ses a ikaba kwa nda meweye ŋgar ana a weye a kwa ya tsidze. Kà sərakwa meweye ŋgar ata ka, aɗaba Yesuw Kiristi BATSAH kwa ŋa.