RUMA 14 - Bible Zulgo

Màkwa à bakal a gà mìsle ŋgiɗ tsa

¹ Na bəla wura ndzəɗa ŋgar a riŋ zukw tsa ika vatwa Mbulum ka, gəsum aaba ŋgat lele mbaŋa. Ka ta mbetswimar ahəm aka dukw ana aka dzala pam aà biy kurum a tsa.

² I tsik taŋa ndeyndey ka, aɗaba mazəma dukw mezime. Gà mìsle ŋgiɗ ti dzele a ka, dukw mezime tserdze ka, dukw mewisle iɗəm tsa, ti zimiŋa. Ama gà biy ŋgiɗ ibam, gà na ndzəɗa tar a riŋ tsa ika vatwa Mbulum a ka, ta gweɗe a, slu ka, awisl, mìi pèpìɗ a tsa. Ti zim a ka, ala bagur pəra.

³ Ama kər ana ki zim a duwa tserdze ya ka, ka ta fə̀r aà wele ana a sasar tsiye, kamala za ya ɓav tsa. Dite kər ana a sàsak tsiye, ka ta mà à bakal a wele ana a pèpìɗ a ya ɓav tsa asa. Aɗaba Mbulum ka, a wele a ikaba kurum a tsa, à gis a biy ŋgiɗ aaha mbaŋa.

⁴ Kər dze ana, weke na ki me a à bakal a mala meslire mìsle ŋgiɗ a? Na bəla dukw ana aka ge ndaka vatwa ŋa tsəka, mala ga ŋgar na a tsiker ahər a ya, nda gà aka ge lele ka, hiywe ŋgat na a tsiker a ya. Ama i təv kurum kinehe tekeɗe, kamala taŋa ya mbaŋa. Mala meslire a ge a lele hiywe, aɗaba Mbulum Batsah ŋgar ŋa a riŋ, ŋgat mala ndzəɗa, à zlèk a ŋgat, na dite a sle a aà medìɗè a ika vatwa ŋgar a tsiye.

⁵ Gà mìsle ŋgiɗ ta ndeɗiŋa: «Gà pat miveke ŋgiɗ ka, ti zè a biy ŋgiɗ nda batsah ŋa na ika miɗ Mbulum a.» Gà biy ŋgiɗ ibam, ta gweɗe a: «Gà pat miveke ka, ta geye akaba fit kalkal dze.» Say ku weke ma ge ka, kamala ana a dzala i gər ŋgar a, ma zazam taŋa.

⁶ Wur ana a dzele a kamala taŋa ya, a gweɗe a, pat ŋgiɗ a za biy ŋgiɗ a ka, a ge a dukw ata ka, a sasar aà mazàmbàɗà à BATSAH kwa ŋa. Ar ka, kalkal wele ŋgiɗ aaha a wele a ikaba gà pat a tsiye mbaŋa. Wur ana a zim a duwa zləməŋa pəra ya tekeɗe, a sasar aà mazàmbàɗà à BATSAH kwa ŋa mbaŋa, aɗaba a ge a dərraha kəkaaha a Mbulum nda dukw ana a zim a ya. Dite bəla wur ana a wele a ikaba dukw mezime ya, a gweɗe a, naha ka, awisl a ka, a sasar mazàmbàɗà à BATSAH kwa ŋa asa. Ŋgat tekeɗe, a ge a dərraha kəkaaha a Mbulum mbaŋa.

⁷ Wura a riŋ ilik ika magər kwa gà mburma Mbulum, a ndze a aà bəra ka, nda mezìwè gər ŋgar tsa. Dite bəla i təv ana à mìt a ya tekeɗe, nda ahər ŋgar tsa asa mbaŋa.

⁸ Na i təv ana kinehe kwa riŋ ki ndzekwe a aà bəra ka, aà mazàmbàɗà à BATSAH kwa ŋa. Dite i təv ana ki metekwe a asa ya ka, ki zèmbeɗekwe a dər hiywe. Kamala taŋa ya, ku mege kwa riŋ nda are, kige tsa bəla kàa matakwa tekeɗe ibam a ka, kwa tserdze biy Yesuw Kiristi BATSAH kwa ŋa.

⁹ Aɗaba ŋgat a mət, a mbəlara iɗəm a ka, na dite a ne Batsah ŋa ika gər gà na tar riŋ nda are ya, nda gà na tàa mata ya tserdze.

¹⁰ Na kataya dze ana, aàla na ki me a à bakal a mìsle ŋgiɗ a? Kige tsa aàmala dze ya na ki fir ahər a kamala za ya? Aɗaba kà sər tsiye, kwa tserdze ki tèkwe a a təv seriye aka miɗ Mbulum a. Ŋgat na a ses a ikaba bazlam ŋa ya.

¹¹ Aɗaba ar ka, kamala ana a riŋ mewetse ŋa i wakita ka, ta gwa: «BATSAH kwa ŋa a gwa ka: I tsik ka, nda ndzer, ku weke a dere a, à dze a gurmits a bəɗ aka miɗ gà. Ku weke a tsik aà iye a parakkà, iye na Mbulum a.»*fa*

¹² Kamala taŋa ya, ku weke hə̀ndə̀sl bakal ŋgar à dèn a ŋgat, a tsik a parakkà ika miɗ Mbulum, na dukw ana a ge ya.

Ka ɗifekwa à mege bakal a gà mìsle ŋgiɗ tsa

¹³ Aɗaba taŋa, kà màkwaba à bakal asa tsa. Ama kurum kinehe ka, ki zlwim a metseke i vatwa gà damər kurum a ivaɗ. Ŋgulum ki dzelwim a ka, aka vatwa ana a da fehhè lele, duwa ikəka tsa, dite ka, gà damər kurum ata ti ndif ahər a sik, tì dìɗ a dər a bakal tsiye.

¹⁴ Iye kəla ka, i sər ndzer, agəra ana iye riŋ mandza ŋa nda Yesuw BATSAH kwa ŋa ya, dukw mezime ka, awisl ilik tsa. Ama na wura a gweɗe a, dukw aaha, kige tsa naaka awisl ka, ma zəm tsa, aɗaba i təv ŋgar ka, a ne aaka a ŋgwala tsa kaɗəŋ.

¹⁵ Kamala taŋa ya, na bəla kər kàa zəm ka, kà wiser ka, à gər. Dukw ata kì ger ka, kamala ana kà waya ŋgat asa tsiye. Tsaatsa Yesuw Kiristi a mət ka, aɗaba ŋgat mbaŋa. Agəra taŋa, dukw ana ki zim a ya ka, mà dəɗ à ŋgat a bakal tsa.

¹⁶ Kər ki gweɗe a, dukw ana ki ge a ya ka, ŋgwal ŋa lele na i təv yak a. Ama na kàa sər, dukw ata ki ge a ka, a tsahən aà tar tsa, ta mèk a à bakal ka, ŋgùlum sifek miyak dər.

¹⁷ I təv kwa ana kà hənakwa à gər a bəɗ a Mbulum BATSAH kwa ŋa ya ka, bazlam dukw ana ti zim a ya, ndəna ti zim a tsiye, kige tsa, masà dukw mese ka, a ge a ŋgulum tsa. Dukw ana ŋgwal ŋa i *mekwere Mbulum ivaɗ ka, Mezite Mesife ŋgar ana a ge a megemir i təv kwa ya. A zlèk a kwa aà mege dukw ana ŋgwal ŋa ya ika magər kwa, a vile a kwe a zayya, nda maŋgayaba lele asa.

¹⁸ Na wura a ge a meslire a Yesuw Kiristi kataya ka, à tsehin a aà Mbulum, dite gà mburma tserdze tì zlibe a à ŋgat mbaŋa.

¹⁹ Aɗaba taŋa, mərakwa aaba aà mege dukw ana ki ndzekwe a dər zayya ika magər kwa, à zlèk a gà asiŋ ŋa aà məvə̀làba ndzəɗa ika vatwa Mbulum a sah lele.

²⁰ Ka tə nəs à megemir Mbulum nda dukw ana ki zim a ya tsa. Dukw mezime fit dze ka, awisl tsa kaɗəŋ. Ama na bəla ki zimiŋa, dite gà mìsle ŋgiɗ tì dìɗ a dər a bakal aɗaba ana kà zəm a ka, ka zəm tsa. Ŋgwal ŋa tsa na kàa zəm a.

²¹ Aɗaba taŋa, dukw ana ta gwa ahər, ŋgwal ŋa tsa, à dìɗ a à damər yak ika vatwa Mbulum a ka, ŋgulum ki ge tsa. Bəla məpapəɗa slu ata, kige tsa masà guzum nda gà ku mege dukùla tserdze tekeɗe ya.

²² Dukw ana kàa dzala, kàa waya bəla awara ya ka, ndza dər i gər yak ɗekɗek, ka ti tsik a wura tsa. Ma ndza ka, ika magər kurum nda Mbulum ilik. Wur ana a ge a gà dukw ata ka, nda madzala gà gər ŋgar ilik sah lele, a gweɗe a, naha ka, awisl, taŋa ka, ndzer kaɗəŋ, kige tsa awisl tsiye ka, ŋgat na maŋgayaba ika gər ŋgar a.

²³ Ama wur ana madzala gà gər ŋgar wàkit wàkit, a gweɗe a, naha ka, awisl, aləka i dəba ŋa ya, aka zəm ka, seriye à gis a ŋgat, aɗaba aka tike madzala gà gər ŋgar tèrihhwè a dukw ana a ge a nda ndzer a tsa. Aɗaba kà sərakwa, dukw ana ka sər ndzer, naha ka, awisl, dite kàa ge ka, kàa ge bakal.