Mata 7 - Bible Zulgo

Ka ta mum à bakal a gà mìsle ŋgiɗ tsa

¹ «Ka ta mum à bakal a gà mìsle ŋgiɗ tsa, na dite Mbulum tekeɗe, a ta me a kurum a à bakal tsiye mbaŋa.

² Aɗaba na kàa mum à bakal a gà mìsle ŋgiɗ ka, Mbulum a ta me a kurum a dər aɗəm kataya mbaŋa. Dukw ana kàa gwim a gà mìsle ŋgiɗ a ka, Mbulum tekeɗe, à me a kurum a dər aɗəm ka, kamala taŋa ya mbaŋa.

³ Aàmala la na a sàsak meŋgeteha ka, a pərats ana kwizikw i are damər yak a, tsaatsa i yak ŋa ana iɗəm diŋgwizl dùrgùrəzl ka, kàa sər ahər tsiye?

⁴ Dite meme na ki gweɗe a damər yak ka, aha i zlekere a pərats ata i are yak a, na tsaatsa i yak ŋa ana iɗəm ka, diŋgwizl a?

⁵ A kər mala mimbèhè are ata, lah mazlàra diŋgwizl aaha i are yak ŋa ya dzekwiŋ, dite ndzihndzih ki ŋget a a vatwa lele, ìndits ki zlere a pərats a kwizikw ŋa ata i are damər yak a kuɗa.

⁶ Ama ka ta vəlum ŋgwal dukw kurum ana tsəɗaŋŋa lele ya, a gà na ti ne kamala gà kəra ya tsa. Aɗaba i dəba ŋa ya ka, ta mbiɗere a gər a dəba aka kurum ŋa ya, ə̀vaŋ ti dze a kurum ŋa. Ka vəlum gà kur kurum ana tsakala ŋa hinne, à sìkim a ba tsiye, a gà na ti ne kamala wèdèlìŋ a ɓav tsa, tsəka, tipikw tipikw ti ta ɓele a kurum aaka a nda sik.»

Hamum a Mbulum, a vile a kurum ŋa

⁷ I dəba ŋa ya, a gwaɗa a tar asa: «Wizwim, Mbulum a vile a kurum ŋa. Yahum, ki ŋgetwimiŋa. Lakum a dukw mahə̀ndə̀kà ga, dite à hìndìk a kurum a i ga ya.

⁸ Aɗaba ku weke na aka wiz a ka, a vileriŋa. Wur ana aka yaha ya ka, a ŋgetiŋa. Dite wur ana aka lak a dukw mahə̀ndə̀kà ga ya ka, tùwaŋ à hìndìker a iɗəm a mbaŋa.

⁹ Na wura ilik ika magər kurum tsir gà ɓəza, na bəla kəla ŋgar ata aka wiz ahər ɗaf ana, a viler a kur a?

¹⁰ Kige tsa na aka wiz ahər kilif ana, a viler a mesiwiɗ a?

¹¹ Na kurum ana gà ŋgwal ŋa tsiye ka, ka sərum məvəla gà ŋgwal gà dukw a gà ɓəza kurum seyiŋ ana, sakwàn Tsir kurum ana i gər ŋa ya ivaɗ a. A vile a gà ŋgwal gà dukw a gà na ta wiz ahər a ya ana, à zè a taŋa tsiye?

¹² Aɗaba taŋa, dukw ana a sàs a kurum zləmana gà mburma ta ge a kurum ŋgwal ŋa ya ka, kurum tekeɗe ibam, gwim a tar kataya mbaŋa. Taŋa na dukw ana i wakita məpala ahəm Musa nda biy gà ɓəzla məma à guma Mbulum a tsik tserdze ya.»

Biye hərmaga ana hinne tsiye

¹³ «Dum ndaka biye hərmaga ana hinne tsiye. Aɗaba biye hərmaga ana zlàbàta ŋa ya ka, a de a à mburma ka, a təv medzeye. Vatwa mada a fata ka, tùwwa mawùràba ŋa tsa, gà mburma hinne na ti de a nda təv ata ya.

¹⁴ Ama biye hərmaga ana hinne tsiye ka, a de a à mburma ka, a təv mesife ana à ndìv a tsiye. Vatwa ŋa ka, rèhhe masakəŋa, mawùràba ŋa hinne. Ama gà mburma ti de a nda təv ata ka, ndaw tsa.»

Gà dizl ɗaf ti sir a aba ka, i mewe tar a

¹⁵ I dəba ŋa ya, Yesuw a gwaɗa a tar asa: «Kaslum ba kurum i təv gà ɓəzla məma à guma Mbulum ana nda pàrsa ya. Ti dere a a təv kurum a ka, zukum zukum kamala gà təmaŋ a. Tsaatsa i huɗ ba tar ka, ti ndzikiɗ ba gà də̀var ana ta pèpìɗ a mburma ya.

¹⁶ Ki sirwim a dər iba ya ka, i megemir tar ana ta ge a ya. Aɗaba dizl ɗaf ana adak ihər a ana, a we a hàndaza ya? Kige tsa ki ŋgəlwim a mawà gùrùv aà tsitsìv a ya?

¹⁷ Dizl ɗaf ana ŋgwal ŋa, dukw məməta ihər tsiye ka, a we a gà ɓəza ka, ŋgwal ŋa mbaŋa. Dite dizl ɗaf ana ŋgwal ŋa tsa, ba a dzəmar tsiye tekeɗe, a we a gà ɓəza ka, à tsehin a lele tsa mbaŋa.

¹⁸ Kige tsa dizl ɗaf ana ŋgwal ŋa ya ka, a we a kəla tekeɗe, magàha a bəɗ ŋa tsa. Dite bəla dizl ɗaf ana ba a dzəmar tsiye ka, a sle a aà mawà kəla nawat nawat ɓav tsa asa.

¹⁹ Ama dizl ɗaf ana a we a ŋgwal ŋa tsiye ka, ti sese a iɗəm a, ta wene a nda akwa.

²⁰ Kamala mawà gà dukw ata ya mbaŋa, na ki sirwim a ikaba à gà ɓəzla məma à guma Mbulum ana nda pàrsa ya.»

Yesuw a ta gweɗe a a gà na ti zezem a ŋgat nda pàrsa ya: «I sər kurum tsa»

²¹ Yesuw a gwaɗa a tar asa: «Aɗaba gà na ti zeliŋ a nda bazlam ɗekɗek masakəŋa vìrìɗìɗɗe, ta gweɗe a ya ka, ti sle a aà mede a *mekwere Mbulum tsa. Say gà na ta ge a dukw ana a sàs a Mbulum Tsir gà ana i gər ŋa ya dzekwiŋ, na ti de a ya.

²² A pat seriye mba ka, gà mìsle ŋgiɗ hinne ta gweɗiŋ a:

²³ Ama ku mege kataya tekeɗe, i gweɗe a ter aaka a ka: «*fa*

²⁴ Aɗaba taŋa, Yesuw a gwaɗa a tar: «Ku weke na aka tsaraka bazlam gà ana i tsik a ya, aka ge megemir ŋa lele ka, a ndzikiɗ ba wele ana metsehe ŋgar a riŋ lele, à dzèhe a ga ya. A dzèhe a ga ka, a le a biye, à zlèzlere a iɗəm nda kur a lele, na dite a mbezle a tsiye.

²⁵ Aləka na bəla yam à dze a, a dere a nda himbiɗ a hinne, mbùhhwa a zlele a nda təv ga ata ka, a mbezle a tsa, aɗaba ana ɓərɓər mazlàzlàŋara i biye ya nda kur a.

²⁶ Ama ku weke na aka tsaraka bazlam gà ana i tsik a ya, aka ge megemir ŋa tsəka, a ndzikiɗ ba ka, wele ana metsehe ŋgar a riŋ tsa, a dza ba aà madzàha ga aka ahəɗ kataya masakəŋa ya.

²⁷ Aləka i təv ana yam ata mbùhhwa a dere a nda himbiɗ a hinne, a zlele a nda təv ga ata, tsam ka, bìrìm a mbezle a fit tsara. Taŋa ka, labara batsah ŋa hinne.»

²⁸ Aləka i təv ana Yesuw a ndəv à mifefile ŋgar ata ya ka, a ge aà gà mburma ana tar riŋ i təv ŋgar i fata tserdze ya, kamala dukw mene aà mburma ya. Guma ŋgar ata a tsik a ka, arəv a da dər aà tar a.

²⁹ Aɗaba bazlam ata a tsik a tar a ka, kamala biy gà ɓəzla medzeŋge məpala ahəm Mbulum ana ti tsikewa a tar a tsa. Ama ka, nda ndzəɗa hinne, kamala ana ŋgat Əbay a, na a tsik a tar a.