Mata 4 - Bible Zulgo

Əbay sitene a dzik à Yesuw

¹ I dəba mifefile ata ya tsara ka, Mezite Mesife Mbulum a da à Yesuw a kusak diriŋ, dite ka, Əbay sitene ma dzik riŋ à ŋgat i fata.

² A ndza riŋ i fata mehinne dzik faɗ. I huɗ mehinne ata ya tserdze ka, aka mə̀ndzər dukw mezime tsidze, may a wurawa ahər hinne.

³ Əbay sitene a samata kataya ka, a sìrìkaha a təv ŋgar. A daha, a gwaɗar: «Na kù gwa, iye Kəla Mbulum ka, gwaɗa a kur aaha ma ne ɗaf, dite ka zəm.»

⁴ Yesuw a niw bazlam ŋgar ata, a gwaɗar aaka: «Mewetse ŋa a riŋ i wakita Mbulum ka, a gwa: «*fa*

⁵ I dəba ŋa ya, Əbay sitene ata a da à ŋgat a batsah kwite Yeruzalem. A daha, a tsəl à ŋgat aka zligiɗìŋ aka gər ga Mbulum batsah ŋana. I fata ka, a hitse à ŋgat aka tsèke zəraŋaŋŋà ŋana.

⁶ A gwaɗar asa: «Na kər Kəla Mbulum kaɗəŋ ndzer ka, ndàb a bəɗ i faha ya, aɗaba mewetse ŋa a riŋ i wakita Mbulum ka, a gwa: «*fb*

⁷ Yesuw a gwaɗar aaka asa: «A riŋ mewetse ŋa i wakita Mbulum mbaŋa, a gwa ka: «*fc*

⁸ Tsam ka, i fataya tsara ka, Əbay sitene ata a da à ŋgat a gər kwite zùbəl ŋa duwa saləllà. Ti ndzeha a fata ka, a dza ba aà meɗifer à mekwere ana ika gər ahəɗ a, nda gà dukw ana iɗəm ŋgwal ŋa lele ya tserdze.

⁹ A gwaɗar: «Gà dukw aaha fit dze ya ka, i vilekiŋa, na kàa dziŋ gurmits a bəɗ, kàa zàmbaɗa à iye ya.»

¹⁰ I fataya ka, Yesuw a gwaɗar kuɗa: «I sər kər ka, Əbay sitene. Da i təv ga ya, aɗaba mewetse ŋa a riŋ i wakita Mbulum ka, a gwa: «*fd*

¹¹ Əbay sitene ata a tsaraka kataya tsara ka, ŋgwìɗik a məsak à ŋgat, a da i təv ŋgar a. Tsam ka, gà gawla Mbulum tə dara a təv ŋgar a, ta ger gər lele kuɗa.

Mege megemir Yesuw ana a dza ahər ba ika ahəɗ Galile ya

¹² Akahər ata ka, ta gəs Yuhana, gədzə̀zl ti tike ŋgat a daŋgay. I dəba ŋa ya, Yesuw a tsaraka ta gwa là, tàa gəs Yuhana ka, a hitsera i fataya, a mah ba, a da aka ahəɗ Galile.

¹³ I təv ana a riŋ a de a mba ya ka, a da nda kwite ŋgar Nazaret. I dəba ŋa ya, a miyak à kwite Nazaret ata asa. A ta mendze a Kafarnahum aà gùva duluv Galile. I fata ka, ahəɗ gà Zabulun nda Naftali.

¹⁴ A ge kataya ka, kamala ana a riŋ mewetse ŋa i wakita Ezaya, mala məma à guma Mbulum ana a tsik akahər ata ya, a gwa:

¹⁵ «A kurum gà mburma ana ika ahəɗ gà Zabulun nda Naftali, nda gà na mandza ŋa aà gùva vatwa mada a duluv batsah ŋana ya, dite nda gà na ika lìdè dulwa Yurdan a. A kurum ata mandza ŋa ika ahəɗ Galile ya tserdze, dite asa ka, kà sərum Mbulum tsiye.

¹⁶ Ama gà mburma ana i lùvùŋ kataya ka, ta ŋget a a dzaydzay kweɗek kweɗek hinne. Tar ana hìrzìzìmme mandza ŋa aà huɗ sìsiye məməta, ti ne kamala ana tar gà məməta ŋa ya ka, a ge a terehe a dzaydzay.»*fe*

¹⁷ Daga akahər ata tsara na Yesuw a dza ba aà metsìkè bazlam Mbulum a mburma ya. A gwaɗawa a tar ka: «Mbəɗum à madzala gà gər kurum a təv Mbulum, aɗaba mekwere ŋgar ana a kwere a ya ka, aka à mendzera.»

Yesuw a zal a gà ɓəzla magàsà kilif faɗ

¹⁸ I dəba ŋa ya, Yesuw a da aà gùva duluv Galile. A sùwaya i fata ka, aka le aà gà wele duwa sula nda damər ŋgar. I ŋgiɗ ka, Simun ana ti ɗer Piyer a, tar nda damər ŋgar Andire. Tar riŋ ta pìl a à ndzàràwà tar a yam a duluv ata, aɗaba megemir tar ka, magàsà kilif.

¹⁹ Yesuw a gwaɗa a taraha aɗəm: «Dumara, tàkwa, zazamum iye. I ne à kurum a gà ɓəzla mayahara mburma i luvuŋ a, kamala kilif aaha kurum riŋ ihər ki geswimere a i yam a, dite ka, gà mburma ata ibam, tə dara a təv dzaydzay ŋa ya.»

²⁰ I dəba bazlam ŋgar ata ya tsara ka, gà wele ata ta məsak aba à gà ndzàràwà tar a fataya, tə zazam ŋgat.

²¹ A da aka miɗ zaakwa asa ka, aka ŋgataha a gà mìsle ŋgiɗ sula asa, a gà Zakup nda damər ŋgar Yuhana, gà ɓəza Zebede. Tar riŋ i slə̀làh yam i duluv nda gà tsir tar ata tserdze, tì lèmbeɗe a à gà ndzàràwà tar mbaŋa. Yesuw a zal a taraha aɗəm.

²² Gà wele ata ta hitsera iɗəm a. Ta məsak aɗəm à tsir tar Zebede tsara, nda gà slə̀làh yam tar ata fit. Tar ŋa tə da nda gà Yesuw tserdze.

Yesuw a tsik guma ŋgar a mburma, dite a mbala à gà ɓəzla dukw məməta

²³ Aləka i dəba ŋa ya, Yesuw a suwaya ika ahəɗ Galile tserdze. A tsikewa guma ŋgar a mburma i gà ga mahàmà a Mbulum. A tsikewa a tar bazlam ŋgwal ŋa ana biy mekwere Əbay Mbulum a asa mbaŋa. A mbala à gà ɓəzla dukw məməta, nda gà mburma ana gà magàha a bəɗ ŋa ya fit dze.

²⁴ I dəba ŋa ya, mege dukw ŋgar ata a ɗe zləm tsikw aka ahəɗ Siriya ana a mbeha a Galile ata ya. Tə tsaraka kataya ka, tə daha, tə ndzakaha gà ɓəzla dukw məməta ŋgiɗ pampam a təv ŋgar, gà na ndelèɓ ndelèɓ ti sèwèrewa are hinne i dukw məməta tar a, nda gà na sitene i ba tar a, dite nda gà na a beye à tar a dala ya, nda gà ɓəzla videl tserdze, a mbala à tar.

²⁵ I dəba ŋa ya, gà mburma mbə̀rzə̀zza hinne tə dawaha a təv ŋgar, tə zazamawa ŋgat, i Galile i fata, tsikw ara aka ahəɗ ana gà kwite iɗəm kurwa ya, dite nda gà na i Yeruzalem a, nda gà asiŋ ŋa ana a riŋ ika ahəɗ Yuda ya, nda gà mburma ana ika lìdè dulwa Yurdan a tserdze.