Mata 28 - Bible Zulgo

Yesuw a mbəlara i məməta ya

¹ Aləka i dəba mesìfìkà ba gà Yahuda a da iɗəm a, a ndze a pat ladà i mèkwède hedwe ka, gà Mariya ana a dara i Magədala ya, nda Mariya i ŋgiɗ duwa tə da aka məfə̀rà aka dive ŋa.

² Ti ta medeha tsara ka, wìwik wìwik ahəɗ a riŋ ihər a ɓezle a hinne, agəra gawla Mbulum ana a tarra i mbulum i gər ŋa ya. Gawla Mbulum ata a daha, a tàpàsl batsah beliŋ ata aà dive ŋa ya. A daha, tuŋ a ndza aaka.

³ Ama gawla Mbulum ata a ndza ka, twiy twiy twiy, kamala mewìtìɗè mbulum a. Petek ŋgar ibam, herrè tizlzlè kamala slewize ya.

⁴ Aləka gà sliwdze aaha ndeɗiŋa ta kesle a dive ŋa ya, ta ŋgat a gawla Mbulum ata tsam ka, ta ge magəɗa hinne, nda medzedzere, ta mata a arəv, ti ne kamala ana tar gà məməta ŋa ya.

⁵ Ama gawla Mbulum ata a gwaɗa a gà məkəs aaha ndeɗiŋa, tə daha aka dive ya: «Ki gwim magəɗa, arəv ma da aà kurum a tsa. Aɗaba i sər, ki yehwim a ka, Yesuw aaha tə ndwandway ŋgat aà dizl magə̀làwà ŋa ya.

⁶ Ama ka, ar ɗa i faha tsa, Mbulum aka mbəl à ŋgat i məməta ya, kamala ana a tsikewa ya. Dumara, fə̀rum aà təv ana ti tike aɗəm a kwaŋ.

⁷ Ama dum tsəma, ta gwaɗum a gà ɓəzla mazazama ŋgat ka: Iye na a tsik a kurum a.»

⁸ Tə tsaraka bazlam gawla Mbulum ata tsara ka, tə tə̀zara i dive ata ya, nda gà medzedzere, dite nda gà maŋgayaba hinne asa mbaŋa. Tə tə̀zara i fataya tsara, aà mede tsikeye bazlam ata a gà ɓəzla mazazama ŋgat.

⁹ Metìze tar ata tə tə̀z a ka, pəzlàŋ Yesuw a dara i təv a ya tsara, tə lə̀ma aà vatwa. A gwaɗa a tar: «Wusa kurum, ndzum zayzay lele.» Gà məkəs aaha ti sìrìkaha a təv ŋgar. Tə daha, tə dza gurmits a biye aka miɗ ŋgar a fata. Ta gəs ŋgat i sik a.

¹⁰ I dəba ŋa ya, Yesuw a gwaɗa a tar: «Ki gwim magəɗa tsa, dum, ta gwaɗum a gà na ti ne gà damər gà ya ka, tə da aka miɗ a Galile, ti ta ŋgetiŋ a ka, i fata.»

Dukw ana gà ɓəzla makàslà dive Yesuw ti tsik a

¹¹ I təv ana gà məkəs ata tar riŋ ihər ti de a ya ka, gà asiŋ gà sliwdze aaha ta kesle a dive ya, tə dara i fataya tsara, tə da a huɗ kwite. Tə daha, ti tsikeye dukw ana a ge ba nda gà tar a, a gà Əbay gà ɓəzla mandəva kuɗa a Mbulum fit dze.

¹² Aləka gà mburma ata tə tsaraka kataya ka, ti yaha ba gər nda gà bàba gà mburma ana i fata, ta kwere a gà Yahuda, tə dzawa akaba ahəm tserdze ya. Tə daha, tə dza akaba ahəm ika magər tar. I təv mandza akaba ahəm tar ata ya ka, tə ruɓa gà sliwdze aaha ndeɗiŋa ta kasla dive Yesuw a, tə dzàɗa a tar siŋgwe hinne.

¹³ Ta gwaɗa a tar: «Ki gweɗwim a ka:

¹⁴ Na Əbay mala sik gà Ruma aaha aka tsaraka kataya ka, a tsik a kurum a duwa tsa. Mər mìi sir a bazlam ana mìi tsiker a ya. Mìi beye a à kurum a i mesewere are ana a vile a kurum a ya.»

¹⁵ I dəba ŋa ya, gà sliwdze ata ta ndzək siŋgwe ata tə dzàɗa a tar a. Tə daha, ə̀ndats ə̀ndats tə sasa pàrsa, ta mà à bazlam gà bàba ŋa ata ti tsik a tar a kaɗəŋ. Dite haa kinehe, bazlam pàrsa ata à ndìv a tsa, rih rih rih ika magər gà Yahuda ya.

Yesuw a slər gà ɓəzla mazazama ŋgat

¹⁶ I dəba ŋa ya, gà ɓəzla mazazama Yesuw a kurwa gəra ilik ŋa aaha, tə da a Galile. Tə daha, tə tsəl a gər kwite ana Yesuw a gwaɗa a tar, ki ti lìmekwe aɗəm a ya.

¹⁷ Aləka, ti ndzeha a fata ka, tàa ŋgat a Yesuw kuɗa. Tə daha, tə dza gurmits a biye ika miɗ ŋgar. Ama gà mìsle ŋgiɗ ika magər tar tsavəvvà ti ndze a ka, ta gəs nda gəzləŋ tar kalkal tsa.

¹⁸ Dite Yesuw a sìrìkaha a təv tar kuɗa. A daha, a gwaɗa a tar: «Mbulum aka viliŋ mekwere ŋgar ana i gər ŋa ya, ndəna ɗa ika gər ahəɗ a tserdze ka, a ahər gà.

¹⁹ Aɗaba taŋa, dum à bazlam gà a təv gà mburma ana ika gər ahəɗ a tserdze, ka nwim à tar gà ɓəzla mazazama iye. Tsilwiɓwim à tar a yam nda zləm Tsir gà Mbulum, dite nda zləm gà, Kəla ŋgar ŋa, dite nda zləm Mezite Mesife Mbulum asa mbaŋa.

²⁰ Dite ka dzeŋgwim a tar, ta gəs bazlam ana i tsik a kurum tserdze ya mbaŋa. Sərum dər lele, mə̀ məts a kurum gər tsa: Iye ŋa tekeɗe ka, i ndze a i təv kurum kəla pat, i zlèk a kurum haa aka təv gər ahəɗ ana à ndìv a ya.»