Mata 27 - Bible Zulgo

Tə da à Yesuw a bəra Pilatus

¹ Aləka aka mbulum ana a də̀v i mèkwède ya ka, gà bàba gà ɓəzla mandəva kuɗa a Mbulum nda gà bàba gà mburma ana ta kwere a gà Yahuda ya tserdze, tə dza akaba ahəm, ta ge metsehe aà makə̀ɗà Yesuw.

² Tə daha, tə dzaw ŋgat tez tsara. Tə da à ŋgat a bəra Puntiyus Pilatus, mala sik Əbay ana a kwere a ahəɗ gà Ruma ya.

Məməta Yudas

³ Aləka i dəba ŋa ya, Yudas, mala mege ɗaf aà Yesuw aaha ndeɗiŋa ya, a fə̀r gà mburma ata ta ge seriye Yesuw ka, biy makə̀ɗà ŋa, tsam ka, a mbəɗ à madzala gà gər ŋgar, a daha, a màra à kur siŋgwe aaha ndeɗiŋa dzik makər tə dzàɗar a, a gà bàba gà ɓəzla mandəva kuɗa a Mbulum a, nda gà bàba gà mburma ana ta kwere a gà Yahuda ya.

⁴ A daha, a gwaɗa a tar: «Yàa ge bakal, aɗaba i ge a kurum ɗaf ka, aà wele ana bakal ŋgar a riŋ tsiye.» Ama gà mburma ata ta gwaɗar: «Bakal ka, biy yak, tsəna, əla mər ti ya.»

⁵ I dəba ŋa ya, Yudas a da à siŋgwe aaha, a gwitse dərraha aba a ga Mbulum batsah ŋa ata ya. Dite ŋgat ŋa a daha, a hirwe ba ŋgar tez nda liɓir, a mət.

⁶ I dəba ŋa ya, gà bàba gà ɓəzla mandəva kuɗa a Mbulum tə daha, ta palara siŋgwe ata i bəɗ a. Ta gwa: «Aɗaba məpala ahəm Mbulum aka vəl a kwa vatwa aà mandza medzibe siŋgwe aaha a ga Mbulum tsa. Aɗaba siŋgwe ata ka, biy na kà sə̀kəmakwa dər mburma aà mekìɗe ya.»

⁷ Aləka gà bàba ŋa ata tə dza akaba ahəm ika magər tar, agəra siŋgwe ata ka, tə daha, tə səkəm dər gùvàh duwa ti lewa iɗəm duɗwa maŋgara gərwa ya. Dite gà slele ana a riŋ i liwiŋ tar a, tàa mət ka, ti le aɗəm a tar a fata kuɗa.

⁸ Aɗaba taŋa, haa kinehe tə zalawa a gùvàh ata ka, «Gùvàh məmbəz. »

⁹ Kamala taŋa ya kaɗəŋ, dukw Yeremiya, mala məma à guma Mbulum ana akahər ata a tsik a ka, ndzer, pàrsa iɗəm tsa. A gwa ka: «Tə ndzək kur siŋgwe dzik makər, na i təv mandza akaba ahəm gà Isərayel ana tə dza akaba, ta gwa, mìi sìkim a dər mburma ya.

¹⁰ Tə daha, tə səkəm dər gùvàh ana ti lewa iɗəm duɗwa maŋgara gərwa ya, kamala ana Mbulum a ɗifiŋ dər a kaɗəŋ.»*fa*

Yesuw i sida ika miɗ Pilatus

¹¹ Yaw, aləka i dəba ŋa ya, Yesuw a hitse aka miɗ Əbay Pilatus. Pilatus ka, mala sik Əbay ana a kwere a ahəɗ gà Ruma ya. A tsam aà Yesuw, a gwaɗar: «Kər ana, batsah Əbay gà Yahuda kaɗəŋ a?» Yesuw a gwaɗar aaka: «Haya, iye ka, ŋgat ŋa.»

¹² Tsaatsa i huɗ bazlam tar ata ya ka, gà Əbay gà ɓəzla mandəva kuɗa a Mbulum nda gà bàba gà mburma ana ta kwere a gà Yahuda ya, tàa ŋgawa gər a Yesuw nda pàrsa hinne. Ama Yesuw ka, aka fàfəl a tar aaka tsidze.

¹³ I dəba ŋa ya, Pilatus a tsam ahər asa, a gwaɗar: «Aàla na kà fàfəl a tar aaka tsiye? Fə̀r aà maŋgawa gər ana ta ŋgewek a ya kwaŋ.»

¹⁴ Ama Yesuw ka, mbə̀rə̀ts mbə̀rə̀ts mendzeba, a gəs mifèfiler aaka ɓav tsa asa. Taŋa mendze ŋgar ata ka, a ge aà Pilatus kamala dukw mene aà mburma ya.

Ta ge seriye Yesuw ka, biy mekìɗe

¹⁵ Aləka i dəba ŋa ya, kəla pat *megirive Paska aka ndzera ka, mala sik Əbay gà Ruma ata a pə̀lawa à gà ɓəzla daŋgay ilik, kamala ana a sàs a gà mburma ŋgar ta waya mipìlè dər a.

¹⁶ Akahər ata ka, wele duwa a riŋ i daŋgay mbaŋa, zləm ŋgar Yesuw Barabas. Aɗaba wele ata gewa ka, dukw ana ŋgwal ŋa tsiye hinne.

¹⁷ Aləka megirive ata a ndzera ka, Pilatus a gwaɗa a gà mburma ana mayahaba gər ŋa i fataya: «A sàs a kurum i pəl a kurum dərraha ana, aà weke? Wànà aà Yesuw Barabas aaha ya? Tsəna, aà Yesuw aaha tə zalar *Kiristi ya ya?»

¹⁸ A tsik a tar kataya ka, aɗaba a sər, ta gəsaha Yesuw ka, agəra ana ti ner are sàmma ya.

¹⁹ Aləka i təv ana Pilatus ŋgat a riŋ i ga mege seriye ata mba ya ka, məkəs ŋgar a sləraha mburma a təv ŋgar, aà magwaɗar ka: «Ma ta ge duwa a wele ata, ŋgat ŋgwal mburma ka, ta ŋgawar gər sàmma ya tsidze. Aɗaba wele ŋa ka, aka dzadzar à iye i suna ya ndaàvəɗ ka, hinne.»

²⁰ Ama gà Əbay gà ɓəzla mandəva kuɗa a Mbulum nda gà bàba ŋa ana ta kwere a gà Yahuda ya, ta màha aba a gà asiŋ gà mburma nda lìfèɗìɗe bazlam. Ta gwaɗa a tar: «Wizwim aà Əbay aaha, mə̀ pəl a kurumara ka, à Barabas a, ma dzeye à Yesuw.»

²¹ I dəba ŋa ya, Əbay ata a tsam aà tar asa. A gwaɗa a tar: «I pəl a kurumaha ana, à weke, na i liwiŋ gà mburma aaha sula, kà wayum a?» Ta gwaɗar aakaha: «A sàs a mər ka, pəl a mərra ka, à Barabas a.»

²² Dite a gwaɗa a gà mburma ata asa: «A sàs a kurum i ge dze ana, meme na à Yesuw aaha tə zalawar Kiristi ya?» Gà mburma ata ta gwaɗar aakaha nda magala gər melik tsara: «Ndwandway ŋgat aà dizl magə̀làwà ŋa.»

²³ Pilatus a gwaɗa a tar: «Wànà a ge dze ana, dukùla na ŋgwal ŋa tsiye?» Ama ta màraha à metsìkè ŋa nda magala asa: «Mì gwaɗak ka, ndwandway ŋgat aà dizl magə̀làwà ŋa tiya wele.»

²⁴ I dəba ŋa ya, Pilatus a fə̀r, a sle aɗəm a tsa, a riŋ tì sìkèh a à Mewideye duwa hinne huwwa ka, a tə̀f yam, a bara ahər ika miɗ gà mburma ata tserdze ya, kamala megweɗe ya ka, bazlam ŋgar iɗəm tə tsa. A gwaɗa a tar: «Makə̀ɗà wele aaha ki kìɗwim a ya ka, bakal ŋa ika gər gà tə tsa. Bakal ŋa mege ka, i kurum dukw kurum, tsəka, ahəm gà tsa.»

²⁵ Aləka gà mburma ata tserdze ya, ta gwaɗar asa: «Haya, na kataya ka, bakal ŋa mə̀ màra aka gər mər nda gà ɓəza mər a tserdze.»

²⁶ Dite i dəba ŋa ya, Pilatus a pəl a tarra à Barabas a kuɗa. Ama Yesuw ka, Pilatus a vəl ŋgat a ahər a gà mburma ŋgar, a gwaɗa a tar: «Gə̀zlum, dite ka ndwandwayum ŋgat aà dizl magə̀làwà ŋa ata kuɗa.»

Gà sliwdze ti ne bakal à Yesuw

²⁷ I dəba ŋa ya, gà sliwdze Pilatus, mala sik Əbay gà Ruma ata, tə da à Yesuw aka varavada a huɗ ga a ma ŋgar. Dite tə zal ahəraha a gà asiŋ gà sliwdze tserdze a fata.

²⁸ Aləka tə daha ka, tə zla ikəka petek ŋgar a. Ti tike aaka andiw ndùzwwa ŋana.

²⁹ Ti tike aaka aba ya ka, tə slàslapa akaba adak, ti ndìwìɗer dər gər, avukw felère Əbay ana ti tiker a gər a. Dite ta vəlar zəva Əbay a ahər mezime, tsam ka, tə dza ba aà madzàr gurmits a biye aka miɗ ŋgar. Tə sawla ahər nda megèyer wusa. Ta gwaɗar: «Wusa, Əbay gà Yahuda. Mbulum mà sə̀kàhak à mendze yak aà biybiy.»

³⁰ I dəba ŋa ya, ŋgùɗàsl ŋgùɗàsl ti tifeye ahər tìzle. Dite tə zla ihər zəva aaha ndeɗiŋa ta vəlar a ahər a, tə lakayar dər aà gər tsara.

³¹ Aləka ti ya ba aà mene à ŋgat bakal a ka, tə zla ikəka andiw ata nduzzwa ya. Ta màr akaba à petek ŋgar kuɗa, dite ta màra à ŋgat a bəra ya. Ti de a à ŋgat a təv ana ti ti ndwendwey a ŋgat aà dizl magə̀làwà ŋa ata ya, kətsah aà gùva kwite ya zaakwa.

Yesuw aà dizl magə̀làwà ŋa

³² Aləka i təv ana ti de a ya ka, tàa lə̀ma aà vatwa nda gà wele duwa, zləm ŋgar Simun. Wele ata ka, gà Kirene. Gà sliwdze ata ti de a à Yesuw a, ta hitse à ŋgat, ta fàr aaka ndzəɗa aà mazla dizl ata ti ti ndwendwey ahər a Yesuw a.

³³ Aləka i dəba ŋa ya, tə da a tə̀vəməŋa a riŋ tə zalar Gwalgwata, kərga megweɗe ya ka, «Atasl gər. »

³⁴ Ti ndzeha a fata ka, a sàs a gà sliwdze ata aà mivile meɗwìtsè mawà dukw duwa makwàsà ŋa, ta gaw akaba nda yàwuf duwa a ndza ɗìwèkìke. Ta vəl a Yesuw, dite ka, ma sa. Ama Yesuw a mə̀ndzər ka, a sasar tsidze.

³⁵ I dəba ŋa ya, tə ndwandway ŋgat aà dizl magə̀làwà ŋa ata kuɗa. Tə daha, tə dzaya ikaba petek ŋa ya ika magər tar, dite ta ge tsetse, ta gwa: «Ŋgada weke na a ŋget a ya?»*fb*

³⁶ Dite i dəba ŋa ya, tə ndza riŋ i fata aà makàslà ŋa.

³⁷ Ta wetse bazlam ana tə ndwandway ŋgat a. Ta gwa: «Yesuw, Əbay gà Yahuda na naha ya.» Ndàp ti tike aà maadwa ŋana ndaka gər ŋgar.

³⁸ Tə ndwandway ahəraha gà ɓəzla akəl sula aà dizl ŋgiɗ a tsaka ŋgar a fata asa mbaŋa. Ilik aka tsèke ahər mezime ŋgar, ilik ŋa aaha aka tsèke ahər gùla ŋgar.

³⁹ Gà mburma ana tə dawaha nda təv ŋgar ata ya ka, ta gewa à gər kwatà kwatà, kamala megweɗe ya, na a gwa, kirim tsa iye ŋa ya ya. Dite tə dzawa ba aà mendeveyar pìslìɗìɗe.

⁴⁰ Ta gwaɗawar: «Naha ana, kər ana kù gwa ka, i mbezle a à ga Mbulum batsah ŋana, dite i huɗ mehinne makər a i zlèzle a dər biy ŋgiɗ pam a ibam a? Mbəl à ba yak kuɗa tsiye, dite ka ndàbara aà dizl magə̀làwà ŋa aaha, na kù gwa ka, iye Kəla Mbulum a?»

⁴¹ Gà Əbay gà ɓəzla mandəva kuɗa a Mbulum nda gà ɓəzla medzeŋge məpala ahəm Mbulum, dite nda gà bàba gà mburma ana ta kwere a gà Yahuda ya, tə sawla ahər hinne mbaŋa.

⁴² Ta gwa: «Aka mbala à gà mburma pampam hinne, ama ŋgat ŋa ka, a sle aà məmbə̀là aba ŋgar ŋa tsa ana, meme? Na kige ŋgat a gwa, iye Əbay gà Isərayel ka, ma tarra aà dizl magə̀làwà ŋa aaha ya kuɗa, na dite mìi gis a ŋgat nda gəzləŋ a.

⁴³ Aɗaba a ge magəɗa a Mbulum, a gwaɗawa: ka, say ma dara, mə̀ mbəl à ŋgat kinehe na kige a waya ŋgat a.»

⁴⁴ Gà ɓəzla akəl ata tə ndwandwayaha tar a tsaka ŋgar a tekeɗe, tàa mata zukw tsa, tə sawla ahər riŋ hinne mbaŋa.

Məməta Yesuw

⁴⁵ I təv ana Yesuw à mìt a ya ka, daga aà magər pat a tsara, həvəɗ a ge ika ahəɗ ata tìtìktìk. Are a da aaba ya asa tsa haa pat a ge metsìɓehe guzum ide.

⁴⁶ Akahər ana ndeɗiŋa pat aka à mege metsìɓehe guzum ide ya ka, Yesuw a wideye nda magala hinne, a gwa: |it"Eli, eli lama sabahtani?»|re kərga megweɗe ya ka: Mbulum gà, Mbulum gà, aàmala na kà miyak à iye ya?*fc*

⁴⁷ Gà mìsle ŋgiɗ i liwiŋ gà mburma ana i fataya, tə tsaraka bazlam ŋgar ata kataya ka, ta gwa: «Tsarakum kwaŋ, araka a zel aaba a a Iliya.»

⁴⁸ Mìsle ŋgiɗ ilik ika magər tar a, a val, a daha, a zlara dukw ana pàfpàfə̀ffa, yam a de aɗəm a hinne ya. Dite a tsilwiɓ dər a meɗwìtsè mawà dukw duwa makwàsà ŋa, a ndza ndùlàkə̀kka, kamala mbəlar a. A dzak a zùbəl guvùkw agar. A tikeraha a bazlam, aà mà ɗìvìts ihər yam ŋa ya.

⁴⁹ Ama gà mìsle ŋgiɗ ta gwa: «Ŋgada kwaŋ, fə̀rakwa ahər dzekwiŋ, ŋgada bəla Iliya a dere a, a mbil a à ŋgat a?»*fd*

⁵⁰ I dəba ŋa ya, Yesuw a wideye nda magala hinne asa, dite a mət kuɗa.

⁵¹ I təv ana a mət tsara ya ka, petek duwa a riŋ i ga Mbulum batsah ŋa ata zùbəl ŋa ya, madànà ŋa aà mbulum, a tayara ba ikaba i gər ŋa ya kwàŋŋa kalkal tsikw a bəɗ. Dite asa ka, ahəɗ ata a ɓazla hinne, gà bàba gà gùrum ibam, tə tazla ba ikaba ya.

⁵² Gà dive ta handaka ba, gà asiŋ gà mburma Mbulum ana ta mata ya hinne, hùrùm ta mbala.

⁵³ Ta hitsera i biye ya. Aləka, aka təv ana Yesuw a mbəlara i məməta ya ka, tar tekeɗe, ta mah ba, tə da a kwite Yeruzalem. Tə daha ka, ti leha aà gà mburma ana i fataya hinne, ta ŋgat a tar.

⁵⁴ Ama gà Əbay gà sliwdze gà Ruma, nda gà mburma ŋgar, tar riŋ ihər ta kesle a Yesuw i fata hiywe. I təv ana ta ŋgat a ahəɗ ata a ɓazla nda gà dukw ana pampam a ge i təv tar i fataya ka, ta ge magəɗa hinne kuɗa. Ta gwa: «Yweh, wele aaha ka, Kəla Mbulum kaɗəŋ ndzer.»

⁵⁵ Akahər ata ka, gà məkəs duwa tar riŋ hinne i fata mbaŋa. Ta hitse dzìrìk diriŋ nda təv tar ata zaakwa, aà məfəraha aà tar. Gà məkəs ata tserdze ya ka, tə zazamaha Yesuw daga aà gər ana ŋgat ika ahəɗ Galile mba ya. Aɗaba ta gewar megemir lele, ti dewar ɗaf.

⁵⁶ Zləm gà məkəs ata ka, Mariya ana a dara i Magədala ya, nda gà Mariya məmər gà Zakup nda Yasufa, nda gà məmər gà ɓəza Zebede tar riŋ i liwiŋ gà məkəs ata mbaŋa.

Mazla məməta Yesuw a biye

⁵⁷ Aləka i təv ana hawa a ge ya ka, wele duwa a riŋ Əbay hinne, a dara i Arimatiya ya, zləm ŋgar Yasufa. Ŋgat ka, mala mazazama Yesuw mbaŋa.

⁵⁸ A da a təv Pilatus, a daha, a wiz ahər məməta Yesuw. Mewize ata a wiz ahər a ka, a da a gər a Pilatus mbaŋa. A gwaɗar: «Daha, ta vəlak.»

⁵⁹ Yasufa a daha, a pə̀lara məməta Yesuw aà dizl a. A daha, a zla petek tìv, a mbe ahər kuɗa.

⁶⁰ Dite a tike ŋgat a dive ŋgar duwa, melè ŋa i giseh a, i təv ana gìrdzìdzìhhe ya. Aɗaba tar ka, ti leyewa aba dive ya. Dive ata ka, awiya ŋa, tàa tike aɗəm wura zukw tsa. A tàpàslaha batsah beliŋ, a hə̀ndə̀k dər ahəraha. Dite ŋgat ŋa a daba kuɗa.

⁶¹ Gà Mariya ana a dara i Magədala ya, nda Mariya ŋgiɗ duwa tə ndza riŋ i təv dive Yesuw i fata tsàkàlàk ihər a, ser aaka.

Gà ɓəzla makàslà dive Yesuw

⁶² Aləka ndidwe ŋana i dəba medzibe aà *megirive Paska gà Yahuda ya, a pat mesìfìkà ba tar a ka, gà bàba gà ɓəzla mandəva kuɗa a Mbulum nda gà asiŋ gà *Farisa, ti yahaba gər, tə da a təv Pilatus.

⁶³ Tə daha, ta gwaɗar: «Əbay, mì dara a təv yak a ka, aɗaba dukw ana mala pàrsa aaha a tsikewa akahər ana aka mət zukw tsiye ya, a gwaɗawa: ya ka, aka mà mərra a gər a.

⁶⁴ Aɗaba taŋa, gwaɗa a gà sliwdze ka, ta kasla dive ŋa mehinne makər, tsəka, aləka gà ɓəzla mazazama ŋgat ti dere a, ti zlere a iɗəm a nda akəl, dite ta gweɗe a a gà mburma ka, aka mbəlara i məməta ya, tsam ka, pàrsa ŋgar ata a zeke a, à zè a dər malahalah ŋana.»

⁶⁵ Pilatus a gwaɗa a tar: «Ndzəkum gà sliwdze naha, ka dum dər aka dive ŋa ata, ta kasla lele, kamala ana tàa sle ya.»

⁶⁶ I dəba ŋa ya, ta mah ba, nda gà sliwdze ata kuɗa. Tə daha aka dive ŋa ata. Tə daha, ta ge atwa aà gùva beliŋ ana ta hə̀ndə̀k dər ahəraha ya, dite ka, wura mà hə̀ndə̀k ihər a tsidze. Ta məsak riŋ à gà sliwdze ata aà makàslà ŋa. Tar ŋa, tə daba kuɗa.