Mata 19 - Bible Zulgo

Guma Yesuw ana a tsik agəra məmìyàkà aba gà zal nda məkəs a

¹ I dəba ŋa ya, Yesuw a ndəv à mifefile ŋgar ata ka, a hitsera ika ahəɗ Galile ya, a da ndàra aka ahəɗ Yuda, aka lìdè dulwa Yurdan.

² Gà mburma hinne tə zazamaha ŋgat a fata. A daha, a mbala à gà ɓəzla dukw məməta ana i liwiŋ tar a.

³ Aləka i dəba ŋa ya, gà *Farisa duwa tə daha a təv ŋgar, aɗaba a sàs a tar maslàlà à ŋgat i yam a. Ta gwaɗar: «Məpala ahəm kwa dze ana, aka vəl vatwa a mburma aà madalawa məkəs, agəra gà dukw ana a ge ŋgwala tsa tserdze ya ya?»

⁴ Yesuw a gwaɗa a tar aaka: «Kàa dzeŋgwim dukw ana mewetse ŋa i wakita Mbulum a te tsiye? Aɗaba akahər ana Mbulum a ge gà dukw tserdze ya ka, a ge gà asləka nda məkəs,*fa*

⁵ dite a gwaɗa a tar: *fb*

⁶ Kərga taŋa ya kaɗəŋ, ba tar ka, sula asa tsa. Ama ba tar ka, aka ne ba ilik kuɗa. Aɗaba taŋa, dukw ana Mbulum a gaw akaba kamala taŋa ya ka, wura ma ta kurə̀zl dər iba ya asa tsa.»

⁷ Gà Farisa ata tə tsaraka kataya ka, ta gwaɗar: «Na kataya ana, aàla na Musa a gwa ka, na aka sàs a wura aà madalawa məkəs ŋgar ka, ma wetser wakita madalawa ŋgat, mə vəlar ahər, dite na a delewe a ya ya?»*fc*

⁸ Yesuw a gwaɗa a tar aaka asa: «Musa a vəl a kurum vatwa ka, aɗaba ana gəzləŋ kurum manəsa ŋa, matsəɓatsəɓ iɗəm hinne ya pəra, dite na ka dalawum gà məkəs kurum a, tsəka, akahər ana piŋŋe Mbulum a ge gà dukw tserdze ya ka, kataya tsa.

⁹ Iye ihər i gweɗe a kurum a nda ndzer: Ku weke na aka miyak à məkəs ŋgar ze melè ahər aka mege muva, dite aka zla aɗəm biy ŋgiɗ ka, taŋa ka, a ge muva.»

¹⁰ I dəba ŋa ya, gà ɓəzla mazazama ŋgat ta gwaɗar: «Na bazlam gà zal nda məkəs kamala taŋa ya ka, mazla məkəs a ge a ŋgulum tsa.»

¹¹ Ama Yesuw a gwaɗa a tar aaka asa: «Aɗaba mburma tserdze ka, ti sle aà metsereke a bazlam aaha i waya i tsik a kurum a ya tsa. Say gà na Mbulum a vəl a tar metsehe ya dukw tar.

¹² Aɗaba i təv gà dukw ŋgiɗ a riŋ pampam na mburma a sle a aà mazla daala tsiye. Gà mìsle ŋgiɗ ka, daga i təv mewe tar a, ba tar a waya mazla məkəs tsa. Gà mìsle ŋgiɗ asa ka, mburma tə dadaɗaya tar. Dite gà mìsle ŋgiɗ asa ka, ti zle a məkəs tsa, kige tsa ti de a a zal tsa, aɗaba a sàs a tar ka, mege meslire Mbulum ɗekɗek. Wur ana aka ŋgat metsehe aà matsaraka bazlam aaha ya ka, mà dzar zləm lele.»

Yesuw a pise ahəm a gà ɓəza ndirkiz

¹³ Aləka i dəba ŋa ya, gà mburma tə daha à gà ɓəza ndirkiz a təv Yesuw, dite ma tike aka tar ahər te, ma hama a Mbulum ka, dite mi pise a tar ahəm. Gà ɓəzla mazazama ŋgat ata ta ŋgat a gà mburma ata ti dehe a à gà ɓəza ya ka, ta pala a tar ahəm, a sàs a tar na ti dehe a à gà ɓəza ata ya tsa.

¹⁴ Ama Yesuw a tsaraka məpala ahəm gà mburma ŋgar ata ta pele a a gà tsir gà ɓəza ya ka, a gwaɗa a tar: «Mandza, ka palum a tar ahəm tsa, tə dara à gà ɓəza a təv ga ya. Aɗaba mekwere Əbay Mbulum a waya ka, medzibe gà mburma ana kamala gà ɓəza aaha ya, na ti de aɗəm a ya.»

¹⁵ Dite i dəba ŋa ya, a daha, a tike ahər aka gà ɓəza ata, a pise a tar ahəm. I dəba ŋa ya asa, a hitse i fataya, a daba kuɗa.

Mege metsehe a mazazama Mbulum agəra limana ana hinne ya

¹⁶ Aləka i dəba ŋa ya, wele duwa gawla ŋa a daha a təv Yesuw, a gwaɗar: «Əbay ga, i ge a dze ana, meme, na dite i ŋget a mesife ana à ndìv a tsa aà biybiy a?»

¹⁷ Yesuw a gwaɗar aaka: «Aàmala na ki wiz a aà iye a dukw ana ŋgwal ŋa ya? Ama wura a riŋ ilik na ŋgwal ŋa ya tsa, say Mbulum ilik. Na a sàsak mesife ana à ndìv a tsiye ka, say ki gis a məpala ahəm ŋgar.»

¹⁸ Aləka wele ata a tsaraka kataya ka, a gwaɗar: «I gis a dze ana, məpala ahəm awara?» Yesuw a gwaɗar aaka: «Məpala ahəm Mbulum ka, araha. A gwa ka:

¹⁹ Ama zàmbaɗa à gà dede yak nda mama yak. Dite ka waya mburma kamala ana kà waya ba yak a.> «*fd*

²⁰ Wele ata a gwaɗar aaka: «Iye ka, Yàa mbər megìse gà dukw ata kà tsikiŋ a tserdze, dite dukùla na a ziŋaha asa ya?»

²¹ Yesuw a gwaɗar: «Na a sàsak magəsa Mbulum nda ndzer ka, daha, ka dzawa à gà dukw yak fit, dite kà dzaya siŋgwe ŋa a gà ɓəzla matawak. Na kàa ge dər kataya ka, ki ŋget a limana ana batsah ŋa, à ndìv a tsa i təv Mbulum a. I dəba ŋa ya ka dara, ka zezem iye kuɗa.»

²² Ama wele ata a tsaraka bazlam ŋgar ata tsara ka, tsùkwaɗ a daba i fataya tsara nda gà matsəɓatsəɓ, aɗaba ana ŋgat Əbay ŋa hinne ya.

²³ Aləka i dəba ŋa ya, Yesuw a gwaɗa a gà ɓəzla mazazama ŋgat: «Iye ihər i tsik a kurum a nda ndzer: Mawùràba aà mada a mekwere Əbay Mbulum gà ɓəzla limana kaɗəŋ.

²⁴ Kinehe iye ihər i tsik a kurum a asa: Ndəna gà ɓəzla limana ti de a mekwere Əbay Mbulum a ka, ŋgulum zlìgwèmè ma da nda biye lepìrè.»

²⁵ Gà ɓəzla mazazama ŋgat ata tə tsaraka bazlam ŋgar ata tsara ka, dùwaɗ a zla aà tar arəv a hinne. Ta gwa: «Na kataya ana, weke a sle a aà mimbile i təv Mbulum a?»

²⁶ Ama Yesuw a fə̀r aà tar, a gwaɗa a tar: «I təv mburma ka, mawùràba ŋa, ama i təv Mbulum ka, mawùràba ŋa tsa, a sle a aà duwa tserdze.»

²⁷ I dəba ŋa ya, Piyer a gwaɗar aaka tsara: «Araha, mər ka, maa miyak aba à gà dukw mər a tserdze, maa dara, maa zazam kər ana, dukùla na a ge a mər a ŋgulum kuɗa ya?»

²⁸ Yesuw a gwaɗa a tar: «Iye ihər i tsik a kurum a nda ndzer, iye, *wur ana a dara i təv Mbulum a ka, a pat ana Yàa ŋgat Əbay nda ndzəɗa gà ana ti zlibe a dər à iye, i kwere a dər gər ahəɗ ana awiya ŋa ya ka, kurum ana kà zazamum iye ya tekeɗe, ki ŋgetwim a Əbay mbaŋa, na kurum aaha kurwa gəra sula ya. Ki ta ŋgetwim a təv mendze Əbay. Dite ki gwim a seriye a gà gwala gà Isərayel ana kurwa gəra sula ya mbaŋa.»

²⁹ Yesuw a gwaɗa a tar asa: «Ku weke na aka miyak aba à ga ŋgar a, kige tsa à gà damər ŋgar, nda gà tsir ŋgar, nda gà mama ŋgar, nda gà ɓəza ŋgar, dite nda gà gùvàh ŋgar agəra iye ka, a ŋget aɗəm a, à zè a taŋa a miyak dər aba kinehe ya medzige dərməka. Dite a ta ŋget a mesife ana à ndìv a tsa aà biybiy a asa mbaŋa.

³⁰ Ama gà mburma ana kinehe ta gwa, gà mər ŋa ya ka, gà asiŋ ŋa hinne ti ti ne a gà ɓəzla dəba mba ika miɗ Mbulum. Dite gà na kinehe ti tike tar aà ahər tsiye ka, gà asiŋ ŋa ibam hinne, ti ti ne a gà ɓəzla aka miɗ mbaŋa asa.»