Mata 18 - Bible Zulgo

Meme na mene batsah ŋa ika miɗ Mbulum a?

¹ I fataya ka, gà ɓəzla mazazama Yesuw aaha ti sìrìkaha a təv ŋgar, ta wiz aà ŋgat, ta gwaɗar: «Weke na a ne a batsah ŋa aləka i *mekwere Mbulum a?»

² Yesuw a tsaraka bazlam tar ata ka, a zal a kəla ndirkiz ana kwizikw a, a hitse dər aka magər tar.

³ A gwaɗa a tar: «Iye ihər i gweɗe a kurum a nda ndzer ŋa: Na kàa mbəɗum à madzala gà gər kurum, kàa nwim à ba kurum kəla ŋa, kamala gà ɓəza ndirkiz a tsəka, ki slwim a aà mede a mekwere Mbulum tsidze.

⁴ Taŋa wur ana aka həna à gər ŋgar a bəɗ kwizikw kamala kəla aaha ya ka, ŋgat aka ne batsah ŋa i mekwere Mbulum.»

⁵ A gwaɗa a tar asa: «Ku weke na aka gəs aà mege gər a medzibe kəla aaha aɗaba iye ka, a ge gər taŋa ka, a iye.»

Mege metsehe a dukw bakal

⁶ Yesuw a gwaɗa a tar asa: «Wur ana a bene a medzibe gà ɓəza aaha ta gəs iye ya, a bakal ka, wur ata ka, ŋgulum tə̀ danar batsah zal kur a ɗa, dite tì yè a dər akaba ŋgat a batsah duluv, ndəna, seriye Mbulum a le ahər a ya.

⁷ Waya gà mburma gər ahəɗ a, agəra dukw ana a peze a ter a za, aà mege dukw bakal a. Taŋa gà dukw ata ka, a ta ge a riŋ seyiŋ. Ama mesewere are ika gər wur ana a peze a za a mburma, aà mege bakal a.

⁸ Na ahər yak, kige tsa sik yak à gis a kər a bakal ka, ɗasl ɗasl sasa aba ya, kà dza dər a dala. Ŋgulum na ki ŋget a mesife i təv Mbulum a, nda gà ahər yak ilik, kige tsa sik yak ilik a, ndəna tì yè a kər a akwa ana a mbete a tsa aà biybiy a, nda gà ahər yak sula ya, kige tsa nda gà sik yak sula məma fit a.

⁹ Na are yak a bene a kər a bakal ka, ùndzuɗ ndzàhara aba ya, dite kà yà a dala diriŋ. Ŋgulum na ki ŋget a mesife ana i təv Mbulum, à ndìv a tsiye, nda gà are yak ilik, ndəna tì yè a kər a akwa ana a mbete a tsa aà biybiy ka, nda gà are yak sula ya.»

Bazlam minew təmaŋ ana a dzeye ya

¹⁰ I dəba ŋa ya, Yesuw a gwaɗa a tar asa: «Gwim metsehe, aɗaba ka ta fə̀rum aà gà asiŋ gà mburma ana ta gəs iye nda gəzləŋ, dite ka, ti ne gà ɓəza i təv are kurum a ka, kamala za ya tsa. Aɗaba iye ihər i gweɗe a kurum a nda ndzer: Gà gawla Mbulum ka, tar riŋ kəla pat mandza ŋa ika miɗ Mbulum Tsir gà i gər ŋa, aɗaba tar mbaŋa.

¹¹ {Kamala taŋa ya, iye, *wur ana a dara i təv Mbulum a, i dara ka, aà məmbə̀là à gà mburma ana tàa dzeye ya.»}

¹² A gwaɗa a tar asa: «Kurum kà dzalum ana, meme, na wura gà təmaŋ ŋgar a riŋ dərməka, ama ka, na aka dzeye ihər a ilik ana, a miyek a à dzik tswiɗ gər a tswiɗ ŋa aaha aà kwite tə̀ma, dite a de a, a yehere a ilik ŋa aaha a dzeye ya tsiye?

¹³ Iye ihər i gweɗe a kurum a asa: Na wele ata aka ŋgat təmaŋ ŋgar ata ilik a dzeye ya ka, a ŋgeye a ba hinne, aɗaba təmaŋ ata, à zè a dər gà asiŋ gà təmaŋ aaha ndeɗiŋa, dzik tswiɗ gər a tswiɗ ŋa ata a dzeye ya tsiye.

¹⁴ Kamala taŋa ya, Mbulum Tsir kurum ana i gər ŋa ya tekeɗe, a waya wura ilik ma dzeye i təv gà mburma aaha ndeɗiŋa ti ne gà ɓəza ndirkiz i təv are kurum a tsidze.»

Wele ana aka ge bakal i liwiŋ gà mburma Mbulum a

¹⁵ Yesuw a gwaɗa a tar asa: «Na wele ana aka ne damər yak, bəla aka ge bakal ka, da a təv ŋgar, dite kà fàfəlum akaba ika magər kurum sula nda ŋgat. Na aka gəs aà kər bazlam yak ata ka, taŋa ka, kàa mbəl à ŋgat i bakal ŋgar ata ya.

¹⁶ Ama na aka gəs bazlam yak ata tsəka, dum a təv ŋgar nda mìsle ŋgiɗ asa, kige tsa nda gà mburma sula. Aɗaba masàsà ikaba gà mifefile ana a ne a bakal a ka, say nda gà ɓəzla sida sula, kige tsa makər. Taŋa ka, kamala ana mewetse ŋa i wakita Mbulum miviye ŋa ya.*fa*

¹⁷ Na aka gəs ahəm aà kurum ata tsəka, tsik a gà mburma ana i ga Mbulum a tserdze. Na bəla aka gəs aà tar ɓav tsəka, fə̀r ahər kamala wur ana aka gəs bazlam Mbulum ilik tsiye, kige tsa kamala mala dùwan ana a gewa bakal hinne ya.

¹⁸ Iye ihər i tsik a kurum a nda ndzer ŋa: Dukw ana kàa palum ahər ɗa ahəm ika gər ahəɗ a, Mbulum tekeɗe, a pele ahər a ahəm i mbulum i gər ŋa mbaŋa. Dite dukw ana kàa vəlum ahər vatwa ika gər ahəɗ a ka, ŋgat tekeɗe, a vile ahər a vatwa i mbulum kataya mbaŋa asa.

¹⁹ Iye ihər i gweɗe a kurum a asa: Na mburma sula ika magər kurum a, tàa dza akaba ahəm ika gər ahəɗ, aɗaba dukw ana ta wiz a aà iye a nda meheme ya ka, ta ŋget a i təv Mbulum Tsir gà ana i gər ŋa ya ndzer.

²⁰ Aɗaba ku mege i ŋga, na gà mburma sula, kige tsa makər tàa yahaba gər aà mahàmà a Mbulum nda zləm gà ka, iye riŋ ika magər tar mbaŋa.»

Bazlam minew wur ana a pìl a à bakal a mburma tsiye

²¹ I dəba ŋa ya, Piyer a da a təv Yesuw. A daha, a gwaɗar: «Əbay gà, medzige ndaw na damər gà a giŋ a bakal, dite i piler a dər a? Wànà medzige təsəla ya?»

²² Yesuw a gwaɗar aaka: «Awaŋ, medzige təsəla pəra tsa. Say sik dzik təsəla haa a da a təsəla, tsəka, kwiye ŋa a riŋ tsa.»

²³ I dəba ŋa ya, a gwaɗa a gà ɓəzla mazazama ŋgat asa: «*Mekwere Mbulum ana a kwere a ya, a ndzikiɗ ba ka, wele duwa Əbay ŋa. Gà ɓəzla megemir ŋgar a riŋ hinne. Ama ka, gwèdèrè ŋgar aà gà ɓəzla megemir ŋgar ata. Əbay ata a dza ba aà mewize aà tar.

²⁴ I təv ana a riŋ a wiz a gwèdèrè ŋgar ata ya ka, ta gə̀saraha wele ŋgiɗ, gwèdèrè ŋgar ihər, a sle a miliyuŋ hinne, a ɗeme a ba tsa.

²⁵ Ama wele ata ka, zlìbìt duwa ŋgar a riŋ kwizikw tsidze, a sle a aà məpəla ŋa tsa. Əbay ata a gwa:

²⁶ Ama wele ata a tsaraka kataya ka, a daha, a kal aba a bəɗ aka miɗ mala ga ŋgar aaha, a hamar hinne. A gwaɗar:

²⁷ I huɗ meheme ŋgar ata ya ka, a ndza aɗəm are tsehe a mala ga ŋgar aaha hinne. A miyakar à gwèdèrè ŋgar ata fit dze, kamala megweɗe ya, mandza pəra.

²⁸ Ama wele ata ta miyakar à siŋgwe ya, a dara i fataya tsara ka, tə lə̀ma nda wele ŋgiɗ ana ta gaw akaba mege megemir i təv ilik ŋa ya, gwèdèrè ŋgar ihər mbeete. Ama biy ŋgar ihər ka, dərməka ilik pəra. Ŋgat i ŋgar ka, a gəs wele ata tsisl i biye ɗa ya tsara. A gwaɗar:

²⁹ Wele aaha kìrìk a dzar gurmits a bəɗ aka miɗ ŋgar a fata. A gwaɗar:

³⁰ Ama a niw meheme wele ata, a gəs dər akaba ŋgat, a tike a daŋgay. A gwa:

³¹ Aləka gà asiŋ gà mburma ana ta gewa megemir dze ya, ta ŋgat a dukw ana wele aaha a gəs mezleke mala gwèdèrè ŋgar ata te tsiye ka, a tsəɓ a tar hinne. Ta mah ba, tə da a təv mala ga tar aaha ndeɗiŋa ya. Tə daha, tə ɗamar dukw ana wele aaha a ge aà mala gwèdèrè ŋgar aaha ya fit dze.

³² Ama mala ga tar aaha ndeɗiŋa ya, a tsaraka kataya ka, a zalaraha. Aləka a daha ka, a gwaɗar:

³³ Ama kər ka, ki zlèk a damər yak, kamala ana i zlak kər a te tsəna, meme?>

³⁴ A tsəɓ a mala ga ŋgar aaha hinne. A daha, a gəs ŋgat, a vəl ahər a gà na ti sèwèrewa are a mburma ya. Ti tike ŋgat gədzə̀zl a daŋgay. A gwa: «

³⁵ I dəba ŋa ya, Yesuw a gwaɗa a gà ɓəzla mazazama ŋgat asa: «Kamala taŋa ya, Tsir gà Mbulum ana i gər ŋa ya tekeɗe, a ge aà kurum a kataya mbaŋa, na kàa pə̀lum aba à bakal nda gà mburma ŋgiɗ nda gəzləŋ ilik tsiye.»