Markus 3 - Bible Zulgo

Wele duwa makula ahər ŋa

¹ I dəba ŋa ya, Yesuw a màha a ga mahàmà a Mbulum. Mimè ata a màha ya ka, a pat mesìfìkà ba. A daha ka, a leha aà gà mburma a riŋ hinne i fata. I liwiŋ gà mburma ata ka, wele duwa a riŋ makula ahər ŋa.

² Gà mburma ata i ga ata ya, tə dza ba aà masamata Yesuw. Gà asiŋ gà mburma ŋgiɗ tə dzala i gər tar, ta gwa: «Wànà Yesuw a ge a megemir, a mbil a à wele ata a pat mesìfìkà ba aaha ya?» Tə dzala kataya ka, aɗaba a sàs a tar məma à bakal a Yesuw, agəra dukw ana Mbulum a pala a tar ahər ahəm a pat mesìfìkà ba ya.

³ Yesuw a gwaɗa a wele ata makula ahər ŋa ya: «Hitse aà mbulum, dara, ka hitse aka miɗ mburma.»

⁴ I dəba ŋa ya, Yesuw a gwaɗa a gà mburma ata ta fir ahər a ya: «Wànà məpala ahəm Mbulum a vəl vatwa dze ana, aà dukùla na a pat mesìfìkà ba ya? A gwa ana, gwim ŋgwal a mburma a pat mesìfìkà ba ya, tsəna, ki gwim tsiye? A gwa ana, mbəlum à mburma ya, tsəna, dzeywim à mburma ya?» Gà mburma ata ta gəs mifèfiler aakaha tsa, tə ndza ba ɗikɗik.

⁵ Yesuw a fə̀r aà gà mburma ata tserdze ya, nda Mahərdəsa yemere. Ama ka, tə ndzar aɗəm are tsehe asa, aɗaba gəzləŋ tar manəsa ŋa, tə sər dukw ana ta ge a ya tsa. I dəba ŋa ya, Yesuw a gwaɗa a wele ata makula ahər ŋa ya: «Sirikara à ahər yak a təv ga ya.» Wele ata a sìrìk dərraha tsara ka, ahər ŋgar ata a làmbaɗa ba lele.

⁶ Gà mburma ata ta ŋgatar kataya tsara ka, gà *Farisa ana i liwiŋ tar a, ta wiyera ba i ga mahàmà a Mbulum ata ya sùtùtùtwara a bəra ya. Tə dara i fataya ka, tə da a təv gà mburma Əbay *Hiridus tsara. Tə daha ka, ta mà akaba à bazlam ika magər tar. Ta gwa: «Meme na ki slekwe a aà medzeye à mesife Yesuw a?»

Gà mburma hinne tə dara a təv Yesuw a

⁷ Aləka i dəba ŋa ya, gà Yesuw nda gà ɓəzla mazazama ŋgat ata tə dara i liwiŋ mburma ya, tə da aà gùva duluv Galile. Tə daha a fata ka, gà mburma ana a riŋ ika ahəɗ Galile i fataya, tə dara a təv tar a hinne. Gà na ika ahəɗ Yuda ya,

⁸ i Yeruzalem a, nda gà na ika ahəɗ Eduma ya, ika lìdè dulwa Yurdan a, nda gà na ta mbehe a gà kwite Tirus nda Sidun a, tə dara a təv tar a mbaŋa. Gà mburma ata tə dara a təv Yesuw a hinne ka, aɗaba tə tsarakaha meɗè zləm ŋgar ana a riŋ a gewa duwa i fataya.

⁹ Yesuw a samata ka, gà mburma a riŋ hinne i fata, ta ŋgiɗits a ŋgat. A slər gà ɓəzla mazazama ŋgat aà mewìzereha slə̀làh yam kə̀la ŋa. A waya matsəla dər aka gər yam, dite gà mburma ata ta ŋgiɗits ŋgat asa tsa.

¹⁰ A ge dər kataya ka, gà ɓəzla dukw məməta ana a riŋ i fataya, tə tsaraka Yesuw aka mbala à gà mburma hinne i dukw məməta ya ka, ta waya mimbèreha, aà malə̀mà ahər, dite ka, mə mbala à tar i dukw məməta tar a te.

¹¹ Gà mburma ana tar riŋ nda gà sitene i ba tar a mbaŋa, ta ŋgat a Yesuw ka, tə daha, tə dzawa aba a bəɗ aka miɗ ŋgar a fata. Ta gwaɗar: «Kər ka, Kəla Mbulum.»

¹² Ama Yesuw a pala a tar ahəm, a gwaɗa a tar: «Hey, ka ti ɗifwim à zləm gà a wura asa tsidze.»

Yesuw a pala gà ɓəzla meslire ŋgar kurwa gəra sula

¹³ I dəba ŋa ya, Yesuw a hitse i fataya, a tsəl aka dìyes duwa a riŋ i fata. A zal a gà mburma ana a sasar a.

¹⁴ Aləka gà mburma ata tə daha ka, a pala i liwiŋ tar a kurwa gəra sula. A ne à tar gà ɓəzla meslire ŋgar. A gwaɗa a tar: «Ki tèkwe a nda gà iye dze. I waya na ki zezemwim a iye ya. A sèsiŋ na i slirewe a kurum aà metsìkè bazlam ŋgwal ŋana a mburma mbaŋa.

¹⁵ Dite ki ŋgetwim a ndzəɗa aà madalawa gà sitene aà ga mburma ya asa.»

¹⁶ Zləm gà mburma ata kurwa gəra sula Yesuw a ndzək tar a ka, gà Simun ana Yesuw a ɗer Piyer a,

¹⁷ dite gà Zakup nda damər ŋgar Yuhana, gà ɓəza Zebede, Yesuw a ɗe a tar Buwanarges, kamala megweɗe ya ka, ndzəɗa tar kamala malaka mbulum a.

¹⁸ Taŋa gà asiŋ ŋa pam tekeɗe, Andire, Filip, Bartelemi, Mata, Tumas, Zakup kəla Alfayus, Tadawas, Simun ana a niw bazlam ŋgumna piŋŋe, a waya makwàrà ba tar i gwala ŋgar a,

¹⁹ dite Yudas Iskariyut, wele ana a ta ge a ɗaf aà Yesuw a.

Gà gwala Yesuw ta waya megìse ŋgat a ma tar

²⁰ Aləka i dəba ŋa ya, Yesuw a tarra ika dìyes ata ya, tə da a ma nda gà ɓəzla meslire ŋgar. Tə daha ka, gà asiŋ gà mburma hinne tə dara a təv ŋgar a asa. Aləka gà Yesuw ka, tə sər akaba vatwa aà mazəma dukw mezime nda gà ɓəzla meslire ŋgar asa tsa.

²¹ Gà gwala ŋgar tə tsaraka miɓizle ŋgar i kwite ata tsara ka, ta gwa: «A ge a ka, duwa aka ndzək ihər metsehe ya, tàkwa aaka, ta gə̀sakwara ŋgat a ma ya.» Ta mah ba, tə da.

Mege bakal nda təv Mezite Mesife Mbulum

²² Gà ɓəzla medzeŋge məpala ahəm Mbulum tar riŋ i liwiŋ gà mburma ata i təv Yesuw a mbaŋa. Tə dara i Yeruzalem a. Ta gwa: «Ŋgat riŋ nda gà *Beldzebul i ba ŋgar.» Gà mìsle ŋgiɗ ibam ta gwa: «Əbay sitene na a vəlar ndzəɗa aà madalawa gà sitene ya.» Ama Yesuw ka, aka tsaraka dukw ana ti tsik ahər a tsara.

²³ Aləka i dəba ŋa ya, a zal a gà mburma ata. A live dər aba nda bazlam ŋgiɗ a pampam. A gwaɗa a tar: «Meme na Əbay sitene a delewe a ba ŋgar a?

²⁴ Na gà mburma ana a riŋ ika ahəɗ ilik ŋa, ta ge a gùvəl ika magər tar ka, ti sle aà mendze a i təv ilik ŋa tsa, ahəɗ tar ata a nisiŋa, a de a a dala.

²⁵ Iye ihər i gweɗe a kurum a asa: Na gà mburma ana i ga ilik ŋa ya, ta ge a maàga, mandza akaba ahəm tar a riŋ tsəka, ga tar ata a de a a dala.

²⁶ Aɗaba taŋa, na Əbay sitene a riŋ a ge a gùvəl aà ba ŋgar, nda gà bəla kwiye i mekwere ŋgar ka, ahəɗ ŋgar a sle aà mendze a tsa, à ndìviŋa.»

²⁷ Yesuw a a gwaɗa a tar asa: «Əbay sitene a ne ka, mala ndzəɗa. Kinehe wura a riŋ a sle a aà mede a ga a bəra mala ndzəɗa, à ndzikere a ihər gà dukw ŋgar a kataya, ze medzewe aba ŋgat ŋa ya ka, a riŋ tsa. Ama say tez a dzew a ŋgat ŋa dzekwiŋ, na dite à ndzikere a ihər gà dukw ana i ga i ma ŋgar a fit a.»

²⁸ I dəba ŋa ya, a gwaɗa a tar asa: «Iye ihər i tsik a kurum a nda ndzer: Mbulum à pìl a à bakal a mburma tserdze, ku mege nda təv gà mezelme bazlam ana ti tsik ahər a ŋgwala ŋa tsa tekeɗe ya.

²⁹ Ama wur ana aka tsik dukw ana ŋgwala tsa aà Mezite Mesife Mbulum a ka, Mbulum à piler a à bakal ŋgar tsidze. A ndze a ika gər ŋgar aà biybiy.»

³⁰ Yesuw a tsik a tar bazlam ata kataya ka, aɗaba ana ta gwa ka, ŋgat a riŋ nda gà Əbay sitene i ba ŋgar a.

Gà mama Yesuw nda gà damər ŋgar

³¹ Zàkwayiya ka, gà mama Yesuw nda gà damər ŋgar aaha ndeɗiŋa ya, tàa slala. Tə daha ka, Yesuw i ga. Ta hitse a bəra. Ta gwa: «Yesuw ana, i ŋga?» Dite tə slər mburma a təv ŋgar a ga, aà mezelereha.

³² Wele ata a daha ka, gà mburma a riŋ hinne mayaha ba gər ŋa riŋ i ga, i təv Yesuw ata. Ta gwaɗa a Yesuw: «Gà mama yak nda gà damər yak naha ɗa i bəra, ta wiz a kər.»

³³ Yesuw a gwaɗa a tar aaka: «Gà mama gà nda gà damər gà ana, gà weke?»

³⁴ I dəba ŋa ya, a fə̀r aà gà mburma ana a riŋ mandza ŋa i bəɗ, ti ler tits a. A gwaɗa a tar: «Gà mama gà nda gà damər gà ɗa ka, i faha.

³⁵ Aɗaba wur ana a ge a dukw ana a sàs a Mbulum a ka, ŋgat na a ne damər gà nda gà mama gà ya.»