Markus 13 - Bible Zulgo

Yesuw a ɗif à ga Mbulum batsah ŋa ana ti ta mbezle a dər mba ya

¹ I təv ana Yesuw a riŋ a dere a i ga Mbulum batsah ŋa ata ya ka, mìsle ŋgiɗ ilik ika magər gà ɓəzla mazazama ŋgat ata, a gwaɗar: «Yweh, yweh, fə̀r aà kur ga batsah ŋa aaha, tìtiw tìtiw a tsahən hinne ya kwaŋ, Əbay. Mazlazla ŋa kaɗəŋ ana, meme.»

² Yesuw a gwaɗar aaka: «Kur ga ŋgwal ŋa aaha ki ge aaka a zlaàzla ya ka, adzəka ka, ta mbezle a dər leheɗ leheɗ mba fit kweleŋ.»

Meme na ki sirekwe a dər ka, gər ahəɗ à ndìv a ya?

³ Aləka i dəba ŋa ya, gà Yesuw tə tsala aka gər dìyes kwite duwa mayaha gər dizl ɗaf uliviye a riŋ hinne i fata. Tə daha a fata ka, Yesuw a ndza a bəɗ. A ŋgetehe a a ga Mbulum batsah ŋa ata ɗazlzlà lele ika miɗ ŋgar. I fata ka, gà Piyer nda gà Zakup, nda gà Yuhana, nda gà Andire, tar riŋ à gər tar nda gà ŋgat. Tə tsam aà ŋgat bazlam a, ta gwaɗar:

⁴ «Tsik a mər te, ndeɗime na bazlam yak ata kà tsik a, a ta ge a ba ya? Dite meme na mìi sir a dər ka, gər ahəɗ aka à mendìve asa ya?»

⁵ I dəba ŋa ya, Yesuw a dza ba aà metsìkè a tar, a gwaɗa a tar: «Gwim metsehe lele, wura ma ta baza a kurum za tsa.

⁶ Aɗaba gà mburma hinne ti dere a a təv kurum a, ti zle akaba a zləm gà, dite ta gweɗe a kurum a, ku weke: tsaatsa pàrsa. Kamala taŋa ya, ti dzeye a à gà mìsle ŋgiɗ hinne.

⁷ I təv ana kàa tsarakum gà labara gà gùvəl a ɗe a bise, kige tsa a ɗere a i təv diriŋ ŋa ya ka, ka ta gwim magəɗa, arəv ma da aà kurum a tsidze. Aɗaba gà dukw ata ka, say ti dere a dukw ŋgar. Ama mandəvandəv gər ahəɗ ka, aka sle zukw tsa na taŋa ya.

⁸ Gà kwite ŋgiɗ pampam ta ge a gùvəl nda gà biy ŋgiɗ. Gà gawla Əbay ŋgiɗ ta ge a gùvəl nda gà biy ŋgiɗ pam asa. I gà kwite ŋgiɗ pampam ahəɗ a ɓezle a wàkit wàkit. May tekeɗe, a ta ge a hinne asa mbaŋa. Gà dukw ata tserdze ya ka, a live dər aba ya pəra, dite ti sir a dər ka, gər ahəɗ aka à mendìve ya, kamala mawà kəla ana à lèh ahər a, a wir a aà gà məkəs a.

⁹ Ama kurum ka, say ndzum nda metsehe kurum lele. Aɗaba a pat ŋgiɗ ka, ti ta gese a kurum, ti de a à kurum aka miɗ seriye. Ti ta gezlere a kurum i gà ga mahàmà a Mbulum a. Ti ta gese a kurum aka miɗ gà ɓəzla makwàrà mburma nda gà aka miɗ gà Əbay gà bàba ŋana, agəra iye. Kamala taŋa ya, ki gwim a sida gà nda ndzer ŋa ika miɗ tar.

¹⁰ Aɗaba malahalah ŋa, ələk gər ahəɗ à ndìv a ka, say gà mburma tàa tsaraka bazlam aaha ŋgwal ŋa ya fit dzekwiŋ.

¹¹ I təv ana ta gese a kurum aà mada à kurum aka miɗ seriye ya ka, ka tə dzalum gà gər agəra bazlam ana ki ti tsikwim a ter a ya tsa. Ama kàa ndzwimaha ka, ki ti tsikwim a ka, dukw ana Mbulum a ti ɗif a kurum a dər ika miɗ tar i fataya pəra. Aɗaba bazlam ana ki ti tsikwim a ya ka, a dere a ka, i madzala gà gər kurum a tsa. Ama na a ti ɗif a kurum a dər ka, Mezite Mesife Mbulum na à zlèk a kurum a.

¹² Gà mburma hə̀ndə̀sl hə̀ndə̀sl tì ti dzèye a gà damər dìnde tar a ahər a gà mburma, ta bets a tar. Gà tsir gà ɓəza tekeɗe, ti ta ge a dər kataya mbaŋa. Gà ɓəza ibam, ta hitse a aà gà tsir tar. Ta ge a ter a ɗaf aà mburma, ta bets a tar asa mbaŋa.*fa*

¹³ Gà mburma tserdze, ku weke tekeɗe, ti ne a kurum a are, aɗaba ana kurum gà mburma gà ya. Ama wur ana ədəts aka gəs gəzləŋ, aka simereha haa a pat ana mesife ŋgar à ndìv a ya ka, Mbulum à mbil a dər.»

Mala mene are a Mbulum à pèt akabiŋa

¹⁴ Yesuw a gwaɗa a tar: «Aka miɗ mba ka, ki ŋgetwim a a wele ana ta gwa ahər Wele ata a ndze a ka, a təv ana biy mendze ŋgar aɗəm tsiye.*fb* Wur ana a dzeŋge a dukw aaha ya ka, say mà dzar zləm lele. Na gà mburma ana ika ahəɗ Yuda ya, tàa ŋgat a gà dukw ata aka ndzera ka, tə̀ tə̀z ihər ndàra a kwite ya.

¹⁵ Wura aka ge ika galak ka, ma tarra a bəɗ a, mə val, tsəka, ma da a huɗ ga a ma ŋgar, aà mandzə̀kàra iɗəm gà dukw ŋgar a asa dzekwiŋ tsa.

¹⁶ Wur ana i gùvàh ŋgar a tekeɗe ka, ma ta mbəɗ gər a ma, aà mandzə̀kàra gà petek ŋgar a asa tsa mbaŋa.

¹⁷ A pat ata ka, mesewere are batsah ŋana ka, biy gà məkəs ana nda gà huɗ i gər a, kige tsa, mawùr ŋa ana gà ɓəza aà tar a asa mbaŋa.

¹⁸ Hamum a Mbulum, ələk gà dukw ata ti ndzere a ka, duwa ma ta ŋge a kurum aà sik kamala mivele ana i dùluɓ a tsa.

¹⁹ Aɗaba mesewere are ata ka, à zè a dər biy na daga à gər ana Mbulum a ge gər ahəɗ haa kinehe ya. Mesewere are ŋgiɗ a riŋ à zè a taŋa ka, a riŋ asa tsa.

²⁰ Na mege Əbay Mbulum mà nikiɗ ihər à pat mesewere are ata ya tsa àsla ka, ana ka, wura ilik a mbil a tsidze. Ama a nikiɗ à pat ŋa ka, agəra gà mburma ŋgar ana a pala tar a.

²¹ Na bəla wura aka gwaɗa a kurum: <*Kiristi naha,> kige tsa ka, ka ta gəsum bazlam ŋgar tsa.

²² Aɗaba taŋa ka, gà na ti ne aba Kiristi ya, nda gà na ti ne aba gà ɓəzla məma à guma Mbulum nda pàrsa ya, ta hitsiŋa. Ta geye a gà dukw mene aà mburma pampam hinne, aà məbàzà dər za a gà na Mbulum a pala tar zləmana, na mege ti sle a ya.

²³ Ama kurum kinehe ka, gwim metsehe lele, agəra gà dukw ata ti dere a mba ya. Taŋa ka, ndzum dər i zləm, Yàa tsik a kurum aba ya kinehe.»

Meme na *wur ana a dara i təv Mbulum a, a dere a ya?

²⁴ Aləka i dəba ŋa ya, Yesuw a gwaɗa a gà ɓəzla mazazama ŋgat asa: «I təv ana gà mesèwèrè are ata tàa ndəv iɗəm a ka, gà pat nda kiye tì div a asa tsa, a ndze a ziŋziŋ fit kweleŋ.

²⁵ Gà mawusawus ibam, ti dzewere a aà mbulum a. Dite gà dukw ana a riŋ madzàvà ŋa aà gəza mbulum a, ti lekeye aaba a gà gər ŋgwir ŋgwìr ŋgwir ŋgwir.

²⁶ A pat ata ka, gà mburma ta ŋgetiŋŋa, a iye, wur ana a dara i təv Mbulum a. I dere a ka, nda hulɓukw a, nda ndzəɗa Mbulum a hinne, dite nda mezlibe gà ana ti zlibe a à iye ya.

²⁷ I slirre a gà gawla Mbulum a. Ti dere a ka, aà mayaha gər a gà na i pala tar a, daga ara aà zlile mbulum a tserdze.»

Bazlam minew gùrùv ana a wiɗe a ya

²⁸ Yesuw a gwaɗa a tar asa mbaŋa: «Tsarakum bazlam minew gùrùv aaha kwaŋ. Aɗaba dizl ɗaf gùrùv ka, à gègìriŋa, dite à dze a ba aà mibìzè nda mewiɗe. Agəra taŋa, kurum tekeɗe, ki sirwim a dər ndzer, viye aka à mege.

²⁹ Kamala taŋa ya mbaŋa, na kàa ŋgatum a gà mesewere nda gà dukw ata pampam tàa ndzera ka, ki sirwim a dər ndzer, iye, *wur ana a dara i təv Mbulum a, Yàa à meslele bise.

³⁰ Iye ihər i gweɗe a kurum a kinehe nda ndzer, pàrsa iɗəm tsa: Gà mburma ana kinehe ya ka, ti ta mete a zukw tsa, say gà dukw ata tàa ndzera dzekwiŋ, dite ta metiŋa.

³¹ Gà kuvəl Mbulum nda gər ahəɗ ka, tì ndìviŋa. Ama bazlam gà ka, à ndìv a tsa, a ndze a aà biybiy.»

Mbulum ilik na a sər pat ana gər ahəɗ à ndìv a ya

³² Aləka Yesuw a gwaɗa a tar i dəba ŋa ya asa: «Ama wura a sər pat ŋa, nda ler ŋa ana gà dukw ata ti ndzere a ya tsidze. Ku mege gà gawla Mbulum tekeɗe, tə sər tsa. Ku mege iye ana Kəla ŋgar a tekeɗe, i sər ɓav tsa asa. Say Mbulum Tsir kwa à gər ŋgar ilik na a sər a.

³³ Gwim metsehe daga aà kinehe ya, ka ndzum are tsa, aɗaba kà sərum pat ŋa tsa.

³⁴ A ti ndzikiɗ a ba ka, kalkal mala ga ana a de a a təv a ya. A təv ana à meh a ba ya ka, a miyek a à ga ŋgar a ahər a gà ɓəzla megemir ŋgar. A ɗe a ter a aba à megemir a, ilik ilik tserdze. A gweɗe a ter a: A gweɗe a a mala makàslà ga ŋgar asa: Ŋgat ŋa a mah ba, a da tsara.

³⁵ Aɗaba taŋa, kurum tekeɗe, ka ndzum are ɓav tsa. Ndzum nda metsehe, aɗaba kà sərum pat ana mala ga à mère a a ma ya tsa. Bəla à mère a ka, ndaàwa, kà sərum tsa. Bəla nda magər həvəɗ, kà sərum tsa asa, bəla medzè melìgire aka bur ide, bəla nda mèkwède aka pat ana à mbizere a ya, gərəŋ gərəŋ kà sərum tsa asa mbaŋa. Ama ki ndzwim a ka, nda metsehe lele, tsəka,

³⁶ aka wiyere aba ya paf ka, ma ti le aà kurum aka mendze are tsa.

³⁷ Bazlam ata i tsik a ka, a kurum ɗekɗek tsa. I tsik ka, ku a weke: Kaslum ba kurum, ndzum nda metsehe lele.»