Markus 12 - Bible Zulgo

Bazlam minew gà ɓəzla makàslà gà dizl ɗaf duwa hinne

¹ I dəba ŋa ya, Yesuw a dza ba aà metsìkè guma ŋgar ndaka bazlam minew a gà mburma ata. A gwaɗa a tar: «Wele duwa a sàs gùvàh. A dzava aɗəm dizl ɗaf hinne. A zlàzl ahər tits lele. A làmbaɗa aɗəm tùgùɗ a magər ŋa, aà meɗwitsewa aɗəm mawà dukw ata. A ndwaŋ aɗəm dzègwèle i magər ŋa ata, aà makàslà ŋa. I dəba ŋa ya ka, wele ata a da a təv ŋa diriŋ aka ahəɗ ŋgiɗ. Gùvàh dizl ɗaf ŋgar ata à mìtehiŋa. A dza aɗəm gà mburma aà məfə̀rà ahər, dite aləka ta vəlar dukw gùvàh ŋgar əŋgal, na aka màra ya.*fa*

² Aləka mawà dizl ɗaf ata a nah ka, wur ana a dzava ya, a sləraha mburma ŋgar ilik a təv gà ɓəzla megemir dizl ɗaf ŋgar ata, dite ta vəlaraha dukw gùvàh ŋgar ata kuɗa.

³ Ama gà mburma ata ta ŋgat a wele ata a ndzeha a təv tar tsara ka, ta gəs ŋgat, ta gə̀zl lehhè. Wele ata a mbəɗ gər a ma, ze ahər sìkwèɗ, duwa ihər tsa.

⁴ I dəba ŋa ya, mala dizl ɗaf ata a sləraha mìsle ŋgiɗ asa. Ta ŋgat a wele ata ka, tə ndavayar pìslìɗìɗe, tə lakayar aà gər asa. Gər a slesle aaka ambul ambul.

⁵ Mala dizl ɗaf ata a sləraha mìsle ŋgiɗ məmakər ŋa pam asa a təv tar. Ta ŋgat a wele ata i ŋgar ka, ta kəɗ a biye. Kamala taŋa ya, tàa sèwèr are a gà mburma ana mala dizl ɗaf ata a slərawaha tar pampam hinne ya asa mbaŋa. Ku weke tekeɗe, na aka sləraha ŋgat a ka, tàa sèwèrer are, dite tàa bats gà asiŋ ŋa a biye.

⁶ I dəba ŋa ya, a zeha a mala dizl ɗaf aaha ka, kəla ŋgar ana mandərkwasla ŋgar, a waya ŋgat hinne ya. A sləraha kəla ata a təv gà ɓəzla megemir ŋgar ata asa. A gwa i ŋgar ka:

⁷ Ama gà wele ata ta ŋgat a kəla ŋgar ata a daha a təv tar a tsara ka, ta gwaɗaba:

⁸ Tə ndabaya aka kəla ata tsara, ta kəɗ ŋgat, dite fakw ti yàra iɗəm a bəra ya.»

⁹ I dəba ŋa ya, Yesuw a ndəv à bazlam ŋgar ata ka, a tsam aà tar, a gwaɗa a tar: «Mala dizl ɗaf aaha dze ana, a ge a ana, meme na aləka aka təv ana aka màra ya?» Ama a gwaɗa a tar: «A dehe a ka, a bets a iɗəm gà ɓəzla mege megemir dizl ɗaf ŋgar ata ya fit, dite à dze aɗəm a gà mìsle ŋgiɗ awiya ŋa asa.»

¹⁰ Yesuw a gwaɗa a tar asa: «Kàa dzeŋgwim bazlam ana i wakita Mbulum a te tsiye? A gwa ka:

¹¹ Dukw ata a ne à kwa kamala dukw mene aà mburma ya ka, Əbay BATSAH kwa ŋa na a ge taŋa ya.> «*fb*

¹² Yesuw a ndəv à bazlam ŋgar ata tsara ka, a tsəɓ a gà Əbay gà ɓəzla mandəva kuɗa a Mbulum nda gà bàba gà mburma ana ta kwere a gà Yahuda ya, hinne. Ti yaha vatwa aà magəsa ŋgat, aɗaba tə sər ndzer, a tsik bazlam minew ata ka, agəra tar. Ama ta ge magəɗa agəra gà mburma ana tar riŋ hinne ya asa mbaŋa. Ta məsak à ŋgat, tə daba dukw tar.

Mandza hadam a batsah Əbay gà Ruma

¹³ I dəba ŋa ya, gà mburma ata tə sləraha gà *Farisa duwa nda gà mburma *Hiridus əŋgal a təv Yesuw, aɗaba a sàs a tar maslàlà à ŋgat i yam a.

¹⁴ Tə daha ka, ta gwaɗar: «Əbay, mì sər, kər ka, mala ndzer ŋa, ki ge a magəɗa a dukw ana gà mburma ti dzele a ya tsa, aɗaba ki ge a gər a gà mburma ana ti ne gà ŋgwal ŋa ika miɗ mburma ya tsa. Ama kər ihər ki ɗif a à vatwa Mbulum ka, nda ndzer ŋa. Aɗaba taŋa, tsik a mər məpala ahəm kwa kwaŋ, dze ana, wànà aka vəl vatwa aà mandza hadam a batsah Əbay gà Ruma ana a kwere a kwa ya ya? Tsəna, aka vəl tsiye? Mì dzar a, wànà mì dzar tsiye?»

¹⁵ Ama Yesuw a sər a taraha aka dukw ana tə dzala i gər tar a tsara. I dəba ŋa ya, a gwaɗa a tar: «Aàmala na ki dzwìm a ba aà iye kataya ya? A za vilwimiŋara kur siŋgwe ŋa ya ilik, i sèmete a kwaŋ.»

¹⁶ Ta vəlaraha ilik. Yesuw a samata ka, a gwaɗa a tar: «Gà foto aaha nda zləm ŋgar ikəka ana, biy weke?» Ta gwaɗar aaka: «Biy batsah Əbay gà Ruma ata ndeɗiŋa ya.»

¹⁷ Yesuw a gwaɗa a tar: «Yawwa, dukw ana biy batsah Əbay gà Ruma ya ka, vəlumar dukw ŋgar. Ama dukw ana biy Mbulum a ka, vəlum taŋa a Mbulum mbaŋa.» Bazlam Yesuw ata a tsik a tar a ka, a za i gər a biy tar ana tə dzala i gər tar a. A ne aka tar ka, kamala dukw mene aà mburma ya asa.

Mewize bazlam i təv gà məməta ana ta mbilere a i biye ya

¹⁸ I dəba ŋa ya, gà asiŋ gà *Saduki, tə dara a təv Yesuw a. Tar ka, gà mburma ana ta gwa ka, wura a sle aà mimbilere a i biye ya asa tsiye. Gà mburma ata tə tsam aà Yesuw,

¹⁹ ta gwaɗar: «Əbay mər, Musa a gwa i təv məpala ahəm Mbulum a ka: *fd*

²⁰ Aɗaba gà wele duwa a riŋ nda gà damər ŋgar təsəla ka, malkwara ŋana a zla daala. Aləka wele ata a mət ka, ze mawà ahər kəla.

²¹ Mimbe gər ŋgar a zazəɗ à məkəs ata madakwa ŋa ya. Aləka wele ata ibam, a mət ka, ze mewe ahər kəla mbaŋa. Məmakər ŋana a zazəɗ dər tekeɗe, a mət ka, kataya mbaŋa asa.

²² Kamala taŋa ya, tar ata təsəla ya, tə zazaɗa à madakwa məkəs ata tserdze ka, ta mata fit, ze maŋgata ahər kəla. I dəba ŋa ya, məkəs ata tekeɗe, a mət asa mbaŋa.

²³ Taŋa dze ana, aləka i təv ana gà məməta ta mbilere a i biye ya ana, məkəs ata a ne a ana, biy weke ilik a? Aɗaba gà mburma ata nda gà damər təsəla ya ka, tàa lama ahər fit a?»

²⁴ Ama Yesuw a gwaɗa a tar aaka: «Kurum ka, kà sərum duwa tsa. Aɗaba la, wànà kà sərum dukw ana i wakita Mbulum a tsiye, dite kà sərum ndzəɗa Mbulum tsa asa ya?

²⁵ Aɗaba aka təv ana gà məməta ta mbilere a i biye ya ka, gà asləka nda məkəs ti zle a ba asa tsa. Ama ti ndze a ka, sùlàɗə̀ɗa kamala gà gawla Mbulum ana i mbulum a.»

²⁶ Yesuw a gwaɗa a tar asa: «Dite aàla na ki wizwim a aà iye bazlam gà məməta ana ta mbilere a i biye ya ya? Wànà kàa dzeŋgwim təv ana i wakita Musa, Mbulum a fàfəlar agəra gà məməta ana ta mbilere a i biye ya te tsiye? Aɗaba mewetse ŋa iɗəm i fata ka, Mbulum a gwaɗarra i huɗ bagur adak ana dzaydzay ŋa ya: *fe*

²⁷ A tsik taŋa ka, a gà mburma ana tar riŋ ti ndze a aà bəra hiywe ya, ku mege na tàa mata tekeɗe ya. Aɗaba Mbulum ka, biy gà mburma ana tar riŋ ti ndze a aà bəra hiywe ya, tsəka, biy gà məməta tsa. Kərga taŋa ya, kurum ka, kàa sərum bazlam gà məməta tsidze.»

Məpala ahəm Mbulum ana ŋgwal ŋa ya

²⁸ Ama mala medzeŋge məpala ahəm duwa a riŋ i fata mbaŋa. Aka tsaraka mifefile gà *Saduki ata nda gà Yesuw a. A fə̀r ka, bazlam Yesuw na lele ŋa ika biy gà Saduki ya ka, a sìrìkeha a təv Yesuw bise. A gwaɗar: «Məpala ahəm Mbulum ana ŋgwal ŋa dze ana, awara na i liwiŋ ŋa nda ndzer a?»

²⁹ Yesuw a gwaɗar aaka: «Məpala ahəm ana ŋgwal ŋa ya ka, araha:

³⁰ Wayum nda gəzləŋ kurum ilik, nda ndzəɗa ba kurum fit, dite nda madzala gà gər kurum dze mbaŋa.>*ff*

³¹ Dite masula ŋa ana a mbeha a taŋa ya ka: *fg* Məpala ahəm ŋgiɗ a riŋ ŋgwal ŋa, a za gà taŋa sula ya tsa.»

³² Mala medzeŋge məpala ahəm Mbulum ata a gwaɗa a Yesuw: «Lele ndzer, Əbay, na bazlam yak ata kà tsik a kaɗəŋ. BATSAH kwa ŋa ka, Mbulum ilik, tsəka, biy ŋgiɗ a riŋ a tsa.

³³ Aɗaba taŋa, say mburma ta waya Mbulum ka, nda gəzləŋ tar ilik, nda madzala gà gər tar asa mbaŋa. I dəba ŋa ya, ta waya mburma kalkal ba tar ŋa ya. Taŋa ka, a za dər gà dukw ana ta bets a a Mbulum masakəŋa ya, nda gà dukw ŋgiɗ pampam ta viler a ka, dite ta waya mada a təv ŋgar a.»

³⁴ Yesuw a fə̀r ka, bazlam ŋgar ata a tsik a wele ata ya ka, a sər mifèfiler aakaha lele. A gwaɗar: «Kər kinehe ka, bise nda Mbulum kuɗa.» I dəba bazlam ŋgar ata ya ka, wura a gəs metsème ahər bazlam asa tsa, ta ge magəɗa.

*Kiristi a pàt aba ana, i gwala weke ya?

³⁵ I təv ana Yesuw a riŋ a tsik a guma ŋgar a mburma i ga Mbulum batsah ŋana ya ka, a tsam aà tar bazlam. A gwaɗa a gà mburma ata: «Meme na gà ɓəzla medzeŋge məpala ahəm Mbulum ta gwa, Kiristi ka, mala məmbàlà à mburma ana Mbulum a gwa, i slir a kurumehe a ya ka, gwala Dawda asa ya?

³⁶ Aɗaba Dawda nda gər ŋgar a mà ka, à bazlam Mezite Mesife Mbulum, a gwa ivaɗ ka: *fh*

³⁷ Ama Dawda nda gər ŋgar ka, a zalar Batsah ga ŋa seyiŋ ka, dite meme na ta gweɗe a ka, kəla ŋgar asa ya?» Gà mburma ana i təv ŋgar a ka, tə dza zləm a guma ŋgar ata lele, aɗaba a da a tar a gər hinne.

Mege metsehe agəra gà ɓəzla medzeŋge məpala ahəm Mbulum ana nda pàrsa ya

³⁸ I dəba ŋa ya, Yesuw a gwaɗa a gà mburma ata tì dze a zləm a guma ŋgar a: «Gwim metsehe nda təv gà ɓəzla medzeŋge məpala ahəm Mbulum. Aɗaba gà mìsle ŋgiɗ iɗəm, ti sìweye a nda gà andiw zùbəl ŋa ka, ta waya məpàtà dər à ba tar aka miɗ mburma ɗekɗek. Gwim metsehe nda təv gà taŋa a sàs a tar ka, ta ge a tar wusa i liwiŋ mburma ka, say nda mazàmbàɗà à tar ɗekɗek a.

³⁹ Tàa da a gà ga mahàmà a Mbulum ka, ti yahawa i tar ka, say təv mendze ana ŋgwal ŋa ya, aà mendze dər aka miɗ mburma, dite ka, mburma ta fə̀r dər aà tar lele kuɗa. Tàa ndze a təv mazəma ɗaf a liwiŋ mburma tekeɗe, say ti yehe a ka, təv mendze ana ŋgwal ŋa ya asa mbaŋa.

⁴⁰ Tì dzik a gà duwa aà gà madakwa gà məkəs a nda haram a. Dite ta heme a a Mbulum ika miɗ mburma ka, vìrìɗìɗɗe, kərga tar ka, gà ŋgwal ŋa, tsaatsa pàrsa. Gà taŋa ka, seriye tar a ta ge a ka, mawùràba ŋa ndeyndey na i təv Mbulum a.»

Madakwa məkəs duwa matawak ŋa, a ndəv aba à dukw məfara ŋana aɗaba Mbulum a

⁴¹ I dəba ŋa ya ka, Yesuw a daha, a ndza a bəɗ bise nda təv sahər ana gà mburma ata tə dzawa aɗəm siŋgwe i batsah ga Mbulum ata i fataya. A fə̀r aà tar, meme na tì dzèye aɗəm a ya. A samata ka, gà Əbay gà bàba ŋa ana i fataya, tar riŋ ihər tì dzèye aɗəm a siŋgwe zùw zùw hinne hinne.

⁴² Ama madakwa məkəs duwa a riŋ i fata, matawak ŋa. A daha, a dza aɗəm i ŋgar ka, siŋgwe duwa mesèse ŋa sula, kalkal siŋgwe ilik a pəra.

⁴³ Yesuw a ŋgat a məkəs ata tsara ka, a zal a gà ɓəzla mazazama ŋgat. A gwaɗa a tar: «Iye ihər i tsik a kurum a nda ndzer: Madakwa məkəs aaha matawak ŋa ya, aka dza aɗəm dukw məfara ŋa aaha aɗaba Mbulum a ka, a za biy gà mburma aaha tserdze tə dzaya aɗəm a.

⁴⁴ Aɗaba gà mìsle ŋgiɗ tə dzaya aɗəm ka, asiŋ ŋa a riŋ aà tar hinne asa, à ndìv a tsa. Ama madakwa məkəs aaha a dza aɗəm i ŋgar ka, dukw ana a ŋgat nda matawak ŋgar a. A dza aɗəm ka, dukw ana a riŋ ihər a ndze a dər dze ya.»