Markus 1 - Bible Zulgo

Guma Mbulum ana Yuhana metsìlwìɓè à mburma a yam a tsik a

¹ Naha Ŋgwal Bazlam ana a ɗif à Yesuw Kiristi Kəla Mbulum a.

² Bazlam ata a dza ahər ba ka, kamala ana Ezaya, mala məma à guma Mbulum a wetse aba a bəɗ a kaɗəŋ. A wetse piŋŋe, a gwa: «Araha», Mbulum a gwa, «I slirehe a mala metsìkè bazlam gà naha aka miɗ yak, dite mà làmbaɗak vatwa yak.*fa*

³ Mburma ŋa a riŋ i kusak, à fèfil a ŋgəlakəkka, a gweɗe a: «*fb*

⁴ Kamala ana Mbulum a gwa: I slirehe a mala metsìkè bazlam gà naha ya ka, aka sle kaɗəŋ. Mburma ŋa a riŋ i kusak, zləm ŋgar Yuhana. A tsik a bazlam Mbulum a mburma. A gwaɗawa a tar: «Mbəɗum à madzala gà gər kurum, dite i tsilwiɓ à kurum a a yam, dite Mbulum à pìl a kurum a à bakal kurum.» I dəba ŋa ya, a tsilwiɓewa à tar a yam.

⁵ Akahər ata ka, gà mburma ana i Yeruzalem a, nda gà na a riŋ ika ahəɗ Yuda ya tserdze, tə dawara a təv Yuhana ya. Ti ɗifewa à bakal tar aka miɗ mburma tserdze, dite Yuhana a tsilwiɓewa à tar a yam i dulwa Yurdan i fata.

⁶ Yuhana ata a ndzawa ka, nda gà petek ŋguz zlìgwèmè, madànà ba ŋa i magər ba ya nda kwiye. Dukw mezime ŋgar ka, say məpapəɗa heyew nda mazəma amum ana i dala ya ɗekɗek.

⁷ A gwaɗawa a gà mburma ana tar riŋ i təv ŋgar a: «Mìsle ŋgiɗ a riŋ, a dere a i dəba gà ya mba. Ŋgat ka, à zè a iye nda ndzəɗa kweleŋ fètìte. I sle a aà mesirikaha a təv ŋgar, aà məpəla à liɓir tsàpà ŋgar tsidze, ku mege nda mekìrìɗèhè gurmits a biye tekeɗe, i sle a tsa.

⁸ Aɗaba taŋa iye ka, i tsilwiɓ à kurum a ka, a yam pəra. Ama ŋgat aka dara ka, a tsilwiɓ à kurum a ka, a yam asa tsa, say a Mezite Mesife Mbulum.»

Metsìlwìɓè à Yesuw ana Yuhana a tsilwiɓ dər a yam a, nda Əbay sitene ana a dzik à Yesuw a

⁹ Akahər ata Yesuw a hitsera i kwite ŋa a riŋ ika ahəɗ Galile ya, tə zalar Nazaret. A dara a təv Yuhana a dulwa Yurdan a. A daha, Yuhana a tsilwiɓ à ŋgat a yam i dula ata.

¹⁰ I təv ana Yesuw a riŋ a tsilere a i yam a ka, kuvəl mbulum a hə̀ndə̀k ba tùwaŋ. A ŋgataha a Mezite Mesife Mbulum a riŋ a terre a iɗəm i fataya, zərawwa kamala maadagwar ana a ndze a a bəɗ a, aka gər ŋgar.

¹¹ A tsarakara mifefile ana a ɗera i mbulum a. Mbulum a gwaɗarra: «Kər na kà ne mandərkwasla gà ya, Kəla gà. Maŋgayaba gà fit dze ka, ika gər yak.»

¹² I dəba mifefile ata ya tsara ka, Mezite Mesife Mbulum a da à ŋgat a kusak diriŋ.

¹³ A ndza riŋ i fata mehinne dzik faɗ. Hawa mèkwède ŋgat a riŋ i təv gà dukw dala. I huɗ mehinne ata ya ka, tar riŋ nda gà Əbay sitene a dzik a à ŋgat kəla pat. Ama gà gawla Mbulum ana i gər ŋa ya, tar riŋ nda gà ŋgat, tə zlàkawa ŋgat mbaŋa.

Yesuw a zal a gà ɓəzla magàsà kilif faɗ

¹⁴ Akahər ata ta gəs Yuhana, ti tike ŋgat a daŋgay gədzə̀zl. I dəba ŋa ya, Yesuw a tsaraka tàa gəs Yuhana ka, a mbəɗaha gər aka ahəɗ Galile. A daha ka, a dza ba aà metsìkè bazlam ŋgwal ŋa ana a da dərra i təv Mbulum a, a mburma. A gwaɗawa a tar:

¹⁵ «Pat ana Mbulum a tike məpàslà ahər a ka, aka sle kuɗa. Aɗaba mekwere ŋgar ana a kwere a ya ka, aka à mendzera. Mbəɗum à madzala gà gər kurum a təv ŋgar, dite kə̀ gəsum bazlam ŋgwal ŋa aaha a gəzləŋ kurum ədəts lele.»

¹⁶ I dəba ŋa ya, Yesuw a da aà gùva duluv Galile. A daha, a sùwaya i fata ka, aka le aà gà Simun nda damər ŋgar Andire, tar riŋ ta pìl a à ndzàràwà tar a yam a duluv ata, aɗaba megemir tar ka, magàsà kilif.

¹⁷ Yesuw a gwaɗa a taraha aɗəm: «Dumara, tàkwa, ka zazamum iye, i ne à kurum a gà ɓəzla mayahara mburma i luvuŋ a, kamala kilif aaha kurum riŋ ihər ki geswimere a i yam a, dite ka, gà mburma ata ibam, tə dara a təv dzaydzay ŋa ya.»

¹⁸ I dəba bazlam ŋgar ata ya tsara ka, gà wele ata ta məsak aba à gà ndzàràwà tar a fataya, tə dara, tə dəɗ akaba, tə zazam ŋgat.

¹⁹ Yesuw a da i fataya zaakwa ka, aka ŋgataha a gà Zakup nda damər ŋgar Yuhana, gà ɓəza Zebede asa. Tar riŋ i slə̀làh yam i duluv, tì lèmbeɗe a ndzàràwà tar mbaŋa.

²⁰ Yesuw a zal a taraha aɗəm tsara. Gà wele ata ta hitsera iɗəm a. Ta məsak riŋ à tsir tar Zebede i slə̀làh yam ata nda gà ɓəzla meslire ŋgar. Tə da nda gà Yesuw tserdze.

Wele ana sitene a darra i ba ya

²¹ I dəba ŋa ya, gà Yesuw nda gà ɓəzla mazazama ŋgat tə da a kwite Kafarnahum. A pat mesìfìkà ba ana a ndzera ya ka, a da a ga mahàmà a Mbulum. A daha, a tsik guma ŋgar a mburma.

²² Guma ŋgar ata a tsik a ya ka, arəv a da dər aà tar a, a ge aà tar kamala dukw mene aà mburma ya. Aɗaba guma ŋgar ata a tsik a ter a ya ka, kamala biy gà ɓəzla medzeŋge məpala ahəm Mbulum a tsa. Ama ka, nda ndzəɗa hinne, kamala ana ŋgat Əbay a, na a tsik a tar a.

²³ I dəba ŋa ya, Yesuw a ndəv à mifefile ŋgar ata tsara ka, wele duwa a riŋ i magər gà mburma ata, sitene a gasawa ŋgat. A dza ba aà mifefile ŋgəlakəkka hinne nda magala.

²⁴ A gwaɗa a Yesuw: «Ki yehe a à mər la ya, kər ana kà dara i Nazaret a? Ka dara ana, aà medzeye à mər kəla ya? I sər kər lele, kər ka, wur ana bakal ŋgar a riŋ tsa, Mbulum a slərra a faha ya.»

²⁵ Yesuw a kwara akaba sitene ata. A gwaɗar: «Ndza ɗikɗik. Dara i ba wele aka ya.»

²⁶ Sitene ata a dzadzar à wele ata hinne, dite a darra i ba ya, nda gà Mewideye ya.

²⁷ Gà mburma aaha tserdze ya, ta ŋgat a dukw mene aà mburma ata ka, tə dzadzar hinne mbaŋa. Ta gwaɗaba ika magər tar: «Naha ana, là? Bazlam wara naha a tsik a awiya ŋa asa ya? Dukw ana a tsik a ya ka, nda ndzəɗa ndzer kaɗəŋ. Mege a kwere akaba a gà sitene tekeɗe, ta gis a bazlam ŋgar a.»

²⁸ I dəba ŋa ya bise tsara, gà mburma ana ika ahəɗ Galile ya, ti ɗewa zləm à Yesuw hinne.

Yesuw a mbala à gà ɓəzla dukw məməta hinne

²⁹ Aləka i dəba ŋa ya, gà Yesuw nda gà ɓəzla mazazama ŋgat, gà Zakup nda Yuhana, tə dara i ga mahàmà a Mbulum a. Ta mah ba, tə da a bəra gà Simun nda Andire.

³⁰ Ti ta medeha ka, dzìdze Simun a riŋ mahə̀nà ŋa ŋgwala tsa, a dzedzeriŋa ika slə̀làh ŋgar i ga. Ta gwaɗa a Yesuw: «Məkəs aaha ka, ŋgwala tsa.»

³¹ Yesuw a daha a təv ŋgar, a gəs ŋgat i ahər a. A hitse dər aà mbulum. Tùŋ a ndza dər a bəɗ nda mendzwil ŋgar. Màràɓàraɓ ŋgar ata a ndala ihər a tsara. I dəba ŋa ya, a sle a aà mege a tar mbəlakw lele kuɗa.

³² Aləka pat a dəɗ ndaàwa ŋana ka, gà mburma ata i fataya, tə ndzakaha gà ɓəzla dukw məməta nda gà ɓəzla sitene a təv Yesuw.

³³ Gà mburma ana i kwite ata ya fit dze, tə ndəv akabaha aka biye hərmaga ata Yesuw iɗəm a.

³⁴ Yesuw a mbala à gà mburma i dukw məməta tar a pampam hinne. A dalawa gà sitene aà gà mburma ana duwa a gasawa tar a mbaŋa. A hə̀ndə̀kaha aà bazlam a gà sitene, aɗaba tar ka, tə sər ŋgat, a dara ka, i təv Mbulum a ndzer.

Yesuw a tsikeye guma ŋgar ika ahəɗ Galile tserdze

³⁵ Ndidwe ŋana aka tuwa mendzikwir ka, Yesuw a dara i ga ya, a hitse i fataya, a da a təv ana mburma a riŋ iɗəm tsiye. A ndzeha a fata ka, a dza ba aà mahàmà a Mbulum Tsir ŋgar.

³⁶ Gà Simun nda gà mìsle ŋgiɗ ana ti zezem a Yesuw a, tə da a mayaha ŋgat. Aləka ta ŋgat Yesuw ka, ta gwaɗar:

³⁷ «Gà mburma a riŋ hinne ta wiz a kər ana, meme?»

³⁸ I dəba ŋa ya, Yesuw a gwaɗa a tar: «I waya ka, ki tèkwe a a təv ŋa, a təv ana a mbera a kwite aaha ya. Say i ti tsik a bazlam ana Mbulum a slər dərra iye ya, a fata mbaŋa. Agəra taŋa na i dara ya.»

³⁹ Yesuw a tsik aba ya kataya ka, a mah ba, a da. A daha, a sùwaya ika ahəɗ Galile tserdze. A ləm aka kwite ata i fataya à bazlam ata. A tsikewa guma ŋgar a gà mburma tserdze i ga mahàmà a Mbulum ana ika ahəɗ ata ya. A dalawuwa gà sitene aà mburma ya mbaŋa.

Yesuw a mbəl à mala vèdègwè duwa

⁴⁰ Akahər ata mala vèdègwè duwa a daha a təv Yesuw. A ndzeha a təv ŋgar ka, a dzar gurmits a biye, dite mà zlak ŋgat i dukw məməta ŋgar a. A gwaɗar: «Na mege kà waya ka, ki sle a aà mimbile à iye te.»

⁴¹ Ama wele ata a tsiker kataya, a ndze are tsehe a Yesuw hinne. A daha, a ləm ahər, a gwaɗar: «Haya, a sèsiŋ na ki mbil a ya. Kinehe ka, mbəl i dukw məməta yak a.»

⁴² I fataya ka, mbəlak ba wele ata a ndala ihər a suwut tsara. Ba ŋgar a làmbaɗa ba lele kuɗa.

⁴³ I dəba ŋa ya, Yesuw a tiriɓe akaba wele ata nda bazlam, a gwaɗar: «Daba.

⁴⁴ Ama kəla ka, ka ti tsik a wura tsidze. Kàa daha ka, kà pàt à ba yak a mala mandəva kuɗa a Mbulum, dite mà samata kər, ma sər dər ka, meme na kà ndza kinehe kuɗa ya. I dəba ŋa ya, ka vəl dukw masakəŋa ana Musa a gwa i wakita ka, ki vilwim a a Mbulum a. Dite na gà mburma ta ŋgeteke a, ti sir a dər ka, kàa mbəl kaɗəŋ a.»

⁴⁵ Tsaatsa, bazlam Yesuw ata a tsiker nda ndzəɗa nda magala ya ka, wele ata a da i təv ŋgar a tsara. A daha, a dza ba aà maɗàmà dukw ata Yesuw a ge nda ŋgat a. Aɗaba taŋa, Yesuw tekeɗe, a sle a aà mipète à ba ŋgar bise a gà mburma ana i gà kwite ata ya asa tsa, tsəka, ti sir a ŋgat. Agəra taŋa a sùwayawa ba nda təv ana mburma a riŋ i fata tsiye. Ama gà mburma pampam tə dayara i gà kwite tar a, tə dawaha a təv ŋgar a fata.