Luka 8 - Bible Zulgo

Gà məkəs ana tə zazam Yesuw a

¹ Aləka i dəba mendze zaakwa ya ka, Yesuw a daya aà kwite aà kwite, mege a batsah kwite, mege a kəla ŋana tekeɗe. A ləm aaka à bazlam ŋgwal ŋa ana biy *mekwere Mbulum a fit. A tsikewa a gà mburma. Gà ɓəzla mazazama ŋgat ana kurwa gəra sula ya, tə dəɗ aaka mbaŋa.

² Gà məkəs ana a dalawa à tar gà sitene ya, dite a mbala à tar i dukw məməta tar a, tə zazam ŋgat mbaŋa asa. I liwiŋ gà məkəs ata tə zazam ŋgat a ka, Mariya ana a dara i Magədala, Yesuw a dalawa ihər gà sitene təsəla ya iɗəm,

³ nda gà Yuwana məkəs Huza, mala megemir gà *Hiridus iɗəm mbaŋa, dite nda gà Suzana, nda gà asiŋ gà məkəs ŋgiɗ pampam hinne iɗəm asa mbaŋa. Gà məkəs ata tə zazam ŋgat a ka, tə zlàkawa gà Yesuw nda limana tar hinne.

Bazlam minew meslìgè daw

⁴ A pat duwa, gà mburma hinne tə dayara i gà kwite ŋgiɗ a pampam, ti yaha ba gər a təv Yesuw. Dite Yesuw a fàfəl a tar ndaka bazlam minew.

⁵ A gwaɗa a tar: «Wele duwa a ndzək hwife daw, a da dər a dala aà meslige. I təv ana a riŋ a slige a ya ka, wur daw ata a dza aka vatwa. Gà mburma ana ti de a ya ka, ta ɓala aaka. I dəba ŋa ya, gà ɗiyeŋ ibam, tə daha, ta pala.

⁶ Asiŋ ŋa a dza aà sik kuvəl, a təv ana ahəɗ ikəka hinne tsiye. A sləl tsara ka, a kula, aɗaba yam a se i təv ata ya tsara, ɗùɗùrwàkùŋŋa biye iɗəm tsa.

⁷ Wur ŋa i ŋgiɗ pam asa, a dza aà huɗ adak. Wur daw ata a sləl ka, adak aaha a zlala aakahər zlàlaw zlàlaw, a dza aaka mezite.

⁸ Ama wur ŋa i ŋgiɗ pam asa, a dza aka ahəɗ ana ŋgwal ŋa ya. Ŋgat ka, a sləl, a da a bəra, dite a ge ba hinne. Wur daw ata ilik ka, a rah a kəzləm tìs.» Yesuw a ndəv à mifefile ŋgar ata fit ka, a gwaɗa a tar asa: «Dzùmar zləm lele, na gər kurum aka ge aà metsereke ya.»

Aɗaba la na Yesuw a fàfəl ndaka bazlam minew a

⁹ Aləka i dəba ŋa ya, gà ɓəzla mazazama Yesuw tə tsam ahər, ta gwaɗar: «Bazlam ata ndeɗiŋa kà tsik ndaka bazlam minew a ka, maa tsaraka tsa ana, a sàsak aà megweɗe ana, meme?»

¹⁰ Yesuw a gwaɗa a tar aaka: «Kurum ka, Mbulum aka ɗif a kurum à dukw ana makàhà ŋa i mekwere ŋgar a. Ama gà mìsle ŋgiɗ ti dze a zləm ka, a dukw ana ti tsik a ter a ndaka bazlam minew a pəra. Dite ku mege ta fir ahər a tekeɗe ka, ta ŋgeter a tsa, ku mege tàa dzar zləm lele tekeɗe ka, ti tsereke a ɓav tsa asa.»*fa*

Yesuw a ɗif à bazlam minew meslìgè daw

¹¹ I dəba ŋa ya, Yesuw a gwaɗa a tar kuɗa: «Bazlam minew ata a sasar aà megweɗe ka, na a ne hwife ka, bazlam Mbulum.

¹² Gà mìsle ŋgiɗ pam, ti ndzikiɗ ba ka, wur daw ata a dza aka vatwa ya. Ti ndzikiɗ ba gà mburma ana ti tsereke a bazlam ata ka, ama Əbay sitene a dehe a, a ndzehe a bazlam ata ta gəs a gəzləŋ tar a, dite ta gəs nda gəzləŋ tar, ta mbala asa tsa.

¹³ Gà biy ŋgiɗ pam asa, ti ndzikiɗ ba wur daw ata a dza aà sik kuvəl a. Ta gis a bazlam ata a gəzləŋ tar nda gà maŋgayaba tsara. Ama bazlam ata a ŋge a zlile aà mendze i gəzləŋ tar tsa. Zàkwayiya, mesewere are a dere a, a dzik à ter a tsara ka, ta miyek a à bazlam ata ta gəs a gəzləŋ tar a.

¹⁴ Gà mìsle ŋgiɗ pam asa, ti ndzikiɗ ba wur daw ata a dza aà huɗ adak a, ti tsereke a bazlam Mbulum. Ama madzala gà gər mesewere are ana ti dzele a pampam, nda gà limana nda meèweke gər ahəɗ ta ge a madzək a bazlam Mbulum ana i gəzləŋ tar a, dite megìse tar ata a ge a ndzəɗa asa tsa.

¹⁵ Dite gà mìsle ŋgiɗ pam asa ka, ti ndzikiɗ ba wur daw ana a dza aka ahəɗ ŋgwal ŋana. Ti tsereke a bazlam Mbulum, ta gis a a gəzləŋ tar lele nda maŋgayaba. Bəla mesewere are aka ndzera ka, hiywe ta misek a dər tsa, ta ge a dukw ana a ge a ŋgulum a Mbulum a.»

Bazlam minew lalampa ana i təv dzəgəɗaf ŋa ya

¹⁶ Yesuw a gwaɗa a tar asa: «Wura a riŋ a tike a akwa aà lalampa ka, dite a kèhe a dər dəɓ aà huɗ tasà, kige tsa aà huɗ maàslə̀làh tsa. A tike a ka, a təv ana dzəgəɗaf ŋa ya ivaɗ, dite na gà mburma ana ti de a a ga ya ka, ta ŋget a dər a vatwa dzaydzay lele ya.

¹⁷ Aɗaba dukw ana makàhà ŋa kinehe ya ka, aləka aka miɗ mba ka, a ta pèt a aba lele. Dite dukw ana gà mburma tə sər kinehe tsiye ka, aləka aka miɗ ka, parakkà a sir aaba a lele mbaŋa.»

¹⁸ I dəba bazlam ata ya ka, a gwaɗa a tar asa: «Gwim metsehe a dukw ana ki tserekwim a ya, ka ti nwim dər ka, dukw pàrsa tsa. Aɗaba wur ana à gis a bazlam gà ana i tsik a ya ka, Mbulum tekeɗe, à sikehe a à megìse ŋgar ata, à zè a taŋa. Wur ana aka gəs tsiye ka, Mbulum ibam, à nikiɗ a à ŋgat mbaŋa asa.»

Gà mama Yesuw nda gà damər ŋgar

¹⁹ Gà mama Yesuw nda gà damər ŋgar tə daha, ta waya mada a təv Yesuw. Ama ti sle mede tsìm a təv ŋgar tsa, aɗaba mburma a riŋ i təv ŋgar hinne.

²⁰ Gà mburma ana i fataya, ti tsikeha a Yesuw. Ta gwaɗaraha: «Gà mama yak nda gà damər yak naha ɗa i bəra, a sàs a tar aà meŋgeteke.»

²¹ Ama Yesuw a gwaɗa a gà mburma ana i təv ŋgar i fataya: «Gà mama gà nda gà damər gà ka, gà mburma ana tar riŋ tì dze a zləm a bazlam Mbulum, dite ta gis ahər a ahəm a.»

Yesuw a kwara akaba gà himbiɗ nda yam

²² A pat duwa, Yesuw a gwaɗa a gà ɓəzla mazazama ŋgat: «Tàkwa aka lìdè duluv ŋgiɗ.» I dəba ŋa ya, tə daha, tə tsala a slə̀làh yam, ta mah ba, tə da.

²³ I təv ana tar riŋ i slə̀làh yam ata, ti de a dər a ka, Yesuw a ndze aɗəm are. Zàmma tsəka, batsah himbiɗ aka dza ba aà mege ika gər duluv ata. Yam a dza ba aà mede aka taraha a slə̀làh yam ata, aka à merèhe aɗəm. A zeha kwizikw, na dite à pìts à ter a a huɗ yam a.

²⁴ Gà ɓəzla mazazama ŋgat ata tə daha, a təv Yesuw. Ta piɗeke à ŋgat. Ta gwaɗar: «Əbay, Əbay, ki dzèkwe a a yam.» Yesuw a hitse aà mbulum. A kwara akaba gà himbiɗ ata nda yam ana a tsele akaba a ya. Himbiɗ ata də̀ɓəts a mət aaka, mege yam aaha tekeɗe, a tsele akaba a asa tsa.

²⁵ Dite Yesuw a gwaɗa a gà ɓəzla mazazama ŋgat ata: «Wànà kàa gəsum iye a gəzləŋ kurum tsiye, na ki gwim a magəɗa kataya ya?» Ama ka, ta ŋgat a dukw Yesuw ata a ge kataya ya ka, a ge aà tar kamala dukw mene aà mburma ya. Ta ge magəɗa hinne asa nda medzedzere. Ta gwaɗaba ika magər tar: «Wele aaha i ŋgar dze ana, weke, na a kwere akaba a gà himbiɗ nda yam ka, ta gis ahər a ahəm a?»

Yesuw a mbəl à mala sitene duwa

²⁶ Ti ndze aka ahəɗ Garasa ika lìdè duluv ŋgiɗ ɗegìrgìr ika miɗ kwite Galile.

²⁷ Aha ŋana Yesuw a tarra i slə̀làh yam a ka, wele duwa a riŋ i fata, a dza ba aà madaha a təv ŋgar. Wele ata ka, sitene a gasawa. A tikewa akaba petek tsa, dite a hənawa i ga ɓav tsa asa. A gər ana a dza ahər ba ya, a hənawa ka, ika magər gà dive.

²⁸ A ŋgataha a Yesuw tsara ka, a wideye nda ndzəɗa hinne. Dite a daha, a kal à ba aka miɗ ŋgar, a gwaɗar: «Əla a ləm akaba à ma ya, Yesuw, Kəla Mbulum ana i gər ŋa ya? Kamkam, kà sèwèriŋ are tsa te.»

²⁹ A tsiker kataya ka, aɗaba ana Yesuw aka mbər megweɗeha a sitene ata i ba ŋgar a: «Dara i ba wele aka ya» ya. Ama sitene ata ka, a gasawa ŋgat kəla pat. Tə dzawuwa ŋgat nda tsitsirɓe i sik a nda ahər a lele tekeɗe ka, ndìrìtsìtse a ŋgazlahawa dər aba ya. A sàs a gà sitene ata ka, say ma ndza i kusak tsàkàlàk aà mburma ya.

³⁰ I dəba ŋa ya, Yesuw a gwaɗar: «Zləm yak weke?» Wele ata a gwaɗar aaka: «Zləm gà ka, Twìɗèkìkke.» A tsiker kataya ka, aɗaba gà sitene ana i ba ŋgar a ka, hinne.

³¹ Gà sitene ata ibam, tə dza ba aà mahàmà a Yesuw asa. Ta gwaɗar: «Kamkam, kù gwaɗa a mər, dum a təv a diriŋ biy na mìi dzeye a ya tsa te.»

³² Ta pə̀r ikaba ya ka, tàa ŋgataha a palam gà wèdèlìŋ duwa a riŋ i fata, ta kiv a tar aà sik kwite. Gà sitene ata ta gwaɗa a Yesuw: «Kamkam, vəl a mər vatwa a ba a gà wèdèlìŋ aaka, mìi petse aɗəm a te.» A vəl a tar aɗəm vatwa.

³³ Gà sitene ata tə dara i ba wele ata ya tsara, ta patsa a ba gà wèdèlìŋ ata. Palam gà wèdèlìŋ ata i fata tserdze ya, ta wiyeraba aà sik kwite ata ya, bìrìm tə dzara a yam ika gìgìze ya, a duluv ata ya, ta mata aɗəm fit.

³⁴ Gà ɓəzla makəva gà wèdèlìŋ ata, ta ŋgat a dukw ana a ge ba nda gà wèdèlìŋ aaha ya ka, swiyèh tə tə̀z. Tə daha, ti tsikeye labara ana a ge ba, ta ŋgatar a, i huɗ kwite, nda gà i kə̀sà ana i dala ŋana ya mbaŋa.

³⁵ Gà mburma ata tə tsaraka ka, tə dayaha aà mesèmete dukw ana a ge ba ya. Ti ndzeha a təv Yesuw ka, tàa le aà wele ana a dalawarra i ba gà sitene ya, ŋgat a riŋ mandza ŋa aà sik Yesuw nda gà petek ikaba lele kuɗa. Madzala gà gər ŋgar ibam, lele mbaŋa. A ge magəɗa a gà mburma ata tə daha ya hinne tsara.

³⁶ Gà mburma ana dukw aaha a ge riŋ ba aà tar ndeɗiŋa ya ka, tə ɗama a gà mburma ata, meme na Yesuw a mbəl à mala sitene ata ya.

³⁷ I dəba ŋa ya, gà mburma ana tserdze ika ahəɗ ata ya, ta hama a Yesuw, dite ma da ika ahəɗ tar a te. Aɗaba ta ger magəɗa ka, hinne. I dəba ŋa ya, Yesuw a tsəl a slə̀làh yam, à mbiɗere a gər ndàra a dəba ya.

³⁸ Ama wele ata a dalawa ihər gà sitene ya ka, a hama a Yesuw, dite ka, mə vəlar vatwa aà mazazama ŋgat te. Ama Yesuw a màr aba ahəm a. A gwaɗar:

³⁹ «Mbəɗ gər a ma, dite ka tə ɗama dukw ana Mbulum a ge aɗaba kər a, a gà mburma ana tserdze ya.» Wele ata a da ba a ma kaɗəŋ, a daha ka, a sùwaya à bazlam ata aà ga aà ga i kwite ata. A ɗamawa dukw ana Yesuw a ge aɗaba ŋgat a, a gà mburma tserdze.

Yesuw a mbəl à dəm Yayirus, nda məkəs duwa ŋgwala tsa

⁴⁰ Aləka i təv ana Yesuw a màra a dəba aka lìdè duluv ŋgiɗ a ka, gà mburma a riŋ i bəɗ i fata hinne, ta bebe a ŋgat. A ndzeha a təv tar tsara ka, tə daha a təv ŋgar nda gà maŋgayaba.

⁴¹ Mìsle ŋgiɗ a riŋ ilik i fata mbaŋa, zləm ŋgar Yayirus. Ŋgat ka, batsah gà mburma ana i ga mahàmà a Mbulum i kwite ata ya. A daha a təv Yesuw. A ndzeha a təv ŋgar tsara ka, a kal aba aka miɗ ŋgar. A hamar hinne. Dite Yesuw ma da a ma ŋgar te.

⁴² Aɗaba dəm ŋgar duwa a riŋ ilik bataŋa, mive kurwa gəra sula, à mìtiŋa. Yesuw a tsaraka kataya ka, ta mah ba, tə da. Aka təv ana ti de a ya ka, gà mburma hinne tə zazam tar. Ta ŋgiɗits a dər Yesuw hinne.

⁴³ Ama i liwiŋ gà mburma ata ka, məkəs duwa a riŋ ilik, a sèwèrewa are hinne, məmbəz a zlalawara ihər a. Dukw ata aka ge ihər ka, mive kurwa gəra sula. Aka nəs à limana ŋgar a təv gà dàkwtar pampam hinne. Ama wura ilik aka sle aà məmbə̀là à ŋgat tsidze.

⁴⁴ A sìrìkeha a təv Yesuw ndaà dəba. A daha, a ləm aà gùva petek ŋgar. A ləm ahər tsara ka, tsəndzalaŋ məmbəz ŋgar ata a zlalwara ihər a, a ndala tsara.

⁴⁵ Yesuw a gwaɗa a tar: «Weke na a ləm aà iye ya?» Ku mege weke a gwa: «Na iye tsa.» Dite Piyer a gwaɗar: «Əbay, kə̀ ŋgat a gà mburma aaha ti lek tits, ta ŋgiɗits a kər a ka, dite ki gweɗe a ka, weke na a ləm aà iye ya ana, meme?»

⁴⁶ Ama Yesuw a gwaɗa a tar asa: «Wura aka ləm aà iye, aɗaba i sər ka, ndzəɗa aka dara i ba gà ya, aka mbəl à mburma.»

⁴⁷ Aləka məkəs ata a samata ka, Yesuw aka mbər mesire aà dukw ana a ge ya, a daha aka miɗ ŋgar nda gà medzedzere slàɓslàɓslàɓ. A kal aba aka miɗ ŋgar a fata. A tsik a Yesuw melime ana a ləm ahər a ika miɗ mburma tserdze, dite meme na a mbəl tsara ya.

⁴⁸ Yesuw a gwaɗar i dəba bazlam ŋgar ata ya: «Dəm ga, megìse yak ana kì gis iye nda gəzləŋ a ka, aka mbəl à kər. Daba nda zay.»

⁴⁹ I təv ana Yesuw a riŋ à fèfil a a məkəs ata mba ya ka, tàa ɗera à labara i bəra Yayirus aaha ndeɗiŋa ya. Wur ana a ɗera à labara ya ka, a gwaɗaha a Yayirus: «Dəm yak aaha ka, aka mət ana, aàmala na ki yère a ba à mala medzeŋge a mburma aka asa ya?»

⁵⁰ Ama Yesuw a tsaraka bazlam ata ka, a gwaɗa a Yayirus: «Arəv ma da aà kər a tsa, gəs iye nda gəzləŋ yak pəra ka, dəm yak a mbiliŋa.»

⁵¹ Aləka i dəba ŋa ya, ta mah ba, tə da. Ti ndzeha a bəra Yayirus, ti de a a təv məməta ata a ga ya ka, Yesuw a gəs mivile vatwa a wura aà mazazama ŋgat tsidze. A vəl vatwa ka, say a gà Piyer nda Yuhana, nda gà Zakup, dite a gà tsir dəm aaha nda mama ŋgar ɗekɗek.

⁵² Tə daha a ga ka, ti leha aà gà mburma riŋ hinne, ti tiwiŋa nda makə̀ɗà ba hinne. I dəba ŋa ya, Yesuw a gwaɗa a tar: «Ka tuwum tsa, aka mət tsa, a riŋ ka, ika mendze are.»

⁵³ Gà mburma ata tə tsaraka kataya ka, tə sawla ahər, aɗaba tə sər ka, aka mət ndzer.

⁵⁴ Ama Yesuw a daha, a gəs dəm ata i ahər a, a gwaɗar nda magala: «Hitse aà mbulum, dəm aaha.»

⁵⁵ Dəm ata a mbəl, a hitse tsara kaɗəŋ. Yesuw a gwaɗa a tar: «Vəlumar dukw mezime.»

⁵⁶ Ama dukw ana Yesuw a ge ya ka, a ge aà gà tsir dəm ata nda mama ŋgar a kamala dukw mene aà mburma ya. I dəba ŋa ya, Yesuw a gwaɗa a tar asa: «Iswe, ka ti tsikwim dukw ana a ge ba kinehe ya, a wura kwaŋ, ndzum dər i gà gər kurum ɗikɗik.»