Luka 20 - Bible Zulgo

Weke na a vəl vatwa a Yesuw aà mege duwa pampam a?

¹ A pat duwa ka, Yesuw a riŋ a dzeŋge a guma ŋgar i ga Mbulum batsah ŋana. A tsik a ter a bazlam ŋgwal ŋana. I təv ana a riŋ a tsik a ya ka, gà Əbay gà ɓəzla mandəva kuɗa a Mbulum nda gà ɓəzla medzeŋge məpala ahəm Mbulum nda gà bàba gà mburma ana ta kwere a gà Yahuda ya, tə daha a təv ŋgar,

² tə tsam ahər, ta gwaɗar: «Tsik a mər kwaŋ. Ki ge a duwa kamala taŋa ya ana, nda ndzəɗa weke? Weke na a slərra kər, a vəlak ndzəɗa ŋa dze ya?»

³ Yesuw a gwaɗa a tar aaka: «Iye tekeɗe, i wiz aà kurum a duwa ilik mbaŋa te. Tsikwimiŋ dukw ilik.

⁴ Weke na a slərra Yuhana aà metsìlwìɓè à mburma a yam a? Wànà Mbulum a, na a slər ahər ŋgat a, tsəna, mburma ya?»

⁵ I dəba ŋa ya, gà mburma ata tə dza akaba bazlam ika magər tar, ta gwaɗaba: «Na kù gwaɗakwar kinehe ka: ka, a gweɗekwe a:

⁶ Ama na kù gwaɗakwar asa: ka, a ge a ba tsa asa. Aɗaba gà asiŋ gà mburma ɗa i magər kwa hinne tə dzala Yuhana ka, mala məma à guma Mbulum ndzer, ta kelewa a kwa nda kur.»

⁷ Gərəŋ gərəŋ a mà a tar dər. I dəba ŋa ya, ta gwaɗar aaka: «Mì sər tsa.»

⁸ Yesuw a gwaɗa a tar: «Yawwa, iye tekeɗe ka, i tsik a kurum a wur ana a slərra iye, a viliŋ ndzəɗa aà megeye gà dukw aaha tserdze ya ɓav tsa mbeete.»

Bazlam minew gà ɓəzla makàslà gà dizl ɗaf duwa hinne

⁹ I dəba ŋa ya, Yesuw a dza ba aà metsìkè guma ŋgar ndaka bazlam minew a gà mburma ata. A gwaɗa a tar: «Wele duwa a sàs gùvàh. A dzava aɗəm dizl ɗaf hinne. I dəba ŋa ya, wele ata a da a kwite ŋa a təv ŋa, a ndze a riŋ hinne. Gùvàh dizl ɗaf ŋgar ata à mìtehiŋa. A dza aɗəm gà mburma aà məfə̀rà ahər, dite aləka ta vəlar dukw gùvàh ŋgar əŋgal na aka màra ya.*fa*

¹⁰ Tits a təv ana dizl ɗaf ata a nah a ka, wele ata a sləraha mburma a təv gà ɓəzla megemir ŋa, dite ka, tə̀ dzàraha dukw gùvàh ŋgar ata kuɗa. Aləka wele ata a daha, ta ŋgatar tsara ka, ta gə̀zl lehhè lele. Tə dalawa ŋgat, a mbəɗ gər a ma, ze ahər sìkwèɗ, duwa ihər tsa.

¹¹ I dəba ŋa ya asa, mala dizl ɗaf ata a sləraha mìsle ŋgiɗ. Aləka wele ata a daha, ta ŋgatar kataya asa ka, ta ger matawak, ta gə̀zl ŋgat, tə dalawa ŋgat mbaŋa.

¹² Ama mala dizl ɗaf ata a sləraha mìsle ŋgiɗ məmakər ŋa asa. Wele ata a daha i ŋgar ka, ta gayar mbəlak hinne, dite tə dalawa sarra mbaŋa asa.

¹³ Aləka i dəba ŋa ya, mala dizl ɗaf ata a dzala, a gwa:

¹⁴ Aləka kəla ata a daha a təv gà mburma ata, ta ŋgatar tsara ka, ta gwaɗaba ika magər tar:

¹⁵ Tə daha, tə lamayarra i fataya tsihtsih, dite tə daha, ta kəɗ ŋgat fit a biye.» I dəba ŋa ya kuɗa, Yesuw a gwaɗa a tar aaka asa: «Dite na kataya dze ana, mala dizl ɗaf aaha a ge a ana, meme na nda gà mburma ata ya, na aləka aka təv ana aka daha ya?»

¹⁶ Ama a gwaɗa a tar: «A dehe a ka, a bets a iɗəm gà ɓəzla megemir dizl ɗaf ŋgar ata ya fit, dite à dze aɗəm a gà mìsle ŋgiɗ awiya ŋa asa.» Ama gà mburma ata tə tsaraka bazlam ŋgar ata kataya ka, ta gwaɗar aaka: «Gà dukw ata tserdze ya ka, a ge a ba diydiy tsidze.»

¹⁷ Yesuw a tsaraka bazlam tar ata kataya ka, a fə̀r aà tar, a gwaɗa a tar: «Dzalum aka dukw ana mewetse ŋa a riŋ i wakita ya, a gwa dze ana, meme? Aɗaba a gwa ka: *fb*

¹⁸ Wur ana aka dəɗ aka kur ata ya ka, ŋgə̀slàf à ses a ikaba ŋgat a fit. Ama na kur ata aka dəɗ aka wura ka, a ŋgesl a ŋgat slìrets slìrets asa mbaŋa.»

Mandza hadam a batsah Əbay gà Ruma

¹⁹ I fataya tsara ka, gà ɓəzla medzeŋge məpala ahəm Mbulum, nda gà Əbay gà ɓəzla mandəva kuɗa a Mbulum duwa, tə daha, ti yaha vatwa aà magəsa Yesuw, aɗaba tə sər ka, a fàfəl ndaka bazlam minew ata ka, agəra tar. Ama magəɗa gà mburma ana mayahaba gər ŋa i təv Yesuw a, a ge a tar.

²⁰ I dəba ŋa ya, tə dza ba aà mayaha manəsa bazlam i təv Yesuw a. Tə slər gà ɓəzla məbànàra bazlam aà mburma i gər a, a təv ŋgar. Gà mburma ata ka, ta ge aba kamala ana tar ka, gà ɓəzla ndzer ŋa ya. Dite ka, ta gə̀saraha ahəm aà are, nda mewize ahər duwa. A sàs a tar məvəla ŋgat ahər mala sik Əbay ana a kwere a ahəɗ gà Ruma ya.

²¹ Tə daha, ta wiz ahər bazlam, ta gwaɗar: «Əbay, mì sər kər ka, mala ndzer ŋa. Ki ge a magəɗa a dukw ana gà mburma ti dzele a ya tsa. Ku mege tar gà ŋgwal ŋa ika miɗ mburma tekeɗe, ama kər ihər ki ɗif a à vatwa Mbulum ka, nda ndzer ŋa.

²² Aɗaba taŋa, tsik a mər məpala ahəm Mbulum kwa kwaŋ, dze ana, wànà aka vəl vatwa aà mandza hadam a batsah Əbay gà Ruma ana a kwere a kwa ya, tsəna, aka vəl tsiye?»

²³ Ama Yesuw a sər a taraha aka dukw ana tə dzala i gər tar a tsara. A gwaɗa a tar:

²⁴ «Pètwimiŋ à kur siŋgwe kwaŋ.» Gà mburma ata tə daha, ta patar dər. A gwaɗa a tar: «Naha dze ana, foto weke, na ika siŋgwe aaha nda gà zləm ŋgar a?» Ta gwaɗar aaka: «Biy batsah Əbay gà Ruma ata ndeɗiŋa ya.»

²⁵ Yesuw a gwaɗa a tar: «Yawwa, dukw ana biy batsah Əbay gà Ruma ya ka, vəlumar dukw ŋgar. Ama dukw ana biy Mbulum a ka, vəlum taŋa a Mbulum mbaŋa.»

²⁶ Tə samata ka, ti sle aà meŋgete a bakal i təv ŋgar a tsa, agəra bazlam ata a tsik a tar ika miɗ mburma tserdze ya. Aɗaba bazlam ana a tsik a tar a ka, a za biy tar ana tə dzala i gər tar a fit. Ta gəs mifèfiler aaka asa tsa.

Mewize bazlam gà məməta ana ta mbilere a i biye ya

²⁷ I dəba ŋa ya, gà asiŋ gà *Saduki duwa tə dara a təv Yesuw a, aà mewize ihər bazlam a. Ama tar ka, gà mburma ana ta gwa ka, gà məməta ti sle aà mimbilere a i biye ya asa tsiye. Tə daha,

²⁸ ta gwaɗar: «Əbay mər, Musa a gwa i təv məpala ahəm Mbulum a ka: *fc*

²⁹ Aɗaba gà wele duwa a riŋ nda gà damər ŋgar təsəla ka, malkwara ŋana a zla daala. Aləka wele ata a mət ka, ze mewe ahər kəla.

³⁰ Mimbe gər ŋgar a zazəɗ à məkəs ata madakwa ŋa ya. Aləka wele ata ibam, a mət ka, ze mewe ahər kəla mbaŋa.

³¹ Məmakər ŋana a zazəɗ dər asa. Aləka a mət mbaŋa asa ka, ze mewe ahər kəla asa. Kamala taŋa ya, tar ata təsəla ya, tə zazaɗa à madakwa məkəs ata tserdze ka, ta mata fit ze maŋgata ahər kəla.

³² I dəba ŋa ya, məkəs ata tekeɗe, a mət asa mbaŋa.

³³ Taŋa dze ana, aləka i təv ana gà məməta ata ta mbilere a i biye ya ana, məkəs ata a ne a ana, biy weke ilik a? Aɗaba gà mburma ata nda gà damər təsəla ya ka, tàa lama ahər fit a?»

³⁴ Ama Yesuw a gwaɗa a tar aaka: «Bazlam mazla məkəs ka, biy gà mburma ana kinehe ika gər ahəɗ a.

³⁵ Ama gà mburma ana Mbulum a pala tar, ti ta mbilere a i biye ya, dite ti ti ndze a ika gər ahəɗ ana awiya ŋa a dere a ika miɗ a ka, ti dzele a bazlam mazla ba nda gà məkəs tsa.

³⁶ Aɗaba tar ka, ta mete a asa tsa. Ti ndze a ka, kamala gà gawla Mbulum a. Tàa ne gà ɓəza Mbulum, aɗaba tàa mbəlara i məməta ya aka ndəv.

³⁷ Ama kà sərakwa dər, gà məməta ta mbilere a i biye ya ka, aà bazlam Musa ana a tsik akahər ata ya. I huɗ bazlam ana a mà dər, meme na Mbulum a fàfəlarra i huɗ bagur adak ana dzaydzay ŋa ya. A ɗe dər, a gwa: Mbulum Abəraham, Mbulum Izak, Mbulum Zakup.*fd*

³⁸ A tsik taŋa ka, a gà mburma ana tar riŋ ti ndze a aà bəra hiywe ya, ku mege tàa mata tekeɗe ya. Aɗaba Mbulum ka, biy gà mburma ana tar riŋ ti ndze a aà bəra hiywe ya, tsəka, biy gà məməta tsa. Aɗaba gà mburma ŋgar tserdze ti ndze a aà bəra hiywe ika miɗ ŋgar ka, agəra ŋgat.»

³⁹ Gà asiŋ gà ɓəzla medzeŋge məpala ahəm Mbulum ana a riŋ i fataya, tə tsaraka kataya ka, ta gwaɗar aaka: «Kataya, kàa tsik ka, lele ndzer Əbay.»

⁴⁰ I dəba ŋa ya, ku weke aka wiz ahər duwa ilik asa tsa, ta ge magəɗa.

*Kiristi a pat aba ana, i gwala weke ya?

⁴¹ Yesuw a gwaɗa a tar i dəba bazlam ŋgar ata ya asa: «Meme na ta gweɗe a, Kiristi ka, mala məmbàlà à mburma ana Mbulum a gwa, i slir a kurumaha a ya ka, gwala Dawda asa ya?

⁴² Aɗaba Dawda nda gər ŋgar a gwa i wakita dimis mazàmbàɗà à Mbulum a ivaɗ ka:

⁴³ haa a təv ana Yàa dza gà ɓəzla gùvəl yak aà huɗ sik yak dzekwiŋ a.>*fe*

⁴⁴ Ama Dawda ka, a zalar seyiŋ ka, dite meme na ta gweɗe a ka, kəla ŋgar asa ya?»

Mege metsehe nda təv gà ɓəzla medzeŋge məpala ahəm Mbulum ana nda pàrsa ya

⁴⁵ I təv ana gà mburma ata tserdze ya, tar riŋ i təv Yesuw, tì dze a zləm a guma ŋgar a ka, a gwaɗa a gà ɓəzla mazazama ŋgat:

⁴⁶ «Gwim metsehe nda təv gà ɓəzla medzeŋge məpala ahəm Mbulum. Aɗaba gà mìsle ŋgiɗ iɗəm, tì sìweye a nda gà andiw zùbəl ŋa ka, ta waya məpàtà dər à ba tar aka miɗ mburma ɗekɗek. Gwim metsehe nda təv gà taŋa a sàs a tar ka, ta ge a tar wusa i liwiŋ mburma ka, say nda mazàmbàɗà à tar ɗekɗek a. Tàa da a gà ga mahàmà a Mbulum ka, ti yahawa i tar ka, say təv mendze ana ŋgwal ŋa ya, aà mendze dər aka miɗ mburma, dite ka, mburma ta fə̀r aà tar lele. Tàa ndze a təv mazəma ɗaf a liwiŋ mburma tekeɗe, say ti yehe a ka, təv mendze ana ŋgwal ŋa ya asa mbaŋa.

⁴⁷ Tì dzik a gà duwa aà gà madakwa gà məkəs a, nda haram. Dite ta heme a a Mbulum ika miɗ mburma kuɗa ka, vìrìɗìɗɗe, kərga tar ka, gà ŋgwal ŋa, tsaatsa pàrsa. Gà taŋa ka, seriye tar a ta ge a ka, mawùràba ŋa ndeyndey na i təv Mbulum a.»