Luka 18 - Bible Zulgo

Bazlam minew gà məkəs duwa nda mala mege seriye

¹ I dəba ŋa ya, Yesuw a tsik bazlam minew a gà ɓəzla mazazama ŋgat ata, aà meɗife a tar dər ka, say ta hama a Mbulum hiywe, ti ye ba tsidze.

² A gwaɗa a tar: «Mala mege seriye duwa a riŋ i kwite duwa. Magəɗa Mbulum a ger tsidze, dite a gəs mifefile wura tsa asa mbaŋa.

³ Madakwa məkəs duwa a riŋ i kwite ata mbaŋa, a dawa a təv ŋgar kəla pat, dite ma ger seriye. A gwaɗa a mala mege seriye ata:

⁴ Aka ndza hinne, a sàs a wele ata aà meger seriye ŋgar tsa. I dəba ŋa ya, a dzala a gwa:

⁵ Ama madakwa məkəs aaha à gìzliŋ a gər hinne nda bazlam, à kiɗ a iye ka, ŋgulum i ger a aba seriye ŋgar a dzekwiŋ, tsəka, a miyek a à madara a təv ga ya tsa.> «

⁶ I dəba ŋa ya, Əbay Yesuw a səkah à bazlam ata asa. A gwaɗa a tar: «Dzum zləm a dukw ata mala mege seriye ata ŋgwal ŋa tsa a tsik a.

⁷ Dite wànà Mbulum dze ana, a ti zlèk a gà mburma ana a pala tar, ti tiwer aaba a hawa mèkwède ya seyiŋ ivaɗ tsiye? Wànà a ge a mèhìnèkw aà mezleke tar a?

⁸ Iye ihər i tsik a kurum ŋa: A ta gis a bazlam tar bise. Ama kəla ka, i təv ana iye, *wur ana a dara i təv Mbulum a, i dere a ya ana, wànà i ti lere a aà gà mburma ya nda gà megìse iye i gəzləŋ tar ika gər ahəɗ a?»

Bazlam minew gà *Farisa duwa nda mala duwan

⁹ Aləka i dəba ŋa ya, Yesuw a tsik bazlam minew ŋgiɗ pam asa, a gà mburma ana tə dzala i tar ka, tar gà ɓəzla gà ŋgwal ŋa ika miɗ Mbulum, dite ka, ta fir a aà gà mìsle ŋgiɗ ka, kamala za ya. A gwaɗa a tar:

¹⁰ «Gà wele duwa sula, tə da a ga Mbulum batsah ŋana aà meheme iɗəm. Mìsle ŋgiɗ ilik ka, gà Farisa. Biy ŋgiɗ aaha ibam, mala dùwan.

¹¹ Tə daha ka, Farisa ata a ndza a təv ŋgar pam, a dza ba aà mahàmà a Mbulum. A gwa:

¹² I gewa ndəra pat sula kəla kwaskwa, dite iye ihər i vəlawa gà dukw ana ku mege Yàa ŋgat kurwa ya ka, i zle a ihər a ilik, i vilek a asa mbaŋa.>

¹³ Ama mala dùwan aaha a daha ka, a hitse diriŋ, aka fə̀r a gəza mbulum tsa, luz a tike gər a bəɗ, a tiwe a ba ŋgar, a lakaba a gəzləŋ. A gwaɗa a Mbulum: «

¹⁴ Yesuw a gwaɗa a tar asa: «Iye ihər i gweɗe a kurum ŋa: Mala dùwan aaha, aləka a da a ma ka, aka mbər mene ŋgwal ŋa ika miɗ Mbulum, bakal ŋgar aka pəl kuɗa. Ama Farisa aaha ka, ŋgat ka, a ne ŋgwal ŋa tsa. Aɗaba na wura a sasar, tə zalar batsah ŋa ka, Mbulum a ne a ŋgat kəla ŋa ivaɗ. Ama wur ana aka ne à ba ŋgar kwizikw ika miɗ mburma ya ka, Mbulum a ne a ŋgat batsah ŋa asa mbaŋa.»

Yesuw a pise ahəm a gà ɓəza ndirkiz

¹⁵ Aləka i dəba ŋa ya ka, gà mburma tə daha à gà ɓəza ndirkiz a təv Yesuw, aɗaba ma tike aka tar ahər te. Aləka gà ɓəzla mazazama ŋgat ta ŋgat a tar kataya tsara ka, ta pala a tar ahəm, a sàs a tar na ti dehe a à gà ɓəza ata ya tsa.

¹⁶ Ama Yesuw a zal a gà ɓəza. A gwaɗa a tar: «Dumara a təv ga ya.» Dite a gwaɗa a gà ɓəzla mazazama ŋgat asa: «Mandza, ka palum a tar ahəm tsa, tə dara à gà ɓəza a təv ga ya. Aɗaba mekwere Əbay Mbulum a waya ka, medzibe gà mburma ana kamala gà ɓəza aaha ya, na ti de aɗəm a ya.

¹⁷ Iye ihər i tsik a kurum a nda ndzer: Wur ana aka gəs mekwere Əbay Mbulum kamala kəla ndirkiz a tsəka, a sle aà mede aɗəm a tsidze.»

Mege metsehe a mazazama Mbulum agəra limana ana hinne ya

¹⁸ Aləka i dəba ŋa ya, Əbay gà Yahuda duwa a tsam aà Yesuw, a gwaɗar: «Əbay gà, kər na ŋgwal ŋa ya. I ge a dze ana, là, na dite i ŋget a mesife ana à ndìv a tsa aà biybiy a?»

¹⁹ Yesuw a gwaɗar aaka: «Aàmala na kà zeliŋ ŋgwal ŋa ya? Wura a riŋ ŋgwal ŋa tsa, say na Mbulum ilik tsiye.

²⁰ Aɗaba kà sər məpala ahəm Mbulum ana a gwa ka: Ki ge muva tsa, kə̀ kəɗ mburma tsa, ki ge akəl tsa, kà sàs pàrsa aà mburma tsa, dite zàmbaɗa à gà dede yak, nda mama yak a tsiye?»*fa*

²¹ Wele ata a gwaɗar aaka: «Əbay ga, Yàa gəs gà dukw ata tserdze ya, daga aà gər kəla ndirkiz a, Yàa ge tsa.»

²² Yesuw a tsaraka mifefile wele ata tsara ka, a gwaɗar: «Ama dukw ilik aka zeha i gà dukw ata kà ɗama dze ya.» A gwaɗar: «Daha, ka dzawa à gà dukw yak fit, dite kà dzaya siŋgwe ŋa a gà ɓəzla matawak. Na kàa ge dər kataya ka, ki ŋget a limana ana batsah ŋa, à ndìv a tsa i təv Mbulum a. I dəba ŋa ya, ka dara, ka zazam iye kuɗa.»

²³ Ama wele ata a tsaraka mifefile ŋgar ata kataya tsara ka, a mət i are ya sə̀rràt, aɗaba ana limana ŋgar a riŋ hinne ya.

²⁴ Yesuw a fə̀r ahər, na a mət i are ya kataya ka, a gwa: «Mawùràba aà mada a mekwere Əbay Mbulum gà ɓəzla limana ka, hinne.

²⁵ Ndəna gà ɓəzla limana ti de a a mekwere Əbay Mbulum a ka, ŋgulum zlìgwèmè ma da nda biye lepìrè.»

²⁶ Gà mburma ana tə tsaraka mifefile ŋgar ata ya ka, ta gwaɗar aaka: «Na kataya ana, weke a sle aà mimbile a i təv Mbulum a?»

²⁷ Yesuw a gwaɗa a tar aaka asa: «Dukw ana mawùràba ŋa i təv mburma ya ka, mawùràba ŋa tsa, na i təv Mbulum a.»

²⁸ I dəba ŋa ya, Piyer a gwaɗar aakaha tsara: «Araha, mər ka, maa miyak aba à gà dukw mər a tserdze, maa dara, maa zazam kər.»

²⁹ Yesuw a gwaɗa a tar aaka: «Haya kwaŋ, taŋa ka, lele. Ama i tsik a kurum a ka, nda ndzer kəla: Na wura aka miyak aba à gà ga ŋgar a, kige tsa à məkəs ŋgar a, bəla à gà damər ŋgar, nda gà bəla tsir ŋgar a, kige tsa asa, à gà ɓəza ŋgar a, agəra mekwere Əbay Mbulum a ka,

³⁰ a ŋget aɗəm a hinne, à zè a taŋa a miyak dər aba kinehe ya. Dite a ta ŋget a mesife ana à ndìv a tsa aà biybiy a, aka miɗ mbaŋa.»

Yesuw a ɗif à məməta ŋgar ana a hitsere a i biye ya, məmakər ŋa

³¹ Yesuw a daha, a ndzək gà ɓəzla mazazama ŋgat aaha kurwa gəra sula ya, kətsah a zlawak aà mburma ya. A daha, a gwaɗa a tar: «Tsarakum, araha, kwa ihər ki tèkwe a a Yeruzalem. Aləka, aka təv ana kàa ndzekwaha a fataya ka, dukw ana gà ɓəzla məma à guma Mbulum ta wetse akahər ata piŋŋe, ti tsik aà iye, *wur ana a dara i təv Mbulum a ka, a ta geye a ba.

³² Aɗaba ti ta vile a iye a ahər a gà slele ana i fata tə sər Mbulum tsiye. Ti sewle aà ìyeŋa, ti ndeveyiŋa, dite ti tif aà iye a tìzle.

³³ Ta gìzl a iye nda megwiymbiɗ hinne, dite ta kiɗ a iye kuɗa. Ama i huɗ mehinne makər a ka, i mbilere a i biye ya.»

³⁴ I fataya ka, gà ɓəzla mazazama ŋgat ata tàa tsaraka dukw ana a sasar aà metsike ya tsa. Aɗaba a ge aà tar ka, kamala makàhà ŋa i huɗ ŋa ya, dèrze ikəka.

Yesuw a mbəl à mala guluf duwa

³⁵ Aləka i təv ana Yesuw aka à mendze a kwite Yeriko ya ka, aka le aà wele duwa guluf ŋa, a riŋ mandza ŋa aà gùva vatwa, à ŋgèl a duwa.

³⁶ A tsaraka gà mburma ana ika vatwa ti de a ya ka, a wiz aà tar, a gwaɗa a tar: «Dukùla na taŋa ya?»

³⁷ Ta gwaɗar: «Yesuw ana a dara i Nazaret a, na a de a nda naha ya.»

³⁸ Mala guluf ata a tsaraka kataya ka, a wideye hinne nda magala. A gwa: «Yesuw, gwala Dawda, i ndzek are tsehe te tsiye? Zlak iye te.»

³⁹ Gà na tə lah a təv ŋgar ika miɗ Yesuw a ka, ta palar ahəm, ta gwaɗar: «Ndza ɗikɗik.» Ama wele ata ka, a tsaraka tsa, a səkah à Mewideye hinne nda magala ŋgəlakəkka ivaɗ asa. A gwa: «Gwala Dawda, i ndzek are tsehe te tsiye?»

⁴⁰ Yesuw a tsaraka mifefile ŋgar ata ka, a hitse dzeŋ, dite a gwaɗa a tar: «Gìswimiŋarra ahər a, ma dara a təv ga ya.» Tə daha, ta gə̀saraha ahər. A ndzeha a təv ŋgar ka, Yesuw a gwaɗar:

⁴¹ «I gek dze ana, dukùla na a sàsak a?» A gwaɗar aaka: «Əbay, a sèsiŋ ka, lèmbeɗiŋ are gà te.»

⁴² I dəba ŋa ya, Yesuw a gwaɗar: «Daba, are yak aka lə̀mbaɗaba. Megìse yak ana kì gis iye ya ka, aka mbəl à kər.»

⁴³ I dəba bazlam Yesuw ata a tsiker kataya ya tsara ka, wurat are ŋgar a hə̀ndə̀k ba. Dite a zazam Yesuw nda gà mazàmbàɗà aà Mbulum, tə dəɗ akaba tserdze. Gà mburma ana i fataya tekeɗe, ta ŋgat a dukw ata ka, tə zàmbaɗa à Mbulum mbaŋa.