Luka 10 - Bible Zulgo

Yesuw a slər gà ɓəzla mazazama ŋgat dzik təsəla gəra sula

¹ I dəba ŋa ya, BATSAH kwa ŋa a ndzək gà asiŋ gà mburma ŋgiɗ dzik təsəla gəra sula, a slər tar sula sula aka miɗ, a gà təv ana a sasar a de aɗəm a ya, ku mege a batsah kwite, ku mege a kəla ŋana tekeɗe.

² A gwaɗa a tar: «Gà dukw mezime a riŋ i bəɗ ka, ndzə̀ɗak ndzə̀ɗak hinne, na biy mipele ya. Ama gà ɓəzla məpala ŋa, aà mada dər a ma ka, ti sle tsa. Aɗaba taŋa, hamum a mala gùvàh, dite mà sə̀kàhara à gà ɓəzla meslire ŋgar a, aà mandzàkà ŋa a ma.

³ Ama kinehe ka, dum, i slir a kurum ana kà nwim kamala gà ɓəza təmaŋ, ndzəɗa kurum a riŋ tsa liɓèt liɓèt a. Ama ki dwim a kə̀la ka, a liwiŋ gà mburma ana ti ne kamala də̀var a.

⁴ Ka tə zlum dər siŋgwe aà ahər tsa, ku mege kìywa, nda gà tsàpà kurum tekeɗe ka, ka tə zlum dər tsa. Ka ta mətsum aà vatwa aà mege wusa a mburma tsa asa.

⁵ Na kàa ndzwim a bəra wur a ka, ki gweɗwim a a mala ga ata: dite ki dwim a a ga a ma ŋgar.

⁶ Na wura a riŋ i ga ata, a waya bazlam kurum ata ka, mandza zayzay kurum ata a ndze a nda ŋgat lele. Na kataya tsəka, mipìsè ahəm kurum ata ki mwim a dər.

⁷ Na bəla wura a waya kurum i fata ka, ndzum i ga ata, zəmum dukw ana tàa vəl a kurum a, ka sum dukw ana tàa tə̀f a kurum a mbaŋa. Aɗaba mala megemir ka, a sle a aà maŋgata dukw maya ba ŋgar mbaŋa. Ka tə dum aà ga aà ga tsa kəla.

⁸ Na kàa ndzwim a kwite ana gà mburma tàa gəs kurum lele ya ka, zəmum dukw ana ta vile a kurum a ya fit dze.

⁹ Mbalum à gà ɓəzla dukw məməta ana i kwite ata ya. Gwaɗum a gà mburma ana i fataya ka: <*Mekwere Mbulum aka à mendzera a təv kurum a.>

¹⁰ Ama kàa ndzwim a kwite ana ta waya kurum tsiye ka, dum, hitswim aka bàrama, kù gwaɗum a tar:

¹¹

¹² Iye ihər i gweɗe a kurum a nda ndzer, pàrsa iɗəm tsa: Gà na tàa gəs bazlam kurum ata tsiye ka, mesewere are ana Mbulum a ta vile a ter a a pat seriye ya ka, biy gà Suduma duwa i təv a tsa.»

Mesewere are gà kwite ana ta gəs Yesuw nda gəzləŋ tsiye

¹³ Yesuw a gwaɗa a tar asa: «A kurum ana i kwite Kurazin a, waya ba kurum a. Dite a kurum ana i kwite Betsayida ya, waya ba kurum a asa. Aɗaba gà dukw mene aà mburma ana i geye i kwite kurum a, mege i geye ka, i gà kwite Tirus, nda Sidun ka, ana ka, ti dzele a ba tar daga piŋŋe. Ti tiwiŋa, tì dzèye akaba a gà makwàtsak bùhwa, dite ti ndèye akaba a à bitekwe aà məpàtà dər ka, a sàs a tar məmbə̀ɗà à gəzləŋ tar a.

¹⁴ Aɗaba taŋa, a pat seriye Mbulum ka, mesewere are ŋa i kurum a ta ge a ka, ŋgulum biy gà mburma ata i gà kwite Tirus, nda Sidun a.

¹⁵ Dite a kurum ana i kwite Kafarnahum a, kurum ana ki gwim a aba zlapa ya, kù gwaɗum i kurum ana, Mbulum a ti dzik a kurum aà gəza mbulum pam a? Awaŋ, tì lìm a kurum a a təv mendze gà məməta ivaɗ.»

¹⁶ Aləka i dəba ŋa ya, Yesuw a gwaɗa a gà ɓəzla mazazama ŋgat ata asa: «Wur ana aka dza zləm a bazlam kurum a ka, a dza zləm taŋa ka, a biy gà. Dite wur ana aka niw bazlam kurum a ka, a niw taŋa ka, biy gà mbaŋa. Ama ka, biy gà ɗekɗek tsa. A niw ka, biy wele ana a slərra iye ya mbaŋa asa.»

Gà mburma ata dzik təsəla gəra sula ya, ta mbəɗara gər a bəra ya

¹⁷ Gà mburma ata ndeɗiŋa Yesuw a slər tar dzik təsəla gəra sula ya, ta mbəɗaha gər a təv ŋgar nda gà maŋgayaba. Tə daha, ta gwaɗar: «Batsah mər ŋa, ku mege gà sitene tekeɗe, tàa gəs ahəm mər i təv ana mì dalawa tar nda zləm yak a.»

¹⁸ Yesuw a tsaraka kataya ka, a gwaɗa a tar: «Kaɗəŋ, Yàa ŋgat a Əbay sitene aka dəɗara i mbulum a tiɗèy gər melek, kamala mewìtìɗè mbulum ana à wìtiɗera i gər ŋa ya, tsikw ara a bəɗ a.

¹⁹ Kinehe ka, Yàa vəl a kurum ndzəɗa aà məɓàlà aka gà mesiwiɗ, nda gà hìrde, dite Yàa vəl a kurum ndzəɗa aà makwàrà mala mene are kurum tserdze mbaŋa, duwa a riŋ a ge a kurum a duwa tsidze.

²⁰ Ama ka ta ŋgayum ba agəra ana gà sitene tàa gəs aà kurum ahəm a ɗekɗek tsa. Say ŋgeywim ba ka, agəra ana gà zləm kurum mewetse ŋa i təv Mbulum a ivaɗ.»

Yesuw a ŋgaya ba

²¹ Aləka i dəba bazlam ata ya tsara ka, Mezite Mesife Mbulum a rah a ba a Yesuw nda maŋgayaba hinne. A hama a Mbulum, a gwaɗar: «A kər Tsir ga, kər ana ki kwere a gà gəza mbulum nda gər ahəɗ a. Iye ihər i gek a kəkaaha, aɗaba kər ka, kàa kaha duwa aà gà ɓəzla metsehe ya, nda gà na tə sər duwa hinne ya. Ama kinehe ka, kər ihər ki ɗif a dər a gà na tə sər duwa tsiye. Kataya Tsir gà, lele na ki ge a taŋa ya. Taŋa ka, kamala ana a sàsabak nda gər yak a.»

²² Dite a gwaɗa a gà mburma ana a riŋ mayahaba gər ŋa i təv ŋgar a: «Ama Tsir gà aka dziŋ gà dukw a ahər tserdze. Wura a riŋ na a sər ka, weke na Kəla Mbulum a tsa, say Tsir ŋa, dite wura a riŋ na a sər ka, weke na Tsir ŋa ya tsa asa, say Kəla ŋgar ata, nda gà mburma ana Kəla ŋgar ata a sasar meɗife a tar dər tserdze ya.»

²³ Dite Yesuw a mbəɗ aba a təv gà ɓəzla mazazama ŋgat, a gwaɗa a tar: «Ŋgayum ba, aɗaba dukw ana kə̀ ŋgatumar, a ge ba i təv kurum kinehe ya.

²⁴ Aɗaba iye ihər i gweɗe a kurum ŋa: Akahər ata ka, gà ɓəzla məma à guma Mbulum hinne nda gà Əbay, tàa yaha vatwa aà maŋgata a dukw ana kurum ihər ki ŋgetwimer a ya, ama ka, tàa ŋgatar tsa. A sàs a tar matsaraka dukw ana kurum ihər ki tserekwim a kinehe ya, ama tar ka, tàa tsaraka ɓav tsa asa.»

Bazlam minew Samariya duwa a ge ŋgwal ŋa

²⁵ I dəba ŋa ya, mala medzeŋge məpala ahəm Mbulum duwa a sasar magəsa Yesuw a gedzewe. A gwaɗar: «Əbay, i ge a dze ana, meme, na dite i ŋget a mesife ana à ndìv a tsa aà biybiy a?»

²⁶ Yesuw a gwaɗar aaka: «Dukùla na a riŋ mewetse ŋa i məpala ahəm Mbulum a? Kà tsaraka i yak ana, meme, na i təv ana kà dzeŋge ya?»

²⁷ Wele ata a gwaɗar aaka: «I tsaraka ka, say «*fb*

²⁸ Yesuw a tsaraka kataya ka, a gwaɗar: «Kàa sər lele, ge kataya, dite ki ŋget a mesife ana à ndìv a tsiye.»

²⁹ Ama mala medzeŋge məpala ahəm Mbulum ata a sasar ka, mene à ba ŋgar mala ndzer ŋa. A tsam biy ŋgiɗ aà Yesuw asa, a gwaɗar: «I weye a mburma dze ana, gà weke?»

³⁰ Yesuw a gwaɗar: «Wele duwa, ŋgat gà Yahuda, a dara i Yeruzalem a, a de a a Yeriko. I təv ana a riŋ a de a ya ka, tə lə̀ma nda gà ɓəzla akəl. Tə daha, urup ùrùp urup urup tə ndabaya aaka, tə surwat ikəka gà petek a. Dite ta gə̀zl ŋgat ŋa lehhè məməta məməta. Ta məsak à ŋgat a fata gùzlàɓ, tə daba.

³¹ Zàkwayiya ka, mala mandəva kuɗa a Mbulum duwa aka daha ndaka vatwa ata te. A ŋgat a wele ata gùzlàɓɓa i bəɗ ka, a sìrìkar vatwa diriŋ, a da ndaà gùva bàrama ŋgiɗ.

³² Zàmma tsəka, mìsle ŋgiɗ ilik gà gwala Levi duwa aka daha nda taŋa mbaŋa. A ŋgat a wele ata ka, a lèlìkw tsìfè tsìfè, a daba nda tsèke ŋgiɗ asa mbaŋa.

³³ I dəba ŋa ya, Samariya duwa a de a a təv ŋa nda gà hezweŋe. Aka daha nda taŋa mbaŋa asa. A ŋgataha a wele ata ka, a ndzer are tsehe hinne.

³⁴ Dzeŋ a hitse, a sìrìkaha a təv ŋgar. A daha, a barar ika mbəlak a nda meɗwìtsè mawà dukw duwa makwàsà ŋa. A bàhar aaka mal, dite a danar ahər nda petek. I dəba ŋa ya, a zla ŋgat aka hezweŋe ŋgar. A da à ŋgat a ga ana tə dzawuwa iɗəm à dukw mezime, dite ta hənawa iɗəm asa ya. A daha, a ger gər lele.

³⁵ Aləka ndidwe ŋana, aka təv ana à meh a ba ya ka, a ndzək kur siŋgwe sula, a dza a mala ga ata. A gwaɗar: «

³⁶ I fataya ka, Yesuw a gwaɗa a wele aaha a tsam ahər bazlam a: «Kinehe, kər ka dzala ana, weke na a waya mburma i liwiŋ gà mburma ata makər a, a zlak wele ata ta gə̀zl a?»

³⁷ Mala mandəva kuɗa a Mbulum ata a gwaɗar: «I dzala ka, wele ana a ger ŋgwal ŋa ya.» Yesuw a gwaɗar: «Yawwa, kər tekeɗe, daha, ge kamala taŋa ya mbaŋa.»

Yesuw i bəra ga Marta nda Mariya

³⁸ Aləka i dəba ŋa ya, gà Yesuw nda gà ɓəzla mazazama ŋgat, ta mah ba i fataya, ti de a a kwite duwa. I təv ana ti ndzeha a fataya ka, tàa le aà məkəs duwa, tə zalar Marta. Məkəs ata a zal a tar a ma ŋgar. A daha, a ge a tar gər lele.

³⁹ I təv ata tə daha ya ka, ti leha aà damər Marta a riŋ, tə zalar Mariya. Dəm ata a daha, a ndza a bəɗ aà sik Yesuw. A dza zləm a dukw ana a tsik a ya.

⁴⁰ Ama Marta ka, ŋgat a riŋ nda gà megemir i zlaŋgwaɗ hinne. A dara a təv Yesuw a, a gwaɗar: «Batsah ga ŋa, i zlaŋa kər te tsiye, na damər gà aaha a miyekiŋ a à mege megemir aaha fit à gər gà ilik a? Gwaɗar, ma dara, mà zlak iye te.»

⁴¹ Əbay Yesuw a gwaɗar aaka: «Marta, Marta, kər ka, ki wisebe a à gər nda megemir hinne.

⁴² Ama ka, dukw ilik aka mətsa. Mariya ka, aka zla iɗəm dukw ata ŋgwal ŋa lele, wura a sle aà mezle ihər a tsiye.»