GALATIYA 6 - Bible Zulgo

Zlàkayakwa ba aà mazla mibe dukw ana a be hinne ya

¹ Gà damər gà, na kàa fə̀rum mìsle ŋgiɗ a riŋ a ge a bakal ka, taŋa kurum ana kàa ŋgatum Mezite Mesife Mbulum a ka, zlakum ŋgat, dite mə̀ màra aka vatwa ŋgwal ŋana ya. Ama kə̀la ka, gwim nda mawàyà ba lele. Dite ku weke mege metsehe a gər ŋgar mbaŋa, na dite à dìɗ a a bakal ŋgar ata tsiye.

² Zlàkayum ba nda təv dukw ana mibe ŋa ika magər kurum a ilik ilik tserdze. Na kàa gwim kamala taŋa ya ka, taŋa ka, kàa gəsum ahəm aà məpala ahəm *Kiristi kaɗəŋ.

³ Na wura aka fə̀r aà ba ŋgar kamala ana ŋgat batsah ŋa ya, ama tsaatsa ka, mburma taf masakəŋa, a sle a aà duwa tsa, taŋa ka, a riŋ a bene a ba ŋgar ivaɗ.

⁴ Say ku weke ma zlaŋa mede ŋgar ana a de a ya. Mà samata ka, wànà ŋgwal ŋa ya, tsəna, ŋgwal ŋa tsiye ya? Na bəla aka samata ŋgwal ŋa ka, a ŋgeye a ba hinne, agəra megemir ŋgar ana a ge a nda ahər ŋgar a, tsəka, a da dər tsa na a ge aaba a zlapa ka, nda megemir mìsle ŋgiɗ a.

⁵ Aɗaba ku mege weke, a ti tsik a megemir ŋgar ana a gewa ya ka, ika miɗ Mbulum mba.

⁶ Wele ana a dza zləm aà medzeŋge bazlam Mbulum a ka, tə̀ dza ba dukw ana a ŋgat a nda wele ana a ɗifer à bazlam Mbulum ata ya.

⁷ Ka banum ba kurum tsa, aɗaba wura a riŋ ilik a we a ahəm nda Mbulum tsidze. Aɗaba dukw ana mburma a slige a ya ka, say dukw ata mbaŋa na a mère a à ba ŋgar, ti ta pele a i bəɗ a.

⁸ Na bəla wura a ge a ka, dukw ana a tsahən aà ba ŋgar a ɗekɗek ka, nuba ŋgar ana a ta ŋget a iɗəm a ka, məməta pəra. Ama na bəla a ge a megemir nda təv Mezite Mesife Mbulum ivaɗ ka, taŋa ka, a ŋget a nuba mesife ana à ndìv a tsa aà biybiy a, i ahər Mezite Mesife ata ya.

⁹ Aɗaba taŋa, tàkwa aka miɗ aka miɗ nda mege dukw ana ŋgwal ŋa ya, ka ti yàkwa ba tsidze. Aɗaba na kàa yàkwa ba tsəka, aləka a təv məpàslà ahər Mbulum ana a tsik a ka, ki ta ŋgetekewe a dukw ana ŋgwal ŋa ya lele, kamala wele ana a pele a dukw ŋgar i bəɗ a ka, sik sik sik ŋgwal ŋa ya.

¹⁰ Aɗaba taŋa, daga aà kinehe ya, na vatwa a riŋ ka, gekwa ŋgwal a gà mburma tserdze. Ndeyndey ŋana ka, a gà na ta gəs Yesuw Kiristi nda gəzləŋ a mbaŋa.

Mandəvandəv bazlam nda mege wusa

¹¹ Kinehe ka, fə̀rum aà gà batsah alfebet ana gùràslə̀slə̀sla, iye ihər i wetse a kurumehe a nda ahər gà ŋa ya kuɗa.

¹² Na a gwaɗa a kurum, say ki seswim a ba kurum a ka, gà na ta waya, dite tə da a gər a gà mburma tserdze ya. Ta ge a dər kataya ka, na dite gà Yahuda ti sèwèr a ter a are asa tsiye. Aɗaba na bəla ti ndiɗik a gər aà metsìkè bazlam məməta *Kiristi ana a sèwèr are, a mət aà dizl magə̀làwà ŋa ya ka, ana ka, ta miyek a à tar tsa.

¹³ Ama gà mburma ata ta waya masàsà ba hinne ya tekeɗe, tar ŋa ka, ti tike gər a məpala ahəm gà Yahuda tèrihhwè ɓav tsa. Ama a sàs a tar ki seswim a ba kurum ka, na dite ti sìŋgìr a à ba tar aɗaba kurum a.

¹⁴ Iye ka, i ge a zlapa ti tsidze, say i ge a ka, nda məməta Yesuw Kiristi BATSAH kwa ŋana a mət aà dizl magə̀làwà ŋa ata ya ɗekɗek pəra. Aɗaba məməta ŋgar ata ka, dukw gər ahəɗ a ne taf masakəŋa na aà are gà ya. Ar ka, kamala ana tə ndwandway gà dukw ata aà dizl magə̀làwà ŋa ya mbaŋa. Iye tekeɗe ka, i ne kamala wur ana, a mət ahər a fata ka, dite a miyak à dukw gər ahəɗ a mbaŋa.

¹⁵ Aɗaba na wura masàsà ŋa, kige tsa bəla masàsà ŋa tsəka, a tsik a duwa tsa. Na ge a ŋgulum ka, say na ki nekwe a gà mburma ana tàa ŋgat mesife awiya ŋa i təv Mbulum a ya.

¹⁶ Gà mburma ana ti zezem a vatwa awiya ŋa ata ya ka, tar na ti ne gà mburma Mbulum gà Isərayel gà ndzer ŋana ya. Ti ndzer are tsehe, mə vəl a tar matasla yam a gəzləŋ zayya lele.

¹⁷ Daga aà kinehe ya ka, wura ma ta wisiŋ à gər asa tsa. Aɗaba Yàa ne mburma Yesuw na i təv mesewere are ya. Girɗe megìzle ana aà iye ya, na a ɗif dər a.

¹⁸ Gà damər gà, i heme a a Yesuw Kiristi BATSAH kwa ŋa, dite ma ge a kurum ŋgwal ŋa. *Amin.