GALATIYA 5 - Bible Zulgo

Kà nwim gà ɓele məpala ahəm gà Yahuda asa tsa

¹ *Kiristi ka, aka be à kwa i məpala ahəm gà Yahuda ya, na dite araha kinehe ki ziwekwe a gər kwa ya. Aɗaba taŋa, mərum aba aà mendze kamala taŋa ya. Wura ilik ma ti ne à kurum gà ɓele asa tsidze.

² Iye Pul, iye ihər i gweɗe a kurum ŋa: Na a sàs a kurum, tə sàs ba kurum ka, taŋa dukw ana Kiristi a ge aɗaba kurum a, a ge a kurum a ŋgulum asa tsidze.

³ Iye ihər i gweɗe a kurum a asa: Ku mege weke na aka sàs ba ka, say a zezem a gà məpala ahəm fit dze, ilik a ze a dərraha tsa.

⁴ A kurum gà mburma ana kù gwaɗum ka, Mbulum a ne à mər a gà ŋgwal ŋa ika miɗ ŋgar, agəra ana mìi zezem a məpala ahəm gà Yahuda ya ka, taŋa kurum nda gà Kiristi ka, zàmtàkàlla kàa zùm aba, kurum mandza ŋa i təv ilik ŋa asa tsa. Kàa mbəɗum dəba a ŋgwal dukw ana Mbulum a ge a kurum a.

⁵ Ama mər ka, mì tike madzala gà gər mər a təv Mbulum. Ŋgat na a ne à mər a gà ŋgwal ŋa ika miɗ ŋgar a, agəra megìse ana mì gəs Kiristi nda gəzləŋ a. Taŋa na kinehe mər ihər mìi veve a pat ana mìi be a aà seriye ya, nda ndzəɗa Mezite Mesife ŋgar a.

⁶ Na wura a riŋ aka gaw ba nda Kiristi ka, bəla ŋgat masàsà ŋa, kige tsa bəla masàsà ŋa tsa tekeɗe ka, a ge a ŋgulum tsa. Dukw ana a ge ŋgulum a ka, say megìse kwa ana kə̀ gə̀sakwa ŋgat nda gəzləŋ a. Dite megìse ata na a vile a kwe a ndzəɗa aà mawàyà gà mburma tserdze ya mbaŋa.

⁷ Malahalah ŋa ka, kurum ihər ki dwim a aka miɗ aka miɗ nda mege gà dukw ana ŋgwal ŋa ya dze ana, weke na a pala a kurum ahəm aà mazazama gà dukw ata ndzer ŋa ya ya?

⁸ Wele ana a bana kurum, a sasar ki gwim a kataya ya ka, taŋa ka, a dara i təv Mbulum ana a zal a kurum a tsa.

⁹ Dukw ana gà mburma ti tsikewa ya ka, mə̀ məts a kurum gər tsa. Ta gwa: «Giɗe ana a kwasawa à duwa ya, ku mege tə ndà aaka kwizikw tekeɗe ka, a kwese a dər hinne.»

¹⁰ I sər ndzer, kà wayum bazlam gà, ki dzelwim a metsehe ŋgiɗ pam tsa, aɗaba ana kwa mandza ŋa nda gà Yesuw Kiristi BATSAH kwa ŋa ya. Ama wele ana a riŋ a wise a kurum a à gər a ka, ku mege weke tekeɗe, seriye Mbulum ika gər ŋgar.

¹¹ Gà damər gà, iye ka, na mege i ɗif a à bazlam Mbulum hiywe, nda metsìkè a mburma, sasayum ba, na dite Mbulum a ne à kurum a gà ŋgwal ŋa ika miɗ ŋgar a ka, ana ka, gà Yahuda ti sèwèriŋ a are tsidze, dite bazlam mandwàndwàyà Kiristi ana tə ndwandway aà dizl magə̀làwà ŋa ya tekeɗe ka, a tsìɓ a ter a tsa asa mbaŋa. Ama ka, i tsikewa kataya tsa.

¹² Gà mburma ata tə dzala ka, aka gər masàsàyà ba tar ɗekɗek, dite ta wise a kurum a dər à gər a ka, ŋgulum tə sasaya ba tar məndəɗ məndəɗ fit fayawaŋwaŋ.

¹³ Gà damər gà, Mbulum a zal a kurum ka, dite ki ndzwim a nda mezìwè gà gər kurum, kàa beywim à məpala ahəm Musa ya. Na ki ziwim a gər kurum kamala taŋa ya ka, ka ta gwaɗum, mìi gewe a dukw ana ba mər a waya pəra ɓav tsa. Seyiŋ tsa, wayum ba ika magər kurum ilik ilik tserdze, dite ki geywim ba meslire ika magər kurum tserdze asa mbaŋa.

¹⁴ Aɗaba dukw ana batsah ŋa i huɗ gà məpala ahəm tserdze ya ka, araha: «Waya mburma tserdze, ku mege weke, kamala ana kà waya ba yak a mbaŋa.»*fa*

¹⁵ Ama na bəla ki geywim be a swalwa kamala gà dukw dala ana gà ŋgwala tsa, hə̀ràsə̀sa ta ŋgeleye a ba tar ŋa, kige tsa ta pepeɗe a ba ya ka, gwim metsehe lele, tsəka, ki ti dzeywimiŋa.

Mezite Mesife Mbulum nda dukw ana mburma a dzele a i gəzləŋ ŋgar a

¹⁶ Dukw ana a sèsiŋ i gweɗe a kurum a ya ka, araha: Vəlum vatwa a Mezite Mesife Mbulum, dite ka, ma ɗif a kurum à vatwa. Kamala taŋa ya, ka tə zazamum mege dukw ana ba kurum a waya ya asa tsa.

¹⁷ Dukw ana meèweke ba mburma a waya mege ya ka, tar pampam nda dukw ana Mezite Mesife Mbulum a waya ki gekwe a ya. Mezite Mesife Mbulum ibam ka, a sasar dukw ana meèweke ba mburma a waya a ge a ya tsa mbaŋa. Gà dukw ata sula ya ka, tar riŋ ndzìzlzle ti nebe a are, ta geye aaba a gùvəl. Aɗaba taŋa na ka slwim aà mege dukw ana a sàs a kurum ki gwim a zləmana nda ndzer ŋa ya tsiye.

¹⁸ Ama na bəla Mezite Mesife Mbulum na a lèh a kurum a aka miɗ a ka, taŋa ka, məpala ahəm Musa à fə̀r aka kurum a ndzəɗa asa tsa.

¹⁹ Kà sərakwa tserdze, na dukw ana meèweke ba kurum a waya a ge a ya. Gà dukuməŋa ka: Mege mezelme nda təv muva, nda mege dukw hwarwa ana pampam a, nda mayaha gà məkəs ana tsilikw tsilikw a.

²⁰ Dite nda mazàmbàɗà à dukw ana ta ge nda ahər tar, ti ne dər Mbulum tar a. Nda gà dukw gà mèdè ana ta ge a pampam a. Nda mene a ba are, nda maàga, dite nda mege are aka mburma, nda mege matsəɓatsəɓ ana tərfə̀ɗ tərfə̀ɗ nda təv gà mìsle ŋgiɗ a, nda gà ti dzele a ka, ba tar ɗekɗek, ti ndzek a iba mburma ya təv pampam, nda gà mandza akaba ahəm ana a riŋ i təv tar tsidze ya.

²¹ Izittè ta ge a are aka dukw mburma, ta kweye a à guzum, ta gìrìv a dər hinne, zlarndaɗndaɗ ti zimeye ka, gà dukw ana ŋgwal ŋa ya, dite nda megeye gà medzibe gà duwa ŋgiɗ pampam asa kamala taŋa ya. Dukw ana i tsik a kurum piŋŋe ya ka, kinehe i me a aka metsìkè a kurum asa, i gwaɗa a kurum: Medzìbe gà mburma ana ta gewa gà dukw ata kamala taŋa ya ka, ti ta ŋget a təv mendze i *mekwere Mbulum ana a ta kwere a ya kwizikw tsidze.

²² Ama megemir Mezite Mesife Mbulum ka, pam. Ar ka, kamala dizl ɗaf ana a we a dukw ŋgwal ŋa ya. Gà dukw ata ka, mawàyà ba ana gà mburma ta weye a ba ya. Maŋgayaba, nda matasla yam ana i gəzləŋ tar a. Ta gis a gəzləŋ i təv gà dukw ŋgiɗ a pampam. Ta gis a mburma lele, ta ge a ter a ka, dukw ana ŋgwal ŋa ya. Tar ka, gà mburma ana gà ndzer ŋa ya.

²³ Tar gà ɓəzla mahə̀nà à gər a bəɗ, ta kwere a ba tar lele. Gà na ta ge a kamala taŋa ya ka, seriye Mbulum à gis a tar tsidze.

²⁴ Aɗaba gà mburma ana tar gà biy *Kiristi ya ka, ti niw gà dukw ana ŋgwal ŋa tsa, meèweke ba tar a waya ya. Ar ka, kamala ana tə ndwandway gà dukw ata aà dizl magə̀làwà ŋa ya.

²⁵ Mezite Mesife Mbulum na a vəl a kwa mesife ya. Aɗaba taŋa, say ŋgat na a kwere a kwa ya.

²⁶ Kà sə̀ŋgə̀rakwa à ba kwa tsa, dite ka tikekwa akaba matsəɓatsəɓ tsa, ki gekwa akaba are tsa asa mbaŋa.