2 Piyer 3 - Bible Zulgo

Mimèra Yesuw Kiristi ana à mère a ya

¹ Gà masla gà ana i waya kurum hinne ya. Araha naha ka, wakita masula ŋa ana i wetse a kurumaha ya. I huɗ gà wakita ata sula ya ka, a sèsiŋ məma a kurumaha a gər ka, à gà dukw ana kàa mbər mesirwim a, na dite ki dzelwim aaka gà gər lele asa ya.

² I wetse bazlam ata ka, a sèsiŋ dukw ana gà ɓəzla məma à guma Mbulum ti tsik akahər ata ya ka, mə̀ məts a kurum gər tsa. Gà biy ŋgiɗ tsa dukw ana Yesuw Kiristi BATSAH kwa ŋana mala məmbə̀là à kwa a tsik a kurum a ka, mə̀ məts a kurum gər tsa, mə̀ mà a kurumara a gər a asa. A tsik a kurum bazlam ata ka, nda ahər gà ɓəzla meslire ŋgar ana a sləraha tar a təv kurum a.

³ Dukw ana i tsik a kurumaha malahalah ŋa ya ka, wur bazlam. Sərum dər lele, mə̀ məts a kurum gər tsa asa: I təv ana gər ahəɗ à ndìv a ya ka, gà asiŋ gà mburma ana ti zezem a gà dukw meèweke ba tar ɗekɗek a ka, ti dere a, ti sewle aà kurum ŋa.

⁴ Ta gweɗe a kurum a: «Aàla na Yesuw Kiristi a gwa, i mère a ka, aka màra kamala ana a tsik a tsiye? Araha, gà tsir mər tàa mata ka, ŋgat aka màra tsəna, meme? Aɗaba dukw ana ika gər ahəɗ tserdze ya ka, hiywe, kamala ana piŋŋe akahər ana Mbulum a ge ya dukw ŋgar, haa kinehe duwa aka mbəɗ ilik tsidze ana, aàla?»

⁵ Gà mburma ata ti tsik bazlam ata kataya ya ka, a sàs a tar masəra dukw ana akahər ata Mbulum a ge ya tsa. Kamala megweɗe ya: Mbulum a ge gəza mbulum nda gər ahəɗ ka, nda bazlam ŋgar ata a tsik a. A lah mege gər ahəɗ ka, nda yam. Dite a vəl a ba vatwa a gà yam nda ahəɗ pampam kuɗa.

⁶ Nda yam ata asa mbaŋa na siyèkw Mbulum a dzeye à gər ahəɗ akahər ata ya. Yam ata ka, batsah yam ana a rah aka gər ahəɗ fèɗìɗe, mburma ta mata aɗəm a.

⁷ Ama gər ahəɗ nda gəza mbulum ana kinehe ya ka, ti ndze a ɓav tsa. Tits a təv ana Mbulum a tsik a ka, a wene a nda akwa hilɓèk hilɓèk kuɗa. Aɗaba kinehe ka, Mbulum a waya mandza zaakwa tə̀ma, haa a pat ana a ta ge a seriye a gà mburma tserdze, a bets a iɗəm gà na ta gəs ahəm ŋgar tsiye ya.

⁸ A kurum gà masla gà ana i waya kurum hinne ya. Duwa ilik ma ta məts a kurum gər, kù gwaɗum ka, gà pat ilik nda mive dəbuw ka, tə za ba làŋa diriŋ a tsa, na ika miɗ Mbulum a. Aɗaba tar ka, ilik.

⁹ Gà asiŋ gà mburma ŋgiɗ ihər ta gweɗe a: «Mbulum ka, mala mèhìnèkw, a dere a bise tsa, aɗaba dukw ana a tsik i sida ya, a gwa, i ge a ya ka, a ge a ba bise tsa ana, meme?» Ama ka, kataya tsa, a riŋ a ge a mba dukw ŋgar. A veve a ka, kurum seyiŋ ivaɗ. Aɗaba a sasar ka, a ze a kurumaha aà mendze kataya ka, ki mbiɗwim a à madzala gà gər kurum, wura ilik ma dzeye tsa. A waya mburma tserdze ta mbəɗ à gəzləŋ tar, ta miyak à bakal tar ivaɗ.

¹⁰ Ku mege kataya tekeɗe, pat ŋa aka ndze aɗəm ka, Yesuw Kiristi BATSAH kwa ŋa à mère a ndzer, pàrsa iɗəm tsa. A mère a kəla ka, kamala mala akəl ana sèrèh a dere a ka, wura a sir ahər a tsiye. A pat ata ka, gà mburma ti tsereke a meɗè gà dukw ana a ɗe a ŋgùzlàr ŋgùzlar kamala malaka mbulum a, na gəza mbulum à ndìv a ya. Akwa a wene a gà dukw ata tserdze gà madzàvà ŋa aà gəza mbulum a, sirikw sirikw. Dite gà ahəɗ nda gà dukw ana ikəka tserdze ya tekeɗe ka, ndìrɓek ndìrɓek a weniŋa.

¹¹ Na gà dukw ata tserdze ya, tì ndìv a kataya ka, gwim metsehe lele na i təv mendze kurum ana ki ndzwim a ya. Ama say ki ndzwim a ka, tsəɗaŋŋa lele. Zazamum nda gəzləŋ kurum ilik. Gəsum ahər ahəm nda təv gà duwa tserdze.

¹² Vavum pat ana Mbulum à mère a ya, kəla pat. Gwim mege megemir ŋgar tserdze lele, na dite à mère a bise ya. A pat ata ka, gəza mbulum a wene a sirikw sirikw, fit a nisiŋa. Dite mawusawus ana gà madzàvà ŋa aà gəza mbulum a ka, wàfùfùfùffa ta wilezliŋa, a tèkwe a, duwa ilik a zehe a tsidze.

¹³ Ama ka, Mbulum a tsik i sida ya, a gwa: «I ge a gəza mbulum awiya ŋa, nda gər ahəɗ awiya ŋa asa mbaŋa.» Na a ndze a i fata ka, gà na ta ge a dukw ana ŋgwal ŋa ndzer a ɗekɗek. Taŋa na dukw ana ki sirwim a dər ka, a dere a ndzer, ki vevekwe a ya.

¹⁴ Aɗaba taŋa, a kurum gà masla gà ana i waya kurum hinne ya. I tsik a kurum a ka, a kurum ana kurum riŋ ihər i vevwim a pat ana Yesuw Kiristi à mère a ya ka: Mərum aba nda ndzəɗa kurum fit dze, na dite mendze kurum ana ika miɗ Mbulum a ge a ŋgwal ŋa, ələk a fata ka, bakal a ge a i təv kurum tsidze ya. Sərum ba nda gà ŋgat i gəzləŋ kurum zayzay lele.

¹⁵ Sərum dər ka, Yesuw Kiristi BATSAH kwa ŋa à mère a bise tsəka, aɗaba aka vəl a kwa vatwa ana a sasar ki mbìɗekwe a à gəzləŋ kwa, dite a mbele a à kwa ya. Pul, damər kwa ana kà waya kwa ŋgat hinne ya tekeɗe ka, aka dzeŋge a kurum dukw ata i huɗ wakita ŋgar a mbaŋa kaɗəŋ. A tsik ka, nda metsehe ana Mbulum a vəlar a.

¹⁶ A tsikewa taŋa ka, kəla pat na a wetse aka gər gà dukw ata i huɗ gà wakita ŋgar a. Ama kəla ka, dukw ŋgiɗ a riŋ i huɗ gà wakita ŋgar ata ka, mawùràba ŋa, a tsereke a ba bise tsa. Gà mburma ata tə səraha duwa tsa, gəzləŋ tar a ndze a wèkit wèkit a ka, ta mbìɗ a à dukw ana bazlam ata a sasar aà megweɗe ya. Ti dzev aaka a ka, wìrɗìɗìɗe nda pàrsa. Ta ge a dər ka, kamala ana ta gewa à gà asiŋ gà bazlam ana i wakita Mbulum a mbaŋa. Kamala taŋa ya, tar ka, ta bets a ba tar nda ahər tar ŋa.

¹⁷ Ama ka, a kurum gà masla gà ana i waya kurum hinne ya: Yàa tsik a kurum aba ya. Aɗaba taŋa, gwim metsehe lele, tsəka, gà mburma ata ta gəs ahəm aà Mbulum tsiye ka, ta bene a kurum aà mazazama dukw bakal tar ata, dite ka, ka miyakum à təv mendze kurum ana ŋgwal ŋa, a ɓezle a tsiye.

¹⁸ Ama kurum ivaɗ ka, dum aka miɗ nda mazazama Yesuw Kiristi BATSAH kwa ŋana ŋgat mala məmbə̀là à kwa ya, na dite a ge a kurum a ŋgwal ŋa nda mesire kurum ana ki sirwim a ŋgat a ka, à sìkèh a aka miɗ aka miɗ bə̀ba ŋa. Mezlibe ŋgar ana gà mburma tì zlibe a à ŋgat a ka, tə̀ zlə̀b dər daga aà kinehe ya, haa aà biybiy. *Amin.